lakbima.lk


එදා පාස්කු ඉරිදාවයි. ප්‍රවීණ සූපවේදිනී ශාන්තා මායාදුන්නේගේ පවු‍ලේ අයටත් එදින විශේෂ දිනයක් වුණා. මායාදුන්නේ පවු‍ලේ බාල දියණිය වන තරංගා සිය සැමියාද සමගින් ඒ වන විට ලංකාවට පැමිණ සිටියා. ඕස්ට්‍රේලියාවේ මෙල්බර්න් නුවර පදිංචිව සිටින ඇය නැවත මෙරටින් පිටත්ව යෑමට නියමිතව තිබුණේ ලබන මැයි මස දෙවැනිදායි. එබැවින් කවුරුත් කාර්යබහුල දින චර්යාවෙන් මිදී සිටි ඒ පාස්කු ඉරිදාව පවු‍ලේ සැවොම එක්ව සතුටින් ගත කිරීමටයි, මායාදුන්නේ පවුල සැලැසුම්කරගෙන සිටියේ.

නාගරික පරිසරයෙන් ඈත්ව දකුණු පළාතට ගොස් නිවාඩු දින ගෙවාදැමීමට ඔවුන් මුලින් බලා‍පොරොත්තුවෙන් සිටියත්, පසුව ඒ අදහස අත්හැර දැමුවේ සුපිරි හෝටලයකට ගොස් රසවත් උදෑසන ආහාරවේලක් ගෙන දවස ඇරඹීම යෙහෙකැයි ඔවුන් සිතූ නිසයි.

ඒ අනුව එදින පාස්කු ඉරිදාව වෙනුවෙන් කොළඹ ෂැංග්‍රිලා හෝටලයේ විශේෂයෙන් පිළියෙල කෙරෙන උදෑසන ආහාරවේල සඳහා ශාන්තා මායාදුන්නේ ඇගේ සැමියා වන කුමාර් මායාදුන්නේ, වැඩිමහල් දියණිය නිසංගා සහ ඇගේ සැමියා වන ශාන්, බාල දියණිය සාරංගා සහ ඇගේ සැමියා වන දුලාංජයත් පිටත්ව ගියා. මේ ගමනට එක්වූ අනෙක් තැනැත්තිය වූයේ තරංගාගේ නැන්දණිය, එනම් දුලාංජයගේ මව වන මේජර් ජෙනරාල් (විශ්‍රාමික) ඉන්දිරා විජේරත්නයි. (ඇය 1998 වසරේ පේදුරුතුඩුවේදී එල්ල වූ මරාගෙන මැරෙන කොටි බෝම්බ ප්‍රහාරයකින් මියගිය බ්‍රිගේඩියර් ලැරී විජේරත්නගේ ආදරණීය බිරිඳයි)
ෂැංග්‍රිලා හෝටලයට ගොස් උදෑසන ආහාර වේල ගැනීම ආරම්භ කළ පසු, වැඩිමහල් දියණිය නිසංගා පවු‍ලේ සැවොම හසුවන පරිදි සිය දුරකථනයෙන් සෙල්ෆි ඡායාරූපයක් ලබාගත්තා.

මෙම ඡායාරූපය එසැණින් සිය ෆේස්බුක් ගිණුමට ඇතුළත් කරන්නටත් ඇය අමතක කළේ නෑ. ඒ ජ්චඵබඥප ඡපඥචඬටචඵබ ඹඪබඩ ටචථඪතර නමින් සටහනක්ද ඊට එක්කරමින්. පවු‍ලේ සැවොම සිනාමුසු මුහුණින් පෙනී සිටි මෙම ඡායාරූපය සඳහා නිසංගාගේ මුහුණු‍පොතේ මිතුරු මිතුරියන්ගෙන් ප්‍රතිචාර ගලාඑන්නට පටන් ගත්තා. ඔවුන් සියලුදෙනා එක්ව ගන්නා අවසන් ඡායාරූපය එය වන බවට කිසිවකු තුළ ඒ වන විට අබමල් රේණුවකුදු සැකයක් ඇතිවීමට කිසිදු හේතුවක් තිබුණේ නැහැ. නමුත් ඒ සියල්ල වෙනස්වීමට ගතවූයේ තවත් මිනිත්තු කිහිපයක් පමණයි.

මෙරට ජනතාවගේ ආදරය සහ ගෞරවය දිනාගෙන සිටි, ප්‍රවීණ සූපවේදිනියක වූ ශාන්තා මායාදුන්නේගේ කොට්ටාවේ පිහිටි නිවසට අප ගොඩවදින විට ශෝකාකූල මුහුණු හැර එකදු සිනහ මුහුණකුදු අප දුටුවේ නැහැ. වෙනදා නිතර සිනහමුසු මුහුණින් මුව සරසාගෙන මෙම නිවසේ සිටි ශාන්තා මායාදුන්නේ සහ ඇගේ වැඩිමහල් දියණියගේ නිසල දේහයන් සාලයේ තැන්පත් කර තිබුණා.


ඒ වන විටත් ඔවුන්ගේ දේහයන් නිවසට ගෙනැවිත් වැඩිවේලාවක් ගතවී තිබුණේ නැහැ. නමුත් ඔවුන් වෙත අවසන් ගෞරවය පුදකිරීමට මැති ඇමැතිවරු, රටේ ප්‍රසිද්ධ පුද්ගලයන් ඇතුළු විශාල පිරිසක් වැල නොකැඩී පැමිණෙමින් සිටියා. නිවසේ දොරකඩට වී, දෑත් එක්කර ආචාර කරමින් ඔවුන් සැම පිළිගත්තේ ශාන්තා මායාදුන්නේගේ සැමියා වන කුමාර් මායාදුන්නේයි. නොසිතූ මොහොතක සිය ආදරණීය බිරිඳ සහ දියණිය මෙලොව හැරයාම ඔහුට තවමත් සිහිනයක් වගෙයි. අනේ..... ශාන්තාගෙයි, දවගෙයි ෆොටෝස් නම් ගන්න එපා. ඒ දෙන්නා ඉස්සර හිටියා වගේම ඉන්නවා මිනිස්සු දකිනවාටයි මම කැමැති කුමාර් එහෙම කීවේ හැඬුම්බර ස්වරයකින්.


ඉකුත් පාස්කු ඉරිදා ෂැංග්‍රිලා හෝටලයට එල්ල වූ මරාගෙන මැරෙන බෝම්බ ප්‍රහාරයෙන් ශාන්තා මායාදුන්නේට සහ වැඩිමහල් දියණිය නිසංගාට මෙලොව හැරයාමට සිදුවුණා. නිසංගාගේ සැමියා වන ශාන්ගේ අතක ආබාධයක් ඇතිවුණා. බාල දියණිය තරංගාගේ සැමියා වන දුලාංජයට සුළු තුවාල සිදුවුණා. සිය වෘත්තිය දිවියේදී කිහිපවරක්ම බෝම්බ ප්‍රහාරයන්ට මුහුණදී සිටි මේජර් ජෙනරාල් (විශ්‍රාමික) ඉන්දිරා මෙවරත් ත්‍රස්ත ප්‍රහාරයෙන් ඉතා සුළු තුවාල ලබා දිවිගලවා  ගැනීමට තරම් වාසනාවන්ත වුණා.


බෝම්බ ප්‍රහාර එල්ල වන අවස්ථාව වන විට පවු‍ලේ අනෙක් අය ආහාර බෙදා ගැනීම සඳහා තමන් අසුන් ගෙන සිටි මේසයෙන් මඳක් ඈතට ගොස් තිබුණත් ශාන්තා සහ නිසංගා එතැනම රැඳී සිටීම නිසයි ඔවුන්ට මෙම අවාසනාවන්ත ඉරණමට මුහුණදීමට සිදුවුණේ. නිසංගා අවසන් මොහොතේ ගත් සෙල්ෆි ඡායාරූපයට ජාත්‍යන්තර වශයෙන්ද ඉතා ඉහළ අවධානයක් හිමිවුණා. මෙම අවාසනාවන්ත ඉරණමට මුහුණදීමට සිදුවූ නිසංගා ලංකාවේ චැනල් අයි නාලිකාවේ නිවේදිකාවක ලෙසද කටයුතු කර තිබෙනවා. පෞද්ගලික බැංකුවක සේවා ප්‍රමිති කළමනාකාරිණියක ලෙස සේවය කරමින් සිටි ඇය මෙලොව හැරගියේ මාස හතක කුඩා බිළිඳෙකුට සිය මව අහිමි කරමින්.


සූපවේදය පිළිබඳ සජීව වැඩසටහන් රූපවාහිනියෙන් ඉදිරිපත් කරමින් බාල, මහලු හැමෝම දන්නා හඳුනන චරිතයක් බවට පත්ව සිටි ශාන්තා මායාදුන්නේ උපත ලැබුවේ 1951 වසරේ අප්‍රේල් 4 වැනිදා යක්කලදීයි. ඒ අටදෙනෙකුගෙන් යුත් පවුලක හතරවැන්නිය ලෙසින්. සිරිනි ශාන්තා කීනවින්න නමින් උපත ලැබූ ඇය ‍‍‍ජ්‍යෙෂ්ඨ බැංකු නිලධාරිනියකු වන කුමාර් මායාදුන්නේ සමග විවාහ වීමෙන් අනතුරුව, ශාන්තා මායාදුන්නේ නමින් ප්‍රසිද්ධියට පත්වුණා.


ශාන්තා බාලවියේ සිටම ඉවුම් පිහුම්වලට හපනියක්. වසර 12ක පමණ කාලයක් ගුරුවරියක ලෙස සේවය කළ ශාන්තා අනතුරුව, කුඩා කාලයේ සිට සූපවේදය පිළිබඳ සිය දැනුම අන්‍යයන්ට බෙදාහදා දෙන්නට පටන් ගත්තා. විදෙස් රටවලටද ගොස් සූපවේදය පිළිබඳ තමන්ගේ දැනුම මුවහත් කරගත් ශාන්තාට පුවත්පත්, ගුවන්විදුලිය සහ රූපවාහිනිය හරහා ප්‍රතිභාව විදහා දක්වන්නට හැකිවුණා.

ඉක්මනින්, කටට රසට, ‍පෝෂ්‍යදායි ආහාර සකසා ගැනීම යන්නයි ඇගේ තේමා පාඨය වූයේ. 2005 වසරේ දී ස්වාධීන රූපවාහිනියෙන් මුල්වරට සූපවේදය පිළිබඳ සජීවි වැඩසටහනක් ඉදිරිපත් කරමින් රූපවාහිනියෙන් ඇරඹූ ගමන නුග සෙවණ, සහන් පියස වැනි කාන්තා වැඩසටහන් රැසක් හරහා ඉදිරියට ගෙන යාමට ඇයට හැකිවුණා. මියයන මොහොත වනතුරුම සූපවේදය පිළිබඳ පන්ති සහ වැඩමුළු පවත්වමින් ශාන්තා ශිෂ්‍ය ශිෂ්‍යාවන් දහස් ගණනකට සිය දැනුම බෙදාහදා දුන්නා.


අපේ පවු‍ලේ අටදෙනාම පුදුම සහෝදර බැඳීමකින් සිටියේ. සමහර සහෝදර සහෝදරියන් දැන් ජීවත්වෙන්නේ විදෙස් රටවල. ලංකාවේ ප්‍රථම මහා භාරකාරතුමිය වන තරංගනී කීනවින්න දිසානායක තමයි අපේ බාලම නංගි. ශාන්තා නංගී ‍පොඩි කා‍ලේ ඉඳලාම ඉවුම් පිහුම් වැඩවලට තමයි වැඩි ආසාවක් දැක්වූයේ.

පවු‍ලේ හැමෝම එකට එකතු වුණාම නංගි අපට රසට උයලා කන්න දෙනවා. ඇය මේ විදිහට අපි අතරින් වෙන්වුණා කියන එක අපට තවමත් හිතාගන්න බැහැ අප සමග එසේ පැවැසුවේ ශාන්තාගේ වැඩිමහල් සොහොයුරා වන හිටපු නියෝජ්‍ය ‍පොලිස්පති ජගත් කීනවින්නයි.

කිෂාන් කනංකෙ
 

Lakbima Online

Download Lakbima Mobile App

 
 

 

Get In Touch With Us

Explore More

Please publish modules in offcanvas position.