lakbima.lk

අධිකරණයක් තුළ විභාග වන නඩුවක ජය පරාජය තීරණය වෙන්නේ  ඊට පෙනී සිටින නීතිඥවරුන්ගේ කෙස් පැලෙන තර්ක මතිනි. තමන් පෙනී සිටින නඩුව දිනවන්නට ඒ නීතිඥයාට උදව් වෙන්නේ, ඔහුගේ වචනය. එහෙත් ඒ වචන ම තම තනතුර අහිමි කරන්නට ද දිනෙක හේතු වේ නම් එය බරපතළ තත්ත්වයකි. නමුත් එදා මෙදා තුර අධිකරණ ඉතිහාසයේ  එලෙස තම කට නිසා හෝ වැඩ නිසා  වෘත්තිය අහිමි කරගත් නීතිඥයෝ ඕනෑතරම් ය. ප්‍රකට සිවිල් ක්‍රියාකාරිකයෙකු වන නීතිඥ නාගානන්ද කොඩිතුවක්කුට ද ඉකුත් දා අත්වූයේ එවැනි ඉරණමකි.

නාගානන්දගේ නීතිඥභාවය වසර තුනකට අත්හිටුවන බව ශ්‍රේෂ්ඨාධිකරණය නිවේදනය කළේ ඉකුත් දහ අට වැනිදාය. ඒ නීතිඥවරයකුට නොගැළපෙන ආකාරයෙන් අධිකරණයක් තුළ හැසිරුණ වරදටය. නීතිඥ නාගානන්ද අතින් එකී වරද සිදු වූයේ ඉකුත් දෙදහස් පහළොවේ මැයි විසිඑක් වැනිදාය. එවකට අභියාචනාධිකරණයේ සභාපති විනිසුරුවරයා වශයෙන් කටයුතු කළ විජිත් මලල්ගොඩ ඉදිරියේ පැවැති නඩු විභාගයකදී විනිසුරුවරයා අපහසුතාවට පත්වන ආකාරයෙන් මෙන් ම නීතිඥවරයකුට  නුසුදුසු  ආකාරයේ  ප්‍රකාශයක්  කිරීම නීතිඥ නාගානන්දට එරෙහිව  ඉදිරිපත්   වූ  චෝදනාව විය. ඒ   සම්බන්ධයෙන්  නීතිඥ නාගානන්ද වැරදිකරු බව අධිකරණය තීරණය කරන ලද්දේ, නීතිඥ ආචාර ධර්ම සංග්‍රහයේ 60 සහ 61 යන වගන්ති උල්ලංඝනය කර ඇති බව පවසමිනි. මේ ආකාරයෙන් නීතිඥවරුන්ගේ නීතිඥභාවය අත්හිටුවිය හැකි නීතිමය පදනම කුමක්ද යන්න මේ සිදුවීමත් සමග බොහෝ දෙනා තුළ මතු වූ ගැටලුවකි. ඒ ගැන දැනගන්නට අප ශ්‍රී ලංකා නීතිඥ සංගමයේ වත්මන් සභාපති ජනාධිපති නීතිඥ යූ.ආර් ද සිල්වා ඇමැතුවෙමු.

නීතිඥ වෘත්තියේ  කටයුතු  කරන  අයටත්  ආචාර ධර්ම පද්ධතියක් තිබෙනවා. ඔවුන් සිය වෘත්තීය ජීවිතය තුළදී ඒ ආචාර ධර්මවලට පටහැනිව කටයුතු කරනවා නම්, ඔවුන්ට විරුද්ධව ක්‍රියාමාර්ග ගැනීමේ හැකියාව පවතිනවා ඔහු පවසන්නේය.

ජනාධිපති නීතිඥ යූ. ආර්. ද සිල්වා පෙන්වා දෙන පරිදි යම් නීතිඥවරයකු එලෙස සිය වෘත්තීය ආචාර ධර්මවලට පටහැනිව ක්‍රියාකරන්නේ නම්, එය සැලකෙන්නේ,

ශ්‍රේෂ්ඨාධිකරණයට අපහාස කිරීමක් ලෙසිනි. නීතිඥවරයකු සිය ආචාර ධර්ම කඩකළේ යැයි සැලකෙන අවස්ථා කිහිපයක් වේ. වෘත්තීය කටයුතු අතරතුරදී සේවාදායකයකුට නීතිඥවරයකු අතින් යම් වරදක් සිදුවුවහොත්, එය සැලකෙන්නේ, එම නීතිඥවරයා වෘත්තීය ආචාර ධර්මවලට පටහැනිව ක්‍රියා කළ අවස්ථාවක් ලෙසිනි. එවැනි අවස්ථාවකදී නීතිඥවරයාට විරුද්ධව දිවුරුම් පෙත්සමක් මගින් නීතිඥ සංගමය වෙත කරුණු දැක්වීමට සේවාදායකයාට අවස්ථාව හිමිවේ.

තමන් වෙනුවෙන් පෙනීසිටි නඩුවක් පැරදුනා කියලා නඩුවට පෙනී සිටි නීතිඥයාට විරුද්ධව කටයුතු කරන්න සේවාදායකයාට අයිතියක් නැහැ. නමුත්, යම් නඩු කටයුත්තකදී තමන්ට අවාසිදායක වන ආකාරයෙන් හෝ තම විරුද්ධ පාර්ශ්වය සමග එක්ව නීතිඥවරයා කටයුතු කළොත් ඊට විරුද්ධව ක්‍රියාකිරීමේ හැකියාව තියෙනවා.

එවැනි පැමිණිල්ලක් නීතිඥ සංගමය වෙත ඉදිරිපත් වූ අවස්ථාවකදී, ඒ පිළිබඳව සොයා බලා ඔහු විනය විරෝධී ක්‍රියාවක නිරත වී ඇති බව පෙනී ගියහොත් ඒ බව ශේ්‍රෂ්ඨාධිකරණයට දැනුම් දීමට නීතිඥ සංගමය කටයුතු කරයි. ශ්‍රේෂ්ඨාධිකරණය විසින් ඒ අවස්ථාවේදී නීතිඥවරයාට රීතියක් ඉදිරිපත් කරන අතර ඔහුට විරුද්ධව කටයුතු නොකර සිටීමට හේතු ඇති දැයි විමසා බැලීමක් කෙරෙයි. එහිදී සිය නිවැරදිභාවය වෙනුවෙන් කරුණු ඉදිරිපත් කිරීමට නීතිඥවරයා අසමත් වන්නේ නම්, ඔහුගේ සේවය තහනම් කිරීමට ශ්‍රේෂ්ඨාධිකරණයට හැකියාව ඇත.

ඊට අමතරව තම සහෝදර නීතිඥවරයකුට හෝ විනිසුරුවරයකුට අපහාස වන ආකාරයෙන් කතා කිරීම හෝ ක්‍රියා කිරීම ද වෘත්තීය ආචාර ධර්ම කඩකිරීමක් ලෙස සැළකෙයි. එවැනි අවස්ථාවකදී ද, ඊට විරුද්ධව කටයුතු කිරීමට අධිකරණයට අවස්ථාව හිමි වේ. එහෙත් එහිදී ඉහළ අධිකරණයට අපහාස කිරීමකදී එක් ආකාරයකටත්, පහළ අධිකරණයට අපහාස කිරීමකදී ඊට වෙනස් ආකාරයකටත් පියවර ගැනෙන බව ජනාධිපති නීතිඥ යූ. ආර්. ද සිල්වා පෙන්වා දෙන්නේය. නීතිඥ නාගානන්ද කොඩිතුවක්කුට එරෙහිව පියවර ගැනීමේ සිද්ධිය ද එලෙස ඉහළ අධිකරණයට අපහාස කිරීම යටතේ කටයුතු කිරීමකි. අභියාචනාධිකරණයේ විනිසුරුවරයා විසින්, තමන්ට අපහාස වන ආකාරයෙන් නීතිඥවරයා කටයුතු කළ බව පවසමින් මෙහිදී ද ශ්‍රේෂ්ඨාධිකරණයට කරුණු වාර්තා කර තිබේ.

එලෙස කරුණු වාර්තා කිරීමෙන් අනතුරුව විනිසුරුවරයා ඉදිරිපත් කළ පැමිණිල්ල ශ්‍රේෂ්ඨාධිකරණ විනිසුරුවරුන්ගේ විමසීමට ඉදිරිපත් වේ. එහිදී සොයා බැලෙන්නේ, නීතිඥවරයාගේ හැසිරීමෙන් අධිකරණයට අපහාස වන ක්‍රියාවක් සිදුවී ඇත්දැයි යන්න සම්බන්ධයෙනි. නීතිඥවරයා විසින් යම් වරදක් කර ඇති බව බහුතරය විසින් පිළිගන්නේ නම්, අදාළ නීතිඥවරයාට එරෙහිව චෝදනා ඉදිරිපත් කරන ලෙස නීතිපතිවරයාට දැනුම් දෙනු ලබයි.  එහිදී නීතිඥවරයාගෙන් නිදහසට කරුණු විමසා බැලීමක් කෙරෙන අතර, කරුණු ඉදිරිපත් කරන්නට අ‍පොහොසත් වුවහොත් ඔහුට එරෙහිව කටයුතු කළ හැකිය. නාගානන්ද නඩුවේදී ද ඔහුගේ ප්‍රකාශයෙන් අධිකරණයට අපහාසයක් වූවා ද යන්න සම්බන්ධයෙන් ත්‍රිපුද්ගල විනිසුරු මඬුල්ලක් ඉදිරියේ විභාගයට ගැණිනි.

පහළ අධිකරණයකදී නම්, එම අධිකරණ විනිසුරුවරු විසින් වැරදිකාර නීතිඥවරයාට විරුද්ධව  ක්‍රියාකිරීම  සම්බන්ධයෙන්  එකඟතාවකට  පැමිණ,  පසුව  එම  තීරණය  ශ්‍රේෂ්ඨාධිකරණයට දැනුම් දේ. අදාළ නීතිඥවරයාට නියම කළ යුතු දඬුවම කුමක් ද යන්න පිළිබඳව තීරණය ගනු ලබන්නේ ශ්‍රේෂ්ඨාධිකරණය විසිනි.

එමෙන්ම පෙරකලාසියක් (පධයර) ඉදිරිපත් කළ අවස්ථාවකදී ඒ සම්බන්ධයෙන් නීතිඥවරයා නිසි පරිදි කටයුතු නොකළහොත් ඔහුගේ වෘත්තිය මුළුමනින් ම හෝ අත්හිටුවීමට ද අවස්ථාව ඇති බව ජනාධිපති නීතිඥ යූ.ආර්.ද සිල්වා පවසන්නේය. පෙරකලාසිය යනු යම් නඩුවක් පවරන අවස්ථාවේ ඊට පෙනී සිටීම සඳහා සේවාදායකයා විසින් බලය ලබා දෙන ලියවිල්ලයි. ඒ පෙරකලාසියෙන් බලය පැවරූ විට ඒ සඳහා වෙනත් නීතිඥ මහතෙකුට ඉදිරිපත් වීමට හැකියාවක් නැත. ඒ සම්බන්ධයෙන් මූලික වගකීම හිමිවෙන්නෙ පෙරකලාසිය ලබන තැනැත්තාටය. ඔහු එම නඩුවට අදාළ ‍ලේඛනගත නීතිඥවරයා වන අතර, අවශ්‍ය නම්, අදාළ නඩුවට පෙනී සිටීම සඳහා වෙනත් නීතිඥයන් යෙදවීම වැනි ඒ සම්බන්ධ ඕනෑම තීරණයක් ගැනීමේ අයිතිය ඇත්තේ ඔහුට ය. ඔහු එම නඩුව විභාග වීමේදී අවශ්‍ය පරිදි නීතිඥවරු යෙදවුවේ නැත්නම් හෝ ඒ සඳහා නිසිපරිදි කටයුතු නොකළහොත් ඔහුට විරුද්ධව කටයුතු කිරීමේ බලය සේවාදායකයාට හිමි වේ.

නඩුවක් විභාග වෙන අවස්ථාවකදී නීතිඥවරුන් දෙපළ අතර ඇතිවන බහින්බස් වීම්ද මෙලෙස ආචාර ධර්ම කඩකිරීමේ වරදට හසුවනවා ද යන්න ඊළඟට මතුවන ගැටලුවයි. යූ. ආර්. ද සිල්වා පවසන්නේ, නඩු කටයුත්තකදී ඔවුන්ගේ මතිමතාන්තර ගැටීම්වලට ඕනෑ තරම් අවස්ථාව තිබෙන බවයි. එහෙත් අනෙක් පාර්ශ්වයේ පෞද්ගලික චරිතයට හානි වෙන ආකාරයට හෝ ද්වේශසහගත ආකාරයට කටයුතු කළහොත් එය වෘත්තීය ආචාර ධර්මවලට පටහැනිව ක්‍රියාකිරීමක් ලෙස සැලකෙයි.

මීට අමතරව නීතිඥවරයකුගේ සේවය  තහනම් කිරීම සම්බන්ධයෙන් රටම දන්නා සිදුවීමක් වන්නේ, නීතිඥ එල්මෝ පෙරේරාගේ සේවය අත්හිටුවීමේ සිද්ධියයි. අධිකරණයේ විභාග වූ නඩුවකදී ඔහුගේ හැසිරීම ගැටලුකාරී වීම පදනම් කරගනිමින්, එල්මෝ පෙරේරාගේ සේවය වසර හතකට අත්හිටුවීමේ නියෝගයක් නිකුත් කෙරිණි.

 ගයාත්‍රි ගීගනආරච්චි

  1. දකුණේ නිදන් හාරද්දී උතුරේ හාරන්නේ රත්තරන්
  2. අවුරුදු විසිපහක්ම රෝදපුටුවේ ගිය හමුදාවේ ධෛර්යය
  3. දරුවන් රකින්නට නුවර කලාවියේ දෙන අපූරූ දානය
  4. ස්ථාන මාරුවකින් කෙළවර වූ ජී. ටී. බොස්ගේ වැදි නැටුම
  5. ඉන්දියාවේදී කොටු වූ බ්ලූමැන්ඩල් සංඛ
  6. කැඩුණු අමුණ බැඳගන්නට මුදල් නැතිව අකලට මහලු වෙන ගමක්
  7. ජංගම දුරකථනයෙන් කතා කර කර දුම්රිය මග දිගේ එලොව යන්නෝ
  8. ඩුබායි ගෙන ගිය බව කියූ කෝටි 700 දියමන්තිය පානදුරෙන් මතුවූ හැටි
  9. මත්පෙති සමග ටෙලි නිළියක් කොටු වූ පොල්හේනේ බිච් පාටිය
  10. කාන්තාවන්ට දුම්රිය මැදිරි වෙන් කිරීමෙන් අනික් මැදිරි වල තද බදයක්
  11. නැගෙනහිර වෙරළේ ඇස්කිමෝ ගෙවල්
  12. ඉතිහාසයේ විශාලම මූල්‍ය ආයෝජනය සමග “ළඟම පාසල - හොඳම පාසල“ වන අයුරු
  13. අල ගෝනියක සැඟව හොංකොං ආ සියවසක් පැරණි බෝම්බය
  14. පාතාලයන්ට නම් තබන්නේ මෙහෙමයි
  15. ලංකාව කිට්ටුවත් මළ මුහුදක්
  16. ලංකාවටත් අලි සිතියමක්
  17. හලාවත බෝට්ටු හොරා ප්‍රංශයට මිනිසුන් ගෙනගිය හැටි
  18. මධුෂ් ගැන ගම්මු කියන කතාව
  19. සිංහරාජයේ සමනළයන්ට පාස්‍පෝට් දෙන්නට ගොස් වනජීවියට කොටු වූ සුද්දෝ
  20. මිතුරා මරා පුළුස්සා ඔහුගේ නමින් පෙනී සිට තවත් දෙදෙනෙක් මැරූ සඳුන්
  21. අම්පාරෙන් මතුවුණේ වඳවුණූ නිට්ටෑවන්ද ?
  22. අපටත් නොදැනීම අපේ සල්ලි බැංකුවෙන් ගන්නා ATM හොරු
  23. ඡායාරූපවලින් ඩයස්‍පෝරාව අන්දන උතුරේ හොර කොටි
  24. ලොක්කන්ගේ දුරකථන ආණ්ඩුව ටැප් කරලද?
  25. සේනා ඉබේ ආවාද? ගෙන ආවාද?

Lakbima Online

Download Lakbima Mobile App

 
 

 

Get In Touch With Us

Please publish modules in offcanvas position.