lakbima.lk

 

අමිලා අලුත් ගීතයකුත් අරගෙන ආයෙමත් කරළියට ඇවිත් නේද?

ඔව්. මගේ අලුත්ම ගීතය තමයි “අන්තිම තත්පර” කියන්නේ. ඒක රූප රචනාවකුත් එක්ක දැන් යූටියුබ් ඔස්සේ රස විඳින්න පුළුවන්. ඒ ගීතයට මේ දවස්වල හොඳ ප්‍රතිචාර ලැබෙනවා.

ප්‍රසංග නිසා මේ දවස්වල ඔබ කාර්යබහුල වෙලාද ඉන්නේ?

අලුත් අවුරුද්දත් කිට්ටු නිසා කොහොමත් ඉස්සරහට එන්නේ ටිකක් කාර්යබහුල කාලයක් තමයි. ඒ අතරතුරේ මේ මාසේ මට කුවේට්වල ප්‍රසංගයකටත් සහභාගි වෙන්න තියෙනවා.

ආධුනික ගායිකාවක් විදිහට ජනතාව ඉදිරියට ඇවිත් මේ වෙද්දී ගිහින් තිබෙන දුර ගැන ඔබට දැන් මොනවද හිතෙන්නේ?

සිරස සුපර් ස්ටාර් දෙවැනි අදියරෙන් තමයි මාව ජනතාව මුලින්ම දැන හඳුනා ගත්තේ. ඒ 2007 වසරේදී. මම ක්ෂේත්‍රයට ආවේ ප්‍රවීණ ගායිකාවන්ගේ ගීත ගායනා කරලා. ඒත් දැන් මගේම කියලා ගීත 50 ක් විතර මට තියෙනවා. ප්‍රසංග වේදිකාවේදීත් සාධාරණ මුදලක් අය කරමින් එදා ඉඳන් අද දක්වා ජනතාවගේ ආදරය දිනාගෙන ඉන්න හැකිවීම ගැන මට හුඟාක් සතුටුයි.

ඔය ආපු ගමනේදී ප්‍රවීණ ගායිකාවන්ගේ ගීත ගායනා කරමින් මුදල් උපයා ගත්තා කියන චෝදනාව ඔබටත් එල්ල වුණා. අදටත් ඔබ ප්‍රසංග වේදිකාවේදී වෙනත් ගායිකාවන්ගේ ගීත ගායනා කරනවා නේද?

සමහරු මට එවැනි චෝදනා එල්ල කළා. ප්‍රවීණ ගායිකාවන්ගේ ගීත ගායනා කරමින් අසාධාරණ විදිහට මුදල් හම්බ කරගන්නවා කියලා සමහරු මට චෝදනා කළා. හැබැයි ඒ චෝදනාව වැරදියි. වෙනත් ගායක ගායිකාවන්ගේ නම්වලින් පෙනී සිටින ශිල්පීන් පවා අපට ප්‍රසංග වේදිකාවේදී මුණ ගැසෙනවා. හැබැයි මම නම් ඔය කියන විදිහට අසාධාරණ ලෙස කවදාවත් මුදල් හම්බ කරලා නැහැ. මොකද මටම අනන්‍ය වෙච්ච කටහඬක් මට තියෙනවා. ඒ වගේම මගේම කියලා ගීත මට තියෙනවා. කොහොමටත් දැන් නම් මම ප්‍රසංග වේදිකාවේදී වෙනත් ගායිකාවන්ගේ ගීත ගායනා කරන්නේ නැහැ. හැබැයි විශේෂ අවස්ථාවලදී මට එවැනි ගීත ප්‍රසංග වේදිකාවේදී ගායනා කරන්න සිදුවන අවස්ථා තියෙනවා.

 ඔබට වැඩිපුරම දෝෂාරෝපණ එල්ල වුණේ ඇන්ජලින් ගුණතිලක මහත්මියගේ ගීත ගායනා කිරීම නිසයි කීවොත් හරි නේද?

ඒක ඇත්ත. හැබැයි මාව මූණට මුණගැහිලා නම් කවදාවත් ඇය මට එවැනි චෝදනාවක් කරලා නැහැ. සමහර උසිගැන්වීම් නිසා වෙන්න ඇති ඇය මට විරුද්ධව මාධ්‍යවලට යම් යම් දේවල් කියන්න ඇත්තේ.

ප්‍රවීණ ගායක ගායිකාවන්ගේ ගීත තරම් නව පරපුරේ ගායක ගායිකාවන්ගේ ගීතවලට ජනතාව ඇලුම් කරන්නේ නැහැ කියන චෝදනාව අද සුලබව එල්ල වෙනවා. ඔබ වැනි රියැලිටි තරගවලින් ඉස්මතු වූ ගායක ගායිකාවන්ටත් මේ කියන චෝදනාව අදාළයි නේද?

ඒ විදිහේ චෝදනාවක් තියෙන බව ඇත්ත. හැබැයි අද ගුවන් විදුලි නාලිකාවකට සවන් දුන්නත් වැඩිපුරම ඇහෙන්නේ අලුත් ගායක ගායිකාවන්ගේ ගීත තමයි. ඒ නිසා ඒ ගීත ජනතාව අතරට ගිහින් නැහැ කියලා කාටවත් කියන්න බැහැ. මේ ගැන කතා කරද්දී මට තවත් වැදගත් කාරණයක් මතක් කරන්න තියෙනවා.

ඒ තමයි බොහෝ ප්‍රවීණ ගායක ගායිකාවන්ගේ ගීත ජනතාවට අමතක වෙමින් යන කාලයක, සුපර් ස්ටාර් දෙවැනි අදියරේදී ඒවා ගායනා කරලා ඒ ගීත නැවතත් ජනතාව අතරට ගෙනගියේ අපි බව. එච්. ආර්. ජෝතිපාල මහතාගේ ගීත පවා ඒ කා‍ලේ හුඟාක් අයට අමතක වෙමිනුයි තිබුණේ. කාලයක් තිස්සේ අමතක වෙලා තිබුණු චිත්‍රපට ගීතත් සුපර් ස්ටාර් දෙවැනි අදියරෙන් තමයි ආපහු කරළියට ආවේ. ඒ නිසා මේ වගේ චෝදනා එල්ල කරද්දී එක පැත්තක් දිහා බලන එක වැරදියි.

ගායන කටයුතුත් එක්ක අමිලාගේ පවුල් ජීවිතය ගවෛන්නේ මොන විදිහටද?

මගේ පුතාට දැන් අවුරුදු දහහතයි. දුවට අවුරුදු හයයි. දරුවෝ දෙන්නා සහ සැමියා එක්ක මම බොහොම සතුටින් කාලය ගත කරනවා.

කිෂාන් කනංකෙ

ඡායාරූප - මංජුල පෙරේරා

Lakbima Online

Download Lakbima Mobile App

 
 

 

Get In Touch With Us

Please publish modules in offcanvas position.