lakbima.lk

එක්සත් ජාතික පක්ෂය ජාතික ආණ්ඩුවකට යන්න හදන්නේ ඇයි?

අපේ රටේ ඔක්තෝබර් 26දා ඇති කරපු ව්‍යවස්ථා විරෝධී කුමන්ත්‍රණයේදී පක්ෂ ගණනාවක් ඊට එරෙහිව අපට සහය දුන්නා. දින 51 තුළ පැවැති ආණ්ඩුව පරාජය කරන්න ගෙන ආ විශ්වාසභංග යෝජනාවට පක්ෂව ඡන්ද 123ක් අපට ලැබුණා. රටේ ප්‍රජාතන්ත්‍රවාදය ශක්තිමත් කරන්න පැමිණි පිරිස සමග ඉදිරියට යන්න ඕනා කියන මතය අපේ පක්ෂයේ බොහෝ අය ගාව තියෙනවා. මොකද විධායකයෙන් අපට මේ වන විට අනතුරු ඇඟවීම් ගණනාවක්ම ඇවිල්ලා තියෙනවා. මහින්ද රාජපක්ෂ රජය ගත්තු ඩොලර් බිලියන 5.5ක ණයක් අපට මේ වසරේදී ගෙවන්න වෙනවා. ස්ථාවරව ආණ්ඩුව ගෙනියන්න මන්ත්‍රීවරු 113 කට වැඩි සංඛ්‍යාවක් අපට හිටියේ නැතිනම් රට ඉදිරියට ගෙනියන්න බැරි වෙනවා.

ඇමැතිධුර වැඩි කිරීමේ වැය බර එතකොට දරන්නේ කව්ද ජනතාවට නේද මේ බර දරන්න වෙන්නේ?

ජාතික ආණ්ඩුවකදී ඇමැතිධුර වැඩිවීමේදී අමතර   වැය බරක් දරන්න වෙන බව ඇත්ත. නමුත් ස්ථාවර ආණ්ඩුව නැති වුණාම අපට ඊට වඩා වැඩි පාඩුවක් දරන්න වෙනවා. දැන් දින 51 තුළ වෙච්චි දේ බලන්න. ඒ කාලය තුළ වූ පාඩුව ගණනය කළාම එය බිලියන ගණනක්. මහ බැංකුවේ තිබුණ ඩොලර් සංචිත බිලියනයක් පමණ විනාශ වුණා. සංචාරය සඳහා හොඳම ගමනාන්තය ලංකාව කියලා නම් කරද්දී රටේ ඇති වූ මේ අර්බුදය නිසා සංචාරක කර්මාන්තයට පාඩු වුණා. ණය ගෙවන්න පුළුවන් රටවල් ලැයිස්තුවේ අපි හිටපු තැනින් තවත් පහළට වැටුණා.  මේ වන විට විධායකයෙන් අපට අභියෝගයක් තියෙනවා. ශ්‍රී ලංකා නිදහස් පක්ෂයෙන් අපට එකතු වූ අයට ඇමැතිකම් දෙන්නේ නැහැ කියලා ජනාධිපතිවරයා කියනවා. ව්‍යවස්ථාවට පිටින් යම් යම් දේ කරන්න බැහැ කියලා එතුමා කියනවා.

ශ්‍රීලනිපයේ අයට වඩා එක්සත් ජාතික පක්ෂයේම අයට ඇමැතිකම් දෙන්න නේද මේ උත්සාහ කරන්නේ.?

එක්සත් ජාතික පක්ෂයේ අයට ඇමැතිකම් දෙන්න බැහැ කිව්වේ ජනාධිපතිතුමානේ. ඒක තමයි මම කිව්වේ එතුමා ව්‍යවස්ථාවට පිටින් කටයුතු කරනවා කියලා. රංගේ බණ්ඩාර ඇමැතිතුමාට, ෆීල්ඩ් මාෂල් සරත් ෆොන්සේකා මහතාට ඇමැතිකම් දෙන්න කියලා අපි නම් කළත් දුන්නේ නැහැ. රටක විධායකය උසුලන තැනැත්තා තමන්ගේ පෞද්ගලික මතිමතාන්තර අනුව කටයුතු කරනවා නම් ඒක වැරදියි. ඔක්තෝබර් 26 දා වෙච්ච දේ වැරදි කියලා ව්‍යවස්ථාදායකයේ බහුතරය කිව්වා. ශ්‍රේෂ්ඨාධිකරණයේ   විනිසුරුවරු සියලු දෙනාම කිව්වා. එම නිසා එතුමා රට ගැන හිතලා මීට වඩා පරිණතව කටයුතු කළ යුතුය කියන මතයේ මම ඉන්නවා. රට අස්ථාවර කිරීමේ හානිය එන්නේ රටට හා රටේ ජනතාවටයි.

ඔබ මෙලෙස කීවත් එක්සත් ජාතික පක්ෂයේම පසුපෙළ මන්ත්‍රීවරු ජාතික ආණ්ඩුවකට විරුද්ධයි. ඔවුන් එය හදන්න දෙන්නේ නැහැ කියනවා. එවිට කොහොමද පාර්ලිමේන්තුවේ මෙය සම්මත කර ගන්නේ පහුගිය ජාතික ආණ්ඩුවේ ගෙනිච්ච වැඩපිළිවෙළ නොවෙයි අපි මෙවර ගෙනියන්නේ. එක්සත් ජාතික පෙරමුණට එකතු වෙන කණ්ඩායමක් හැටියට තමයි මෙවර ජාතික ආණ්ඩුව ගෙනියන්නේ. පහුගිය ජාතික ආණ්ඩුව තුළ මොකද වුණේ කියලා දැන් රටම දන්නවා. ඒකට මුළු රටම විරුද්ධයි. විරුද්ධ වෙන්න හේතුව දෙගොල්ලා දෙපැත්තට කඹ ඇදගත්ත නිසයි. එයින් පීඩාවට පත් වුණේ රටේ ජනතාවයි.   

පසුගිය බ්‍රහස්පතින්දා මේ යෝජනාව පාර්ලිමේන්තුවට ඉදිරිපත් කරනවා කියා කීවත් හදිසියේම එය අකුලා ගෙන තියෙනවා. මොකද වුණේ?

පක්ෂ නායක රැස්වීමේදී කථානායකතුමා පැහැදිලිව කියලා තිබුණා මේ අවස්ථාවේ එය ගැනීම ස්ථාවර නියෝගවලට එකඟ නැහැ කියලා. මොකද සභානායකතුමා ජාතික ආණ්ඩු යෝජනාව කථානායකතුමාට භාරදීලා තිබුණේ ගිය සතියේදීයි. යෝජනාවක් භාරදී දින 5 ක කාලයක් තිබිය යුතුය කියලා ස්ථාවර නියෝගවල සඳහන් වෙනවා. ඒ නිසා කථානායකතුමා සාධාරණ ඉල්ලීමක් කරලා තිබුණා ඒ දින 5 ගියාම මේ යෝජනාව ඉදිරිපත් කරන්න කියලා. ඒ ගැනත් අපි දැනුම්වත් වුණා ඒ වෙලාවේ. එම නිසා අපි තීරණය කළා නීත්‍යනුකූල තත්ත්වය තුළ මේ යෝජනාව ඉදිරිපත් කරන්න.

එක්සත් ජනතා නිදහස් සන්ධානය, දෙමළ ජාතික සන්ධානය හා ජනතා විමුක්ති පෙරමුණ විරුද්ධව ඡන්දය ප්‍රකාශ කිරීමෙන් මෙය පරාජය වේවි යන භයට පසු බැස්සා කියලා ඔවුන් කියනවා. ඒක ඇත්තද ?

නැහැ අපට බහුතරය තිබුණා. ජනතා විමුක්ති පෙරමුණේ අදහස ගැන මම දන්නේ නැහැ. නමුත් දෙමළ ජාතික සන්ධානය හා ශ්‍රීලනිප තවත් මන්ත්‍රී කණ්ඩායමක් අපට සහය දෙන්න ඉදිරිපත් වෙලා තියෙනවා. එම නිසා සංඛ්‍යාව ගැන අපට ප්‍රශ්නයක් තිබුණේ නැහැ. කථානායකතුමාගේ ඉල්ලීම අනුව නියම ක්‍රමවේදයට ගේන්න ඕනා නිසා තමයි කල් ගත්තේ.ඔබ එසේ කීවත් ස්ථාවර නියෝග අත්හිටුවලා මෙම යෝජනාව ගේන බව තමයි සභානායකවරයා කලින් කියලා තිබුණේ.

නැහැ. නමුත් අපට අවශ්‍ය සංඛ්‍යාව තියෙනවා නම් කවද වුණත් ගේන්න පුළුවන්. එදා අපි ස්ථාවර නියෝග අත්හිටුවලා විශ්වාසභංගය ගෙනාවේ පාර්ලිමේන්තු සැසිවාරය කල් තියලා නව සැසිවාරයක් පටන් ගෙන න්‍යාය පත්‍ර සකස් කොට නොතිබූ නිසයි. ඒ තත්ත්වය දැන් නැති නිසා අපට එහෙම කරන්න අවශ්‍යතාවයක් නැහැ. මොකද එම පූර්වාදර්ශයට අගමැතිතුමාත් කැමති නැහැ. කථානායකතුමාත් ඊට කැමති නැහැ. සත්‍ය කාරණාවනම් ඒ නිසා තමයි මේක කල් දැම්මේ.

ශ්‍රී ලංකා නිදහස් පක්ෂයේ කණ්ඩායමක් එන බව කීවත් ඔවුන් නොපැමිණීම නිසා යෝජනාව කල් තැබූ බවටත් ප්‍රකාශ වෙනවා.

නැහැ නැහැ. ශ්‍රී ලංකා නිදහස් පක්ෂයේ කණ්ඩායමක් පැහැදිලිවම අපත් සමග එකතු වෙන්න ඉන්නවා.
ජාතික ආණ්ඩුවක් පිහිටුවන්න ගිවිසුම් අත්සන් කරන්නේ කාත් සමගද?

මේ වෙලාවේ ඒ ගැන වැඩි විස්තර කතා කිරීම සුදුසුය කියලා මම හිතන්නේ නැහැ. ඊළඟ අවස්ථාවේදී අපට එය බලා ගන්න පුළුවන්. ව්‍යවස්ථාවේ පවතින ආකාරය ප්‍රධාන පක්ෂයක් සමග තවත් පක්ෂයක් හෝ කිහිපයක් එකතු වෙලා ජාතික ආණ්ඩුවක් හදන්න පුළුවන්. මෙතනදී ප්‍රධාන පක්ෂය      අපියි. එම නිසා ඕන පක්ෂයක් එක්ක අපට ගිවිසුම් අත්සන් කරන්න පුළුවන්. ව්‍යවස්ථාවෙන් පිට අපි කටයුතු කරන්නේ නැහැ.


එක් මන්ත්‍රීවරයෙකු පමණක් සිටින ශ්‍රී ලංකා මුස්ලිම් කොංග්‍රසය සමග ජාතික ආණ්ඩුවක් පිහිටුවීමේ ගිවිසුම් අත්සන් කරන එක කොතරම් සාධාරණද?

එතනදී බලන්න ඕනේ සාධාරණද නැතිද කියන කාරණයට වඩා පවතින නීතිය ගැනයි. එතනදී අපි ඔක්තෝබර් 26 දා විධායකය කරපු විදියට නීතිය උල්ලංඝනය කරලා අපි වැඩ කරන්නේ නැහැ. අපි කටයුතු කරන්න බලා‍පොරොත්තු වෙන්නේ ව්‍යවස්ථාවට අනුවයි.

ඔබ කියන ආකාරයට ජනාධිපතිවරයාත් අගමැතිවරයාත් අතර විරසකය එන්න එන්නම වැඩි වෙනවා. මෙහෙම බැලුවහම ආණ්ඩුව ඉදිරියට කරගෙන යන්න පුළුවන් වෙයිද?

ඔක්තෝබර් මාසේ 26 දා ජනාධිපතිතුමාට තිබුණ ජනවරම එතුමා නැතිකර ගත්තා. මොකද මහින්ද රාජපක්ෂ මහත්තයට විරුද්ධව හැට දෙලක්ෂයක් ජනතාව එතුමාට ඡන්දය දුන්නා. ඒ ජනවරමට එතුමා පිටුපාලා තියෙනවා.

එක්සත් ජාතික පක්ෂය සුදානම්ද ජනාධිපතිවරණයකට?

ඔව් අපි සුදානම්. අපිත් කියන්නේ ජනාධිපතිවරණයක් කැඳවන්න කියලායි. මොකද මහ මැතිවරණයක් කැඳවුවත් අද තියෙන තත්ත්වය වෙනස් වෙන්නේ නැහැ. මොකද ජනාධිපතිවරණයකින් තමයි සැබෑ ජනවරම බලාගන්න පුළුවන් වෙන්නේ. ජනාධිපතිතුමා ජනාධිපතිවරණය කැඳවූ වහාම අපි කෘත්‍යාධිකාරී මණ්ඩලය රැස්වෙලා අපේක්ෂකයා  කව්ද කියලා අපි ප්‍රකාශයට පත් කරනවා.

එක්සත් ජාතික පක්ෂය එසේ කීවත් ජනාධිපතිවරයා කියන්නේ පළාත් සභා මැතිවරණය කැඳවනවා කියලායි?

පළාත් සභා මැතිවරණය කල්දැම්මේ ජනාධිපතිතුමාගේම පක්ෂයේ ඇමැතිවරයානේ. එතුමා තමයි මේ ප්‍රශ්නයේ මූලිකයා. ප්‍රාදේශීය සභා මැතිවරණය කල් දැම්මෙත් එතුමාමයි. දැන් එතුමා ඔවුන්ගේ වැරදි අපේ පිටට පටවන්න හදනවා.

මැතිවරණ කොමිසමේ සභාපති කියලා තිබුණා ජනාධිපතිවරණයට පෙර පළාත් සභා ඡන්දය තිබ්බේ නැතිනම් ඉල්ලා අස්වෙනවා කියලා.

තනතුරෙන් ඉල්ලා අස්වෙනවාද නැතිද කියන එක එතුමාගේ තීරණයක්. මම නම් කියන්නේ එතුමාට අස්වෙන්න තිබුණේ පාර්ලිමේන්තුව විසුරුවා හරිමින් ආණ්ඩුක්‍රම ව්‍යවස්ථාව   උල්ලංඝනය කරපු වෙලාවේ කියලා.

එක්සත් ජාතික පක්ෂ ආණ්ඩු පැමිණි හැම වෙලාවේම ජනතාවගේ අතමිට සරු වෙනවා කියලා මතයක් තිබුණත් අද එය වෙනස් වෙලානේ. අද ජනතාව අතේ මුදල් නැහැ. ඇයි එහෙම වුණේ.

එදා තිබුණේ තනි ආණ්ඩු වුණත් මේ වෙලාවේ තිබුණේ පක්ෂ දෙකක ජාතික ආණ්ඩුවක්. ශ්‍රීලනිප මන්ත්‍රීවරු එළියට ගිහින් ආණ්ඩුව විවේචනය කෙරුවා. හොඳම ඇමැතිකම් ඔවුන්ට ලැබුණා. ආණ්ඩුවේ හොඳ කාරණා සියල්‍ලේ අයිතිවාසිකම් ඔවුන් සතු කරගනිමින් නරක සියල්ල අපේ පිට පැටෙව්වා. අතමිට සරු වෙන යුගය ඉදිරියට එනවා.

ජාතික නිදහස් උත්සවය ඔබ අමාත්‍යාංශයෙන් කෙරුණේ. නමුත් සරත් ෆොන්සේකා මන්ත්‍රීවරයාට කිසිම කැඳවිමක් කළේ නැහැ. ඇයි එහෙම වුණේ.

නැහැ. ඇත්තටම සරත් ෆොන්සේකා මහතාට ආරාධනා කළා. මම හිතන්නේ ජනාධිපතිතුමා සමග පැවැති ගැටලුවක් තමයි එතන ඉස්මතු වුණේ. එතුමා පැමිණෙද්දී හමුදාවෙන් ලැබෙන නිසි පිළිගැනීම දෙන්න බැහැ කියන කාරණය තමයි මතු වෙලා තිබුණේ. අපේ අමාත්‍යාංශය පැත්තෙන් එතුමාට ප්‍රශ්නයක් තිබුණේ නැහැ. නමුත් ආරක්ෂක   අමාත්‍යාංශය පැත්තෙන් යම් යම් ගැටලු මතු වුණා.

ඔහුට එක්සත් ජාතික පක්ෂයෙන් පැමිණි කැපිල්ලක් මේකට හේතුවුණා කියලාත් ප්‍රචාරය වුණා.

නැහැ. එහෙම දෙයක් නැහැ. අපි ආරාධනා කළා. ආරාධනාව නොවෙයි එතන තිබුණ ප්‍රශ්නය වුණේ්. එතුමාට නිසි තැන ලැබෙනවාද කියන එකයි. හමුදා ආචාර පෙළපාළියක් යන වෙලාවේදි එතන සිටින පිළිවෙළක් තිබෙනවා. මොකද හමුදාපති ඇතුළු පිරිස් සහභාගි වෙනවා. එතනදී එතුමාට හිමි තැන තිබෙනවාද කියන ගැටලුව තමයි මතු වෙලා තියෙන්නේ. එය අපේ ප්‍රශ්නයක් නොවෙයි ආරක්ෂක අමාත්‍යාංශය තමයි ඒ ගැන බලන්නේ. ඒ නිසා එතනයි ප්‍රශ්නය මතු වෙලා තියෙන්නේ.  

ලසන්ත වීරකුලසූරිය

  1. ව්‍යවස්ථා සංශෝධන සාකච්ඡාවලින් මහින්දලා ඉවත් නොවන්නේ ඇයි?
  2. පොලිස් විරුවන්ට සිදුවන නොසැලකිල්ල ගැන විපක්ෂ නායක පාර්ලිමේන්තුවේදී කළ විශේෂ ප්‍රකාශය
  3. පාර්ලිමේන්තුව උණුසුම් කළ කතානායකගේ සම්පූර්ණ කතාව
  4. ආයෙත් ජාතික ආණ්ඩුවක් නම් හැදෙන්නේ නෑ
  5. හොරට නිදාගෙන ඉන්න හාදයන් ඇහැරවන්න අමාරුයි
  6. ඇමතිවරු වැඩිකරගන්න ආණ්ඩුව කරන උප්පරවැට්ටිය
  7. අපේ එකම අරමුණ අපේම ජනාධිපතිවරයෙක්
  8. ජනපති අපේක්ෂකත්වය මෛත්‍රීට නොලැබුනොත් මම දේශපාලනයෙන් සමු ගන්නවා
  9. සුමන්තිරන් - සම්පන්දන් කියන්නේ එල්.ටී.ටී.ඊ.කාරයෝ නොවේ
  10. රනිල්ගේ සුමන්තිරන්ගේ ගැටවලට අහුවෙන්න එපා - මහාචාර්ය මැදගොඩ අභයතිස්ස හිමි
  11. මැතිවරණයට බිය දේශපාලන පක්‍ෂ
  12. මහින්ද ශ්‍රීලනිපයේ බව අපි පිළිගන්නවා - එතුමත් ඒ බව කියනවා
  13. දයාසිරිගේ කතා අපට වලංගු නෑ

Page 1 of 14

Lakbima Online

Download Lakbima Mobile App

 
 

 

Get In Touch With Us

Please publish modules in offcanvas position.