Home    |    Daily Lakbima    |    Sunday Lakbima    |   Rajina |    Archive    |    Advertise With Us    |     Careers Email - lakbimaonline@gmail.com youtube
Coss Ear2
lakbima.lk
COSS Ear 1
                                                                                        එසැනින් පුවත් | ගොසිප් | විශේෂ පුවත් | සුන්දර ලක්බිම | ව්‍යාපාරික පුවත්     

ගල්ගමුවේ දළ පූට්ටුවාගේ ඛිෙදනීය මරණය ඇති කළ කම්පනයෙන් තවමත් රට මිදී නැත. ඝාතනය කරන ලද අන් හස්තීන්ට මෙන් නොව දළ පූට්ටුවා වෙනුවෙන් කරන පින් පැමිණවීම් මෙන්ම වරද කළ වූවන්ට දඬුවම් ඉල්ලා කරන දේව කන්නලව්ද තවමත් විවිධ පළාත්වලින් වාර්තා වෙයි. ඊට හේතු දෙකකි. ඒ ගල්ගමුවේ දළ පූට්ටුවා මිනිසුන් විසින් කරන ලද අනේක විධ ශාරීරික හිංසාවන් ගෙන් පීඩා විඳිමින් සිටියදී මෙලෙස අකල් මරණයකට පත් වීම සහ අන් වන අලින්ට සාපේක්ෂව මිනිසුන් සමග යම් සහජීවනයක් පවත්වාගෙන යෑම ඒ හේතු දෙකය. කෙසේ වෙතත් දළ පූට්ටුවා වෙනුවෙන් හෙළු කඳුළු වියැකෙන්නටත් පෙර තවත් එවැනිම සාහසික අපරාධ වැලක් වාර්තා වීම වෙනස්ම ආකාරයේ කතිකාවකට මගපාදා තිබේ.
ගල්ගමුවේ දළ පූට්ටුවාගේ සිරුර සොයා ගත් දින සිට දින හතක් ඉකුත්වන්නට පෙර තවත් දළ ඇතුන් සිව්දෙනකු පුත්තලම, කැකිරාව, තබ්බෝව ආදී ප්‍රදේශවලදී ඝාතනයට ලක්වීම කුමන්ත්‍රණකාරී ක්‍රියාවක්දැයි මේ වන විටත් සැක පළවන්නට පටන් ගෙන තිබේ.
මෙම සැකය පරිසරවේදීන් තුළ පමණක් නොව වනජීවී විෂය භාර අමාත්‍යවරයා වන ගාමිණී ජයවික්‍රම පෙරේරා තුළද ඇතිව ඇති බව ඔහු විසින් මාධ්‍ය හමුවේ කරන ලද ප්‍රකාශවලින් තහවුරු වෙයි. සති දෙකක් තුළ දළ ඇතුන් මේ තරම් ගණනක් මරා දැමීම කුමන්ත්‍රණයක් වියහැකිය. මේ පිළිබඳ වරදකරුවන් වන අයට වහා දඬුවම් පැමිණවිය යුතුයි. දුර්ලභ සතුන් මරණ අයට පවතින නීති රීති වෙනස් කර හෝ දැඩි දඬුවමක් දිය යුතුයි යනුවෙන් වනජීවී විෂයභාර ඇමැතිවරයා ප්‍රකාශ කළ බව මාධ්‍ය ඔස්සේ වාර්තා විය.
කෙසේ වෙතත් පසුගිය සතියේ වාර්තා වූ ඇතුන්ගේ මරණ සියල්ලම මානව ක්‍රියාකාරකම්වල ප්‍රතිඵල බව ඒ සිදුවීම් ගැන 
පරීක්ෂණ කරන ‍පොලිස් සහ වනජීවී නිලධාරීහු සහතික කරති.
පසුගිය සතියේ මුලින්ම වාර්තා වූ ඇත් මරණ සිදුව තිබුණේ සිරම්බිඅඩි ප්‍රදේශයේදීය. ඒ වන සංරක්ෂණ දෙපාර්තමේන්තුවට අයත් වන රක්ෂිතයක දිවි ගෙවූ සෙල්ලං කන්දේ තනි දළයා නම් ඒක දන්ත හස්තියාගේ මරණයයි. තනි දළය නිසාම කොයි කාගේත් අවධානයට ලක් වූ මේ හස්තියාගේ මරණයට හේතුව වස ශරීර ගත වීම බව මරණ පරීක්ෂණය සිදුකළ අනුරාධපුර පණ්ඩුල ගම වනජීවී ඒකකයේ පශු වෛද්‍ය චන්දන ජයසිංහ පවසන්නේය. අඩි 9කට ආසන්න උසකින් යුත් දැවැන්ත හස්තියෙකුට මරු කැඳ විය හැකි උග්‍ර විෂක් ප්‍රදේශවාසීන් අතර ගැවසීම වනසතුන්ට පමණක් නොව මිනිසුන්ටද තර්ජනයකි. මේ වනතුරුත් මීට අදාළ සැකකරුවන් අත්අඩංගුවට ගෙන නැති අතර පරීක්ෂණ අඛණ්ඩව සිදුවන බව දැනගන්නට තිබේ.
සෙල්ලංකන්දේ තනි දළයාට පසු වාර්තා වූ අනෙක් ඝාතනය වූයේ තබ්බෝව ප්‍රදේශයේදී ඇතෙකු වෙඩි තබා මරා දැමීමය. මෙම සිදුවීමට අදාළ එක් පුද්ලයෙකු අත්අඩංගුවට ගෙන ඇති බවද වාර්තා වෙයි. ඊළඟ ඇත් මරණ වාර්තා වූයේ කැකිරාව අළගොල්ලා වැව ළඟදීය. එහිදී සිදුව තිබුණේ නීතිවිරෝධීව අදින ලද විදුලි රැහැනක පැටලීමෙන් සද්ධන්ත ඇත් රජෙකු මිය යෑමය.
පිට පිට වාර්තා වූ සිව්වැනි අලි මරණය පසුගිය 12 වැනිදා තිරප්පනෙන් වාර්තා විය. එහිදී මිය ගොස් සිටියේ ගැබ්බර කෙනරකි. එයද වෙඩි වැදීමකින් සිදුවූ බව වාර්තා වන අතර, නවගත්තේගම තම්මැන්නා වැටිය සහ රිටිගල ස්වාභාවික රක්ෂිතය ආශ්‍රිතවද පසුගිය දින 10 තුළ අලි ඇත් මරණ වාර්තා වී ඇත.
මෙම අලි ඇත් මරණවලින් එකක් වන සංරක්ෂණ  දෙපාර්තමේන්තුව සතු රක්ෂිතයක ද තවත් එකක් වනජීවී දෙපාර්තමේන්තුව සතු රක්ෂිතයකද සිදුව ඇත. ඉතිරි ඒවා සියල්ල ගම්මාන ආශ්‍රිත හුදකලා බැදි කුට්ටි සහ වැව් පිටි ආශ්‍රිතව වී ඇත. එහෙත් මේ ඇත් මරණ සම්බන්ධව බොහෝ දෙනා සෘජුවම චෝදනා කරනුයේ වනජීවී දෙපාර්තමේන්තුවටය. එහෙත් එලෙස චෝදනා කිරීම සාධාරණ නොවනා බව වනජීවී දෙපාර්තමේන්තුවේ පශු වෛද්‍ය (අධ්‍යක්ෂ සෞඛ්‍ය) තාරක ප්‍රසාද් පවසන්නේය. 
ලංකාවේ මුළු බිම් ප්‍රමාණයෙන් 14ක් විතර පාලනය වන්නේ වනජීවී දෙපාර්තමේන්තුවෙන්. මේ ප්‍රමාණය රට පුරාම විසිරී තිබෙනවා. ඒ වාගේම දැඩි භූ විෂමතාවක් සහිත කලාපයක් මින් ආවරණය වෙනවා. ඒත් අපට ක්‍ෂේත්‍ර රාජකාරීවලට ඉන්නේ 850ක විතර පිරිසක්. ඇතැම් අයට මාස ගණනක් නිවාඩු ගන්න විදිහක් නෑ. ඒ තරම් අසීරුතා මැද තමයි අපි කටයුතු කරන්නේ. 
වයඹ වනජීවී කලාපය ආශ්‍රිතව සේවය කරනා වනජීවී දෙපාර්තමේන්තු සේවකයකු අප හා පැවැසුවේ මෙවැනි අදහසකි. ඩී.ජී.ගේ අවසරය නැතිව පත්තරවලට කතා කරන්න අපිට බෑ. ඒත් පත්තරවල අය නිතර අපිට මුණගැසෙන්නේ නෑ. ඒ හින්දයි මේ ටිකවත් කියන්නේ. අලි ගම් වදින එක වළකන්න තමයි විදුලි වැටවල් හදලා තියෙන්නේ. ඒවායේ කම්බි කපලා විකුණන්නේ ගම්වලට මිනිස්සු. සමහර අය මේ කම්බිවලින් නීති විරෝධීව විදුලිය අරගෙන වගා බිම්වලට දානවා. තවත් අය පන්දලම් බඳිනවා. අලි වැටේ බැටරි ට්‍රාන්ස්ෆෝමර් ගලවා විකුණනවා. මේවා කරන්නේ ගම්වල මිනිස්සු නැතිව වනජීවී එකේ අපි නොවෙයි. අන්තිමට අලි ගමට පැන්නට පස්සේ බෝඩ් අරං පාරට එනවා උද්ඝෝෂණයට. අලි ගහලා මරපු අයගේ මිනී පෙට්ටි මහ පාරට ගෙනල්ලා මැරිච්ච අයටත් අවනම්බු කරනවා. ඒත් හිතන්නේ නෑ. විදුලි වැට කඩලා අලි ගමට ගෙන්න ගන්නේ අපිමයි කියලා. අනිත් එක දේශපාලන ඇඟිලි ගැසීම්. කිසිම වනජීවී මහත්තයෙකුට වැඩ කරන්න දේශපාලකයෝ දෙන්නේ නෑ. හිටපු ඩී.ජේ. (සුමිත් පිලපිටියට ) යන්න වුනෙත් ඔය දේශපාලන ඇඟිලි ගැසීම් නිසා. 
කෙසේ නමුත් වනජීවී පශු වෛද්‍ය චන්දන ජයසිංහ පවසනුයේ අලි හා මිනිසුන් අතර ඇතිව ඇති මේ ගැටුමට මූලික හේතුව අවිධිමත් මානව ක්‍රියාකාරකම් බවයි. අලි මංකඩවල් ආශ්‍රිතව ගොවි බිම් බිහි වීම, වන බිම් එළි කිරීම මෙන්ම වනෝද්‍යානවලට ගවයන් ඇතුළු කිරීම වැනි ක්‍රියා නිසා ආහාර, සහ ජලය සොයා වන අලින් ගම්මාන සමීපයට එනවා ඒකට නිසි විසඳුමක් ඕන. 
ප්‍රකට වනජීවී පර්යේෂකයෙකු වන ආචාර්ය පෘථිවි රාජ් ප්‍රනාන්දු පවසනුයේ අලි මිනිස් ගැටුම 
වළකාලන්නට ඇති හොඳම ක්‍රමය වනාන්තර වටකර නොව ගම වට කර විදුලි වැට ඉදිකිරීම බවයි. එමගින් විදුලි වැට නඩත්තුව පහසුවන බව ඔහුගේ මතයයි. වනජීවී පශු වෛද්‍ය (අධ්‍යක්ෂ සෞඛ්‍ය) තාරක ප්‍රසාද් පවසනුයේ මේ වන විටත් ස්ථාන ගණනාවක එය ක්‍රියාත්මක වන බවයි. 
රටේ වන බිම්වලින් 13ක අයිතිය ඇත්තේ වන සංරක්ෂණ දෙපාර්තමේන්තුවටය. වනජීවිය  සතුව ඇති බිම් ප්‍රමාණය රටේ මුළු බිම් ප්‍රමාණයෙන් 14 යි. වනජීවීන්ගේ යහ පැවැත්ම ගැන සිතා වන සංරක්ෂණ දෙපාර්තමේන්තුව වනජීවී දෙපාර්තමේන්තුවට එකතු කර සමස්ත බිම් ප්‍රමාණය එකට පාලනය කළ හැකි නම් ඉන් වඩාත් ප්‍රතිඵල ලැබෙනු ඇතැයි තවත් පාර්ශ්ව පවසති. 
කෙසේ වෙතත් අලි ඇතුන්ට එල්ලව ඇති තර්ජනය අවම කරන්නට සියලු අලි ඇතුන්ට රේඩියෝ කරපටි පැලඳවිය  යුතු බව වන ජීවි අමාත්‍යවරයා වරක් පවසා තිබුණි. එහෙත් පරිසර නීතිඥ ජගත් ගුණවර්ධන පවසනුයේ එය අනුමත කළ නොහැකි යෝජනාවක් බවය. කරපටි පලඳවන්නට අලි ඇතුන් නිර්වින්දනය කළ යුතු අතර ඒ තුළම සැලකිය යුතු අවදානමක් ගැබ්ව ඇති බව ඔහු පෙන්වා දේ. 
අලින්ට එල්ලව ඇති තර්ජනය වළකාලනු වස් කළ යුතු හොඳම ක්‍රියා මාර්ගය වනබිම් ආරක්ෂා කිරීමයි. ඒ වගේම අලින්ට වනාන්තරයෙන්  වනාන්තරයට සංක්‍රමණය වීමට අවශ්‍ය අලි මංකඩ සකසාදීමයි. සංවර්ධන ව්‍යාපෘති ආරම්භ කරන කොට මේ බිමේ වනජීවීන්ට තිබෙන අයිතිය ගැන බරපතළ ලෙස සිතිය යුතුයි. ජගත් ගුණවර්ධන පවසන්නේය. 
 
අරුණ ලක්ෂ්මන් ප්‍රනාන්දු

ෆේස්බුක් , ට්විටර් ඇතුළු සමාජ මාධ්‍ය මේ වන විට ලෝකයේ ජනප‍්‍රියතම සන්නිවේදන මාධ්‍යය බවට පත්වෙමින් ඇත. මෙම  ජනප‍්‍රියතාව නිසාවෙන්ම විවිධ පිරිස් මෙම සමාජ මාධ්‍ය අවභාවිතාවේ යොදවන  අවස්ථාද මේ වන විට බහුලව දක්නට ඇත . මෙම අවභාවිතාවන් හේතුවෙන් අද වනවිට ලොව පුරා මෙම සමාජ මාධ්‍යට එරෙහි හා සමාජ මාධ්‍ය විරෝධී මතවාදයක්ද මතුවෙමින් පවතී.
මුහුණු පොත හෙවත් ෆෙස් බුක් සමාගමේ හිටපු විධායක නිලධාරියකුද පසුගියදා මෙම සමාජ මාධ්‍යයට එරෙහි දැඩි විවේචනයක් එල්ල කළ අතර එය ලොව පුරා ජනමාධ්‍ය තුළ මෙන්ම සමාජ මාධ්‍ය තුළද මහත්වූ ආන්දෝලනයක් ඇතිකිරීමට සමත්විය.
මෙම සිදුවීම ශ‍්‍රී ලංකාවේ අපට වඩාත් වැදගත් වන්නේ අදාළ විධායක නිලධාරිවරයා, ශ‍්‍රී ලාංකිකයකුද වීම නිසාවෙනි . ඒ අන් කිසිවකු නොව , කලක් ෆෙස්බුක් සමාගමේ පරිශීලක වර්ධන අංශයේ උප සභාපතිව කටයුතු කළ හා මේ වනවිට ලොව ප‍්‍රමුඛ පෙළේ ව්‍යාපාරිකයකු වන චමත් පළිහපිටියයි.
සමාජ මාධ්‍ය ජාල සහ ඒ හා සමාන සේවාවන් ”‍සමාජය කැබලිවලට ඉරා දමන”‍ බව පළිහපිටිය මෙහිදී එල්ල කළ ප‍්‍රධානතම චෝදනාව විය , 
ෆෙස්බුක් සමාගමේ හිටපු විධායක පළිහපිටිය මේ බව පැවැසුවේ පසුගියදා  ”ස්ටැන්ෆොර්ඞ් ග‍්‍රැජුවෙට් ස්කූල් ඔෆ් බිස්නස්” හිදී (Stanford Graduate School of Business) පැවැති වැඩසටහනකදීය.
චමත් පළිහපිටිය විසින් ඉහත කී අදහස පසුගිය  මාසයේ දී පළ කරනු ලැබ තිබූ නමුත් එය සමාජ ජාල තුළ විශාල වශයෙන් සංසරණය වීම ආරම්භවූයේ  පසුගිය සඳුදා දින සිටය. මේ වනවිට එම ප‍්‍රකාශයට සමාජ මාධ්‍ය තුළ මෙන්ම ජාත්‍යන්තර මාධ්‍ය තුළද සුවිශාල ප‍්‍රසිද්ධියක් හිමිවෙම්න් ඇත.
”‍අපි සමාජය කැබලිවලට ඉරා දමන මෙවලම් නිර්මාණය කර ඇතැයි,”‍  පළිහපිටිය මහතා පැහැදිලිවම ප‍්‍රකාශ කර තිබිණ, මෙම ප‍්‍රකාශය සමාජ මාධ්‍ය තුළ මේ වනවිට වේගයෙන් සංසරණය වෙමින් පවතින ජනප‍්‍රියතම ”‍පාඨයක්”‍ බවට පත්ව ඇත. පළිහපිටිය මහතා මෙම ප‍්‍රකාශය කර ඇත්තේ පාපොච්චාරණයක ආකාරයකින් බව මේ වනවිට බොහෝ දෙනකුගේ මතය වී ඇත.
සමාජ මාධ්‍ය විසින් ඔබ ආකෘතියකට හිරකෙරෙමින් පවතිනවා,”‍ යනුවෙන්ද මෙහිදී  ඔහු අනතුරු ඇඟවීමක් කළේය. ෆේස් බුක් සමාගමේම හිටපු විධායක නිලධාරියකු එල්ල කරන මෙම විවේචනයන්ට සමාජ මාධ්‍ය තුළ ලැබී තිබුණේ මහත් වූ අවධානයකි.
බිලියන දෙකක පිරිසක් ෆේස් බුක් වෙත  ආකර්ෂණය කරගැනීමට කටයුතු කිරීම ”‍අතිවිශාල වරදක්”‍ යයි තමාට  හැෙඟන බවයි මෙහිදී පළිහපිටිය මහතා   තවදුරටත් ප‍්‍රකාශ කළේ.
සමාජ මාධ්‍ය භාවිතයේ ”‍දැඩි වේගය අවම කිරීමක්”‍ කරන ලෙස ඔහු සමාජ මාධ්‍ය භාවිත කරන්නන්ට අවවාදයක් ද කළේය.
කෙසේ වෙතත් මෙලෙස  ෆේස් බුක් සමාගමේ හිටපු නිලධාරියෙකු එය විවේචනය කළ පළමු අවස්ථාව මෙය නොවේ. චමත් පළිහපිටිය හුදෙකලා නොකරමින්, ෆේස්බුක් සමාගමේ පළමු සභාපති සහ එහි වාණිජ වර්ධනයේ මූලික ආකෘතිය සකස් කළ ෂෝන් පාකර් (Sean Parker) ද, මෑතකදී ෆේස්බුක් සමාජ භූමිකාවේ ඉතිහාසය පිළිබඳව කනගාටුව පළ කර තිබිණ.
මෙම ප‍්‍රකාශයන් හා විවේචනයන් හරහා ෆේස් බුක් සමාගමට දැඩි අහිතකර බලපෑමක් එල්ලවෙමින් පවතින බව ලොව පුරා සමාජ මාධ්‍ය විශේෂඥයින් පෙන්වා දෙති.  සමාජ මාධ්‍යයට එරෙහිව මතුවෙමින් ඇති, මතවාදය ශක්තිමත් කරලීමට මෙම ප‍්‍රකාශයන් හේතුසාධක වී ඇති බව ඔවුන් පෙන්වාදේ.
විශේෂයෙන්ම චමත් පළිහපිටිය මහතාගේ ප‍්‍රකාශය හේතුවෙන් ෆේස් බුක් සමාගම මේ වනවිට වඩාත් කලබලයට පත්ව ඇති බවක් පැහැදිලිවම දක්නට ඇත.
පළිහපිටිය මහතාගේ ප‍්‍රකාශයට ෆේස්බුක් සමාගම විසින් වහාම ප‍්‍රතිචාර දක්වනු ලැබුවේ ඒ අනුවය. 
ෆේස් බුක් සමාගම මීට පෙර කිසිදු අවස්ථාවක මෙසේ එල්ලවන විවේචනයන්ට ප‍්‍රතිචාර දක්වන්නට ගොස් නැත. නමුත් පලිහපිටිය මහතාගේ ප‍්‍රකාශයත් සමග  ෆේස්බුක් සමාගම අසාමාන්‍ය පියවරක් තබමින් තම ආයතනය ආරක්ෂා කරගැනීමට ඉදිරිපත්ව ඇත.
ෆේස් බුක් සමාගමේ ප‍්‍රකාශකයෙක් පැවැසුවේ චමත් පළිහපිටිය වසර හයකට වඩා තම සමාගමේ සේවය නොකළ බවය. 
”‍චමත් සේවය කරන විට අප ෆේස්බුක් ලොව පුරා ප‍්‍රවර්ධනය කිරීමේ සහ නව සමාජ මාධ්‍ය අත්දැකීමක් නිර්මාණය කිරීමේ අරමුණ ඇතිව කටයුතු කළා. එවිට ෆේස්බුක් බොහෝ වෙනස් සමාගමක්. කාලයත් සමග වූ වර්ධනය වීම අනුව අපගේ වගකීම් වර්ධනය විය යුතු ආකාරයත් අපට වැටහුණා,”‍ යනුවෙන් සමාගමේ ප‍්‍රකාශකයා සඳහන් කළේය.
ෆේස් බුක් ආයතනය, පළිහපිටිය චෝදනා ඉදිරියේ අසරණ වී ඇති බවක් එම ප‍්‍රකාශයන් හරහා දක්නට ඇති බව සමාජ මාධ්‍ය විශ්ලේෂකයින්ගේ මතය වී ඇත. 
එසේම, ”‍අපි, අපේ භූමිකාව ඉතා බරපතළ ලෙස සැලකිල්ලට ගන්නවා සහ එය වර්ධනය කිරීමට උත්සාහයෙන් කටයුතු කරනවා,”‍ යනුවෙන් එම ෆේස් බුක් සමාගමේ ප‍්‍රකාශකයා වැඩිදුරටත් සඳහන් කර තිබීම මේ වනවිට ජාත්‍යන්තර මාධ්‍යයේ පවා  විශේෂ අවධානයට පාත‍්‍රවී ඇත.
 
පැතුම් වික්‍රමරත්න

වන අලි හෝ දළ ඇතුන් ඝාතනය කිරීම සම්බන්ධයෙන් ‘නම් දැරූ උදවිය’ සිටියේ, ලංකාවේ බි‍්‍රතාන්‍ය යටත්විජිත පාලන සමයේ දී ය. එකල, විසූ ලොකුම අලි ඝාතකයන් දෙදෙනෙකි. ඉන් එක් අයෙක් වන්නේ වර්ෂ 1845 දී වැවිලිකරුවෙකු වශයෙන් ලංකාවට පැමිණි ‘සැමුවෙල් බේකර්’ ය. ඔහු විසින් දඩයම් කළ අලි-ඇතුන් සංඛ්‍යාව දහස ඉක්මවූ බව කියැවේ. අනෙකා උප දිසාපතිවරයෙකු වශයෙන් කටයුතු කළ ‘මේජර් තෝමස් විලියම් රොජර්ස්’ ය. ඔහු විසින් මරා දැමූ අලි-ඇතුන් සංඛ්‍යාව 1400ක් පමණ වන බව කියැවේ. ලංකාවේ මහා මාර්ග සැලසුම්කර, ඉදි කිරීම් කළ ‘මේජර් තෝමස් ස්කිනර්’ ද අලි-ඇතුන් 700ක් පමණ දඩයම් කළ තැනැත්තෙකි.
බි‍්‍රතාන්‍ය වැවිලිකරුවන් අලි දඩයම සැලකුවේ, ‘මහත්වරුන්ගේ ක‍්‍රීඩාවක්’ වශයෙනි. එකල මරා දැමුණු අලි-ඇතුන් සංඛ්‍යාව 10,000 ද ඉක්මවන බැව් පැරණි වාර්තාවල සදහන් වේ.
බි‍්‍රතාන්‍ය දඩයක්කාරයන්ගේ අලි ඝාතන සම්බන්ධයෙන්, එකල ලාංකේය ජන සමාජය තුළ කෙතරම් ප‍්‍රබල කම්පනයක් හට ගත්තේ ද? යන්න, අපැහැදිලි ය. එසේ වුව ද, අලි-ඇතුන් 1400ක් පමණ මරා දැමු මේජර් තෝමස් විලියම් රොජර්ස් මියගියේ වර්ෂ 1845 දී ‘අකුණු සැරයක්’ (හෙණයක්) වැදීමෙනි. ඔහු අකුණට ගොදුරුවී තිබෙන්නේ, අලි දඩයමේ යන්නට කල්යල් බලමින් හපුතලේ තානායම් අලින්දයේ සිටින මොහොතක ය. ඉන් පසුව නුවරඑළිය දේවස්ථාන භූමියෙහි ඉදි කළ රොජර්ස්ගේ සොහොනට ද අකුණු (හෙණ) වැදුණු බව ප‍්‍රකට කාරණයකි.
මේ දිනවල අපේ රටේ වැසියන් බොහොම දෙනෙක් ද කෝපයට පත්ව, ‘වැහි නැති හෙණ’ ඉල්ලමින් සිටිති. ඒ අනිකෙකුට නොව, ‘ගල්ගමුවේ දළ පූට්ටුවා’ නමින් ප‍්‍රකටව සිටි සද්දන්ත දළ ඇතා අමු අමුවේ මරා දැමූ උදවියට එරෙහිව ය. ඇතුගේ මළ සිරුර 2017 නොවැම්බර් 29 වැනි දා සවස, අනුරාධපුර දිස්ත‍්‍රික්කයේ කලාවැවට නුදුරු කහල්ල-පල්ලෙකැලේ වන රක්ෂිතයේ ‘හොරොව් වැව’ අසලින් සොයා ගැණුනි. ඇතු මරා දමා කපාගත් දළ යුවළ, ඊට පෙර පානදුර වලාන දුෂණ මර්දන ඒකකයේ නිලධාරින් විසින් සොයා ගෙන තිබිණි. ‘ගල්ගමුවේ දළ පූට්ටුවා’ ඇත් දළ ජාවාරම්කරුවන් අතින් කුරිරු ලෙස මියයාම, මෑත කාලයේ  රට වැසියන්ට මහත් කම්පනයක් ගෙන දුන් සිද්ධියක් විය.
අලි-මිනිස් ගැටුම හමුවේ දැඩි ලෙස කෝපයට පත්ව සිටිය ද, ලාංකේය ජන සමාජය වන අලි-ඇතුන් සම්බන්ධයෙන් බොහොම ලැදි ය.  විශේෂයෙන්ම දළ ඇතුන් සම්බන්ධයෙන් ඔවුන් දක්වන්නේ අප‍්‍රමාණ ගෞරවයකි. 
ගෙවී ගිය නොවැම්බර් 29 වැනිදායින් ඇරඹුුණු වකවානුව, ලංකාවට දැඩි සුළං සහ වැසි විපත් රැුගෙන ආවේ ය. ඉන් විශාල පිරිසක් පීඩාවට පත් වූහ. හටගත් අලාභහානි ද විශාල ය. එවේලෙහි රටවැසි වැඩි දෙනෙක් පැවසුවේ, ‘ ඕක නම් අර ගල්ගමුවේ දළ පූට්ටුවා මරා දාපු එකේ සාපේ තමයි’ යනුවෙනි. ‘ගල්ගමුවේ දළ පූට්ටුවා’ මරා දැමීමෙන් රටට හටගත් කම්පනය කොතරම් ද යන්න, එයින්ම පෙනේ!
කුරුණෑගල සහ අනුරාධපුරය යන දිස්ත‍්‍රික්ක වෙන්වන සීමාවේ පිහිටි ‘ගල්ගමුව’, ලංකාවේ සුප‍්‍රකට වන අලි සංක‍්‍රමණ මාර්ගයකට අයත් ය. එහි එක් කෙළවරක්, පුත්තලම දිස්ත‍්‍රික්කය ඔස්සේ රටේ වයඹ දිග මුහුදු සීමාව තෙක් පැතිරෙන, විල්පත්තුව ජාතික වනෝද්‍යානය තෙක් දිවෙයි. අනෙක් කෙළවර, ගල්ගමුව, සියඹලන්ගමුව වැව් ඉස්මත්ත ඔස්සේ, අනුරාධපුර දිස්ත‍්‍රික්කයේ ‘කලා වැවේ වන රක්ෂිතය’ දක්වා දිවෙයි. එය වත්මනෙහි ‘කහල්ල-පල්ලෙකැලේ වන රක්ෂිතයයි’. සංක‍්‍රමණික වන අලි, සෑම වසරකම ජූලි-අගෝස්තු යන මාසවල විල්පත්තුවේ සිට  කලා ඔය පැන, නවගත්තේගම, ඉගිනිමිටිය, සංගප්පාලය තේක්ක කැලය, අඹන්පොළ සහ ගල්ගමුව ඔස්සේ කලාවැව (කලා-බළලූ වැව) ඉස්මත්තේ වන ගොමු තුළට පැමිණෙති. ඉන් පසුව ඔක්තෝබර් මාසය අග භාගයේ එන ඊසාන දිග මෝසම් වැසි    සමයත් සමගම ආපසු යන්නට ගමන් අරඹති. එය ‘වයඹ වනජීවී කලාපයේ සිදුවන විශාලතම වන අලි සංක‍්‍රමණ කටයුත්තයි. මෑත කාලයේ පටන් එය වන අලි-ඇතුන්ට මාරකයක්වී තිබේ. 
වනජීවී සංරක්ෂණ දෙපාර්තමේන්තුවේ මෙහෙයවීමෙන් 2004 වසරේ දී, වයඹ වනජීවී කලාපයෙහි වන අලි පිළිබ`ද සමීක්ෂණයක් කෙරුණි.  එහි දී ගණන් ගැණුනු සමස්ත වන අලි සංඛ්‍යාව 1076කි. උන් අතර සිටි දළ ඇතුන් සංඛ්‍යාව 43ක් විය. සමීක්ෂණයෙන් හෙළිවුණු අන්දමට, ‘කලාඔය අලි කණ්ඩායම’ (කලා ඔය ආශ‍්‍රිතව නිතර ගැවසෙන)  81 දෙනෙක් විය. උන් අතර සිටි දළ ඇතුන් සංඛ්‍යාව හය දෙනෙකි. ඇත් දළ ජාවාරම්කරුවන් අතින් නොබෝදා  ඝාතනය වුණු ‘ගල්ගමුවේ දළ පූට්ටුවා’ ද එකල උන් අතර සිටින්නට ඇත.
ලංකාවේ කැලෑවල වන අලි කොතෙක් සිටිය ද දළ සහිත සතුන් (ඇතුන්) බෙහෙවින් දුර්ලභ ය. වනජීවී නිලධාරීන් පවසන අන්දමට ලංකාවේ ඇත් ප‍්‍රතිශතය සියයට හතරක් තරම් සුළු සංඛ්‍යාවකි. උන් අතර ‘දළ පූට්ටුවන්’ ද ඉතා දුලබ ය. ‘දළ පූට්ටුවන්’ යනු, දළ යුගල එහි අගින් එකිනෙක හරහා කතිරයක් මෙන් පිහිටා තිබෙන හස්තීන්ය.  ඒ අතරින් වඩාත් ප‍්‍රකටව සිටි හස්තියා, 1960 දශකයේ පමණ යාල වනයේ විසූ ‘වලස්කෙම දළ පූට්ටුවා’ ය. වර්ෂ 1970 දී පමණ ඌ ඇත් දළ ජාවාරම්කරුවන් විසින් ඝාතනය කෙරිණි. එය ද අපේ ජන සමාජය මහත් කම්පනයට පත් කළ සිද්ධියක් විය.
2003 වසරේ පෙබරවාරි මාසයේ දී, ශ‍්‍රීපාද වන අඩවියේ රත්නපුර බෑවුමේ දී තවත් හස්තියෙක් දළ කපා ගැනීම පිණිස ඝාතනය කෙරිණි. සිරිපා හිමය පාමුල පිහිටි ගම්මානවල ‘කුරු ඇතා’ නමින් ප‍්‍රකටව සිටි මෙම හස්තියා, කුඩා දළ සහිත (පණු දළ) එකෙකි. ඌ ගැමියන් අතර බොහොම ගෞරවාදරයට පාත‍්‍රව සිටියේ ය. ‘කුරු ඇතා’ මරා දැමීම රත්නපුරයේ ගම්වලට මහත් කම්පනයක් ගෙන දුන්නේ ය. පුද්ගලයන් 500කට අධික පිරිසකට මරු කැඳවමින්, 2003 වසරේ මැයි මාසයේ හටගත් මහා වැසි සහ නායයාම් විපත, සිරිපා හිමයේ ‘කුරු ඇතා’ මරා දැමූ ශාපය නිසා හටගත් එකක් බව රත්නපුරේ බොහෝ මිනිසුන්ගේ අදහස විය. ඇතුන් සේම ඇත් දළය ද අපූර්ව නිර්මිතයකි. අප ‘ඇත් දළ’ යයි හ`දුන්වන්නේ ඇතුන්ගේ (පිරිමි සතුන්ගේ) මුවෙහි ඇති ‘කෘන්තක දත්වලට’ ය. ඒවා සාමාන්‍යයෙන් අඩි හතරක් පහක් හෝ ඊටත් වඩා ටිකක් දිගින් වැඩෙයි. ඇත් දළයක පිටතින් දක්නට ලැබෙන්නේ එහි සමස්ත දිගින් තුනෙන් දෙකක කොටසක් පමණි. ඉතිරි කොටස ඇතුගේ මුවෙහි හනුව ඔස්සේ හිසට සවිවී තිබේ. හිටපු නියෝජ්‍ය වනජීවී අධ්‍යක්ෂකවරයෙකු වන වෛද්‍ය නන්දන අතපත්තු මහතා සිය ‘අලි ඇතුන්ගේ සැඟවුණු ලෝකය’ නම් ග‍්‍රන්ථයෙහි සඳහන් කරන අන්දමට, ඇත් දළයක සංයුතිය මූලික වශයෙන් කැල්සියම් සහ පොස්පරස් යන මූල ද්‍රව්‍යවලින් සමන්විත වේ. එය සාමාන්‍ය අස්ථියක සංයුතියට සමාන ය. ඇතුන්, සිය වන සැරියේ දී ජලය සහ ලවණ ලබා ගැනීම පිණිස පොළොව හෑරීම සඳහා ද, අලි සටන්වල දී අවියක් වශයෙන් ද දළ පාවිච්චි කරති. එසේම ඉන් හොඩවැලට ආරක්ෂාවක් ද සැලසෙයි. වෙහෙසට පත් අවස්ථාවන්හි දී හොඩය දළ මත රඳවා සිටීමට ද උන් කැමැතිය.
හස්තීන් මිනිස් සමාජයෙහි ගරු බුහුමන් ලබන්නේ උන්ට පිහිටන දුර්ලභ ‘දළ’ සම්පත නිසා ය. එය මහාර්ඝ වස්තුවක් බව වැඩි දෙනෙකුගේ ඇදහීමයි. පූජනීය වස්තූන් දෙපස ඇත් දළවලින් සරසා තැබීමට ද මිනිසුන් පුරුදුව සිටිති. එසේම ආභරණ සහ කැටයම් භාණ්ඩ නිපදවීම පිණිස ද අනාදිමත් කාලයක පටන්ම ඇත් දළ භාවිත කෙරේ. ඇත් දළ යනු, ලංකාවේ මෙන්ම ලෝකයේ ද අංක එකේ හොර ජාවාරමකි. ඇත් දළ සහ ඇතුන් මහාර්ඝ වස්තූන් ලෙස සැලකීමේ මනුෂ්‍ය සිරිත උන්ට නම් මාරකයකි.
ඇත් දළ තූළ ඉතා කලාතුරකින් පිහිටන ‘ගජමුතු’ සිතූ පැතූ සම්පත් ගෙන දෙන දෙයක් බව ඇතැමුන් විශ්වාස කරති. එහෙත් ‘ගජමුතු’ යයි කියන්නේ, ඇත් දළයක (කෘන්තක දතෙහි) කල්ක කුහරය තුළට එහි බිත්තියෙන් ගිලිහී වැටෙන ‘ඩෙන්ටීනමය’ දන්ත කොටස් ය. ඇතු හිස සැලීමේ දී හට ගන්නා ඝර්ෂණය නිසා, කලක් ගතවන විට ඒවා ගෝලාකාර හෝ  ඕවලාකාර හැඩයක් ගනියි. විශාල ගජමුතුවක් ඇතැම් විට වෙරළු ගෙඩියක් තරම් විශාල වන්නට ද පුළුවන. දළ ඇතුළත ගජමුතු හට ගන්නේ, ඇතු බොහොම වියපත් තත්ත්වයට පත්වන කාලයේ ය. ගජමුතු අතිශයින්ම දුලබ නිසා, ඒවාට  ‘මහාර්ඝ වටිනාකමක්’ ඇතැයි මිනිස්සු අදහති. එහෙත් ඒවා නිකම්ම නිකම් අස්ථි හෝ දන්ත කොටස් පමණි.
ගල්ගමුවේ දළ පූට්ටුවා ඝාතනය සම්බන්ධයෙන් ප‍්‍රවීණ වන අලි පර්යේෂකයෙකු වන වෛද්‍ය පෘථිවිරාජ් ප‍්‍රනාන්දු දැක්වූ අදහසක් බී. බී. සී. පුවත් වෙබ් අඩවියෙහි පළකර තිබිණි.
‘ඇත් දළ කියන්නේ අපි වැදගත් තැනක, ගෙදරක හෝ කොතැනකවත් තබා ගත යුතු නැති දෙයක් බව අප තේරුම්ගත යුතුයි. මොකද ඒවා ලේ තැවරුණු දේවල්.’
 
 ක‍්‍රිෂ්ණ විජේබණ්ඩාර

ඔහු නමින් එම්.එස්.එච්. මොහොමඩ්ය. මේ නම කියූ පමණින් ඔහු හඳුනන්නේ ඔහුගේ ළඟම හිතවතුන් පමණි. එහෙත් මහරගම පිළිකා රෝහලට “ පෙට් ස්කෑන් යන්ත්‍රය” මිලදී ගැනීම සඳහා පූරෝගාමී වූ මොහොමඩ් කීවොත් රටම ඔහු ගැන  දනියි. මොහොමඩ්ගේ එකම පුතු පිළිකා රෝගයෙන් පෙළුණු අතර පුතාගේ සිහිනය වූයේ ඔහු මෙලොවින් සමුගෙන යාමට පෙර මහරගම පිළිකා රෝහ‍ලේ අන්ත අසරණ රෝගීන් වෙනුවෙන් කුමක් හෝ කළ යුතුය යන්නය. මහරගම පිළිකා රෝහ‍ලේ නොමැති පෙට් ස්කෑන් යන්ත්‍රයක් රෝහලට ලබා දීමට පුතු අපේක්ෂා කළේය. ගිලන්ව ජීවිතයත් මරණයත් අතර සටනක යෙදී සිටින තම පුතුගේ එම ප්‍රාර්ථනය ඉටුකිරීමට මොහොමඩ් තරයේ අධිෂ්ඨාන කර ගත්තේය. ඒ අනුව  මොහොමඩ් මීට වසර ගණනාවකට පෙර පිහිටුවා ගත් “ කදීජා” පදනම හරහා ගොඩනැගුණු “ ෆයිට් කැන්සර් ටීම් “ එක මගින් මෙම යන්ත්‍රය මිලදී ගැනීමට අවශ්‍ය ප්‍රතිපාදන සෙවීම ඇරඹිණි.
ලංකා බැංකුවේ ආරම්භ කළ “පෙට් ස්කෑන් යන්ත්‍රය මිලදී ගැනීමේ ගිණුම”ට දෙස් විදෙස් පරිත්‍යාගශීලී විශාල වශයෙන් මුදල් තැන්පත් කළේ  මාධ්‍ය මගින් ලබා දුන් හුදු ප්‍රසිද්ධියත් සමගය.
 “පෙට් ස්කෑන් යන්ත්‍රය” මිලදී ගැනීමට අවශ්‍ය රුපියල් කෝටි 20ක මුදල මාස දෙකක් තුළ රැස් කර ගැනීමට “ෆයිට් කැන්සර් ටීම්” එකට හැකිවිය. ඒත් මේ ලිපිය ලියන මොහොත වන විටත් එය මිලදී ගැනීමට සෞඛ්‍ය අමාත්‍යාංශයට හැකියාව ලැබි නැත. ලබන ජනවාරියේ එය මහරගම පිළිකා රෝහ‍ලේ ස්ථාපිත කරන බව හිටපු සෞඛ්‍ය සේවා අධ්‍යක්ෂ ජනරාල් වෛද්‍ය ජයසුන්දර බණ්ඩාර පැවැසුවේ මොහොමඩ්ගේ පුතා මිය ගිය දිනයේය.
වසර ගණනාවක් පුරා පිළිකා රෝගය සමග සටන් කළ පුතු මිය ගියද ඔහුගේ බලා‍පොරොත්තුව තව සති කීපයකින් ඉටුවනු ඇත. පුතුගේ වියෝවින් පසුවද මොහොමඩ් පිළිකා රෝගීන් සඳහා ආරම්භ කළ  සමාජ සත්කාර සේවා   නතර කළේ නැත. ඔහු තමන්ගේ සමාජ මෙහෙවර වඩ වඩාත් ශක්තිමත් කරමින් මහරගම පිළිකා රෝහලට ජාන පර්යේෂණාගාරයක්, එම්.ආර්.අයි ස්කෑන් යන්ත්‍රයක්, අල්ට්‍රාසවුන්ට් ස්කෑන් යන්ත්‍රයක්, එන්ඩස්කොපි, හොරනස්කෝප්, ආදී යන්ත්‍රරැසක් පරිත්‍යාග කිරීමේ භාරදූර්ය කටයුත්තට අත ගැසුවේය.  
එම කටයුතු කරන අතර මොහොමඩ් තවත් දැවැන්ත පියවරක් තැබිමට සිතා සිටින්නේය. ඒ පිළිකා රෝගීන් සඳහාම වෙන්වුණු අංග සම්පූර්ණ රෝහලක් සහිතව සත්කාර ගම්මානයක් ගොඩ නැඟීමය. දෙස් විදෙස් පරිත්‍යාගශීලීන්ගේ  ආධාර උපකාර ඇතිව මෙම ව්‍යාපෘතිය ගොඩනැංවීම ඔහුගේ එකම අධිෂ්ඨානය වී ඇත්තේය. මෙවැනි සංකල්පයක් සිතට නැගුණේ කෙසේද යන්න පිළිබඳ අප ඔහුගෙන් විමසුවෙමු.
“ මට මේ වගේ අදහසක් පහළ වුණේ මගේ පුතා රෝගියෙකු වී  සිටිය කාලයේදී. මොකද මම පුතා එක්ක මහරගම පිළිකා රෝහ‍ලේ මාස ගණනාවක් නතර වෙලා හිටියා. එතනදී මම දැකපු දෙයක් තමයි රෝගීන්ට බෙහෙත් දුන්නාම ඒ අයට එළියට පහළියට යන්න දෙන්නේ නැහැ. ඒ අයව විෂබිජවලින් ආරක්ෂා කර ගන්න ඕනේ නිසයි වෛද්‍යවරුන් එහෙම උපදෙස් දීලා තියෙන්නේ. මේ නිසා රෝගීන් හැමෝම වගේ ඇඳවල්වලට කොටු වෙලා ඉන්නේ. බිත්ති හතරකට කොටු වෙලා රෝගියෙකුට ප්‍රතිකාර කරන කොට එය ඒ තරම් සාර්ථක නොවන්න පුළුවන්. මොකද මගේ පුතා වුණත් ඇඳෙන් බැස්සේ නානකාමරයට යන්න විතරයි. ඒත් මම දැක්කා හැමදාමත් ව්‍යායාම් කරපු අය පිළිකා රෝගයට ගොදුරු වෙලා ඇඳක් මතට වී ඉන්නවා. ඒ අයගේ මානසික පීඩාව වැඩි වෙනවා. පිටරටවල පිළිකා රෝගීන්ට බෙහෙත් කරන ගමන්ම ඔවුන්ට අවශ්‍ය ව්‍යායාම, විනෝදාස්වාදය සඳහා යම් යම් ක්‍රීඩාවන්  කරන්න පහසුකම් ලබා දීමෙන් වඩාත් සාර්ථක ප්‍රතිඵල ලබා ගන්න පුළුවන් බව පෙනී ගොස් තිබෙනවා.ඒනිසා රෝගියෙකුට අවශ්‍ය සියලුම පහසුකම්ද සහිතව මේ ගම්මානය ඉදිකරන්න මම  බලා‍පොරොත්තු වෙන්නේ. මේ රෝහල දකුණු ආසියාවේ හොඳම පිළිකා රෝහල් අතරින් එකක් ලෙස ගොඩනැංවීම තමයි  කදීජා පදනමේ එකම අරමුණ.” 
මොහොමඩ් ඉදිකරන පිළිකා රෝගීන් සඳහා වූ ගම්මානය කොළඹ සිට පැය 2ක් තුළදී ළඟා වීමේ හැකියාව පවතින තැනක ඉදිවන්නේය. එය අක්කර 30ක නිස්කලංක  භූමිභාගයක ඉදිකිරීම සඳහා මේ වන විටත් අවිස්සාවේල්ල හෝ හලාවත ප්‍රදේශයෙන් භූමියක් තෝරා ගැනීමට නියමිතය. රුපියල් කෝටි 500ක වියදිමින් ඉදිකිරීමට බලා‍පොරොත්තු වන මෙම නව රෝහල සහිත ගම්මානය වසර 2021 දී ජනතා අයිතියට පැවැරීම එම්.එස්.එච්. මොහොමඩ් ප්‍රමුඛ කදීජා පදනමේ බලා‍පොරොත්තු වන්නේය.
ඉන්දියාවේ  ටාටා රෝහල සහ “සායි “රෝහල පිළිකා රෝගීන් වෙනුවෙන් ඉදිකරන ලද ගම්මානයක් සහිත රෝහල්ය. මොහොමඩ් පවසන්නේ ලංකාවේ ඉදිකරන රෝහලද එම රෝහල්  අනුසාරයෙන් ඉදිකරන බවය. මෙම රෝහල් ගම්මානය තුළ පන්සලක්, පල්ලියක්, හා කෝවිලක්ද ඉදිවෙනු ඇත. රෝගීන්ට තම ආගමික වතාවත්්වල යෙදීමට මෙයින් අවකාශ සැලසෙනු ඇත.
එපමණක් නොව ඇවිදින මංතීරුවක්, පිහිනුම් තටාකයක්, කාය වර්ධන මධ්‍යස්ථානයක්, ක්‍රීඩා පිටියක් ඇතුළු සියලුම අංගයන්ගෙන් සමන්විත වන ලෙස මෙය නිර්මාණය කරන බව මොහොමඩ් මහතා සඳහන් කරන්නේය.
මෙම ගම්මානයේ ඉදිවෙන පිළිකා  රෝහ‍ලේ සේවය කිරීමට සඳහා දෙස් විදෙස් වෛද්‍යවරුන් මේ වන විටත් කැමැත්ත පළ කර තිබේ. රෝගීන්ට නොමි‍ලේ ප්‍රතිකාර කිරීම සඳහා විදෙස් වෛද්‍යවරුන් මෙරටට පැමිණීමට මේ වන විටත් එකඟතාව පළ කර ඇත්තේය. එම වෛද්‍යවරුන් මෙම එකඟතාව පළ කර ඇත්තේ පසුගිය සතියේදී කදීජා පදනමේ “ෆයිට් කැන්සර් ටීම්”හි සාමාජිකයන් සමග පැවැති විශේෂ සාකච්ඡාවකින් අනතුරුවය.
මෙම සාකච්ඡාව පිළිබඳව මොහොමඩ් මහතා සඳහන් කළේ මෙවන් අදහසකි.
“ලෝකයේ පිළිගත් පිළිකා රෝග විශේෂඥ වෛද්‍යවරුන් වන සිංගප්පූරුවේ, ජාතික විශ්ව විද්‍යාලයේ  අස්ථි පිළිකා විශේෂඥ වෛද්‍ය කුර්පාර් සිං,  ඉන්දියාවේ බැංගලෝර්හී ඇපලෝ රෝහ‍ලේ පිළිකා රෝග විශේෂඥ වෛද්‍ය එම්. ශ්‍රීනිවාස් හා ඉන්දියාවේ ජාතික පිළිකා රෝහ‍ලේ අධ්‍යක්ෂ වෛද්‍ය එන්. කනගරාසා යන අය ලංකාවට ගෙන්වලා “ෆයිට් කැන්සර් ටීම් “ එකේ විධායක ශේ්‍රණියේ සාමාජිකයන් 15 දෙනෙක් එක්ක අපි සාකච්ඡා කළා. සාකච්ඡා වට දෙකක්ම පැවැත් වුවා. එහිදී වෛද්‍යරුන් තුන් දෙනාම එකඟ වුණා මාස තුනකට වරක් හෝ මාසෙකට වරක් ලංකාවට පැමිණ පිළිකා  රෝගීන්ට අවශ්‍ය සැත්කම් කරන්න. ඒ සියලුම සැත්කම් හා ප්‍රතිකාර නොමි‍ලේ කරන්න ඒ අය ‍පොරොන්දු වුණා. ඒ විතරක් නොවෙයි. ලෝකයේ අනෙක් රටවල සිටින පිළිකා රෝග විශේෂඥ වෛද්‍යවරු මේ සඳහා යොමු කරන්න කටයුතු කරන බවට ‍පොරොන්දු වුණා. ඒ වගේම ලංකාවේ වෛද්‍යවරුන් විශාල සංඛ්‍යාවක් මේ රෝහලට පැමිණ රෝගීන්ට ප්‍රතිකාර කිරීමට කැමැත්ත පළ කරලත් තියෙනවා.”
පිළිකා රෝගීන් සඳහා ඉදිකරන මෙම රෝහල සඳහා  සහයෝගය ලබා දීමට කැමති   පරිත්‍යාගශීලීන් සිටින්නේ නම් ඔවුන්ට  කදීජා පදනම ආරාධනා කර සිටියි. ඔබට ඉදිරියේදී ඒ සඳහා දායකත්වය ලබාදීමට හැකි වනු ඇත.
 
ශ්‍රියානි විජේසිංහ

අන්තර්ජාතික සහයෝගිතාව සහ මිත්‍රත්වය රටේ සංවර්ධන ඉලක්ක සපුරා ගැනීමට උපරිමයෙන් යොදා ගන්නා බව ජනාධිපති මෛත්‍රීපාල සිරිසේන මහතා පැවැසීය.ජනාධිපති මෛත්‍රීපාල සිරිසේන මහතාගේ ඉල්ලීම පරිදි චීන රජයෙන් ලැබුණු මිත්‍රශීලී පරිත්‍යාගයක් වන රුපියල් මිලයන 12,000ක වියදමින් ‍පොළාන්නරුවේ ඉදිකෙරෙන ජාතික වකුගඩු රෝහල සඳහා මුල්ගල් තැබිමේ උත්සවයට එක්වෙමින් ජනාධිපතිවරයා මෙම අදහස් පැවැසීය.
වකුගඩු රෝගයෙන් පීඩා විඳින ජනතාව වෙනුවෙන් ජනාධිපති තුළ තිබූ දිගුකාලීන අපේක්ෂාවක් ඉටුකරමින් ඉදිකෙරෙන මෙම
රෝහල දකුණු ආසියාවේ විශාලතම වකුගඩු රෝහල ලෙස ඉදිකෙරේ. ‍පොළොන්නරුව මහ රෝහලට නුදුරින් 28 කණුව ප්‍රදේශයේ ඉදිකෙරෙන ජාතික වකුගඩු රෝහල සඳහා වැය කෙරෙන සම්පූර්ණ මුදල චීන රජයේ පරිත්‍යාගයක් ලෙස ලැබිම විශේෂත්වයකි.
උතුරු මැද පළාතේ පමණක් නොව රට පුරා විසිරී සිටින වකුගඩු රෝගීන් වෙනුවෙන් මෙම රෝහල ඉදිකෙරෙන අතර ලොව නවීනතම පරීක්ෂණාගාර සහ අධි තාක්ෂණික පහසුකම්වලින් මෙය සමන්විතය.
මෙම උත්සව සභාව ඇමතූ ජනාධිපතිවරයා ප්‍රකාශ කළේ අද ශ්‍රී ලංකාවට හිමිව තිබෙන අන්තර්ජාතික සහයෝගිතාව සහ මිත්‍රත්වය රටේ සංවර්ධන ඉලක්ක සපුරා ගැනීමට උපරිමයෙන් යොදා ගන්නා බවයි. එදා රටේ සංවර්ධනයටත්, රටේ හෙට දවසටත් දැවැන්ත අභියෝගයක් පැවැති රටට නොලැබුණු අන්තර්ජාතික සහයෝගිතාවය උපරිමයෙන් දිනා ගැනීමට ඉකුත් වසර තුන තුළ තමාට හැකිවූ බව මෙහිදී ප්‍රකාශ කළ ජනාධිපතිවරයා ශ්‍රී ලංකා මාතෘ භූමිය පිළිබඳව අද ජාත්‍යන්තරයේ පවත්නා පිළිගැනීම තමා සිදුකළ සංචාර රැසකදී මනාව සනාථ වූ බවද කියා සිටියේය.
සෞඛ්‍ය අමාත්‍ය රාජිත සේනාරත්න, නියෝජ්‍ය අමාත්‍ය ෆයිසාල් කාසිම්, සෞඛ්‍ය අමාත්‍යාංශයේ ‍ලේකම් ජනක සුගතදාස, සෞඛ්‍ය අධ්‍යක්ෂ ජනරාල් වෛද්‍ය අනිල් ජාසිංහ, ‍පොළොන්නරුව මහ රෝහ‍ලේ අධ්‍යක්ෂ වෛද්‍ය ඉන්දික සම්පත් කුමාර යන මහත්වරුන්ද ශ්‍රී ලංකාවේ චීන තානාපති යී ෂියෑන්ලිං මහතා ඇතුළු සම්භාවනීය ආරාධිත පිරිසක් මෙම අවස්ථාවට එක්ව සිටියහ.
‍පොළොන්නරුව මහ රෝහ‍ලේ අධ්‍යක්ෂ වෛද්‍ය ඉන්දික සම්පත් කුමාර මහතා ඇතුළු කාර්ය මණ්ඩලය මෙම අවස්ථාවට එක්ව සිටියහ.

ප්‍රියන්ත බණ්ඩාර

අමාරුවෙන් හදාගත් වගාව මහවැලි නිලධාරීන් ඇවිත් විනාශකර දැම්මා. පොල් පැළත් උගුල්ලා දැම්මා. අපි වගා කටයුතු කරන්නේ බොහොම දුෂ්කරතා විදගෙනයි. හැම ගෙවත්තම වගා කරන්න කියලා මහවැලියත් කියනවා. රජයත් නිතරම කියනවා. මට සිදුකළ මේ අලාභයට වග කියන්නේ කවුද?අපි ගෙදර නැති වෙලාවක මේ අලාභය සිදුකර තිබෙනවා. මෙහෙම කළේ ඇයි කියා අහලා බලන්නට මම මහවැලි කාර්යාලයට ගියා. ඔව් මම තමයි එහෙම කළේ පුළුවන් දෙයක් කරන්න කියලා මට තර්ජන කළා. මේ අලාභය පිළිබඳව මම ගිරාදුරුකෝට්ටේ පොලීසියේ පැමිණිල්ලකුත් දැම්මා.
මේ අදෝනාව නගන්නේ ගිරාදුරුකෝට්ටේ මහවැලි බල ප‍්‍රදේශයේ  මිල්ලත්තාව ඒකකයේ පළුගොල්ලේ පදිංචි 56 වියැති තිදරු පියෙක් වන එච්.එම් ඊ.ජී.සෙනේ බණ්ඩා ගොවි මහතාය. තමාට සිදුකළ අලාභ හානිය හා අසාධාරණය පිළිබදව කරුණු පැවැසූ සෙනේ බණ්ඩා මහතා මෙසේද පැවැසීය.
අවුරුදු 20ක පමණ කාලයක සිට මම මේ ඉඩමේ පදිංචිවී සිටිනවා. දැනට නිවසේ ඉන්නේ මමයි බිරිදයි පමණයි. නිවස ඉදිරිපිට ඇති කුඹුරත් ගෙවත්තත් වගා කරගෙන ජීවත් වෙනවා. වන අලින්ගෙන් වගාවන් රැකගන්නේ බොහොම අමාරුවෙන්. මේ ගේ පොඞ්ඩ ටිකෙන් ටික හදා ගත්තෙත් දුව එවාපු සල්ලිවලින්. මුලදී දරුවොත් එක්ක හිටියේ පොඩි පැලක. මේ ඉඩම මේ වන තෙක් නීත්‍යානුකූලව මට පවරා දී නැහැ. ඒ වෙනුවෙන් කාලයක් තිස්සේම ඉල්ලීම් කරනවා. ජනාධිපතිතුමාටත් ලියුම්වලින් දන්වා යැව්වා. ඒ ගැන සොයා බලා කටයුතු කරන්න කියා මහවැලි කාර්යාලයට  දන්වා එවා තිබෙනවා. නමුත් කවුරුවත් සොයන්න බලන්න ආවෙ ගියේ නැහැ. මේ ඉඩමට මම අක්කර බදුත් ගෙවනවා. ගොවි සංවිධානෙටත් බැදිලා ඉන්නවා. කුඹුරට කෙත් ඇළෙන් වතුර ගන්නට කොන්ක‍්‍රීට් බටයකුත් දමා දී තිබෙනවා.
දැන් කියන්නේ මේ ඉඩමෙන් මාව ඉවත් කරන්න කටයුතු කරනවලූ‍. එහෙමනම් ඒක කරන්න තිබුණේ දැන් නෙවෙයි මීට ගොඩාක් කලින්. අනුන්ට අතපාන්නේ නැතුව  යමක් වවා ගෙන අවුරුදු 20ක පමණ කාලයක් දුක් මහන්සියෙන් ජීවත්වන අපිට මෙහෙමකරණ එක හරිම අසාධාරණයි.
දෙසැම්බර් හතර වෙනිදා හවස දෙකට විතර අපි නිවසේ නැති වෙලාවක ගිරාදුරුකෝට්ටේ මහවැලි කොට්ඨාස කාර්යාලයේ නිලධාරීන් පස්දෙනෙක් ඇවිත් ගෙවත්තේ වගා කර තිබූ පොල් පැළ හතම උගුල්ලා දැම්මා. කරවිල,බටු,මෑ,බඩ ඉරිගු වගාවනුත් ගලවලා දමලා. අපි මේ වගාවන් හදාගන්නෙත් රැකබලා ගන්නෙත් බොහොම දුක් මහන්සියෙන්. ඇයි මෙහෙම කළේ කියලා අහන්නට පසුවදා මම ගිරාදුරුකෝට්ටේ මහවැලි කාර්යාලයට ගිහින් කොට්ඨාස කළමනාකාර මහත්තයා ගෙන් ඇහුවා. ඔව් මම තමයි ගැලෙව්වේ. පුළුවන් දෙයක් කරන්නෙයි කියලා සැර දැම්මා. මේ මට සිදු වූ අලාභයත් අසාධාරණයත් පිළිබදව මම ගිරාදුරුකෝට්ටේ පොලීසියේ පැමිණිල්ලකුත් දැම්මා.
මේ පිළිබදව  ගිරාදුරුකෝට්ටේ මහවැලි කොට්ඨාස කළමනාකාර කුලසේකර මහතාගෙන් විමසීමේදී හෙතෙම මෙසේ පැවැසීය.
සෙනේ බණ්ඩා මහතා පදිංචිව සිටින්නේ නිත්‍යානුකූලව පවරා නුදුන් ඉඩමකයි. මෙම භූමිය වන සංරක්ෂණ කොටසට අයිතියි. වන වගා වැඩපිළිවෙළ අනුව මහවැලිය මගින්  මී, බුළු, කුඹුක් වැනි පැළ මෙම භූමියෙත් වගා කර තිබුණා. ඒවා කිසිවක් දැන් නැහැ. පොඩි වළවල් හාරා කුඩා පොල් පැළ කිහිපයක් මේ ගෙවත්තේ සිටුවා තිබුණා. ඒවා ගලවා ඉවත්කළා ඒක මගේ රාජකාරියට අයිති දෙයක්. අනවසරව වන රක්ෂිතවල ස්ථිර බෝග  වවන්නට කිසිසේත්ම නීතිමය ඉඩක් නැහැ. එහෙත් එළවළු වැනි තාවකාලික බෝග කිසිවකටවත් කිසිම හානියක් සිදුකළේ නැහැ.
මේ කුඹුර වගා කරන්නට එපා කියා දන්වා තිබියදී තමයි වගාකළේ. කෙත් ඇළ බලහත්කාරයෙන් කඩා බටයක් දමා වතුර  ලබා ගන්නවා. ඒකත් වැරදියි. මොහුගේ බිරිද නමට උල්හිටිය ඞී 7 උතුර බෙදුම් ඇළ කොටසේ ඉඩමක් තිබෙනවා. ඒ ඉඩමට බලපත් ලබාදීමට මේ වන විට කටයුතු යොදමින් සිටිනවා. වන රක්ෂිත, ඇළවේලි, වැව් රක්ෂිත ආරක්ෂාකර සංරක්ෂණය කිරීම අපේ කාර්යයක්. මොහු මෙම ඉඩමේ වසර 20ක් සිටි බව කියනවා. එහෙමනම් මීට කලින් සිටි අදාළ නිලධාරීන් මේ ගැන සොයා නොබැලීම මෙවැනි ගැටලූවලට හේතුවයි.

ගිරාඳුරුකෝට්ටේ එස්.එස්.එස්. ගුණරත්න

අතීතයේ සිට මේ රටේ ජනතාව සාමයෙන් සංහිඳියාවෙන් ජීවත් වුණත් ඇතැම් දේශපාලනඥයින් පටු අරමුණු සඳහා ජාතිවාදය අවුස්සා මේ රටේ සංහිඳියාවට බාධා එල්ල කරන බව මල්වතු - අස්ගිරි මහානාහිමිවරු ඊයේ (3) සඳහන් කළහ.
ජාතික සහජීවනය සංවාද හා රාජ්‍ය භාෂා අමාත්‍ය මනෝ ගනේෂන් මහතා ඊයේ (3) මල්වතු - අස්ගිරි මහා නාහිමිවරුන් බැහැදැක දොළොස් වන දින කොළඹදී පැවැත්වෙන සර්ව ආගමික සමුළුවට සහභාගි වන ලෙස මහානාහිමිවරුන්ට ආරාධනාවක් කළේය.

එහිදී මල්වතු පාර්ශ්වයේ නායක තිබ්බටුවාවේ ශ්‍රී සිද්ධාර්ථ සුමංගල මහා නාහිමියෝ මෙසේද කීහ.
අතීතයේ සිට අපේ ජනතාව සංහිඳියාවෙන් ජීවත් වුණා. නමුත් ඇතැම් දේශපාලනඥයන් අද ජාතිවාදය අවුස්සන්න කටයුතු කරනවා. ඒ තුළින් ජනතාව කුපිත වනවා. සමහරු සංහිඳියාවට කටයුතු කරන අතරතුර සමහරු සංහිඳියාව මෙරටින් ගිලිහී යන්න කටයුතු කරනවා. දේශපාලනඥයින් තමන්ගේ ඡන්ද ගොඩ වැඩිකරගන්න ජාතිවාදය අවුස්සනවා. සිංහල, ද්‍රවිඩ, මුස්ලිම් සියලු ජනතාව අතර දේශපාලන වාසි සඳහා ජාතිවාදය වපුරවමින් සංහිඳියාව නැති කරන්න ඇතැම් දේශපාලනඥයින් කටයුතු කරනවා. මේ සියලු ජාතීන් අතරම අන්තවාදීන් සිටිනවා. අද මුස්ලිම්, ද්‍රවිඩ ජාතීන් පැවිදි වෙනවා. නමුත් ඇතැම් මුස්ලිම් වැඩිහිටියන් ඒකට ඉඩ දෙන්නේ නැහැ. මාවනැල්ල පැත්තේ පිරිවෙන් අවසානය දක්වා අධ්‍යාපනය ලැබූ මුස්ලිම් හිමිනමක් සිටියා. එයාගේ පියාට අනෙක් මුස්ලිම් අය සිදුකළ බලපෑම් නිසා එය සිවුරු අරින්නට කටයුතු කළා. මෙවැනි කටයුතු නිසා සංහිඳියාවට බාධාවක් ඇති වනවා යැයිද මහා නාහිමියෝ කීහ.
අස්ගිරි පාර්ශ්වයේ නායක වරකාගොඩ ඥානරතන මහ නාහිමියන් පවසා සිටියේ අතීතයේ සිට අපේ ජනතාව මේ රට තුළ සංහිඳියාවෙන් ජාතීන් අතර සමගියෙන් ජීවත් වුණු බවයි.

අස්ගිරි පාර්ශ්වයේ නියෝජ්‍ය ‍ලේඛකාධිකාරී අස්ගිරි පරිවේණාධිපති පූජ්‍ය නාරම්පනාවේ ආනන්ද හිමියෝ එහිදී මෙසේද පැවැසූහ.
මේ රටට අලුතින් සහජීවනය සංහිඳියාව කියා වචනයක් එක්ව තිබෙනවා. අප එය අගේ කරනවා. මේ රටේ සිංහල බහුතරය සමග ද්‍රවිඩ, මුස්ලිම්, හින්දු, කතෝලික ජනතාව සහජීවනයෙන් සංහිඳියාවෙන් ජීවත් වුණා කියලා අද බොහෝ අය අමතක කරනවා. වෙනත් රටවල ඇතිවන වාර්ගික අර්බුද මේ රටේ ඇති වුණේ නැහැ. ලෝකයේ සහජීවනයට හොඳම නිදසුන මේ රටේ සිංහල ජනතාවයි. සිංහල ජාතිය බහුතරයක් සිටියත් මේ රටේ ජීවත් වන සුළු ජාතීන්ට හිරිහැර කරන්නේ නැහැ. ඒ සඳහා බුදු දහමින් ලැබෙන ශික්ෂණය බොහෝ වැදගත්. එයට හොඳම නිදර්ශනය තමයි අපේ පන්සල් ඉඩම්වලයි බොහෝ අන්‍යාගමික සිද්ධස්ථාන ඉදිකර තිබෙන්නේ. එදා සිට මේ සහජීවනය ඇති වී තිබුණා. අද මේ තත්ත්වය ඇති වී තිබෙන්නේ මේ දේශපාලනඥයන් නිසයි. මේ රටේ බේද නිර්මාණය කළේ දේශපාලනඥයන් බව අප අවංකවම පිළිගත යුතුයි. දේශපාලන වාසි තකා ඇතැම් අය යම් යම් වාර්ගික අර්බුද ගොඩනගා තම දේශපාලන ස්ථාවර හදාගන්නවා. ජනතාව තුළ දේශපාලනඥයන් විසින් ජාතිවාදය ආගම්වාදය වපුරා ඒ ජනතාව තුළ යම් යම් බලා‍පොරොත්තු ඇති කරනවා. ඉන් පසු මේ රටේ සහජීවනය නැති වී යනවා.

අපි පසුගියදා යාපනයේ ගියා. ඒ ජනතාව අපෙන් ඉල්ලන්නේ හරිම සාධාරණ ඉල්ලීම. ඒ අයට ආණ්ඩුක්‍රම ව්‍යවස්ථාව හෝ විධායක ජනාධිපති ක්‍රමය හෝ වැඩක් නැහැ. ඒ අය ඉල්ලන්නේ තමන්ගේ එදිනෙදා කටයුතු පහසුවෙන් කරගෙන යන්න මූලික අවශ්‍යතා ඉටුකරදෙන්න කියලයි. මේ ප්‍රශ්න උතුරටත් දකුණටත් ‍පොදු ප්‍රශ්නයි. ප්‍රශ්න නිවැරදිව තේරුම් ගෙන කටයුතු නොකිරීම නිසා සංහිඳියාව නැති වී වාර්ගික අර්බුද ඇති කරනවා. මේ සඳහා දේශපාලනඥයන් දැනුම්වත් කරන්න. යාපනයේ ද්‍රවිඩ ජනතාව ඉල්ලා සිටියා යාපනයේ සිංහල මහා විද්‍යාලය නැවත පටන් ගන්න කියලා. ඒ අය කියන්නේ යාපනයේ සේවය කරන සිංහල අයගේ දරුවන්ට එහි අධ්‍යාපනය ලබන්න සිංහල පාසලක් නැතිවීම නිසා ඒ නිලධාරීන් එහෙන් පිටව යනවා. ඒ නිසා ඒ අයට අධ්‍යාපනය ලබන්න සිංහල පාසලක් ඇති කරන්න කියලයි ඒ අය ඉල්ලා සිටින්නේ. අද මේ ජනතාව අතර ඇති වැරදි අවබෝධය නිසා මේ ප්‍රශ්න හට ගන්නේ. අද සිංහල මුස්ලිම් - ද්‍රවිඩ කියා කොටස්වලට බෙදී වෙන් වී ඉන්නේ. ඉතින් කොහොමද මේ රටේ සංහිඳියාවක් ඇති කරන්නේ. ජාතික ආගමික වාර්ගික පදනමින් මේ ප්‍රශ්න දෙස බලා ඒවා විසඳන්නට යාමෙන් මේ ප්‍රශ්න පැන නගින බව උන්වහන්සේ පෙන්වා දුන්හ.

එහිදී මහා නාහිමිවරුන් හමුවේ අදහස් දැක්වූ මනෝ ගනේෂන් අමාත්‍යවරයා මෙසේ කීය.
දෙසැම්බර් 12 වන දින සර්ව ආගමික සමුළුවක් කොළඹදී පැවැත්වෙනවා. එයට ඔබ වහන්සේලාට ආරාධනා කරනවා. අද මේ ආණ්ඩුවේ සහ හිටපු ආණ්ඩුවේ දූෂණ ප්‍රශ්න, උතුරේ ජාතික කොඩිය එසවීමට අකමැත්ත පළ කිරීම, දකුණේ ආගම් අතර ගැටුම්, අතරතුර ඉදිරියේදී මැතිවරණයක්ද එනවා. ඒ නිසා අද ජාතික සමගිය යට යමින් පවතිනවා.  එය රටට හොඳ තත්ත්වයක් නොවෙයි. සමහරු සමාජය කඩනවා. අප එය නැවත හදනවා. බුදුදහමට ප්‍රමුඛ තැන තියෙනවා. එහි අකුරක්වත් අඩුකරන්න දෙන්නේ නැහැ. සමහරු මුදල් දීලා ආගමට හරවන්න යාම වැරදියි. ආගමක් තමන් විසින් අවබෝධ කරගෙන වැළඳගත යුතුයි. අද යුරෝපා රටවල බෞද්ධ සහ හින්දු ආගම අදහන්න විදේශිකයන් විශාල ලෙස පෙළඹෙනවා. ජාතිවාදය ආගම්වාදය ත්‍රස්තවාදය නැති කරන්න අප කටයුතු කළ යුතු අතර ජාතික සංහිඳියාවට ඉදිරියේදී විශාල වැඩකොටසක් කිරීමට ඇති බවද අමාත්‍යවරයා මහනාහිමිවරුන්ට පැවැසීය.

ගයා වන්නිආරච්චි

‘සපරගම ශ‍්‍රද්ධාදීපනී’ සද්ධර්ම සංචරණ වැඩ සටහනේ දෙවැනි වන්දනා නඩය පැරණි සිරිතට අනුව සිරිපා කරුණාවට  පිටත්වීම සහ ශ‍්‍රීපාද වන්දනාව  පිළිබදව ක‍්‍රිෂ්ණ විජේබණ්ඩාරයන් ඇතුළු ලේඛක මණ්ඩලයක් විසින් සකස් කළ ‘අපේ බුදුන් අපි වඳින්ඩ’ නව ග‍්‍රන්ථය දොරට වැඞීමේ දහම් හමුව 2017 දෙසැම්බර් මස 02 වැනි සෙනසුරාදා උදෑසන 7.00ට, රත්නපුර සබරගමු මහ සමන් දේවාල භූමියේ දී පැවැත්වේ.
රත්නපුරයේ ‘මිණිදන පදනම’ වැඩසටහන සංවිධානය කරන අතර, දෙවැනි සම්ප‍්‍රදායික වන්දනා නඩයට මෙවර ද වන්දනාකරුවන් 50 දෙනෙක් සහභාගි  වෙති.  එදින උදෑසන ඔවුන් සබරගමු මහ සමන් දේවාල භූමියේ දී ආගමික වතාවත්වලට සහභාගි වන බවත්, ඉන් පසුව මහා සංඝරත්නයේ ආශිර්වාද ලබා ගෙන වන්දනාවට පිටත් වන බවත්, ‘සපරගම ශ‍්‍රද්ධාදීපනී’ සද්ධර්ම සංචරණ වැඩ සටහනේ නිර්මාතෘ සහ රත්නපුර ‘මිණිපුර මිණි මියුසියම් ආයතනයේ’ අධිපති, සාමවිනිසුරු කපිල චම්පක අතුරලියගම මහතා පැවසී ය.

 


ශ‍්‍රීපාද වන්දනාව  පිළිබදව මහජනතාව දැනුවත් කිරීම පිණිස ප‍්‍රවීණ මාධ්‍යවේදී ක‍්‍රිෂ්ණ විජේබණ්ඩාරයන් ඇතුළු ලේඛක මණ්ඩලයක් විසින් සකස් කළ ‘අපේ බුදුන් අපි ව`දින්ඩ’ නව ග‍්‍රන්ථය ද එහි දී දොරට වැඞීම, මෙවර පින්කමේ විශේෂත්වයයි. ජයන්ත විජේරත්න හේරත්, ධර්මශ‍්‍රී තිලකවර්ධන, රංජිත් ඉලේපෙරුම, බුද්ධික රත්නකුමාර, සරත් වීරවංශ, අජිත්ලාල් ශාන්තඋදය, චන්දන සමරවික‍්‍රම, පියතිස්ස පාදුක්කගේ සහ ප‍්‍රියන්ත බණ්ඩාර යන ලේඛකයන් විසින් නව ග‍්‍රන්ථය සකස්කර ඇත. එය ප‍්‍රකාශයට පත්කර ඇත්තේ රත්නපුර ‘මිණිපුර මිණි මියුසියම්’ ආයතනය මගිනි.
රත්නපුර ප‍්‍රදේශය මුල්කර ගෙන ක‍්‍රියාත්මක කෙරෙන ‘සපරගම ශ‍්‍රද්ධාදීපනී’ සද්ධර්ම සංචරණ වැඩසටහනට, ශ‍්‍රීපාද වන්දනාවට අමතරව, ලබන වෙසක් සමය දක්වා පොහොය දින හයක් පුරාවට කෙරෙන පෙහෙවස් සමාදන් වීමේ පින්කම් මාලාවක්, වන මල් පූජාවක්  සහ චීවර පූජාවක් සහිත දානමය පින්කමක් ද ඇතුළත් වේ.
‘සපරගම ශ‍්‍රද්ධාදීපනී සද්ධර්ම සංචරණ වැඩසටහන’ ක‍්‍රියාත්මක වන්නේ, රත්නපුර, සපරගමු මහ සමන් දේවාලය අසල පිහිටි ශ‍්‍රී සුමනාරාම විහාරස්ථානය මුල්කර ගනිමින්, එහි විහාරාධිපති, පූජ්‍ය කරවිට උපනන්ද නාහිමියන්ගේ මගපෙන්වීම පරිදි ය.
සමාජයෙන් ගිලිහී යමින් තිබෙන පැරණි බෞද්ධ වන්දනා සිරිත් සුරැකීම සහ පින් රැුස්කර ගැනීමට ශක්තියක් නැති අයට ඒ සදහා උපකාරී වීමේ අරමුණින් යුතුව වැඩසටහන පැවැත්වෙන බව, රත්නපුර මිණිදන පදනමේ සභාපති සහ ‘මිණිපුර මිණි මියුසියම්’ මැණික් කෞතුකාගාරයේ අධිපති, සාමවිනිසුරු කපිල චම්පක අතුරලියගම මහතා පවසයි.
සිරිපා වදින්නට යන එම පිරිසට රක්ෂණ ආවරණයක් ද හිමිවේ. එයට අනුග‍්‍රහය දක්වා ඇත්තේ, ‘රත්නපුර ඔර්ලෝසු කණුව ඉදිරිපිට  මැණික් වෙළෙද ව්‍යාපාරික සංගමය’ විසිනි. සිරිපා වන්දනා ගමනෙහි බරපැන, කැපකාර පවුල් 50ක් විසින් ද, මිණිදන පදනම මගින් ද දරන බව, කපිල චම්පක අතුරලියගම මහතා පැවසී ය. වන්දනාකරුවන්ට සත්කාරක සේවා සපයන්නේ පානදුරේ ‘බෙස්ට් ලයිෆ්’ ආයතනය මගිනි.

ශ්‍යාමෝපාලී මහා වංශික මහා නිකායේ මල්වතු පාර්ශ්වයේ තිබ්බටුවාවේ ශ්‍රී සිද්ධාර්ථ සුමංගලාභිධාන මහානායක ස්වාමීන්ද්‍රවර ප්‍රමුඛ සානුනායක කාරක මහා සංඝ සභාව විසින් ජර්මනියේ බර්ලින් නුවර ශ්‍රී සම්බෝධි විහාරාධිපති හා ගම්පහ දොරණෑගොඩ ශ්‍රී සුමන්තින්දාරාම රජමහා විහාරාධිපති හා සදානන්ද මහ පරිවේණස්ථානයේ අධිපති ශාස්ත්‍රපති රඹුක්වැල්‍ලේ දේවානන්ද හිමියන් වෙත සද්ධර්ම කීර්ති ශ්‍රී බුද්ධරක්ෂිත භාෂාන්තර විශාරද යන ගෞරව නාමය සහිතව ජර්මනියේ සමථ බලසම්පන්න ප්‍රධාන සංඝනායක පදවිය පිරිනමා තිබේ. රඹුක්වැල්‍ලේ දේවානන්ද හිමියන් විසින් පුරා වසර විසි පහක් තිස්සේ ජර්මනිය ප්‍රධානකොට යුරෝපය ඇතුළු දේශීය හා විදේශීය වශයෙන්  සිදුකරන ලද ජාතික, ආගමික, සමාජයීය හා ශාස්ත්‍රීය සේවාවට උපහාරයක් වශයෙන් උන්වහන්සේ වෙත මෙකී පදවිය පිරිනමා ඇත.
මහනුවර තෙල්දෙණිය රඹුක්වැල්‍ලේ පදිංචිව සිට (පරලොව සැපත්) දිසානායක මුදියන්සේලාගේ පුංචි බණ්ඩාර දිසානායක නිලමේතුමාගේ හා කුලසේකර මුදියන්සේලාගේ පුංචි මහත්තයා යන දෙ‍පොළගේ පුත් රුවනක් වූ මේ හිමියන් පැවිදි බිමට පත්වීමට පෙර තෙල්දෙණිය දුම්බර මහා විද්‍යාලයෙන් මූලික අධ්‍යාපනය ලබා පසුව ගම්පහ දොරණෑගොඩ සදානන්දා මහ පරිවේණස්ථානයට ඇතුළත්ව වර්ෂ 1976දී එවකට දොරණෑගොඩ ශ්‍රී සුමන්තින්දාරාම රජමහා විහාරාධිපති හා සදානන්ද මහ පරිවේණාධිපතිව වැඩ සිට අපවත්වී වදාළ රාජකීය පණ්ඩිත රඹුක්වැල්‍ලේ ශ්‍රී බුද්ධරක්ෂිත පඤ්ඤාසාරාභිධාන සීනාදී සිව් කෝරළයේ විශේෂ අධිකරණ සමථ බලසම්පන්න ප්‍රධාන සංඝනායක ස්වාමින්ද්‍රයන් වහන්සේගේ හා තත්ශිෂ්‍ය එම විහාරාධිපති හා සදානන්ද මහ පිරිවෙනේ අධ්‍යක්ෂව වැඩ සිට අපවත්වී වදාළ කුරුකොහොගම ශ්‍රී බුද්ධරක්ෂිත ජිනානන්දාභිධාන නායක ස්වාමින්ද්‍රයන් වහන්සේගේ ශිෂ්‍යයකු ලෙස පැවිදි බිමට ඇතුළත් විය.
1984 වර්ෂයේදී ප්‍රාචීන විභාගය සමත් වූ උන්වහන්සේ එම වර්ෂයේදීම අ.‍පො.ස. උසස් පෙළ විභාගයට කලා විෂය ධාරාවෙන් ඉදිරිපත්ව ඉතා උසස් අන්දමින් සමත්ව ගම්පහ දිස්ත්‍රික්කයේ වැඩිම ලකුණු ලබාගෙන 1985දී කැලණිය විශ්ව විද්‍යාලයට ඇතුළත් වූහ. 1985දී මහනුවර මල්වතු මහාවිහාරිය උ‍පොෂථාගාරයේදී උපසම්පදා අධිශීලය ලබාගත් උන්වහන්සේ කැලණිය විශ්වවිද්‍යාලයේ සිංහල, ජනසන්නිවේදනය සහ බෞද්ධ දර්ශනය යන විෂත්‍රයන්ගෙන් සාමාන්‍ය ශාස්ත්‍රවේදී උපාධිය හදාරා 1990 වර්ෂයේදී පවත්වනු ලැබූ එම උපාධි පරීක්ෂණයෙන් කලාතුරකින් ලැබිය හැකි (ප්‍රථම පන්තියේ ගෞරව සාමාර්ථයක්) ට්ඥදඥපචත ජ්ඪපඵබ ඛිතචඵඵ දිනාගත්තේය.
අනතුරව පාලි හා බෞද්ධ විශ්ව විද්‍යාලයෙන් ශාස්ත්‍රපති උපාධිය ලබාගත් උන්වහන්සේ එවකට කොළඹ ජර්මන් ධර්ම දූත සංගමයේ සභාපති වූ පේරාදෙණිය විශ්වවිද්‍යාලයේ හිටපු කුලපති වූද දිවංගත එස්.ඩබ්.ආර්.ඩී. බණ්ඩාරනායක ශ්‍රීමතාණන්ගේ ‍ලේකම් වූද, ඇම්.ජේ. පෙරේරා මහතාගේ ප්‍රධානත්වයෙන් පවත්වනු ලැබූ සම්මුඛ පරීක්ෂණයෙන් සමත්ව 1992 ජර්මනියේ බර්ලින් විහාරයට වැඩම කර විදේශීය ධර්මදූත සේවාවට එක්විය. 1994 සිට 1998 දක්වා බර්ලින් විහාරාධිපතිත්වය දැරූ උන්වහන්සේ ජර්මන් ජාතික බෞද්ධයන්ගේ අනුග්‍රහයෙන් ක්‍රි.ව.2000දී බර්ලින් නුවර ශ්‍රී සම්බෝධි විහාරය නමින් විහාරස්ථානයක් ආරම්භ කළේය.
සිංහල, පාලි, සංස්කෘත, ඉංග්‍රීසි හා ජර්මන් භාෂාවන් පිළිබඳ පෘථුල අවබෝධයක් ඇති උන්වහන්සේ ජර්මන් භාෂාව චතුර ලෙස හසුරවමින් එම භාෂාවෙන් හා සිංහල භාෂාවෙන් ලිපි ලියන ප්‍රවීණ පුවත්පත් ‍ලේඛකයෙක්ද වෙති. 1994 වර්ෂයේදී යුරෝපා මහා බෞද්ධ සම්මේලනය බර්ලින් නුවර පැවැත්වීම, ජර්මනියේ හිට්ලර් විසින් අරඹන ලද දෙවන ලෝක සංග්‍රාමයේදී ලක්ෂ සංඛ්‍යාත ප්‍රමාණයක් මියගොස් වසර 50ක් පිරීම නිමිති කරගෙන 1994 වර්ෂයේදී ජර්මනියේ හිටපු ජනාධිපති ආචාර්ය රිචර්ඩ් ෆොන් වෛසේකර් මහතාගේ ප්‍රධානත්වයෙන් හා රාජ්‍ය නායකයන්ගේ හා ආගමික නායකයන්ගේ සහභාගිත්වයෙන් බර්ලින්නුවර පිහිටි ජර්මන් පාර්ලිමේන්තුවේදී 1994/05/30 දින පැවැති ගුණානුස්මරණ උත්සවයේදී බුදුදහම වෙනුවෙන් ජර්මන් භාෂාවෙන් දේශනයක් රඹුක්වැල්‍ලේ දේවානන්ද හිමියන් විසින් පැවැත්වීම සුවිශේෂි සිදුවීමක් වූ අතර එය බෞද්ධ භික්ෂුවක් විසින් ජර්මන් පාර්ලිමේන්තුවේ පවත්වනු ලැබූ ප්‍රථම හා එකම දේශනයද වේ.
ජර්මනියේ රාජ්‍ය භාෂා දොර්තමේන්තුවේ කථිකාචාර්යවරයකු ලෙසද කටයුතු කරන රඹුක්වැල්‍ලේ දේවානන්ද නායක ස්වාමීන්ද්‍රයන් වහන්සේ දැන උගත් ශිෂ්‍යයන් පිරිසක්ද බිහිකර ඇති අතර එම ශිෂ්‍යයන්ද දෙස් විදෙස් වශයෙන් ධර්ම සේවාවන්හී යෙදී සිටී. පසුගිය වසර 25 තුළ රඹුක්වැල්‍ලේ දේවානන්ද නායක ස්වාමින්ද්‍රයන් වහන්සේ වෙතින් ථෙරවාදී බෞද්ධයන් බවට පත්වී බුදුදහම, භාවනාව, පාලි හා සිංහල භාෂාවන් ඉගෙනගත් අතිවිශාල ජර්මන් ජාතික පිරිසක්ද වෙති.

මුල්‍ලේගම විමලානන්ද හිමි
බලංගොඩ ප්‍රියදර්ශනාරාමාධිපති

විතාරන්දෙණිය ශ්‍රී සුදර්ශනාරාමාධිපති විශ්‍රාමලත් පරිවේණාධිපති කිරින්දේ ගුණසිරි හිමිපාණන්ට නිරෝගි සුව පතා කොළඹ කොටුව සම්බුද්ධාලෝක විහාරවාසි කිරින්දේ පේමසිරි හිමි විසින් මිද්දෙණිය රජයේ රෝහලට ගිලන් ඇඳක් පරිත්‍යාග කෙරිණ. ගිලන් රථයට සවිකරන එම ඇඳ කිරින්දේ පේමසිරි හිමි විසින් මිද්දෙණිය රෝහ‍ලේ ප්‍රධාන වෛද්‍ය නිලධාරිනි ජානකී ජයලත් විදානපතිරණ මහත්මිය වෙත බාරදුන් අයුරු.
බෞද්ධ හා පාලි විශ්වවිද්‍යාලයේ ‍‍‍ජ්‍යෙෂ්ඨ මහාචාර්ය ඉත්තදෙමළියේ ඉන්දසාර, ප්‍රංශයේ ජේතවනාරාමාධිපති මුරුංගාගස්යායේ ඤාණිස්සර, ඉතාලියේ ප්‍රධාන සංඝනායක වගේගොඩ සීලානන්ද, මල්හේවා අයිනේ මුණසිංහාරාමාධිපති  ගජනායකගම සෝමරතන යන හිමිවරු ඇතුළු සඟරුවන මෙහි වේ.

Page 1 of 8

IMAGE

තනුජා සිරස හැර යයි

IMAGE 2017 Dec 17 12:25
පෞද්ගලික රූපවාහිනී නාලිකා මේ රටේ ඇති කළ වෙනස තුළ බිහි වූ ප්‍රබල චරිතයක් තමයි තනුජා ජයවර්ධන...
Views - 173

මගේ ගීත ගායනා කරන්න එපා වික්ටර්ගෙන් පුතුන්ට නියෝගයක්

IMAGE 2017 Dec 17 11:32
නව පරපුරේ සංගීතවේදියකු වන ඉරාජ් වීරරත්න මීට මාස කිහිපයකට පෙර නිර්මාණය කළ දැණුනා නම්වූ...
Views - 239

රුපියල් දහසේ නෝට්ටු මවන භූතයෙක්

IMAGE 2017 Dec 17 10:13
නිවෙස්වලට කඩාවැදී ගෙහිමියන්ට වින පමුණුවන භූතයන් ගැන අපි කොතෙකුත් අසා ඇත්තෙමු. එහෙත්,...
Views - 256

ෆේස්බුක් එකෙන් ඔබේ හිතේ ලෙඩ ගැනත් කියන්න පුළුවන්

IMAGE 2017 Dec 15 10:42
ඔබටත් ෆේස්බුක් ගිණුමක් තිබෙනවාද? එසේ ගිණුමක් තිබෙනවා නම් ඔබ ඒ සඳහා දවසකට; සතියකට හෝ මාසයකට පැය...
Views - 2084

සුද්දන්ට උණවටුන එපා කරවන ඩිස්කෝ ඩාන්ස්

IMAGE 2017 Dec 14 07:56
ආචාර්ය ආතර් සී. ක්ලාක් විද්වතා පවසන ආකාරයට උණවටුන වෙරළ තීරය ලෝකයේ ඇති දර්ශනීය වෙරළ දොළහෙන්...
Views - 3493

ගැබිණි නිලධාරිනිය අධ්‍යක්ෂක හා 'හනිමූන්' ගිහින්

IMAGE 2017 Dec 13 10:33
ඔහු මෙරට ප්‍රමුඛතම සමාගමක අධ්‍යක්ෂ වරයෙකි. වයස අවුරුදු 40 ක් පමණ වන ඔහු දරු දෙදෙනෙකුගේ පියෙක්...
Views - 9380

Please publish modules in offcanvas position.