lakbima.lk

තිරයේ දකින කතාවල චරිත තමන්ගේම කරගන්නා රසිකයන් බොහෝයි. ඒ රසිකත්වයේ සීමාවෙන් එහා ගිය උමතු වූ චරිතද මේ අතර වෙයි. මේ දිනවල ජාතික රූපවාහිනිය ඔස්සේ විකාශය වන ජේ. ශිවගුරුනාදන්ගේ “අමුතු රසිකයා” ටෙලි නාට්‍යයේ ප්‍රධාන චරිතයක් වන්නේද එබඳු විකල් සිතක් ඇති තරුණයෙකි.

සඳරුවන් රත්නායක සහ සඳරු යන එහි චරිත ද්විත්වයම අපූරු ලෙස ප්‍රතිනිර්මාණය කරන්නේ පුංචි තිරයේ නළු පරපුරට අලුතින්ම එක්වූ රංගන ශිල්පියෙකි. සිරස ෆිල්ම්ස්ටාර් 2018 තරගයේ ජයග්‍රහකයා ලෙස කිරුළ හිමි කරගෙන ටෙලි නාට්‍ය රංගනයට එක්වූ සංජය මුරමුදලි මෙම නවක රංගන ශිල්පියාය. මෙවර රැජිණ කතාබහකට එක්වන්නේ ඔහුයි.
 

අමුතු රසිකයා ඔබ ප්‍රධාන චරිතයක් රඟපාන ප්‍රථම අවස්ථාව නේද?

ඔව් .... මම ටෙලි නාට්‍ය රාශියක පුංචි චරිත රඟපෑවා. අමුතු රසිකයා තමයි ප්‍රධාන චරිතයක් රඟපාන ප්‍රථම අවස්ථාව.

එදා පුංචි පුංචි චරිත රඟපෑ සංජය අද එක දිගට ප්‍රධාන චරිත රඟපෑමට එකතුවෙලා

මේ දවස්වල මගේ ටෙලි නාට්‍ය හයක් විකාශය වනවා. ඔබ නිසා (හිරු ටීවී) තෝඩු (ස්වාධීන රූපවාහිනිය) හුස්මක් තරමට (හිරු ටීවී) සුසුමක ඉම (ස්වාධීන රූපවාහිනිය) කුමී(ස්වර්ණවාහිනිය) සහ අමුතු රසිකයා තමයි ඒ ටෙලි නාට්‍ය.

සංජයගේ පෞද්ගලික තොරතුරු කතා කළොත්

මගේ ගම හඟුරන්කෙත. ඉගෙන ගත්තේ දියතිලක මධ්‍ය මහ විදුහ‍ලේ. දැනට කැලණිය විශ්වවිද්‍යාලයේ නාට්‍ය හා රංග කලාව උපාධිය හදාරනවා. ඊට කලින් මහරගම ජාතික තරුණ සේවා සභාවේ රංගනය ගැන පාඨමාලාවක් හදාරලා තියෙනවා.

ඒ කියන්නේ සංජය පාසැල් අවදියේ පටන්ම රංගනයට උනන්දුවක් තිබූ අයෙක් ....


ඒ කා‍ලේ මම දඩබ්බර ළමයෙක්. පාසැ‍ලේ ගැටුමක් වුණොත් අනිවාර්යයෙන් මගෙ නමත් ඒකට ඈඳිලා ඇති. මම උසස් පෙළට නාට්‍ය හා රංග කලාව කළාට පාසැල් අවදියේ රංගනයට උනන්දුවක් තිබුණෙ නැහැ. අපේ පාසැ‍ලේ කිත්සිරි සර් තමයි මගෙ දක්ෂතා හඳුනාගෙන ඒ ගැන මාව උනන්දු කරලා ඒ මාවතට මාව යොමු කළේ. උසස් පෙළ ඉවරවෙද්දි මට රඟපෑමේ උනන්දුව ඇතිවුණා. ඊට පස්සෙ තමයි ඒ ගැන වැඩිදුර හදාරන්න, ටෙලි නාට්‍යවලට සම්බන්ධ වන්න යොමුවුණේ.

පාසැල් අවදියේ දඩබ්බරයෙක් නම් ඒ සම්බන්ධ මතක හිටින අත්දැකීම් ඇති


ඒ වගේ අවස්ථා නම් අනන්තවත් තියෙනවා.

ඒ අතරින් එකක් දෙකක් කියන්න


දවසක් පාසැ‍ලේ නිවාඩු දෙන දවසේ අපි රතිඤ්ඤා අරගෙන ගියා. ඔය වෙලාවෙ මමයි තව යාළුවෙකුයි රතිඤ්ඤයක් පත්තු කරලා පන්තියෙන් එලියට වීසිකළා. ඒක විසිවෙලා ගිහින් දැලක වැදිලා ඊට පස්සේ වැටුණේ ලී වැඩ කාමරය  ළඟ. එතැන මේසය මත තමයි ගුරුවරු කෑම කන්නේ. ගරුවරු කෑම කන තැනට වැටිලා රතිඤ්ඤය පිපිරුණා. ඒ වැඩේ කළේ කවුද කියලා ගුරුවරු හෙව්වා.

මමයි ඒ වැඩේට සම්බන්ධ යාළුවයි පංතියෙන් පිට වුණා. පන්තියේ අනිත් හැමෝටම දඬුවම් ලැබුණා. හැබැයි පස්සෙ අපිව අහුවුණා. එදා අපි දෙන්නාව මේසයක් යටට දාලා සපත්තුවල ‍ලේස් එකට ගැට ගහලා පහර දුන්නා.

ඔය දඩබ්බරකම නිසාම ඇතිවුණු ලස්සන ආදර කතාත් සංජයට ඇති


මගෙ දඩබ්බරකම හින්දා ගෑනු ළමයි ගොඩක් මට කැමති නැහැ. ඒ නිසා ප්‍රේම සම්බන්ධතාවලට නැඹුරු වුණා අඩුයි. හැබැයි ඉතින් පෙම් සබඳතා හින්දා යාළුවන්ගෙ ගැටුම් ඇතිවූ අවස්ථාවල ඒ ගැටුම්වලට නම් සම්බන්ධ වෙලා තියෙනවා.


ආදර සම්බන්ධතා තිබිලාම නැද්ද?


පුංචි පුංචි ආදර කතා තිබිල තියෙනවා. දැනට නම් එහෙම සම්බන්ධයක් නැහැ.

පුංචි තිරේ ටෙලි නාට්‍ය හයකටම එකතු වුණා. තවම රිදී තිරයට පා තබන්න අවස්ථාවක් ලැබුණෙ නැද්ද ?


ආරාධනාවක් ලැබුණා. තවමත් එය තියෙන්නේ සාකච්ඡා මට්ටමේ.

සංජයගේ රංගන ජීවිතයේ කඩඉමක් වූ අමුතු රසිකයා ගැන මොකද හිතෙන්නේ ...

ඒක නළුවකුට ලැබෙන සුවිශේෂ අවස්ථාවක්. මම ඒ නාට්‍යයේ සඳරුවන් රත්නායක හා සඳරූ කියන චරිත දෙකම රඟපානවා. සඳරුවන් රත්නායක අහිංසක තරුණයෙක්. ඔහුගේ පියා විසින් ඔහුගේ පෙම්වතිය අතුරුදන් කළ නිසා ඔහු පිස්සු වැටෙනවා.

ඉන්පසු ඔහු ජීවිතය යළි පටන් ගන්නේ ෂෙල්ටන් (රොෂාන් පිලපිටිය) නමැති රියදුරෙක්ගෙ ගෝලයා වන සඳරූ විදියට. ෂෙල්ටන් චිත්‍රපටි පිස්සෙක්. සඳරූ ඔහු සමග චිත්‍රපටයක් බලන්න යනවා. චිත්‍රපටියේ දකින නිළිය තමන්ගෙ පෙම්වතිය කියල හිතාගෙන සඳරූ ආයෙම මානසිකව වැටෙනවා. ඊට පස්සෙ අපූරු සිදුවීම් රැසක් කතාව තුළ දිගහැරෙනවා.

ආරියවංශ කුලතිලක
 

Lakbima Online

Download Lakbima Mobile App

 
 

 

Get In Touch With Us

Explore More

Please publish modules in offcanvas position.