lakbima.lk

පාර්ලිමේන්තුව විසුරුවා හැරීමට බලපෑ හේතු පැහැදිලි කරමින් ජනපතිවරයා ගිය සති අන්තයේ විශේෂ ප්‍රකාශයක් කළේය.  නොවැම්බර් දාහතරවැනිදා පාර්ලිමේන්තුව රැස්වන අවස්ථාවේදී විශාල ගැටුමක් ඇතිවන බවත්, ඇතැම්විට කිහිපදෙනෙකුගේ මරණය පවා සිදු විය හැකි බවත් ඇතැමුන් ප්‍රකාශ කළ බවත් ජනපතිවරයා පාර්ලිමේන්තුව විසුරුවා හැරීමට හේතු පැහැදිලි කළ කතාවේදී කීවේය.

ජනපතිවරයා පමණක් නොව ඇතැම් මැති ඇමැතිවරුන් පවා අනාවැකි කීවේ දාහතරවැනිදා පාර්ලිමේන්තුවේදී දෙපාර්ශ්වයේ මන්ත්‍රීවරු ගහගෙන, මන්ත්‍රීවරයකු මරණයට පත්විය හැකි බවය. එනමුත් එවැනි බරපතළ තත්ත්වයක් පාර්ලිමේන්තුවේදී ඉකුත් දාහතරවැනිදා උද්ගත වූයේ නැත.

කෙසේ නමුදු ලංකා දේශපාලන ඉතිහාසය හාරා ඇවිස්සීමේදී හෙළිවන කාරණාවක් වන්නේ මින් පෙර මැති සභා පරිශ්‍රයේදී මන්ත්‍රීවරුන් තිදෙනෙකු මරණයට පත් වී ඇති බවය. ඉන් එක මරණයක් සිද්ධ වූයේ මැති සබය තුළදීමය. අනෙක් මන්ත්‍රීන් දෙන්නා මරණයට පත්වූයේ මැති සබ පරිශ්‍රයේදීය.

මේ තිදෙනා අතරින් මුලින්ම මරණයට පත්වූයේ හම්බන්තොට මන්ත්‍රී ඩී.ඇම්. රාජපක්ෂය. එක්දහස් නවසිය තිස්හයේ මැතිවරණයෙන් ඔහු දෙවැනි රාජ්‍ය මන්ත්‍රණ සභාවට පත්වූයේ හම්බන්තොට ආසනයෙනි.

රුහුණේ සිංහයා ලෙස විරුද්ධාවලි ලද ඔහු ගිරවාපත්තුවේ රාජපක්ෂ පවුලෙන් දේශපාලනයට පිවිසි මුල්ම සාමාජිකයා විය. ඔහුට දේශපාලනයෙ දිගු ගමනක් යාමට නොහැකි  වූයේ අකල් මරණයට මුහුණ දුන් බැවිනි. ඒ එක්දහස් නවසිය හතළිස් පහේ මැයි දහඅටවැනිදාය. වයස අවුරුදු හතළිස් නවයේදී ඔහු මරණයට පත්වූයේ රාජ්‍ය මන්ත්‍රණ සභා ගොඩනැගිල්‍ලේදී හෘදයාබාධයක් වැලඳීමෙනි. ඔහුගේ හදිසි මරණයෙන් හිස් වූ හම්බන්තොට ආසනයට පත්වූයේ ඩී.ඇම්. රාජපක්ෂගේ සොයුරු ඩී.ඒ. රාජපක්ෂය. ඔහු මහින්ද රාජපක්ෂගේ පියාය.

ඩී.ඇම්. රාජපක්ෂ මරණයට පත්වූ රාජ්‍ය මන්ත්‍රණ සභාවේ සභාපතිවරයා වූයේ සර් ෆ්‍රැන්සිස් මොලමුරේය. රාජ්‍ය මන්ත්‍රණ සභාව එක්දහස් නවසිය හතළිස් හතේදී පාර්ලිමේන්තුව ලෙස බෞතීස්ම වූයේ ලංකාවේ මුල්ම පාර්ලිමේන්තු මැතිවරණය වෙනුවෙනි. එම මැතිවරණයේදී බලංගොඩ ආසනය ජය ගනිමින් පාර්ලිමේන්තුවට පත්වූ සර් ෆ්‍රැන්සිස් මොලමුරේ ලංකාවේ මුල්ම කථානායකවරයා ලෙස තේරී පත්විය. එක්දහස් නවසිය පනස් එකේ ජනවාරි විසිපස්වැනිදා පාර්ලිමේන්තුව රැස් වූයේ කථානායක සර් ෆ්‍රැන්සිස් මොලමුරේගේ ප්‍රධානත්වයෙනි. සභාවේ වැඩකටයුතු කෙරීගෙන යන අතරතුරේදී ඔහු කථානායක අසුනෙන් වැටී දණ ගසාගෙන සිටින අයුරු දුටු මන්ත්‍රීවරු කලබලයට පත්වූහ. සර් ෆ්‍රැන්සිස් මොලමුරේ කථානායක අසුන මතම මියගොස් තිබුණේ හෘදයාබාදයකිනි. කථානායකවරයා මිය ගිය ඉරියව්ව ගැන එකල කිය වුණු කතාවක් වූයේ ඔහු මරණයට පත්වූවේ පනාමුරේ ඇත් රාජා දණ ගසාගෙන මිය ගිය ආකාරයට බවය. ඒ කතාවට මුල පනාමුරේ සුප්‍රකට ඇත්ගා‍ලේ හිමිකරුවා ඔහු බැවිණි. පනාමුරේ ඇත්රාජාට වෙඩි තබා මරන්නට නියම කළේ ඔහුය.

සර් ෆ්‍රැන්සිස් මොලමුරේ මෙන්ම ඩී.ඇම්. රාජපක්ෂ මිය ගිය කොටුවේ පාර්ලිමේන්තු ගොඩනැගිල්ල අද හැඳින්වෙන්නේ ජනපති ‍ලේකම් කාර්යාලය යනුවෙනි. ඒ ශ්‍රී ජයවර්ධනපුර කෝට්ටේ නව පාර්ලිමේන්තුවක් අසූව දශකයේ මුල ගොඩනැගූ බැවිනි.

එම පාර්ලිමේන්තු පරිශ්‍රයේද මන්ත්‍රීවරයකුගේ මරණයක් සිද්ධ විය. එය ස්වාභාවික මරණයක් නොව ඝාතනයකි. එම ඝාතනය සිද්ධ වූයේ එක්දහස් නවසිය අසූ හතේ අගෝස්තු දහ අට වැනිදාය. එදින පාර්ලිමේන්තුවේ කාමරයක ආණ්ඩු පක්ෂයේ මන්ත්‍රීන්ගේ රැස්වීමක් පැවැත්විණි. එහි මුලසුනේ සිටියේ ජනපති ජේ.ආර්. ජයවර්ධනය. ඔහු ඉලක්ක කරගෙන අත්බෝම්බ දෙකක් එල්ලවූ අතර එකක් පුපුරාගොස් එවකට දෙනියාය එජාප මන්ත්‍රීවරයා වූ කීර්ති අබේවික්‍රම මරණයට පත් විය. ලලිත් ඇතුළත්මුදලි ඇමැතිවරයා බරපතළ තුවාල ලැබිය. මෙම ප්‍රහාරයට ඇඟිල්ල දිගුවූයේ එකල පාර්ලිමේන්තු කාර්ය මණ්ඩලයේ රාජකාරී කළ ජවිපෙ සාමාජිකයකු වූ අජිත් කුමාරටය. ඔහු විමල් වීරවංශ ඇමැතිවරයාගේ මස්සිනාය. එම චෝදනාවට දිගු කලක් බන්ධනාගාරගත කර සිටි ඔහු පසුව නිදහස ලැබිය.

 මිහිරි ෆොන්සේකා

Lakbima Online

Download Lakbima Mobile App

 
 

 

Get In Touch With Us

Please publish modules in offcanvas position.