lakbima.lk

මාරක රිය අනතුරක් සිදුකිරීම හේතුවෙන් සංගීතවේදී ජනනාත් වරකාගොඩ මීට දෙසතියකට පමණ පෙර අත්අඩංගුවට පත්වුණා. ඔහුගේ මෝටර් රථයේ ගැටී මියගොස් තිබුණේ හැට දෙහැවිරිදි වියේ පසුවූ කාන්තාවක්. මෙම සිදුවීම වෙත රටේ බොහෝ දෙනාගේ අවධානය යොමු වුණේ ජනනාත් මෙන්ම ඔහුගේ දෙමාපියන් වන ප්‍රවීණ රංගන ශිල්පී විජේරත්න වරකාගොඩ සහ රංගන ශිල්පිනී චිත්‍රා වරකාගොඩද රටම දන්නා හඳුනන කලාකරුවන් වන නිසයි. අත්අඩංගුවට පත්ව දින කිහිපයක් රක්ෂිත බන්ධනාගාරගතව සිටි ජනනාත් පසුගියදා (18) ඇප මත මුදාහැරුණා.

හිතපු නැති විදිහේ අකරතැබ්බයකට නේද ඔබට මුහුණ දෙන්න වුණේ?

ඒක නම් ඇත්ත තමයි. මම කවදාවත් හිතුවේ නැහැ මේ වගේ සිදුවීමකට මට මුහුණ දෙන්න වේවි කියලා. මගේ පෙර කරුමයක් තිබිලා වෙන්න ඇති මේ වගේ අනතුරක් මගේ අතින් වෙලා රිමාන්ඩ් බන්ධනාගාරගත වෙන්න මට සිද්ධ වුණේ.

කොහොමද මේ තරම් ඉක්මනින් ඔබට රිමාන්ඩ් භාරයෙන් නිදහස් වෙන්න ලැබුණේ?

රිය අනතුරු කියන්නේ කවුරුවත් වුවමනාවෙන් කරන දෙයක් ‍නෙවෙයිනේ. මේකත් බොහොම අහම්බෙන් සිද්ධ වෙච්ච අනතුරක්. අනතුර නිසා මට දවස් කිහිපයක් රිමාන්ඩ් බන්ධනාගාර ගත වෙලා ඉන්න සිදුවුණා. සාමාන්‍ය ක්‍රමවේදය අනුව පරීක්ෂණ කරලා මාව ඇප මත නිදහස් කළා. මේ සම්බන්ධයෙන් නඩු කටයුතු ඉදිරියේදී සිද්ධ වේවි.

මේ රිය අනතුර ගැන විවිධ විදිහේ පුවත් පැතිර ගියා. කොහොමද මේ මාරක රිය අනතුර සිද්ධ වුණේ කියලා අපි ඔබෙන්ම දැනගන්න කැමැතියි?

අනතුර සිද්ධ වෙච්ච විදිහ ගැන මට කියන්න තියෙන්නේ මෙච්චරයි. මගේ මෝටර් රථය කහ ඉර පසු කරනවාත් එක්කම වගේ තමයි මියගිය කාන්තාව දකුණු පැත්තෙන් දුවගෙන ඇවිත් වාහනයේ බඳේ වැදුණේ. මේ ගැන ආරංචිය පැතිර ගිය විදිහට, හරියටම කහ ඉර මතින්මත් ‍නෙවෙයි අදාළ කාන්තාව පාර පැන්නේ. අනතුර සිද්ධ වෙද්දි මගේ මෝටර් රථයේ පිටුපස කොටස තමයි කහ ඉර මත තිබුණේ. මෝටර් රථයේ ගැටුණු කාන්තාව එම ස්ථානයේදීම මියගියා.

සාදයකට සහභාගි වී නැවත එමින් සිටියදී ඔබේ අතින් මෙම රිය අනතුර වූ බවටත් පුවත් පැතිර ගියා. ඒ ආරංචිය ඇත්තක්ද?

ඒක සම්පූර්ණයෙන්ම බොරු කතාවක්. පසුගිය 10 වැනිදා මහියංගණයේ බිබිල පාරෙදි වල් අලියකුගේ පහර දීමකින් පුද්ගලයෙක් මියගියා. ඔහුගේ අවමංගල්‍යයට සහභාගි වෙලා එන ගමන් තමයි පාන්දර 5.30 ට විතර කිරිල්ලවල ප්‍රාදේශීය ‍ලේකම් කාර්යාලය ඉදිරිපිටදී මේ අනතුර සිදුවුණේ. වල් අලි ප්‍රහාරයෙන් මියගිය කෙනාගේ දියණිය මා සමග ශ්‍රී ජයවර්ධනපුර විශ්වවිද්‍යාලයේ ‍ලේඛකත්වය සහ සන්නිවේදනය පිළිබඳ ඩිප්ලෝමාව හදාරණ ශිෂ්‍යාවක්. එම පාඨමාලාව හදාරණ ශිෂ්‍යයන් කිහිප දෙනකුත් ඒ වෙලාවේ මගේ මෝටර් රථයේ සිටියා.

ඒ අවස්ථාවේ ඔබ බිමත්වද හිටියේ?

මමවත්, මා සමග සිටි වෙනත් කිසිවකුවත් ඒ වෙලාවේ මත්පැන් පානය කරලා හිටියේ නැහැ. ඒ බව ‍පොලීසිය කළ
පරීක්ෂණවලිනුත් තහවුරු වුණා. මේ සිදුවීමෙන් පස්සේ ජනනාත් මේ දවස්වල හොඳටම බොනවා කියලත් සමහරු මා ගැන බොරු ආරංචි පතුරුවලා තියෙන බව මට ආරංචියි. මට තේරෙන්නේ නැහැ ඇයි අපේ රටේ මිනිස්සු තමන් හරියටම නොදන්න දේවල් ගැන මේ වගේ බොරු කතා හදන්නේ කියලා.

මියගිය කාන්තාව වෙනුවෙන් යම්කිසි සාධාරණයක් ඉටු කරන්න ඕනෑ කියලා හිතෙන්නේ නැද්ද?

මියගිය කාන්තාව කිසිම හව්හරණයක් නැති, කාලයක් තිස්සේ රෝගී තත්ත්වයකින් පෙළුණ අවිවාහක කෙනෙක්. ඒ රෝගයට ප්‍රතිකාර ගන්න යමින් සිටියදී තමයි ඇය මේ අනතුරට ලක්වුණේ. ඇගේ අවමංගල්‍ය කටයුතු සඳහා සියලුම විය පැහැදම් දැරුවේ අපියි. මගේ පියාත් ඒ අවමංගල්‍යයට සහභාගි වුණා. මියගිය කාන්තාවගේ ඥාතීන්වත් මේ සිදුවීම ගැන අප සමග කිසිදු ගැටුමක් ඇතිකර ගත්තේ නැහැ. මම හිතන්නේ මේ විදිහේ මරණයකට මුහුණ දෙන්න ඇගේ ඉරණමේ ලියැවිලා තියෙන්න ඇති. මේ අනතුරෙන් පස්සේ මමත් තව තවත් පින් අතේ වැඩ කරමින් ජීවත් වෙන්නයි හිතාගෙන ඉන්නේ.

- කිෂාන් කනංකෙ

Page 2 of 163

Lakbima Online

Download Lakbima Mobile App

 
 

 

Get In Touch With Us

Please publish modules in offcanvas position.