Home    |    Daily Lakbima    |    Sunday Lakbima    |   Rajina |    Archive    |    Advertise With Us    |     Careers Email - lakbimaonline@gmail.com youtube

lakbima.lk
                                                                                        එසැනින් පුවත් | ගොසිප් | විශේෂ පුවත් | සුන්දර ලක්බිම | ව්‍යාපාරික පුවත්   

හිටපු ජනපති ‍ලේකම් ලලිත් වීරතුංග හිරේට නියම කළ නඩු තීන්දුව නිසා මින් පසු රජයේ නිලධාරීන් රාජකාරි කිරීමට බියක් දක්වනු ඇති බව මේ දිනවල පැවැසෙන කතාවකි. ඒ ගැන විදේශ කටයුතු  අමාත්‍යාංශය ඇතුළු අමාත්‍යාංශ රැසක ‍ලේකම් ධුරය දරා ඇති කීර්තිමත් පරිපාලන නිලධාරියකු වන ලයනල් ප්‍රනාන්දු අදහස් දැක්වූයේ මෙසේය. 
 
වත්මන් පරිපාලන ක්‍රමය අපට ලබා දුන්නේ ඉංග්‍රීසින් විසිනි. එංගලන්තයේ අධ්‍යාපනයට මුල්තැන ලබාදෙන විට ඔවුන් ලංකාවේත් අධ්‍යාපනයට මුල් තැන ලබාදුන්හ. සෞඛ්‍යය පහසුකම් නොමි‍ලේ ලබාදුන්හ. ඒ කෙසේ වෙතත් හොඳින්ම කළ දේ වන්නේ පාර්ලිමේන්තුවේ උත්තරීතරභාවය ආරක්ෂා කිරීමයි. කොයි ආණ්ඩුව බලයට පත්වුවත් මුදල් ලබාගැනීමට පාර්ලිමේන්තුවට අය වැය ‍ලේඛනයක් ඉදිරිපත් කළ යුතුය. මේ අයවැය ‍ලේඛනය ගැන රටේ කොයි කවුරුත් බලා සිටින්නේ මහත් උනන්දුවෙනි. ඒ මගින් ලබා දෙන මුදල් අයවැය මගින් රාජ්‍ය  ආයතනවලට ලබාදෙන මුදල් වියදම් කරන ආකාරය ගැන පාර්ලිමේන්තුව විමසිලිමත් වෙයි. මූල්‍ය පාලනය සම්බන්ධයෙන් ආණ්ඩුක්‍රම ව්‍යවස්ථාවේ 148,149, 150 යන වගන්ති තුනෙහි ඒ පිළිබඳව පිටු තුනක් පුරා විග්‍රහ කර තිබේ. අය වැය ‍ලේඛනය මගින් කිසියම් අමාත්‍යාංශයකට හෝ දෙපාර්තමේන්තුවකට වෙන් කළ මුදල් ප්‍රමාණවත් නොවන්නේ නම් පරිපූරක ඇස්තමේන්තුවක් ඉදිරිපත් කරමින් අමතර මුදලක් වෙන් කරගත හැකිය. මැතිවරණයකදී කටයුතු කරන ආකාරය, පාර්ලිමේන්තුව විසුරුවා ඇති කාලයේදී මුදල් ඇමැති කටයුතු කළ යුතු ආකාරය ගැනද එහි පැහැදිලිව සඳහන් කර තිබේ. මුදල් ඇමැතිවරයාට වුවද රාජ්‍ය මුදල් භාවිතයේදී සිය අභිමතය පරිදි කටයුතු කිරීමට අවස්ථාවක් ලැබෙන්නේ නැත.
කිසිම රාජ්‍ය සේවකයෙකුට රාජ්‍ය මූල්‍ය පාලන ප්‍රතිපත්තිවලට පටහැනිව ක්‍රියාකළ නොහැක්කේය. එහෙත් ඇතැම් අවස්ථාවලදී රාජ්‍ය නිලධාරීන්ට සිය අභිමතය භාවිත කිරීමට සිදුවන අවස්ථාද තිබේ. 
රාජ්‍ය නිලධාරීන් සෑම අවස්ථාවකදීම තමන්ගේ අමාත්‍යාංශයේ ඇමැතිවරයා කියන ආකාරයටම කටයුතු කළ යුතුදැයි යන්න ගැන අවධානය යොමු කරයි. ඇමැතිවරයෙක් කියන දේ රාජ්‍ය නිලධාරියා දිගින් දිගටම ඉටු නොකරන විට කිසියම් සිත් බිඳීමක් නිරායාසයෙන්ම සිදුවීම ස්වාභාවිකය. ප්‍රේමදාස ජනාධිපතිවරයාට හැර අනෙක් සියලුම ජනාධිපතිවරුන්ට මම සෘජුවම සේවය කර ඇත්තෙමි. එසේම විවිධ රජයන් යටතේ විවිධ ඇමැතිවරුන් ගණනාවක් සමග කටයුතු කර ඇත්තෙමි. 70-77 රජයේ ප්‍රබලතම ඇමැතිවරයා වූ ෆීලික්ස් ඩයස් බණ්ඩාරනායක ඇමැතිවරයා සමග වරක් මට ගැටෙන්නට සිදුවිය.  දෙදෙනාගේම සිත් නොරිදෙන ආකාරයට එම ගැටලුව විසඳාගෙන සුහදව කටයුතු කිරීමට හැකිවිය. රාජ්‍ය නිලධාරීන් ඇමැතිවරු සමග කටයුතු කිරීමේදී සෘජුව හා අනලස්ව කටයුතු කළ යුතුය. 
ඇතැම් අවස්ථාවලදී ඇතැම් ඇමැතිවරු විවිධ ගෙවීම් කරන ලෙස තම ‍ලේකම්වරුන්ට නියෝග කරයි. සෑම අවස්ථාවකදීම ඇමැතිවරු ලිඛිතව මෙම නියෝග දෙන්නේ නැත. බොහෝවිට දෙන්නේ වාචිකවය. 
මෑත කාලයේදී ලලිත් වීරතුංග හිටපු ජනාධිපති ‍ලේකම්වරයාට සිර දඬුවම් ලැබිම හා මූල්‍ය අපරාධ කොට්ඨාසයේ පරීක්ෂණ නිසා රාජ්‍ය නිලධාරීන් සෘජුව කඩිනමින් කටයුතු කිරීමට බියක් ඇත්තේය යන මතයකි. මෙසේ බියවීමට කිසිදු හේතුවක් නැත. මූල්‍ය අපරාධ කොට්ඨාසයක් තිබුණත්  නැතත් පැය විසිහතරකින් ස්ථාන මාරුවීමක් ලබාගෙන යාමට බිය නැති රාජ්‍ය සේවකයකු සිටිත් නම් මේවාට බිය විය යුතු නැත.  
මම රාජ්‍ය සේවයේ කටයුතු කරන විට කිසිදු අවස්ථාවකදී බිය වූයේ නැත. රාජා සමරනායක රාජ්‍ය ඇමැතිවරයා ලෙස කටයුතු කරන කාලයේදී රජයේ ගබඩාව පැවැතියේ මගේ යටතේය. එක්තරා අවස්ථාවකදී අධිකරණ අමාත්‍යාංශයේ නිලධාරියෙක් පැමිණ එහි දූෂණ සිදුව ඇතැයි චෝදනා කළේය. එම දූෂණ මොනවාදැයි නිශ්චිතව පවසන්නේ නම් එම වැරදි නිවැරදි කිරීමට උත්සාහ ගන්නා බවට මම සහතික වීමි. මේ ගැන එම නිලධාරියාට පැහැදිලිව කරුණු ඉදිරිපත් කිරීමට නොහැකිවූ විට එම නිලධාරියාට ඇමැතිවරයා දොස් පැවරුවේය. මෙවැනි සිදුවීම්වලින් රජයේ සේවකයන්ට ධෛර්යයක් ඇතිවන නමුත් බියක් ඇතිවීමට හේතුවක් නැත.
තමන්ගේ දේශපාලන අරමුණු ඉටු කරගැනීමට දේශපාලනඥයන්ට රජයේ දේපළ යොදා ගැනීමේ චෝදනා එල්ලවෙයි. මැතිවරණයකට මාසයකට පෙර මැතිවරණ දෙපාර්තමේන්තුව රාජ්‍ය නිලධාරීන්ට දැනුම් දෙන්නේ රාජ්‍ය සම්පත් මැතිවරණ කටයුතුවලට යොදා ගැනීමට අවස්ථාවක් නොදිය යුතු බවය. ඇමැතිවරයා කියන දේ මුල සිටම කිරීමට ගියහොත් රාජ්‍ය නිලධාරීන් උගුලට හසුවෙති. එවැනි අවස්ථාවකදී කළ යුත්තේ ඇමැතිවරයාටද කරුණු පහදා දී කටයුතු කළ යුත්තේ රාජ්‍ය නිලධාරියාය. නැතිනම් අමාත්‍යාංශ ‍ලේකම් නිසාය. 
මම වෙළෙඳ හා නාවික කටයුතු අමාත්‍යාංශයේ කටයුතු කරන කාලයේදී ජනාධිපති ‍ලේකම්වරයාගෙන් දුරකථන ඇමතුමක් ලැබිණි. ඒ අවස්ථාව වන විට මම වෙළෙඳ අමාත්‍යාංශයේ වැඩ බලන ‍ලේකම්වරයා ලෙස කටයුතු කළෙමි. මහ‍පොළ අරමුදලින් 
ආරක්ෂක අමාත්‍යාංශයට මුදල් අවශ්‍ය බව ඔහු කීවේය. මහ‍පොළ අරමුදලින් මට මුදල් ලබාදීමට හැකියාවක් නොමැති බව ජනාධිපති ‍ලේකම්වරයාට ගැළපෙන ආකාරයට දැනුම් දුන්නේය. එම අරමුදල පවත්වාගෙන යන්නේ කමිටුවක් විසින් නිසාත්, මම එම මණ්ඩලයේ නොමැති නිසාත්, අගවිනිසුරුවරයා මෙම මණ්ඩලයේ ප්‍රධානියා නිසාත් එය කළ නොහැකි බව දැනුම් දුන්නෙමි.  එදින දිවා ආහාරය ගෙන නැවත කාර්යාලයට එන විට මගේ මේසය මත ජනාධිපති ‍ලේකම් කාර්යාලයෙන් මාගේ නමට ලිපියක් විය. එම ලිපියේ සඳහන් වූයේ ලයනල් ප්‍රනාන්දු නමැති මම වහාම ක්‍රියාත්මක වන පරිදි මහවැලි අමාත්‍යාංශයට මාරු කර යවන බවය. මා වෙනුවට පැමිණීමට සිටි මහවැලි අමාත්‍යාංශයේ නිලධාරියා නිදහස් කිරීමට ගාමිණී දිසානායක ඇමැතිවරයා කැමැති නොවූ නිසා එම මාරුවීම ක්‍රියාත්මක වූයේ නැත. මා කීමට උත්සාහ කළේ සාධාරණ හේතු මත දේශපාලන නියෝගයක් ක්‍රියාත්මක කිරීම ප්‍රතික්‍ෂේප කළ පමණින්ම රාජ්‍ය නිලධාරියෙක් ගෙදර යැවිය නොහැකිය යන්නයි. නීත්‍යානුකූල හේතු මත යම් දෙයක් කළ නොහැකි බව රජයේ නිලධාරියෙක් දැන්වූවිට එම නිලධාරියාගේ රැකියාව අහිමි කිරීමට ජනාධිපතිවරයාටද බලයක් නැත්තේය. කළ හැක්කේ වෙනත් තැනකට මාරු කර යැවීම පමණි. එහෙත් කවයක් සේ නැවතත් කැරකී පළමු සිටි තැනටම පැමිණෙනු ඇත.
 
සංජය නල්ලපෙරුම

දේශීය ආහාර බෝග වගා කිරීමේ සතියක් ප්‍රකාශයට පත් කිරීමට රජය තීරණය කොට ඇතැයි පැවැසේ. දේශීය ආහාර නිෂ්පාදනය අරභයා වර්තමානයේ පවතින්නේ ඉතා කනගාටුදායක  තත්ත්වයක් බව ඉතාම පැහැදිලිය. අයහපත් කාලගුණ තත්ත්වය, නිෂ්පාදන පිරිවැය ඉහළයාම, වෙළෙඳ ‍පොළ ගැටලු ආදි වාස්තවිත තත්ත්වයන් කරණකොටගෙන ශ්‍රී ලංකාවේ කෘෂිකර්මාන්තය ඉතා අවදානම් සහගත අඩියකට පැමිණ තිබෙන බව පෙනී යන කාරණයකි.
ජනාධිපති මෛත්‍රීපාල සිරිසේන මහතා අවස්ථා ගණනාවකදී ප්‍රකාශ කළ කරුණක් වන්නේ සහල්, අල, ලූනු, කව්පි, මුංඇට, කුරහන්, වියළි මිරිස් වැනි දේශීය වශයෙන් වගා කළ හැකි ආහාර බෝග දිගින් දිගටම ආනයනය කිරීමට සිදුවීම ලැජ්ජාවට කරුණක් වන බවය.
ඉකුත් වසරේදීම මෙවැනිම දේශීය ආහාර ප්‍රවර්ධන වැඩ සටහනක් ක්‍රියාත්මක කරනු ලැබිය. එහෙත් අයහපත් කාලගුණ තත්ත්වය නිසාදෝ  මේ වසරේ සැප්තැම්බර් මාසය වන විටත් අපි අඩුවක් නොමැතිව  සහල් ඇතුළු අත්‍යවශ්‍ය ආහාර ද්‍රව්‍ය දිගින් දිගටම ආනයන කරමින් සිටින්නෙමු. ගොවි පුතෙකු හා කෘෂිකාර්මික ප්‍රදේශයකින් රටේ මුල් පුටුවට පැමිණි මෛත්‍රීපාල සිරිසේන ජනාධිපතිවරයාට මෙරට කෘෂිකර්මාන්තය නගා සිටුවීම  සඳහා අවංක වුවමනාවක් තිබෙන බව පැහැදිලිය. ඔහු විසින් මොරගහකන්ද ජලාශය ඉදිකිරීම සඳහා ගනු ලැබූ ප්‍රයත්නය තුළින් ඒ බැවි ගම්‍ය වෙයි. එහෙත් අවාසනාවකට මෙන් කෘෂිකාර්මික ක්ෂේත්‍රයේ වගකිව යුතු අංශ වෙතින් ප්‍රමාණවත් සහායක් ජනාධිපතිවරයාට නොලැබිම නිසා ආහාර බෝග  
නිෂ්පාදනය මන්දගාමී තත්ත්වයකට ඇද වැටී තිබේ. එම නිසා ජනාධිපතිවරයාට  2017 වසරේදී ආහාර බෝග නිෂ්පාදනය ඉහළ නැංවීම සඳහා නව වැඩ සටහනක් ඉදිරිපත් කිරීමට සිදුවී ඇත. 
 
සහල් නිෂ්පාදනය
 
‍පොහොර සහනාධාරය සඳහා වාර්ෂික අයවැයෙන් රුපියල් බිලියන 35ක් පමණ වෙන් කරන අතර එම වැඩ සටහන සඳහා දරනු ලබන වියදම  කෘෂිකාර්මික ක්ෂේත්‍රය සඳහා වෙන් කරනු ලබන මුළු ප්‍රතිපාදන  ප්‍රමාණයෙන් සියයට 60ක් පමණ වේ.
(මුදල් අමාත්‍යාංශය වාර්ෂික වාර්තාව 2016) රජය ‍පොහොර  සහනාධාරය සඳහා මෙපමණ මුදලක් වියදම් කරනු ලැබුවද අද වන විටද වෙළෙඳ ‍පොළේ සහල් ගැටලුවට විසඳුමක් ලෙස සහල් ආනයනය කොට බෙදා හැරීමට රජයට සිදුවි තිබේ. ජනාධිපති මෛත්‍රීපාල සිරිසේන මහතාම මීට මාසයකට පමණ පෙරදී ප්‍රකාශ කළේ රටවල්  හතරකින් හෝ සහල් ආනයනය කොට වෙළෙඳ ‍පොළේ සහල් මිල අර්බුදයට විසඳුම් ලබාදෙන බවය. දැන් වෙළෙඳ ‍පොළේ සහල් සඳහා පැවති උපරිම මිල ඉවත් කොට  ඇත. ඒ අනුව එතෙක් රුපියල් 90ට  පමණ තිබූ සම්බා  සහල් කිලෝවක් රුපියල් 110 ක් පමණ දක්වා ඉහළ ගියේය. 2017 වර්ෂයේ “ආහාර නිෂ්පාදන ජාතික වැඩ සටහන” පැමිණෙන්නේ මෙවැනි පසුබිමකය. අද වන විට ලංකා සතොසේ ලොකු ලූනු කිලෝවක මිල රුපියල් 136 කි. අර්තාපල් අල කිලෝවක මිල රුපියල් 159 කි. මෙය ඉතා ඉහළ මිලක් බව අමුතුවෙන් කිවයුතු නැත. දැන් වෙළෙඳ‍පොළේ උපරිම මිලක් නියම කොට ඇති භාණ්ඩයන් හෝ සේවාවන් සොයා ගැනීමට නොහැකිය. 2017 සඳහා ඉදිරිපත් කළ අය වැය ‍ලේඛනයෙන් කියා සිටියේ හාල් මැස්සන්, සාලයා, කරවල, උම්බලකඩ, ටින්මාළු ආදිය සඳහා සහනදායි මිලක් යටතේ අලෙවි කිරීමට පියවර ගන්නා බවය. නමුත් මේ වන වට වෙළෙඳ ‍පො‍ලේ හාල් මැස්සන්, කරවල ආදියෙහි  මිල විශාල වශයෙන් වැඩි වී තිබේ.
ආහාර නිෂ්පාදන ජාතික වැඩ සටහන ධීවර සම්පත් ප්‍රවර්ධනය කිරීම සඳහාද වැඩ පිළිවෙළක් එකතු කළ යුතුය. මක්නිසාදයත් රටවටා  නොගැඹුරු මුහුදු  තීරයක් පැවැතීමත්, අමුතු පිරිවැයක් නොදරා මහමුහුදෙන් නොමිලයේ මාළු ලබාගැනීම හැකිවීමත් නිසාය. ආහාර නිෂ්පාදන වැඩ සටහන ගැන කතා කරමින් තවදුරටත් පිටරටින්, හාල්මැස්සන්, කරවල හා මාළු ආනයනය කිරීම ලැජ්ජා සහගත ක්‍රියාවන් බව අමුතුවෙන් කිවයුතු නැත.  
සෑම ආණ්ඩුවක් යටතේම දේශීය ආහාර නිෂ්පාදනය ඉහළ නැංවීම සඳහා විවිධ නම්වලින් වැඩ සටහන් ඉදිරිපත් කරනු ලැබිය. චන්ද්‍රිකා බණ්ඩාරනායක කුමාරතුංග රජය යටතේ “වගා ලංකා වගා සංග්‍රාමය පැමිණියේය. මහින්ද රාජපක්ෂ රජය යටතේ “දිවි නැගුම හා ගෙවතු වගා වැඩ සටහන” පැමිණියේය. වත්මන් රජය යටතේද දැන් “ආහාර නිෂ්පාදන ජාතික වැඩ සටහන” පැමිණ තිබේ. මේ අන්දමට ඒ ඒ ආණ්ඩු යටතේ කෘෂිකාර්මික  වැඩ සටහන් පෙරට පැමිණියද ඒවායේ ප්‍රතිඵල ඉතා අල්ප විය. සත්‍ය තත්ත්වය නම් අප තවදුරටත් ආහාරවලින් ස්වයං ‍පෝෂිත නොවූ ජාතියක් වීමය. ශ්‍රී ලංකාවේ  අපට  ආහාර සුරක්ෂිතභාවයක් නොමැත. ඉන්දියාවෙන් හෝ පාකිස්තානයෙන් කරනු ලබන ආහාර ආනයනය කුමන හෝ  තත්ත්වයන් යටතේ වැළකී ගියහොත් ශ්‍රී ලංකේය ජනතාව දැඩි ආහාර අර්බුදයකට මුහුණ දෙනු ඇත.
මේ නිසා ඉලක්කගත ජාතික ආහාර නිෂ්පාදන වැඩ පිළිවෙළක් රටට අවශ්‍යය. කටින් බතලකොළ සිටුවන ආකාරයේ වැඩ සටහන් තුළින් රටට යහපතක් වී නොමැති බව අප දිගින් දිගටම ආහාර ආනයනය මත රැදී සිටීම තුළින් පෙනී යයි. මේ අවදානමෙන් මිදීම සඳහා ආණ්ඩු මාරු වුවත් වෙනස් නොවන ජාතික කෘෂිකාර්මික ප්‍රතිපත්තියන් සකස් කළ යුතුව ඇත. එහිදී ජනතාවටද කෙටිකාලයක් තුළ කිසියම්  කැප කිරීමක්  කිරීමට සිදුවනු ඇත. විදේශ ආහාර  මතම රැඳී නොසිටීම දේශීය ආහාර සඳහා හුරුවීම හා ඒ සඳහා කිසියම් කාලයක් ලබාදීම අප විසින් කළ යුතුම කාර්යයකි. ඉන්දියාව, ජපානය වැනි රටවල් සෑම අවස්ථාවකදීම පාහේ පරිභෝජනය කරනුලබන්නේ දේශීය නිෂ්පාදනයන්ය. එසේම එම රටවලට වෙනත් රටක 
නිෂ්පාදනය කරනු ලැබූ කෘෂි බෝගයක් පහසුවෙන් ආනයනය කිරීමද අසීරුය. තීරු බදු හා තීරුබදු නොවන බාධක යොදා දේශීය  ගොවිතැන් නිෂ්පාදනයන් ආරක්ෂා කර ගැනීමේ  වැඩ පිළිවෙළක් එම රටවල් අනුගමනය කරනු ලබයි.  එවැනි වැඩ පිළිවෙළක් හා ප්‍රතිපත්තියන් නොමැතිව කුමන කෘෂි නිෂ්පාදන වැඩසටහනක් දියත් කරනු ලැබුවද එය සාර්ථකවීමට ඇති ඉඩකඩ අඩුය.
 
විදුලි බිල හා ජල ගාස්තු
 
ඉදිරියේදී විදුලි බිල හා ජල ගාස්තු ඉහළ නැංවීමට සිදුවන බවට  ආරංචි මෙම සතිය ආරම්භයත් සමග පැතිරී ගියේය. විදුලි ඉංජිනේරුවන් මණ්ඩලයට පවසා  ඇත්තේ පාඩු පියවා  ගැනීම සඳහා විදුලි බිල ඉහළ නැංවිය යුතු බවය. එහෙත් විදුලි බල හා බලශක්ති අමාත්‍යවරයා පවසා තිබුනේ කිසිදු හේතුවක් මත විදුලි බිල ඉහළ නැංවීමක් සිදු නොකරන බවය. අමාත්‍යවරයා මීට මාස කිහිපයකට පෙර  කරනු ලැබූ ඉහත ප්‍රකාශය අදටත් වලංගු දැයි අපි නොදනිමු. කෙසේ  වෙතත් පවතින  තත්ත්වය යටතේ විදුලි ගාස්තුවද වැඩිකළහොත් රටේ ආර්ථිකයත් ජනතාවත් කබලෙන් ලිපට  වැටෙන බව පැහැදිලිය. ඉහළ ගොස් ඇති ප්‍රවාහන හා අනෙකුත් නිෂ්පාදන පිරිවැය හමුවේ  කර්මාන්ත කරුවන් ස්වකිය ව්‍යාපාර පවත්වාගෙන  යන්නේ ඉතා අසීරුවෙනි.
මෙරට නිෂ්පාදන කර්මාන්තවල තරගකාරීත්වය පහළ වැටීමට එහි පිරිවැය ඉහළයාම මූලික හේතුවක් වී තිබේ. විශේෂයෙන්ම ඉන්දියාව, චීනය, වියට්නාමය, බංග්ලාදේශය වැනි ආසියාතික  රටවල් ශ්‍රී ලංකාවට සාපේක්ෂව අඩු නිෂ්පාදන පිරිවැයක් යටතේ භාණ්ඩ හා පමණට වැඩි සේවා  නිෂ්පාදනය කරනු ලබයි. ඒ අතුරින් ඇඟලුම් ක්ෂේත්‍රය ශ්‍රී ලංකාවට වඩාත් සමීපය. මෙරට ඇඟලුම් ක්ෂේත්‍රයේ  නිෂ්පාදන පිරිවැය ඉහළ යාමට විදුලිය, ප්‍රවාහන වියදම් හා සේවක වැටුප් මට්ටම වැඩිවීම හේතුකාරක වී තිබේ. මෙවැනි පසුබිමක් යටතේ තවදුරටත්  ප්‍රවාහන වියදම් හා ජල ගාස්තු ඉහළ යෑමක්  සිදුවන්නේනම් කාර්මික ක්ෂේත්‍රයේ තරගකාරීත්වය තවදුරටත් පහළයාමක් අපේක්ෂා කළ හැකිය.
අනෙක් පැත්තෙන් පාරිභෝගිකයාගේ ජීවන වියදම ඉහළ යාමටද එය ආසන්න බලපෑමක් වනු ඇත. විශේෂයෙන්ම මෙරට විදුලි බිල ගැන සලකා බැලුවොත් එය ලෝකයේ  ඉහළම විදුලි ගාස්තු ගෙවන රටවල්වලින් එකකි. ප්‍රවාහන, දුරකථන අමාත්‍යාංශය හා ආහාර ද්‍රව්‍ය  ආදියෙහි බරෙන් හෙම්බත්වී සිටින ජනතාවගේ හිසමත විදුලිය හා ජල ගාස්තුවද පැටවුණහොත් ඔහුට පාන් කියා ගැනීමටවත් නොහැකි තත්ත්වයන් උදාවනු ඇත. 
 
සාලිය ජනක කුමාර

යහපාලන රජයට දෙවසරක් පිරී ඇත. මෙම රජය බලයට පත් කර දීමට මෙරට බෞද්ධ භික්ෂූන් වහන්සේලාට විශාල මෙහෙයක් කළ බව අමුතුවෙන් සඳහන් කළ යුතු නැත.  විශේෂයෙන් කෝට්ටේ නාග විහාරයේ සෝභිත නාහිමියන් ප්‍රමුඛ ප්‍රාදේශීය  මහා සංඝරත්නය වත්මන් යහපාලන රජය බලයට පත් කිරීමට සහාය වූයේ ප්‍රධාන කරුණු කිහිපයක් මුල්කරගෙනය.
විධායක ජනාධිපති බලතල අහෝසි කිරීමට දූෂණය, වංචාව, හොරකමට එරෙහිවීම හා ඉකුත් රජයේ එවැනි කටයුතු විමර්ශනය කර වැරදිකරුවන්ට දඬුවම් දීම ජාතික  හා ආගමික සහජීවනය ඇතිකර රට තුළ ශීඝ්‍ර දියුණුවක් ඇති කිරීම යන කරුණු ඉන් ප්‍රමුඛත්වයෙන් සැලකිය හැකිය. යහපාලන ආණ්ඩුවේ එක්සත් ජාතික පක්ෂ ශ්‍රී ලංකා නිදහස් පක්ෂ දෙපාර්ශ්වයම ගිවිසුමකට එළෙඹුනේද මේ කාරණා පිළිබඳ අවබෝධයෙන් යුතුවය. මේ ගිවිසුම අත්සන් කළේ දෙවසරකට ඉහතදීය. දැන් ඊටද කල් පිරී ඇත. අප දැන් ආපසු හැරී බලද්දී එදා මේ රජය බලයට පත් වෙද්දී දුන් ‍පොරොන්දු  ඒ ආකාරයෙන්  ඉටු වී ඇත්ද යන්න සැක සහිතය. යම් රජයක් ලබා දෙන ‍පොරොන්දු 100 ක්ම ඉටු කළ නොහැකි වනු ඇත. ඒ ගැන තර්කයක් අපට නැත. එසේ වුවද ප්‍රධාන කාරණා ඉටු කිරීමට මේ  රජය ගෙන ඇති පියවරයක් හා ඒවායේ ප්‍රගතිය විමසා බලද්දී සතුටුවිය හැකිද යන්න විමසා බැලිය යුතුව ඇත.
එදා සෝභිත හාමුදුරුවන් වේදිකා ගානේ හඬ නැගුවේ ජනාධිපති  විධායක බලතල අඩු කිරීම සඳහාය.  එහෙත් 19 වන සංශෝධනය ඉදිරිපත් කර ඊට ආරම්භයක් දුන්නා මිස දැන් ඒ ගැන කතාවක්වත් නැත්තේ ඇයි දැයි අපට  තේරුම් ගැනීමට අපහසු නැත. සෝභිත හිමියන්ගේ දේහය ඉදිරිපිටදීද රටේ නායකයන් කතා කරනු ලැබුවේ සෝභිත නාහිමි අපේක්ෂා කළ වෙනස යහපාලන රජය විසින් ඇති කරන බවය. පසුගිය කාල පරිචිජේදය තුළ රටේ ඇති වූ ස්වභාවික විපත් හේතුවෙන් යම් යම් කාරණා ඉටු කිරීමට රජයට අවස්ථාවක් නොවූ බවටද තර්කයක් නැත. එහෙත් කළ හැකි දේ නොකර නොකළයුතු දේ කරමින් මේ යහපාලන රජය ඇති කරන වෙනස කුමක්දැයි අසන්නට අපට සිදුව තිබේ.
වත්මන් රජය බලයට පත් වූ ගමන්ම 2015 පෙබරවාරි 27 වනදා සිදුකර ඇති මහ බැංකුවේ බැඳුම්කර ගනුදෙනුව හා ඉන් සිදුව ඇති මහ මුදල් වංචාව දෙවසරක් යන්නට කලින් හෙළිදරව් කරගන්නට වත්මන් විපක්ෂයට හැකියාව ලැබි තිබුණද ඉකුත් රජයේ දස වසරක කාලයේ සිදු කළායැයි කියන කිසිදු හොරකමක්, දූෂණයක් ගැන නිවැරදි අයුරින් ඔප්පු කර ගන්නට වත්මන් රජයට මතෛක් හැකියාව ලැබි නැත.
මහ විශාල වංචා කළ බව කියමින් ඉකුත් රජයේ නායකයන් සම්බන්ධයෙන් යහපාලන රජය ලෝකයට කීවේ කුමක්ද? නමුත් අද මේ රජයේ මැති ඇමැතිවරුන් ඊටත් වඩා හොරකම් කර ඇති බවට ඔප්පු වෙමින් තිබෙන්නේ මේ දෙගොල්ලොම එකම පි‍ලේ අය බව සනාථ කරමින්ය. රජයේ නොහැකියාව වහ ගැනීමට දැන් පක්ෂය තුළත් ආණ්ඩුව තුළත් පිල් බෙදෙමින් එකිනෙකට චෝදනා කර ගැනීම අපි පිළිකුලෙන් යුතුව බලා සිටින්නෙමු. ගෙදර ගින්දර පිටතට දෙන්න එපා යැයි ගැමි වහරේ කියමනක් තිබේ. පක්ෂය තුළ තම සාමාජිකයන්ගේ ප්‍රශ්න කතා බහ කර විසඳා නොගෙන  එකිනෙකා අභිබවා යන ප්‍රකාශ කතා කරමින් අද බොහෝ ජනතාව අභිමුඛව රජය ස්වකීය අසාර්ථකභාවය ප්‍රකට කර තිබේ. 
විජේදාස රාජපක්ෂ මහතා අමාත්‍යවරයෙකු වුවද එ.ජා.ප.යේ සාමාජිකයෙකි.  ඔහු වරදක් කර ඇත්නම් ඒ පිළිබඳ පක්ෂ අභ්‍යන්තරයේ සාකච්ඡා කර තීන්දු තීරණ ගත යුතුය. එසේ නොමැතිව විජේදාස අමාත්‍යවරයා සිය අමාත්‍ය ධුරයේ කටයුතු ඉටු නොකරන බවට ප්‍රසිද්ධියේ ප්‍රකාශ කිරීමෙන් අපේක්ෂා කරන්නේ කුමක්ද යන්න රටේ ජනතාවට ප්‍රශ්නයකි. මේ නිසා දැන් එ.ජා.ප. පාක්ෂිකයන්ද පිල් බෙදෙමින් කොටසක් විජේදාස රාජපක්ෂ මහතාටද පක්ෂවද තවත් කොටසක් ඔහුට එරෙහිවද සිටිති. ඉදිරියේ ළඟ එන මැතිවරණයේදී මේ පිල් බෙදීම එ.ජා.ප.ය ජයග්‍රහණයට කොයි ආකාරයෙන් බලපාන්නේ දැයි පක්ෂයේ නායකයන් අවධානය යොමු කළ යුතු නොවේද?
මහින්ද රාජපක්ෂ රාජ්‍ය පාලන සමයේ සිදුවූවා යැයි කියන වංචා දූෂණ සම්බන්ධයෙන් පරීක්ෂණ ප්‍රමාද වීම හා නඩු පැවැරීමේ ප්‍රමාදය ගැන අගමැතිවරයාටද ඇඟිල්ල දිගු කරන්නට අපට සිදුව තිබේ. රනිල් වික්‍රමසිංහ මහතා අමාත්‍ය මණ්ඩල ප්‍රධානියාය. ඔහුට ඕනෑම අමාත්‍යාංශයක කටයුතු පිළිබඳ ඕනෑම වේලාවක විමසා බලා තීන්දු තීරණ ගත හැකිය.  එසේ තිබියදී ඔහු මේ නඩු ‍පොත් පරීක්ෂණ ප්‍රමාදය ගැන තමන්ගේම අමාත්‍ය මණ්ඩලයේ තමන්ගේම පක්ෂයේ අයෙකුට තමන්ගේම අය ප්‍රසිද්ධියේ පහර දෙද්දී බලා සිටීම ප්‍රජාතන්ත්‍රවාදී දැයි කිව හැකිද?
හම්බන්තොට වරාය බදු දීම සම්බන්ධයෙන් අප තුළ ඇත්තේ ජාතික ආර්ථිකය නංවාලීමට ගත් තීරණයක් යන හැඟීමය. ඉකුත් රජයේද මේ ආකාරයට රාජ්‍ය දේපළ බදු දීමට පමණක් නොව විකිණීමටද පියවර ගෙන ඇත. ඒ නිසාම ඒකාබද්ධ විපක්ෂයේ මහින්ද රාජපක්ෂ මහතා ඇතුළු කණ්ඩායම මීට විරුද්ධ වීම ගැන අප පුදුමයට පත්ව සිටිමු. ඔවුන්ට මෙම බදු දීමට විරුද්ධ වීමට හා ඒ සඳහා ජනතාව පෙළ ගැස්වීමට අවස්ථාව උදා කර දුන්නේද රජයේ උදවියටය. මෙම ගිවිසුම සම්බන්ධයෙන් විවෘත සංවාදයක් කරන්නට අවස්ථාව තිබුණේ නම් විරුද්ධවාදීන්ට මෙම ගිවිසුම තුළින් රාජ්‍ය දේපළ විකුණා ගන්නවා යැයි සිතන්න හෝ ප්‍රකාශ කරන්නට අවස්ථාවක් නොලැබෙනු ඇත.
ගත වූ දෙවසර තුළ රටේ ජනතාවට සහනයක් වූ යමක් කළේද යන්න පිළිබඳව ජනතාව තුළ නම් මතකයක් නැති තරම්ය. අමාත්‍යාංශ හා රාජ්‍ය ආයතන හුදෙකලාව ඔවුන්ගේ කටයුතු කරගෙන යද්දී කරලියේ දක්නට ලැබුණේ රජයේ පාර්ශ්ව දෙක (ශ්‍රීල.නි.ප. , එ.ජා.ප) ඇතැම් කරුණු වලදී කඹ අදිමින් එකිනෙකා විවේචනය කර ගැනීමකි. ඔවුන් තුළද අපට අසන්නට දකින්නට ලැබුණේ ඒවාය.
ඔවුන් තුළ දකින්නට ලැබෙන දෙයින් රජයක් තිබේද යන ප්‍රශ්නය මතුවන බව හැඟීයන බව සඳහන් කර තිබුණේ ජනාධිපතිවරයාමය. එසේ වීමට හේතුව ඉකුත් දෙවසර තුළ රජයේ ජනතා වැඩසටහන් මාධ්‍ය මගින් ප්‍රචාර නොවීම බව පැහැදිලිය. ඊටද වගකිව යුත්තේ රජයමය. රජයේ වැඩ පිළිබඳ මාධ්‍යයන්ට  තොරතුරු සපයා දෙන්නට කෙතරම් බලවත් යාන්ත්‍රණයක් තිබේදැයි අප සිතිය යුතුය. ඕනෑම නියෝජ්‍ය  අමාත්‍යවරයෙකුට සෑම අමාත්‍යවරයෙකුටම ප්‍රධාන ‍ලේකම්වරුද ඒ ඒ අමාත්‍යාංශයන්ට මාධ්‍ය ඒකක හා ඊට අයත් කාර්ය මණ්ඩලයද ඇත. රජයේ පුවත්පත්ද, පුවත්පත් දෙපාර්තමේන්තුවද අගමැති හා ජනාධිපති මාධ්‍ය අංශයන්ද ක්‍රියාත්මක වන්නෙය. එසේනම් ඉකුත් දෙවසර තුළ රජයේ ජනතා වැඩසටහන් මාධ්‍යයට ලබාදී තිබුණද එසේ ලබාදී තිබියදීත් ප්‍රචාරය නොවූවාද? එසේ නැත්නම් මාධ්‍ය ආයතනවලට රජයේ සංවර්ධන කටයුතු ගැන තොරතුරු ලබාදී නැද්ද යන්න පිළිබඳව සොයා බැලිය යුතුය. මාධ්‍යවේදීන්ට හා මාධ්‍ය ආයතනවලට දොස් පැවැරීමට පෙර මේ සම්බන්ධයෙන් සොයා බලා එසේ තොරතුරු ලබාදී නැත්නම් අදාළ නිලධාරීන් සම්බන්ධයෙන්ද රජය සුදුසු පියවර ගත යුතුය. 
රජයේ දෙවන මුදල් අමාත්‍යවරයා පසුගියදා ප්‍රකාශයට පත් කළ බදු අඩුවීම හා ණය‍පොලී පහත දැමීම ඉතා වැදගත්ය. මේ රජය බලයට පත් වූ සැණින් ඉන්ධන මිල අඩුකර එම මිල ස්ථාවරව පවත්වාගෙන ගියේය. පසුගිය වසරේ විවිධ බදු පැනවීම් නිසා ජනතාවට යම් අපහසුතාවක් දැනුන බව සැබෑය. මේ රජයේ පළමු අයවැයෙන්ම අත්‍යවශ්‍ය භාණ්ඩ දහතුනක පාලන මිල අඩුකර පාලන මිලකට යටත් කරන බව කීවද එය වෙළෙඳ‍පොළේ ප්‍රායෝගිකව සිදු නොවූ බවද අදටත් ජනතාව නගන මැසිවිල්ලකි. මේ නිසා වත්මන් රජයේ මුදල් අමාත්‍යාංශයේ ප්‍රකාශනයන් ජනතාව එතරම් ගණන් නොගන්නා තත්ත්වයකට පත්ව ඇත. මේ ස්වභාවය ජනතාවගේ සිත් සතන් තුළින් ඈත් කර ඔවුන්ට රජයේ ප්‍රකාශන කෙරෙහි විශ්වාසයක් ඇති වන පරිද්දෙන් ක්‍රියාකළ යුතු වීම අත්‍යවශ්‍ය වේ.  
අප රටේ මහා සංඝරත්නයේ බහුතරයකට පක්ෂ දේශපාලනයක් නැත. අප මේ යහපාලන රජය පිහිටුවා ගැනීමට  ශක්තිය ලබා දුන්නේ පක්ෂ දේශපාලන අරමුණකට වඩා මේ රටේ බෞද්ධ අබෞද්ධ දායක දායිකාවන්ගේ අනාගත සුබ සිද්ධිය සඳහා යහපාලන රජයෙන් යම් කාර්යභාරයක් සිදුවනු ඇතැයි විශ්වාසයෙනි. අප දේශපාලන පක්ෂ වශයෙන්  හෝ පෞද්ගලිකව දේශපාලකයන් සම්බන්ධව විශේෂ පැහැදීමක් හෝ විශේෂ කලකිරීමක්ද නැත. අපට ඇත්තේ අපේ දායක රට වැසියන්ට  රජයකින් සිදුවිය යුතු යුතුකම් හා වගකීම් පිළිබඳව සොයා බලා ඊට අවශ්‍ය මග පෙන්වීම රාජ්‍ය නායක කාරකාදීන්ට ලබාදීමටය.
මේ රටේ ෙතේ‍රනිකායික මහ නාහිමිවරුන්ගේ අනුශාසනා රජය පිළිගෙන ඒ අනුව කටයුතු කිරීම වැදගත් වනු ඇති බවද මෙහිදී මතක් කළ යුතුය. නව ආණ්ඩුක්‍රම ව්‍යවස්ථාවක අවශ්‍යතාවක් ඇති බවත් අපටද පෙනෙන්නේ නැත. අවශ්‍ය වන්නේ ජාතික සංහිඳියාව සඳහා සුළු ජාතීන්ගේ සැකබිය දුරු කරන සංශෝධන කිහිපයක් පමණි. එහිදීද රටේ ඒකීයබාවයත්, බුද්ධාගමත් ප්‍රමුඛත්වයෙහිලා සැලකීම යන කාරණාවලදී. ඊට හානියක් හෝ වෙනත් ආකාරයකින් ඊට දවෛනි හෝ සමතැන හිමිවන වගන්ති ඇතුළත් නොකළ යුතු බවද අපි අවධාරණය කරමු. මේ රටේ සිංහල, මුස්ලිම්, දෙමළ, බර්ගර් හෝ වෙනත් ජාතීන්ට එකට ජීවත්වීමට මතෛක් කල් බාධාවක් හෝ ගැටලු තිබුණේ නැත. මේ ගැටලු ඇති කරමින් ඒවා ජාතික ප්‍රශ්න බවට පත් කරන්නේ දෙමළ හා සිංහල අතළොස්සකි. ඒ අතළොස්සක් දෙනා රජයට හා ජාත්‍යන්තරයට බලපෑම් කරන්නේ කෙසේද ඒ සඳහා ඔවුන්ට ශක්තිය දෙන්නේ කවුදැයි විමසා බලන්නේ නම් සත්‍ය හෙළිදරව් කරගත හැකිය.
මේ රටේ ජාති හෝ ආගම් හෝ භේදයක්  නැත. එවැන්නක් ඇති බව පෙන්වීමට ඇතැම් පිරිස් දරන උත්සාහය ව්‍යර්ථ කළ යුතුය. ඒ සඳහා රජය කළ යුත්තේ ව්‍යවස්ථා සම්පාදනය කොට හෝ අවස්ථාවාදී අතළොස්සක් දෙනා රටට හෙළිකර ඔවුන්ට  දඬුවම් පැනවීමය. අප දන්නා තරමට  දකුණේ ජීවත්වන සිංහල, දෙමළ, මුස්ලිම් සාමාන්‍ය ජනතාවට ජාතිවාදී ආගම්වාදී ප්‍රශ්න නැත. ඔවුන් බලෙන් මේ ජාතිවාදී ආගම්වාදී කලබලවලට ඇද ගන්නට  ඇතැම් පිරිස් උත්සාහ කරමින් විවිධ උපාය මාර්ග ක්‍රියාකාරකම් උතුරේදීත්, දකුණේදීත් ක්‍රියාත්මක කරන බවට නැගෙන චෝදනා සනාථ කර ගැනීමද රජයේ වගකීමයි. 
දෙවසරක් අවසානයේ ආපසු හැරී බලා සතුටුවන දේට වඩා අනාගතය සඳහා සැලසුම් කළයුතු දේ හඳුනාගත යුතුය. හෙට දවස ශ්‍රී ලාංකේය ජනතාවට යහපත් දිනයක් උදාකර දීමට මේ යහපාලන රජයේ මූලික වගකීම් බවට අමතක නොකළ යුතුය.
 
යටමලගල සුමනසාර හිමි
සිංගප්පූරුවේ  ක්වීන් ලිංග් විහාරයේ 
ආගමික උපදේශක හා කැලණිය පට්ටිවිල ජාත්‍යන්තර බෞද්ධාගම මධ්‍යස්ථානාධිපති


රටේ සංවර්ධනයට අප කිසිවෙකු විරුද්ධ නැති බව මුලින්ම කිවයුතු කාරණාවක්ව පවති. එසේම සංවර්ධනයේ නාමයෙන් ලංකාවේ අධිවේගී මාර්ග ඉදිවෙනවාට විරුද්ධත්වයක් නොමැතිවා මෙන්ම රටේ සියලු මාර්ගයන් අධිවේගී වුවද එය අප පිළිගැනීමට සුදානම්ය. එහෙත් ප්‍රශ්නය වන්නේ එසේ අධිවේගී මාර්ග ඉදිකිරීමේදී කෙරෙන නාස්තිය, දූෂණය, වංචාව, හොරකම පිළිබඳ  දේ ගැනය. විශේෂයෙන්ම පැවැති මහින්ද රාජපක්ෂ පාලනය අවසන් වන විට තිබූ ප්‍රධාන චෝදනාවක් අතර වූයේ මග නැගුම ආදී වශයෙන් සමාගම් පිහිටුවාගෙන යමින්, අධිවේගී මාර්ග සහ රටේ පාරවල් ආශ්‍රිතව කළ සොරකම්ය. එය එසේම අද වන විටද ඒ ආකාරයටම අධිවේගී මාර්ගවලින් විශාල ප්‍රමාණයේ දුෂණයන් සිදුවන බව පෙනී යයි.
කොළඹ සිට මාතර දක්වාත්, මාතර සිට හම්බන්තොට දක්වාත් දිවෙන අධිවේගී මාර්ගයේ මේ වන විට මාතර හම්බන්තොට කොටස ඉදිවෙමින් පවති. එය ප්‍රධාන සමාගම් තුනක් විසින් කොටස් හතරකට ඉදිකිරීම් පවතින අතර මේ සඳහා  ශ්‍රී ලංකාව රටක් ලෙස ණය ආධාර ලබා ගෙන ඇත්තේ චීනයෙනි. එසේ චීනයෙන් ගන්නා ණය, ‍පොලී සමග ගෙවීමට නියමිතව ඇත. මෙම කොටසට පමණක් ගෙන තිබෙන ප්‍රමාණය රුපියල් බිලියන 243කි. හම්බන්තොට වරාය විකුණා, ලැබෙන ගාණටත් වඩා වැඩි ගණනක් ලෙස එය පෙන්වා දිය හැකිය.
මෙසේ ණය රැගෙන ඉදිකිරීම් කටයුතු කරන මෙම ක්‍රියාවලිය සඳහා ඉදිකිරීම් කොන්ත්‍රාත්කරුවෙක් සහ ඉදිකිරීම් කටයුතු වෙනුවෙන් උපදේශන සේවාවන් ලබාදෙන සමාගමක් පවති. මෙහි විශේෂත්වයක් ඇත. එනම්, ණය ගැනීම සිදුවන්නේත්, අදාළ උපදේශන සේවාවන් ලබා ගැනීමත් චීනයෙන්ම වීමය. කෙසේ වුවද මෙහි උපදේශනය ලබා ගත් වෙනත් රටවල තත්ත්වයන් ප්‍රගතියන් කෙසේද යන්න සොයා බලා නොමැති වීමද තවත් ගැටලුවක්ව පවති.
අදාළ උපදේශනවලට ගාස්තු ගෙවීම සිදුකෙරුණද ආසන්න වශයෙන් ඩොලර් බිලියන 12ක් ලංකාවට ඔවුන් ගෙන ආ යුතු වුවත් මේ දක්වා ණය ලබාදී නැත. මෙහි සිදුවිය ඇති ගැටලු ගණනාවකි. චීන බැංකුවක් විසින් අනුමත කර ඇති මෙම ණය තවමත් ලංකාවට ලැබි නැති අතර මතුවන ගැටලුවක් වන්නේ අවුරුදු ගණනක් ගොස් ඔවුන් බිල් පත් ඉදිරිපත් කිරීමේදී ‍පොලී සහිතව ප්‍රමාද ගාස්තු සහිතව ඒ බිල්වලට අපට ගෙවීමට සිදුවීමය. ශ්‍රී ලංකා රජයට එය ගෙවීමට නොහැකි වුවහොත් සිදුවන්නේ මෙම අදාළ ඉදිකිරීම සහ උපදේශනයේ වටිනාකමට සරිලන ලෙසට අධිවේගී මාර්ගය චීනයටම විකිණීමට සිදුවීමය. අප මෙහිදී ඉතා වගකීමෙන් කියා සිටින්නේ අදාළ මෙම ණය ගනුදෙනුවත් සමග, අධිවේගී මාර්ග ඉදිකරන ක්‍රියාවලියත් සමග අනිවාර්යයෙන්ම මෙම ණය ගෙවා ගැනීමට බැරි තත්ත්වයක් මතු වීමත්, ණය සහ ‍පොලී ගෙවා ගැනීමට නොහැකි වීමත් නිසා ණයට හිලව්වක් ලෙසට අධිවේගී මාර්ගය චීනයටම දෙන්න සිදු වෙනවා යැයි ආණ්ඩුවේ පාලකයන් විසින් පැවැසීමට ඉඩ තිබෙන බවය. එය ඉතාම පැහැදිලිය.
දැනට මෙම ඉදිකිරීම්වල පළමුවෙනි කොටස සිදුකරන්නේ කැතික් යන චීන සමාගමක් විසිනි. අදාළ සමාගම කරන මෙම ගනුදෙනු අයථා කටයුතු සියල්ල චීන රජය සම්පුර්ණ වශයෙන් දැන සිටින බව අප විශ්වාස නොකරන අතර චීන රජයටත් සඟවා මෙම කටයුතු සිදුකරන බව පෙනී යයි.
උපදේශන සේවා සපයන ආයතනයත්, ශ්‍රී ලංකා රජය වෙනුවෙන් මාර්ග සංවර්ධන අධිකාරියත් අත්සන් කර ඇති අවබෝධතා ගිවිසුම ව්‍යාපෘති එකඟතා ගිවිසුම තුළ පැහැදිලිව ඇති කාරණයක් තිබේ. එනම්, මෙම උපදේශකයා සපයන උපදේශන එහි සේවා දායකයා ලෙස සිටින ශ්‍රී ලංකා රජය තෘප්තිමත් විය යුතු බවය. එහිදී ඔවුන්ගේ තාක්ෂණික සම්පත්, ඔවුන් සපයන සේවාවන් පිළිබඳව, ඔවුන්ගේ තාක්ෂණික හැකියාව, මේ සියල්ල පිළිබඳව සෑහීමකට පත් නොවන්නේ නම් අදාළ ගිවිසුම වලංගු වන්නේ නැත යන්නය. එසේ තෘප්තිමත්භාවයක් සපයන සේවයක් මේ වන විට සපයා තිබේද යන්න අප විමසා බැලිය යුතුව තිබෙන කාරණයකි.
අපට කිවයුතුව තිබෙන කාරණාවල ප්‍රධානම දේ තමයි මේ ගිවිසුම අනුව එකඟතාවයට පත් වුණු ආකාරයට හදන්න තියෙන කොටස්වල,  ප්‍රධාන කොටස් දෙකක් ඇත. එක් කාරණයක් වන්නේ අධිවේගී මාර්ගය හදන විට ගුවන් පාලම් හැදීමය. ගුවන් පාලම් කොපමණ තිබේද යන්න ඇස්තමේන්තු කළ යුතුව තිබේ. එසේම අනිත් ඒවා වන්නේ සාමන්‍ය ස්ථාන හදන්න පස් පුරවන්න.  දැන් මේ උපදේශන සමාගම අදාළ සැලසුම් නිර්මාණය කිරීමේදී  ඔවුන් ඉදිරිපත් කරන කරුණු අනුව, ගුවන් පාලම කොච්චරක් හදනවද, ගුවන් පාලම්වල දිග කොපමණද, ඒ දුරට යන ඇස්තමේන්තුව කොපමණද, ඒ සඳහා එක කිලෝ මීටරයකට යන වියදම කොපමණද කියලා ඇස්තමේන්තු කර මෙම කාර්යය ආරම්භ කළ යුතුය.
එසේ ආරම්භ කර මෙම කාර්යය කරගෙන යන අතර 2016.11.13 දින අග්‍රාමාත්‍ය පෞද්ගලික ‍ලේකම් සමන් ඒකනායක මහතා මහාමාර්ග අමාත්‍යාංශයේ ‍ලේකම්වරයාට ලිපියක් යොමු කරමින් පවසන්නේ 2016.11.09 වෙනිදා රැස්වූ ආර්ථික කළමනාකරණ කමිටුවේ තීරණයකට අනුව සම්පූර්ණ පරීක්ෂණයකින් පසු කොන්ත්‍රාත්කරු විසින් ගුවන් පාලම්වල දිග කිලෝ මීටර් 2.78කින් වැඩි කළ යුතු බව ය. එසේම එය එසේ වැඩි කළ යුතුව ඇත්තේත් ණය සීමාව තුල  සිටිමින් ණය සීමාව ඉක්මවා නොයන ලෙස බවය. එසේ තිබියදී නොවැම්බර් 09 වෙනිදාට පසුව ව්‍යාපෘති අධ්‍යක්ෂවරයාගෙන් මෙම ව්‍යාපෘතියේ උපදේශන සමාගම ඉල්ලුම් කරමින් පවසන්නේ, මෙම දුර ප්‍රමාණය වැඩි කිරීමට අවශ්‍ය බවත්, එම දුර වැඩි කිරීම සඳහා යන ඇස්තමේන්තුවේ ප්‍රමාණය මෙපමණ බවත්, එම ප්‍රමාණයට අනුමැතිය ලබා දෙන ලෙසත් ය. මෙහිදී මතුවන ගැටලුව වන්නේ ආර්ථික කළමනාකරණ කමිටුව මෙසේ ගුවන් පාලමේ දිග වැඩි කළ යුතුයි යන්න කලින්ම දන්නේ කෙසේද යන්නය.
ඔවුන් මෙයට අදාළව සාකච්ඡා කළේ කවුරුන් සමගද, ලංකාවේ ඉංජිනේරුවන් සමග සාකච්ඡා කළාද, එසේ නැතහොත් තාක්ෂණික ඇගැයීම් වාර්තාවක් බැලුවාද, කිලෝ මීටර් 2.78ක් දුර වැඩි කිරීමට අනුමැතිය ගත්තේ කවුරුන්ගෙන්ද? අධිවේගී මාර්ගයක් හැදීම සාමන්‍ය පාරක තාර දමන්නාක් වැනි කාර්යයක් නොවේ. මුලින් පුංචියට ඇස්තමේන්තු හදන අතර පසුව වෙනස් කිරීම් කරනවා. අග්‍රාමාත්‍යවරයාට මේ සම්බන්ධයෙන් ඇති තාක්ෂණික දැනුම මොකක්ද, මේ අය ගිහින් පාර බැලුවාද මේ ආදී ගැටලු මෙහිදී පැන නගී. මෙම කිලෝ මීටර් 2.78 වැඩි කිරීමට ආර්ථික කළමනාකරණ කමිටුව නොහොත් එජාප ආණ්ඩුවේ කුස්සි කැබිනට්ටුව තීරණය කළේ කොහොමද යන ප්‍රශ්නය මෙහිදී පැන නගී.
මහින්ද රාජපක්ෂ පාලනයට තිබූ විවේචනයක් වූයේ ඔවුන්ගේ යහළුවන් සමග එක්වී වංචාවන් කළා යන්නය. නමුත් අදත් සිදුවන්නේ එයම බව පෙනී යයි. ආර්ථික කලමනාකරණ කමිටුව මෙම තීරණය ගත්තේ කුමන තාක්ෂණික ඇගැයීම් වාර්තාවක් පදනම් කරගෙනද, එසේ නැතහොත් උපදේශන ආයතනයේ ඉදිරිපත් කරන ලියැකියැවිලි පදනම් කරගෙනද මේ ආදී කුමන කාරණා මතද යන්න පිළිබඳව දැන් ආණ්ඩුව රටට ඉදිරිපත් කළ යුතුව තිබේ.
මේ මහ දැවැන්ත විනාශයට හවුල් වන්නට බැරි හෘද සාක්ෂියක් ඇති දේශීය ඉංජිනේරුවරුන් මෙම ව්‍යාපෘතියෙන් ඉවත්වී තිබේ. මාර්ග සංවර්ධන අධිකාරිය සිටිය යුත්තේ, ඉන්නේ රට පැත්තෙනි.  එහි ඉහළ නිලධාරීන් කිහිපදෙනකු සමග එකතු වෙලා මේ මිල වැඩි කිරීම කර තිබෙන්නේ. අද මෙම ව්‍යාපෘතිය සම්පූර්ණයෙන්ම මෙහෙය වනු ලබන්නේ ලංකාවේ මාර්ග සංවර්ධන අධිකාරියේ කටයුතු කරන ව්‍යාපෘති කළමනාකරුවන් සහ කැතික් කොම්පැනියයි කියන මේ උපදේශක සමාගම එකතු වෙලයි. ඒ මිල වැඩිවීම් කරනවාට අනුමැතිය දෙන්නේ කවුද? රජයේ ප්‍රතිපත්ති සම්පාදනයට අනුමත සඳහා තිබෙන කැබිනට් මණ්ඩලය නමෛයි. පාර්ලිමේන්තුව නමෛයි. මේ රටේ ජනතාවගෙන් අමතර  රුපියල් මිලියන 36,000ක් මෙම ව්‍යාපෘතියේ අධිවේගී මාර්ග හදන්නට වැය කරන විට, ඒ සම්බන්ධයෙන් රටේ ජනතාවගෙන් අහන්න ඕනෑද නැද්ද යන ගැටලුව මෙහිදී පැන නගී. පාර්ලිමේන්තුව, කැබිනට් මණ්ඩලය තිබෙන්නේ ජනතාවගේ එම හඬ වෙනුවෙනි.
අධිවේගී මාර්ග සඳහා වත්මන් හවුල් ආණ්ඩුව මැදිහත් වෙන ක්‍රියාකාරකම් ඔස්සේ සිදුවන මහ පරිමාණ මූල්‍ය වංචාවන් පිළිබඳ තොරතුරු රැසක් සහ එම පුද්ගලයන් පිළිබඳව තොරතුරු රැසක් මේ වන විට ලැබි තිබේ. එම හෙළිදරව් කිරීමටත් ඔවුන්ට එරෙහිව නීතිමය ක්‍රියා මාර්ග ගැනීමට අදාළව කටයුතු කිරීමටත් අප සුදානම්.
එසේම මෙම මාතර සිට බෙලිඅත්ත අධිවේගී මාර්ගයේ ඉදිකිරීම් කටයුතුවලට සිදුව ඇති වංචා දූෂණ අක්‍රමිකතා සම්බන්ධවත් ඊට හවුල් පුද්ගලයන් පිළිබඳ තොරතුරු කෝප් කමිටුව ඉදිරියට ගෙන ඒමටත් කටයුතු කරන බව අවධාරණය කළ යුතුව ඇත.
මෙම ව්‍යාපෘතිය සඳහා අදාළ කොන්දේසි කඩකරමින්, බදු සහන ලබාගනිමින් චීනයෙන් යකඩ ගෙනවිත් තිබෙන අතර, ආර්ථික කළමනාකරණ කමිටුවෙන් ගුවන් පාලම්වල දිග වැඩි කිරීම එහිදී ඒ සඳහා රුපියල් මිලියන 36,000 මුදල් වැඩිපුර ගෙන තිබිම යන කාරණා සුළු කොට තැකිය යුතු නෙවේ.
එසේම මෙම ව්‍යාපෘතිය සඳහා සංචාරක වීසාවලින් චීනයෙන් උපදේශකවරුන් පැමිණ තිබේ. ඔවුන්ට නේවාසික වීසා තිබිය යුතුය. සංචාරක වීසා මගින් පැමිණි ඔවුන්ට වැටුප් ගෙවීමට පදනමක් නොමැති නිසා අග්‍රමාත්‍යවරයාගේ ‍‍‍ජ්‍යෙෂ්ඨ උපදේශකවරයෙකු පෙන්වා, මහා මාර්ග අධිකාරියේ සභාපතිවරයාගේ අත්සන ගසා රුපියල් ලක්ෂ ගණනින් වැටුප් ඔවුන්ට ලබාදී ඇත.  එහිදී ප්‍රධානියෙකුගේ මාසික වැටුප රුපියල් ලක්ෂ 35ක් සහ සාමාන්‍ය අයෙකුට ලක්ෂ 5 බැගින් වන ලෙස වැටුප් සකස් කර ඇත. එසේම මෙම ව්‍යාපෘතියට අදාළ නොවන මර්සිඩස් බෙන්ස් රථයක් අල්ලස් ලෙස ගෙන්වා තිබෙන බව දැනගන්නට ලැබි තිබේ. ප්‍රබලයෙකුට අල්ලස් ලෙස මෙම රථය ගෙන්වා තිබෙන බව දැන ගන්නට ලැබි ඇත. කෙසේ වුවද අදාළ වංචා දූෂණ අක්‍රමිකතා පිළිබඳව ලිපි ‍ලේඛණ මෙන්ම ඉතා වැදගත් සාක්ෂි බොහොමයක් මේ වන විට අප සතුව ඇත. මේ පිළිබඳ දැවන්ත හෙළිදරව් කිරීමක් අප කෝප් කමිටුවට ඉදිරිපත් කිරීමට සුදානම්ව සිටින්නෙමු.

ජනතා විමුක්ති පෙරමුණේ පාර්ලිමේන්තු මන්ත්‍රී, කෝප් කමිටුවේ සභාපති - සුනිල් හඳුන්නෙත්ති

සාකච්ඡාව - පද්මිණී මාතරගේ

යහපාලන ජාතික ආණ්ඩුව ඇතුළේ පුපුරා ගිය දේශපාලන අර්බුදයක් හේතුවෙන් අධිකරන හා බුද්ධ ශාසන ඇමැතිවරයා නොබෝදා ධුරයෙන් පහ කරන විට ඒ සිදුවීම හා බැඳුණු  නව දිශානතියක තවත් දේශපාලන අන්දරයක්ද සමාජය තුළ පැතිර ගියේය. ජනමාධ්‍ය ඔස්සේ පවා විවෘතව දිග හැරුණු මේ කතාන්දරයට ඉහළම බර තැබිමක් දේශපාලන ලෝකයෙහි හිමිවනු පෙනුණේ රටේ ජනතාවද ඒ ගැන තැන නොතැන නොබලා කතාබහ කරන්නට වූ විටය. ධුරයෙන් ඉවත් කෙරුණු හිටපු අධිකරණ හා බුද්ධශාසන ඇමැතිවරයා ඉදිරි ජනපතිවරණයකදී ‍පොදු අපේක්ෂකයෙකු ලෙස දේශපාලන කරළියට පැමිණේවිද යන කුතුහලයෙන් පිරුණු දේශපාලන පුවත එම කාරණාවයි. මෙරට සිටින කීර්තිමත් හා කෘතහස්ත නීතිවේදියෙකුලෙස සමාජයේ ඉහළම ජනප්‍රසාදයක් දිනාගෙන සිටින උගතෙකු හා බුද්ධිමතෙකු වන හිටපු අධිකරණ ඇමැතිවරයාට ජනාධිපතිධුර අපේක්ෂකයෙකු ලෙස ඉදිරිපත්වීමට  ඇති අයිතියට හා සුදුසුකමට කිසිවෙකුටත් අබියෝග කළ නොහැකිය. ඒ මන්දයත් ඔහුට තරම් ඉහළ ප්‍රවීණ  සුදුසුකම් නොතිබූ අය පවා වසර 35ක පසුගිය අතීතය තුළ ජනාධිපතිවරණ සඳහා ඉදිරිපත්ව තිබෙන බැවිනි. මෙරට දේශපාලන ධුරාවලියෙහි ඉහළම තනතුර වන ජනාධිපති පදවියට තරග කිරීම සඳහා අවශ්‍යවන  මූලික අපේක්ෂක සුදුසුකම් පිළිබඳව 1978 ආණ්ඩුක්‍රම ව්‍යවස්ථාවේ 31(1) හා (2) වැනි උප වගන්තිවලත්, 1981 අංක 15 දරණ ජනාධිපතිවරණ ඡන්ද විමසීම් (විශේෂ) විධි විධාන පනතෙහි 11 වැනි වගන්තියෙහිත් පැහැදිලිවම දක්වා තිබේ. එකී සුදුසුකම් සපුරාලීමට හැකි ඕනෑම ශ්‍රී ලාංකික පුරවැසියෙකුට එම තනතුරට තරඟ කිරීම සඳහා ඉදිරිපත්වීමට නීතියෙන් පිළිගත් වලංගු ප්‍රජාතන්ත්‍රික අයිතිවාසිකමක් තිබේ. එසේ ඉදිරිපත්වන අපේක්ෂකයගේ දේශපාලන පෞරුෂත්වය වැඩෙන්නේ ඔහුට සමාජයේ තිබෙන පිළිගැනීම, ගෞරවය හා වටිනාකම වඩාත් ඉහළ යන විටය. හිටපු අධිකරණ ඇමැතිවරයා වටා නොබෝදා  ගෙතී රට වටා සීඝ්‍රයෙන් පැතිරී ගිය හදිසි දේශපාලන පුවතටද වැඩි සමාජ වටිනාකමක් නිතැතින්ම ආරෝපණය වූයේ මේ පසුබිම තුළය.

එහෙත්, දේශපාලනික වශයෙන් වඩාත් සංවාදයට බඳුන් කළ යුතු විවාදපන්න කාරණය වන්නේ එසේ ජනපතිවරණයකට සූදානම් කරවන ‍පොදු අපේක්ෂකයා කවුරුන්ද, ඔහුට ඊට ඇති සුදුසුකම් මොනවාද, ඔහුගේ දේශපාලන දර්ශනය හෝ අභිලාශය කුමක්ද යන කරුණු නොව ශක්තිමත් හා සංකීර්ණ දේශපාලන පක්ෂ පද්ධතියක් පවතින අපේ රටේ ප්‍රධාන පුරවැසියා තෝරන මැතිවරණය සඳහා වසර ගණනාවක් කල්තියාම ‍පොදු අපේක්ෂකයන් සොයා යෑමට තිබෙන සැබෑ අවශ්‍යතාවය කුමක්ද යන්නයි. ආසියාවේ සෙසු බොහෝ රටවල් අසාවත් නොතිබුණු තරම් ඈත යුගයක 1931 දී සර්වජන ඡන්ද අයිතිය දිනාගත් අපේ රටෙහි ඊට නොදවෛනි අභිමානවත් ඉතිහාසයක් දේශපාලන පක්ෂ ක්‍රමයටද තිබේ.  1935 දී මෙරට මුල්ම දේශපාලන පක්ෂය බිහි වූ දා සිට 2010 දක්වා ගෙවිගිය වසර 75 ක කාලය තුළ පැවැති පාර්ලිමේන්තු  ජනධිපති ජනමත හා පළාත් සභා මැතිවරණ වෙනුවෙන් කලින් කලට ඉදිරිපත් වී තරගවැදී තිබෙන මුළු දේශපාලන පක්ෂ සංඛ්‍යාව 115කි. 2010 න් පසුව මේ දක්වාද තවත් දේශපාලන පක්ෂ ගණනාවක් මෙම ලැයිස්තුවට අලුතින් එකතු වී තිබේ. අපේ දේශපාලන පක්ෂ ක්‍රමය කෙතරම් වැඩි අතුපතර විහිදී ගොස් තිබේද යන්න මැතිවරණ කොමිසමේ සභාපතිවරයා විසින් වර්තමානයේ වලංගු ලෙස පිළිගෙන ඇති දේශපාලන පක්ෂ ලැයිස්තුවෙහි පක්ෂ 67 ක්ම තිබිමෙන් පැහැදිලිවෙයි. ඇමෙරිකාව, බටහිර යුරෝපය වැනි දියුණු ප්‍රජාතන්ත්‍රවාදී රටවල පවා  නොමැති තරමේ අති විශාල දේශපාලන පක්ෂ ගණනකින් ලාංකීය දේශපාලන කෙත සරුවට ‍පොහොණවී  ඇති බව අමුතුවෙන් කිවයුතු නොවේ.

මෙබඳු පසුබිමක් තුළ දේශපාලන පක්ෂ ක්‍රමයේ අභිමානය ඉහළින්ම හුවා තැබිය හැක්කේ ජාතික මැතිවරණ සඳහා ඔවුන් දක්වන ප්‍රශස්ත දායකත්වය තුළය. ඒ වෙනුවෙන් සමාජය ‍පොදුවේ පිළිගන්නා හා ඉහළින්ම වැළඳ ගන්නා නියම ජනතාවාදී අපේක්ෂකයන් ඉදිරිපත් කරවීමට ඔවුන්ට ඇති හැකියාව හා අවස්ථාව තුළය.  මෙහිලා වැඩිවගකීම ඇත්තේ එ.ජා.ප.යත්, ශ්‍රීල.නි.ප.යත් යන රටේ ප්‍රධාන දේශපාලන පක්ෂ දෙකටය. ඒ ජනාධිපතිවරණයකදී සැබෑ සටන ඇත්තේ මෙම පක්ෂ දෙක අතරෙහි වන බැවිනි. ජාතික මැතිවරණයකදී වැඩි දෙයක් කිරීමේ දේශපාලන  ශක්නුතාවයෙන් හෙබි එකම බලවේ දෙකද මෙම පාර්ශ්වයන් පමණක් වන බැවිනි. එහෙයින් ඉදිරි ජනාධිපතිවරණයකට වඩාත් සුදුසු අපේක්ෂකයෙකු සූදානම් කරවීමේ වැඩි වගකීම හා කාර්යභාරය පැවැරෙන්නේද මෙම ප්‍රධාන දේශපාලන පක්ෂ දෙක වෙතය.

ජනාධිපතිවරණයක් සඳහා වන ‍පොදු අපේක්ෂක සංකල්පය අපේ දේශපාලන සමාජයට ආගන්තුක දෙයකි. මක්නිසාද යත් දේශපාලන නිදහස දිනූ දා සිට මේ දක්වා අඛණ්ඩවම අපේ රටේ ජනතාව ප්‍රධාන දේශපාලන පක්ෂ දෙක මත පදනම් වූ තට්ටුමාරු පාලන ක්‍රමයක් සඳහා දිගින් දිගටම හුරුපුරුදු වී සිටි බැවිනි. ඒ සඳහා ඔවුන්ගෙන් සාතිශ්‍ය බහුතරය හැමැදාමත් ඡන්දය පාවිච්චි කොට ඇති බැවිනි. ‍පොදු අපේක්ෂක සංකල්පයෙන් තොරව අවසන්වරට මෙරට පැවැති අතිශය දේශපාලන සංකීර්ණභාවයකින් යුතු පසුගිය 2015 අවසන් මහා මැතිවරණයේදි පවා රටේ ඡන්ද දායකයන්ගෙන් 88ක් වූ සාතිශය බහුතරය ඡන්දය දී තිබුණේ මෙම ප්‍රධාන පක්ෂ දෙකට වීමෙන් මෙම තර්කය තවත් සනාථ වෙයි. අනෙක් අතට, විධායක ජනාධිපතිධුරය රටට හඳුන්වා දී වසර 28ක් යන තුරුම ‍පොදු අපේක්ෂකත්වය යන්න  මෙරට දේශපාලනයට නුහුරු නුපුරුදු දෙයක් විය.  1982 - 2005 දක්වා පැවැති සෑම ජනාධිපතිවරණයකටම ප්‍රධාන ප්‍රතිවාදීන් ලෙස තරගවැදී තිබුණේ එ.ජා.ප.යේත්, ශ්‍රීල.නි.ප.යේත් අපේක්ෂකයන්ය. එකල පැවැති මුල් ජනාධිපතිවරණ  පහේදීම ඔවුන් අතරට පැමිණ ලොකු දෙයක්  කිරීමේ හැකියාව කුඩා දේශපාලන ධාරාවක අපේක්ෂකයෙකුට හෝ  නිර්පාක්ෂික අපේක්ෂකයෙකුට කිසිවිටෙකත් තිබුණේ නැත.  එවැනි දේශපාලන රික්තකයක් එකල දේශපාලන සමාජයෙහි නිර්මාණය වූයේද නැත. කලානුරූපීව පැවැති වඩාත් අසීරු දේශපාලන සාධක හමුවේ වුව එදා පැවැති ජනාධිපතිවරණවලට තමන්ගේම අපේක්ෂකයන් ඉදිරිපත් කරවීමට මෙම පක්ෂ දෙකම එදා මොනවට වගබලා ගත්තේය. තමන්ට  ජනාධිපතිවරණයක් ජයගැනීම හුදු සිහිනයක්ව පැවැති 1982 දී ශ්‍රීල.නි.ප.යත්, 1994 දී එ.ජා.ප.යත් ක්‍රියා කළ අන්දම මීට නිදසුන්ය. කෙතරම් දැඩි හා අසීරු දේශපාලන අභියෝග මැද වුවද මේ ප½ධාන පක්ෂ දෙකම එදා මහත් අපහසුවෙන් හෝ තමන්ගේම අනන්‍යතාවයෙන් යුතු පාක්ෂිකත්වයේ නියම අපේක්ෂකයන්ම මැතිවරණවලට ඉදිරිපත් කරවුවා විනා කිසිවිටෙකවත් තම දේශපාලන පක්ෂයේ නම සලකුණ හෝ පාට උකසට තබමින් ‍පොදු අපේක්ෂකයන් පසුපස හඹා ගියේ නැත. මැතිවරණය දිනිය නොහැකි වුවත් ඔවුන්ගේ සාම්ප්‍රදායික දේශපාලන පැවැත්මට හෝ ස්ථාවරභාවයට කෙටිකාලීනව විනා දිගුකාලීනව බලපෑ තර්ජනයක් හෝ අබියෝගයක් එදා ඇති නොවූයේද මෙම පසුබිම හේතුවෙනි.

ඉදින් ‍පොදු අපේක්ෂ සංකල්පයට පණ ලැබෙන්නේම පවතින දේශපාලන පසුබිම තුළ තනිව තරගකොට ජනපතිවරණයක් ජයගත නොහැකිය යන හීනමානය සහ පරගැති අදීන මතවාදය පක්ෂ ක්‍රමය තුළ මුල් බැස ගැනීමත් සමගය.  1988 දෙවැනි ජනාධිපතිවරණයේදී විජය කුමාරතුංග මහතා විපක්ෂයෙන් ඊට ඉදිරිපත් කළ යුතු බවට පැවැති ‍පොදු අදහස ඔහුගේ හදිසි ඝාතනයත්, ඊට සමගාමීව මැතිණියගේ ප්‍රජා අයිතිය පිළිබඳ තිබූ ගැටලුව නිරාකරණය වීමත් සමග තිඹිරිගෙය තුළදීම මියැදී ගියේය. ඉන්පසුව පැවැති ඊළඟ ජනාධිපතිවරණ තුනේදීම ‍පොදු අපේක්ෂකත්ව සංකල්පය පක්ෂ දෙකටම වුවමනා නොවීය.  එය මුලින්ම විද්‍යාමාන වන්නේත්,ප්‍රායෝගිකව ක්‍රියාවට නැගෙන්නේත්  2010 ජනාධිපතිවරණය සඳහා එ.ජා.ප.යේ වුවමනාවෙන් හා මෙහෙයවීමෙන් යුතු ‍පොදු අපේක්ෂකයෙකු නව ප්‍රජාතන්ත්‍රවාදී පෙරමුණේ හංසයා ලකුණින් කරළියට ගෙන ඒමත් සමගය. 2015 දීද නැවතත් එම ජවනිකාව එලෙසින්ම දේශපාලන කරළිය තුළ දිග හැරුණේත් එ.ජා.ප.යේම දේශපාලන වුවමනාවටය. එහෙත් එ.ජා.ප.යට  එසේ වුවත් ශ්‍රීල.නි.ප.යට  නම් මේ සංකල්පය මෙතුවක් කිසිදා අවශ්‍ය නොවීය. ඒ සිය පක්ෂ අනන්‍යතාවයෙන් යුතු සැබෑ ශ්‍රීල.නි.ප. අපේක්ෂකයෙකු තරඟයට යොමු කොට රටේ සියලුම ප්‍රගතිශීලී බලවේග ඔහු වටා ඒකරාශී කර ගැනීමේ සූක්ෂම දේශපාලන කලාව  ඔවුන් සිය අඩසියවසකටත් වැඩි පක්ෂ ඉතිහාසය තුළ මැනවින් ප්‍රගුණ කොට තිබූ නිසාය. එහෙත් එ.ජා.ප.යට එය කළින්ම වුවමනා වූයේ දක්ෂණාංගික ප්‍රතිපත්ති වැළඳගෙන හුදකලා දේශපාලන ගමනක් ගිය ඔවුන්ට  අතිශය තීරණාත්මක මොහොතක මධ්‍යස්ත සමාජ හා දේශපාලන බලවේග තමන් වෙත නතු කර ගැනීමේ වෙනත් විකල්පයක් පෙනෙන්නට නොතිබූ හෙයිනි. එහෙත්, අකාලයේ අරුමය වන්නේ මතෛක් ‍පොදු අපේක්ෂකත්වය ගැන කිසිදා නොසිතා තම පක්ෂ අනන්‍යතාවය අභිමානවත් ලෙසින් දිගටම රැකගෙන සිටි ශ්‍රීල.නි.ප.යේම සමහර   පිරිස් ඒ මුල සහමුලින්ම අමතක කොට 2020 ට ‍පොදු අපේක්ෂකත්වයක් ගැන දැන් සිටම සිහින මවන්නට හා සිතන්නට පෙළඹී තිබෙන ජුගුප්සාජනක පසුබිම තුළය.

වත්මන් ආණ්ඩුව ඉකුත් ජනපතිවරණයේදී ‍පොරොන්දු වූ පරිදි විධායක ජනාධිපතිධුරය අහෝසි නොකළහොත් ඊළඟ ජනාධිපතිවරණය පැවැත්වීම සඳහා තවත් වසර දෙකහමාරකට ආසන්න කාලයක් ඉතිරිව තිබේ. මේ කාලය වූ කලී කුලියට ගෙන එනු ලබන තාවකාලක ‍පොදු අපේක්ෂකයන් ගැන නොව තමන්ගේම ප්‍රතිපත්තිවලින් හා අනන්‍යතාවයෙන් හෙබි පක්ෂයේ තිරසාර ජනාධිපති අපේක්ෂකයෙකු ගැන සිතීමට පක්ෂවලට ලැබි තිබෙන ඕනෑවටත් වඩා වැඩි කාලයකි. එ.ජා.ප.යට මෙම කාලය තුළ තමන් සතු ආණ්ඩු බලයේ මහිමයෙන් රටට වැඩ පෙන්වා තම කාර්්‍යභාරය නොකඩවා ඉදිරියට ගෙන යා හැකි ශක්තිමත් ජනපති අපේක්ෂකයෙකු නිර්මාණය කරගත හැකිය. ඉදිරි මැතිවරණයකට තනිව ඉදිරිපත්වීමට ඒකාබද්ධ විපක්ෂය අදහස් කරන්නේ නම් ඔවුන්ටද වත්මන් ආණ්ඩුවේ පවතින අඩුපාඩු හා නොහැකියාව රටට හුවා දක්වා ඊට විකල්ප තමන්ගේම සැබෑ නායකත්වයක් රටට ඉදිරිපත් කිරිම මගින් ඔහු වෙත ජනතා ආකර්ශනය දිනා ගැනීමේ ප්‍රමාණවත් අවකාශය කාලයා විසින් මේ වනවිටත් පාදා දී තිබේ. එහෙත් ගැටලුවත්, අවාසනාවත් වන්නේ එවුන් දෙපිරිසම තවමත් ඒ ගැන සිතන,  උනන්දුවන හෝ ක්‍රියාකරන පසුබිමක් පෙනෙන්නට නොතිබිමය.  ඒ වෙනුවට මේ දෙපිරිසම තරගයට මෙන් ‍පොදු අපේක්ෂක මිරිඟුවක් පසුපස යළි හඹායාමට සූදානම්  බව රටට පෙන්වීමය. තමන්ගේම  වාසිය තකා කෙස් පැලෙන තර්ක, විතරක් මේ දෙපාර්ශවය  විසින්ම කොතෙකුත් ගෙනහැර පෑවත් සැබැ පාක්ෂිකත්වයේ අපේක්ෂකයෙකු තුළින්ම ඉදිරි ජනපතිවරණයත් ජයගැනීමේ අවස්ථාව හා හැකියාව මේ දෙපාර්ශ්වයටම තිබේ. එ.ජා.ප.ය 1982 දී හා 1988 දීත්, ශ්‍රීල.නි.ප.ය 1994 දී හා 2010 දීත් මේ වග ක්‍රියාවෙන්ම ඔප්පු කර පෙන්වා ඇත.

කුමන පක්ෂ කෙසේ සිතුවත් ජනතාව සිතන්නේ ඊට  වඩා වෙනස් ලෙසටය. රාජ්‍ය නායකයා තෝරන ජාතික මැතිවරණ පද්ධතියේ මුදුන් මල් කඩ වන් ජනාධිපතිවරණයකදී ඔවුන් ඡන්දය දෙන්නේ වඩාත් බුද්ධිමත් ලෙසය. පරිණත ලෙසය. විචාරශීලිවය. පසුගිය 2010 හා 2015 අවසන් ජනාධිපතිවරණ දෙකේදීම ඔවුන් ඒ බව කදිමට පසක් කර තිබේ. එබැවින්  ප්‍රධාන දේශපාලන පක්ෂද  සිතිය හැකිය යුත්තේ ඒ ආකාරයටමය. රටට වැඩදායක වන ලෙසය. ජනතාවගේ හිත සුව පිණිස වන ලෙසය. තමන්ගේ පක්ෂ අනාගතයද වඩා යහපත්වන හා  සුරැකෙන ලෙසය. මේ ප්‍රධාන දේශපාලන පක්ෂ දෙකම ඒවායේ නිර්මාතෘවරුන් විසින් එදා ගොඩනගනු ලැබුවේ කිසිවෙකුටත් මතවාදී වශයෙන් අත නොපා ස්වෝත්සාහයෙන්ම  නැගී සිට දේශපාලනික ජයග්‍රහණ අත්පත් කර ගන්නා රිසියෙනි. තමන් ජීවමානව සිටි අවධියේ කිසිදාක ඒවා වෙනත් පාර්ශ්වයන්ට පාවා දීමට හෝ උකස් තැබිමට ඔවුන් කටයුතු කළේ නැත. එම අබිමානය අදීනත්වය හා අනන්‍යතාවය මතුවටත් එපරිදීම රැකගැනීම ඒවායේ වත්මන් නායක, කාරකාදීන් වෙත පැවැරී තිබෙන පරම යුතුකමය. වගකීමය. එය නොපිරිහෙළා ඉටු කිරීම ඔවුන් විසින් සිතාමතාම හෝ වුවමනාවෙන්ම පැහැර හැරියහොත් එය තම පක්ෂවල ආදි කතුවරුන්ටද සිදුකරනු ලබන අවමානයක් හා නින්දාවක්වන බව අමුතුවෙන් කිව යුතු නැත.

නීතිඥ කපිල මුණසිංහ

පරාක්‍රම සමුද්‍ර ව්‍යාපාරයේත් මහවැලි බි හා සී කලාපවලත් මේ දිනවල යල කන්නයේ අස්වනු නෙළීම ආරම්භ කර තිබේ. පුද්ගලික වී මෝල් හිමියන් හා වී තොග රැස් කරන්නන් ඉතා ඉහළ මිලක් ගෙවා කුඹුරෙන්ම වී මිලදී ගැනීමද ආරම්භ කර ඇත. මේ තත්ත්වය මත දේශීය වී වෙළෙඳ‍පොළට හොඳ මිලක් ලැබි තිබෙන්නේද යන්න අප විමසා බලන්නට සිතුවේද ඒ නිසාය.

සමස්ත ලංකා ගොවිජන සම්මේලනයේ සභාපති නාමල් කරුණාරත්න මහතා ඒ පිළිබඳ ප්‍රකාශ කරනු ලැබුවේ මෙවන් කරුණකි.

මේ වෙනකොට වීවලට හොඳ වෙළෙඳ‍පොළක් නිර්මාණය වෙලා තිබෙනවා. නමුත් මේ තත්ත්වය නිර්මාණය වුණේ අහම්බෙන්. වී අලෙවි මණ්ඩලයට වී ලබාදෙන කොට 14ක් එහි තෙත බර ඉවත් කරන්න ඕනේ. ඒ වගේම ඔවුන් සම්බා කිලෝ එකක් මිලට ගන්නේ රුපියල් 41කට. ඒ වගේම නාඩු කිලෝ එකක් මිලට ගන්නේ රුපියල් 38කට. ගොවියා මතෛක් කල් වී අලෙවි කළේ ඔවුන්ගේ කොන්දේසිවලට යටත් වෙලා. නමුත් මේ වනවිට තෙත බර පිටින්ම යම් කිසි මුදලකට වී මිලට ගන්නට පෞද්ගලික වෙළෙන්දන් ඉදිරිපත් වෙලා ඉන්නවා. මේ නිසා ගොවීන් ඔවුන්ට වී අලෙවි කරනවා.
මෙලෙස වී අලෙවි මණ්ඩලයට වී ලබානොදී පෞද්ගලික අංශයට වී ලබාදීමට අදාළව හේතුවූ කරුණු පිළිබඳව ගොවිජන සම්මේලනයේ සභාපතිවරයා පෙන්වා දුන්නේ මේ ආකාරයෙනි.

මෙවර කන්නයේ විශාලම අස්වැන්න ලැබෙන්නේ අම්පාරෙන්. ඒ වගේම මින්නේරිය ගිරිත‍ලේ ආදී ප්‍රදේශවලිනුත් අක්කර 18ක අස්වැන්නක් ලබා ගන්නවා. උතුරේත්, රාජාංගණයේත් යම් ප්‍රමාණයක අස්වැන්න ප්‍රමාණයක් වගා කෙරුණා. ඒ වගේම ඇඹිලිපිටිය මොණරාගල වැනි ප්‍රදේශවල වී වගා කරලා තිබෙන්නේ හතරෙන් එකකට අඩු ප්‍රමාණයක්. මෙවර ගොවීන් ලබාගත් වී අස්වැන්න ප්‍රමාණය අඩුවීමත් ගොයම් කඩින්කඩ කැපීමත් යන හේතු වී වලට හොඳ වෙළෙඳ‍පොළක් නිර්මාණය කරදීමට බලපෑවා.

එකවර අස්වැන්න ප්‍රමාණයක් නෙළාගත්තා නම් සමහර විට වී අතිරික්තයක් නිර්මාණය වෙලා. එහෙම වුණා නම් ගොවියාට අද හොඳ මිලක් නොලැබෙන්නත් පුළුවන්.

ගොවියාට සහනයක් ලැබුණත් ඉදිරියේදී වී තොග පෞද්ගලික අංශ සතුවීමේදී ඇතිවිය හැකි බලපෑම් පිළිබඳව නාමල් කරුණාරත්න මහතා පෙන්වා දුන්නේ මෙවන් අදහසකි.

මේ වගේ ගොවීන්ට අහම්බෙන් සහනයක් ලැබෙන එක බෙහෙවින්ම වටිනවා. නමුත් නිතර නිතරම වී පෞද්ගලික අංශ සතු වෙන්න ගියොත් වෙන්නේ ඉදිරියේදී නොසිතූ අරගලයක් ඇතිවීම. මේ නිසාම රජයට විශාල වගකීමක් තියෙනවා. වී යම් ප්‍රමාණයක් හෝ රජයේ ගබඩා සතුව පවත්වාගෙන යාමට. ඒ නිසා රජය යම් වී ප්‍රමාණයක් හෝ මිලදී ගන්න ඕනේ. එහෙම නැති වුණොත් සිදුවන්නේ මහ පරිමාණ මෝල් හිමියන් අතර විශාල සහල් ඒකාධිකාරියක් නිර්මාණය වෙන එක. එහෙම වුණොත් මහා පරිමාණ වී මෝල් හිමියන් පාරිභෝගිකයා අපහසුතාවයට පත්කරමින් පාරිභෝගිකයාව විශාල ලෙස කොල්ලකෑමට ඉඩ තිබෙනවා. මෙවැනි තනි ඒකාධිකාරියක් පෞද්ගලික අංශය සතුව නිර්මාණය වුණොත් සිදුවෙන්නේ ගොවියාට වගේම පාරිභෝගිකයාට පෞද්ගලික අංශයෙන් වී නිසාම යැපීමට සිදුවෙන එක. මේ නිසාම මෙවැනි තත්ත්වයන් ඇති නොවීමට නම් රජය වගකීමෙන් කටයුතු කළ යුතුයි.

මේ ආකාරයට ගොවිජන සම්මේලනය කියන වී ඒකාධිකාරිය නිර්මාණය වීමට ඇති ඉඩකඩ පිළිබඳවත් ගොවියා වී අලෙවි මණ්ඩලයට වී ලබා නොදීම පිළිබඳවත් වී අලෙවි මණ්ඩලයේ සභාපති එස්.බි. දිසානායක මහතා දැක්වූයේ මෙවන් අදහසකි.
මැදිරිගිරිය හා කවුඩුල්ල ගිරිත‍ලේ ව්‍යාපාරවල අස්වනු නෙළා අවසන් වුවත් වී ඇටයක්වත් ගොවීන් වී අලෙවි මණ්ඩලයට ලබාදුන්නේ නැහැ. මේ වනවිටත් ගොයම් කපා පෑගූ ගමන්ම කුඹුරේදීම තෙත හා අමු වී පවා රුපියල් 47ක් වැනි මිලකට පුද්ගලික වෙළෙන්දන් වී ගන්නවා. වේලන ලද නාඩු වී කිලෝවක් රුපියල් 53ක් වැනි ඉහළ මිලකටත් පෞද්ගලික අංශ වී මිලට ගන්නවා. අස්වැන්න අඩු නිසා මේ විදිහට වී හොඳ මිලකට අලෙවි වෙනවා. ඒ වගේම වී ගබඩා කොට බොහෝ කල් අපට තබාගන්නත් බැහැ. කොහොම නමුත් රජයේ වී ගබඩා හිස් වෙන්න නම් ඉඩ තබන්නේ නැහැ.

සමන්මලී නැලිගම

ශ්‍රී ලංකා නිදහස් පක්ෂයේ සභාපති තමන් නොවන බව හොඳින් දන්නා හිටපු ජනාධිපති මහින්ද රාජපක්ෂ මහතා එහි සභාපති තමන් යැයි කීමට තරම් දේශපාලනික වශයෙන් අසරණ තත්ත්වයට පත්ව ඇතැයි සමාජ සවිබල ගැන්වීම්, සුබසාධන හා කන්ද උඩරට සංවර්ධන අමාත්‍ය එස්.බි. දිසානායක මහතා පැවැසීය.
හිටපු අමාත්‍ය බැසිල් රාජපක්ෂ මහතාගේ මැදිහත්වීම මත ආරම්භ කළ ‍පොහොට්ටු පක්ෂය, මහින්ද රාජපක්ෂ මහතා වෙනුවෙන් පෙනී සිටියත් එම පක්ෂයද දේශපාලනික වශයෙන් පිරිහීම නිසා මහින්ද රාජපක්ෂ මහතාද අසරණ වී ඇතැයි වත්තේගමදී පැවැති පාතදුම්බර ආසන බල මණ්ඩල රැස්වීමෙන් අනතුරුව මාධ්‍ය හමුවේ ඔහු මේ බව කීවේය. 
ශ්‍රී ලංකා නිදහස් පක්ෂයේ සභාපතිධුරය වත්මන් ජනාධිපති මෛත්‍රීපාල සිරිසේන මහතාට භාරදුන් හිටපු ජනාධිපතිවරයා ‍පොළොන්නරුවේ පැවැති සමුළුවේදී අනුශාසක ලෙස අසුන්ගෙන සිටි බව සිහිපත් කළ අමාත්‍ය එස්.බි. දිසානායක මහතා මෙසේ ප්‍රකාශ කළේය.
දේශපාලනික වශයෙන් ශ්‍රී ලංකා නිදහස් පක්ෂය අද අර්බුදයකට මැදිහත් වී සිටිනවා. එක් පැත්තකින් ජනාධිපති මෛත්‍රීපාල සිරිසේන මහතාද අනෙක් පසින් ඒකාබද්ධ විපක්ෂය නියෝජනය කරමින් මහින්ද රාජපක්ෂ මහතා පෙනී සිටිනවා.
කුමන දෙයක් සිදු වුවද ශ්‍රී ලංකා නිදහස් පක්ෂයෙන් ඉවත්ව නව පක්ෂ සකස් කොට ගිය පිරිස් යළි පක්ෂය හා එක්වන බව අතීතයේ සිටම ගෙන හැර දැක්විය හැකි යැයි කී අමාත්‍යවරයා මෙසේ කීවේය.
මෛත්‍රීපාල සේනානායක, අනුර බණ්ඩාරනායකයන් පක්ෂය කඩාගෙන වෙනත් පක්ෂ සකස්කොට ගියත් ඔවුන් යළි ශ්‍රී ලංකා නිදහස් පක්ෂය වෙත පැමිණියා. ඊටත් ඉහතදී සී.පී.සී. ද සිල්වා, ටී.බි. ඉලංගරත්න, රත්නසිරි වික්‍රමනායක, විජය කුමාරතුංග ආදී විවිධ පිරිස් පක්ෂයෙන් ඉවත්ව විකල්ප ක්‍රම කරා යොමු වුවත් අවසානයේදී සිදුවුණේ ඔවුන්ට යළි ශ්‍රී ලංකා නිදහස් පක්ෂය වෙත පැමිණීමටයි.
ශ්‍රී ලංකා නිදහස් පක්ෂයට පමණක් නොව එක්සත් ජාතික පක්ෂයටද  එවැනි අත්දැකීම් තිබෙනවා. ගාමිණී දිසානායක, ලලිත් ඇතුළත්මුදලි ආදීන් එක්සත් ජාතික පක්ෂයෙන් ඉවත්ව ගියත් අවසානයේදී ඔවුන්ට යළි පක්ෂය සමග අත්වැල් බැඳීමට සිදු වුණා. මහජන පක්ෂය, ජනතා විමුක්ති පෙරමුණ, දෙමළ ජාතික  සන්ධානය ආදියද මේ අයුරින් විකල්ප කණ්ඩායම්වලට බෙදී ගියත් අවසානයේදී ඔවුන්ට සිදුවන්නේ සිය මව් පක්ෂය හා එක්වීමටයි.
ඉදිරියේදී පැවැත්වෙන මැතිවරණ සඳහා මේ වන විට ශ්‍රී ලංකා නිදහස් පක්ෂය සූදානමින් සිටින්නේ මෙවර ඉදිරිපත් කරන අපේක්ෂකයන්ගෙන් සියයට අසූවක් සම්මුඛ පරීක්ෂණ ගත කළා. මේ වන විට ශ්‍රී ලංකා නිදහස් පක්ෂයේ පාක්ෂිකයන් තුළ බෙදීමක් තිබෙනවා. පාක්ෂිකයන් සියයට පනහක් මහින්ද රාජපක්ෂ මහතා සමග සිටින්නේ නම් සෙසු සියයට පනහ සිටින්නේ මෛත්‍රීපාල සිරිසේන මහතා සමග යැයි අමාත්‍ය එස්.බි. දිසානායක මහතා වැඩිදුරටත් ප්‍රකාශ කළේය. 
 
නදීක දයා බණ්ඩාර - මහනුවර අතිරේක

මේ සතිය ආරම්භයේදීම මාධ්‍ය ආයතනවලට ෆැක්ස් මගින් ආරාධනාවක් ලැබි තිබුණේ ‍පොදුජන පෙරමුණේ  නීතිඥ  සංගමයේ මාධ්‍ය හමුවක් සඳහාය. එය පැවැත්වෙන  ස්ථානය ලෙස දැනුම් දී තිබුණේ  බත්තරමුල්ල, නෙළුම් මාවතේ පිහිටි ‍පොදුජන පෙරමුණේ කාර්යාලයේදීය. මීට සහභාගි වීම සඳහා අපිද එහි ගියෙමු.  අපි එහි යන විට ප්‍රභූ ආරක්ෂක නිලධාරීන් මෙම කාර්යාලය රැකවල්ලා සිටියේ හිටපු ජනාධිපති මහින්ද රාජපක්ෂ මහතා එතැනට එන නිසාය.
මාධ්‍යවේදීන්ට අහම්බෙන් ලැබුණු මේ අවස්ථාවේදී හිටපු ජනාධිපතිවරයාගෙන් පවතින දේශපාලන ආර්ථික තත්ත්වයන් ගැන ප්‍රශ්න කරන්නද අවස්ථාවක් උදා වූයේ නොසිතූ පරිදිය. මෙහි පලවන්නේ මාධ්‍යවේදීන් මහින්ද රාජපක්ෂ  හිටපු ජනාධිපතිවරයාට යොමු කළ ප්‍රශ්න හා ඔහුගෙන් ඊට ලැබුණු පිළිතුරුය.
• ඔබතුමාට 2020 බලය ලබා ගන්න උත්සාහ කළත් රජයේ ප්‍රබලයන් කියන්නේ ඊට අවස්ථාවක් නෑ කියලයි. සිරිමාවෝ මැතිණියගේ ප්‍රජා අයිතිය අහෝසි කළ ආකාරයටම ඔබේ ප්‍රජා අයිතියත් අහෝසි කරන සැලසුමක් තිබෙනවාද?
කොහොමද ප්‍රජා අයිතිය නැති කරන්නේ. එහෙම වුනොත් මගේ ප්‍රජා අයිතිය විතරක් නෙමේ මට ඡන්දය දුන්නු පනස් අට ලක්ෂයක් හා දැන් අලුතින් මා සමග එකතු වී සිටින අයගෙන් ප්‍රජා අයිතිය අහෝසි  කරන්න වේවී. ඒ ගැන ජනතාව කලබල විය යුතු නෑ. එන ඕනෑම දේකට මුහුණ දෙන්න අපි ලෑස්තියි. ප්‍රජා අයිතිය ආවට ගියාට නැති කරන්න පුළුවන් දෙයක් නමෛයි.
ආණ්ඩුවේ ඉඳගෙන කියන දේවල් හුඟක් කරන්න පුළුවන් දේවල් නමෛයි. පසුගිය දිනක නීතිපතිවරයා අරලිය ගහ මන්දිරයට ගෙන්වා ගෙන ඔහු ඉදිරියේ කෑ ගහල නඩු ෆයිල් 5ක් තෝරාලා දීලා කිව්වලු ඒ ෆයිල් අධිකරණයට බාර දීලා නඩු පවරන්න කියලා. ඒ පැත්තේ අයම තමයි මේවත් අපිට කියන්නේ.
• මේ රජය ඩෙංගු මතවමඩින්නත් හමුදාව යොදා ගන්නවා. ඒ වුණත් ඔවුන්ට විදේශ  පුහුණු සඳහා වෙන් කර තිබූ ඩොලර් 6000ක මුදල ඩොලර් 1200 ට අඩු කරලාලු. ඇයි එහෙම වෙන්නේ?
මේ රජය රණවිරුවන්ට රජයේ සේවකයන්ට තිබෙන පහසුකම් වරප්‍රසාද අඩු කරනවා කියල ඒ අයම කියනවා. මගේ පාලන කාලයේ ‍පොලීසියට මෝටර් බයිසිකලයක් දුන්නා. දැන් ඒවා නිලධාරියා පැන්සන් යන කොට බාර දීලා යන්න ඕනෑලු. එහෙම නැත්නම් ඒ මොහොතේ වෙළෙඳ‍පොළ වටිනාකම ගෙවන්න ඕනෑලු. අපි ඒ දුන්න මෝටර් සයිකල්වලට දැන් ‍පොලීසිවලට එවලා තියෙන චක්‍ර‍ලේඛයේ එහෙම සඳහන් වෙනවාලු.
• රණවිරුවන්ගේ විදේශ පුහුණු අවස්ථා
අඩු කිරීම හරිද?
ඒක වැරදියි. ඒක රණවිරුවන්ටද රජයේ සිවිල් සේවකයන්ටද ‍පොලීසියටද මේ කාට වුණත් ඒ ඒ රාජකාරියඅනුව ලැබෙන්න තියෙන ලැබිය යුතු දේවල් දෙන්න ඕනේ. දැන් රජය ගන්න හැම තීන්දුවකටම ඡන්දය දුන්න හැටි දෙලක්ෂයම කැමතියි කියලයි කියන්නේ.
• මේවා කරලා හොඳම මුදල් ඇමැති වුණාද කියලත් සමහරු අහනවා?
මමත් හිතන්නේ එහෙමයි. ජාත්‍යන්තර මූල්‍ය අරමුදල කියන විදියට වැඩ කරනවා නම් හොඳයි කියල තමයි මේ අය හිතන්නේ. අලුත් අදායම් බදු පනතත් ඒ අයගේ උපදෙස් අනුව තමයි හදලා තියෙන්නේ. මේ පනත අනුව පන්සලෙනුත් බදු අය කරනවා. දානය දෙන එකත් පන්ස‍ලේ වත්කම් විදියට සලකන්න රජය කටයුතු කරනවා. හැම අංශයම වැටිලා. දැන් ඔයාලත් හිනා වේවී හිටියට ඔයාලටත් මේකට මුහුණ දෙන්න වෙයි. හැම තැනටම වාර්තා දීලා ආදායම ලක්ෂය පැන්නොත් ලෙඩේ.
• මේ රජය පෙර රජයේ හොරුන්ට දඬුවම් කරන්න ප්‍රමාදයි කියල අධිකරණ අමාත්‍යවරයා ඒ තනතුරින් ඉවත් කරන්න හදනවා නේද?
ඔව් බොහොම පැහැදිලියි. මේ ආණ්ඩුව හොරු අල්ලන්න අවුරුදු දෙකහමාරක් දඟලනවා. සාක්ෂි තිබුණා නම් මේ අය කියව කියව ඉන්නේ නෑ. සාක්ෂි  නැති නිසයි ප්‍රමාද තියෙන්නේ. නීතිපති  දෙපාර්තමේන්තුවට ෆයිල් බාර දුන්නට ඒවායේ නඩු දාන්න තරමේ ප්‍රමාණවත් සාක්ෂි නැත්නම් ඒ අය කොහොමද අධිකරණයේ නඩු පවරන්නේ. තවම ඒකාබද්ධ විපක්ෂයේ  කවුරුත් වැරදි කරුවෝ වෙලා නෑ. රවි කරුණානායක ජනතා අධිකරණය ඉදිරියේ වරදකරුවෙක් වෙලා.
• ඔබ සඳහන් කරන්නේ ඔබලාට එරෙහිව ඉදිරිපත් කරන චෝදනා බොරු කියලද?
ඕනෑ කෙනෙකුට චෝදනා කරන්න පුළුවන්. ඒ චෝදනා ඔප්පු කරන්න සාක්ෂිත් අවශ්‍යයයි.  මේ කරන බොරුවලට ජනතාවට කරන අපරාධ නිසා තමයි මේ ගංවතුර නියඟය, නාය යෑම්, අපිට කරන බොරු චෝදනාවලට දෙවියෝ බලනවා. දැන් තමයි දෙවියෝ දඬුවම් දෙන්න පටන් අරන් තියෙන්නේ.
• රාජිත සේනාරත්න අමාත්‍යවරයා කැබිනට් ප්‍රකාශක ලෙස කීවා ඊළඟට බලයට එන්නේ ඔබ තුමාලා
කියලා.
ආ..... එයා එහෙම කිව්වද? දැන් එයාලට දැනිලා ඇති වෙන්නේ මොනවද කියලා.
• රාජිත අමාත්‍යවරයා එහෙම කීවේ අයි කියලයි මම ඇහුවේ?
දැන් ඒ අයට ජනතාවගේ හැඟීම් දැනෙන්න  පටන් අරන්. උපන් දිනය වෙනුවෙන් තිබුණු සංගීත සංදර්ශනයේ පහන පත්තු කරන්න ගියාම ජනතාව දැක් වූ ප්‍රතිචාරවලින් මේවා දැනිලා ඇති.
• ශ්‍රීලනිප ආණ්ඩු පක්ෂය කියන්නේ ඔබලා ශ්‍රීලනිප ප්‍රතිපත්ති උල්ලංඝනය කරනවා කියලා. නමුත් ශ්‍රීලනිප මහ ‍ලේකම් කියනවා ආණ්ඩුවේ   අර්බුද තිබුණත්  එජාප නායක රනිල් වික්‍රමසිංහ මහතාගේ අගමැති කම වෙනස් වෙන්නේ නෑ කියලා. ඒකත් ශ්‍රීලනිප ප්‍රතිපත්තියද?
ශ්‍රීලනිපය පරාජය කරලා එජාප බලයට ගෙනාවේ ඒ අය තමයි. ඒ අයට ශ්‍රීලනිපයේ අයිතියක් නෑ. මම තාමත් කියන්නේ මමයි ශ්‍රිලනිප සභාපති කියලා.
ශ්‍රීලනිප ඡන්දදායකයෝ බහුතරය මා සමගයි. මම ඔවුන්ගේ සභාපති.
• සුසිල් ප්‍රේමජයන්ත අමාත්‍යවරයා කියලා තිබුණා දැන් ශ්‍රීලනිපයේ බණ්ඩාරනායක ප්‍රතිපත්ති නෑ කියලා. ඔබ එකඟද?
ඔව් ඒ කතාව සම්පූර්ණ  සත්‍යයක්. අද මේ රටේ ක්‍රියාත්මක වෙන්නේ රට විකුණන් කන රනිල් වික්‍රමසිංහ මහතාගේ ප්‍රතිපත්තියි.
• සුසිල් ප්‍රේමජයන්ත  අමාත්‍යවරයා ඉදිරියේදී තීන්දුවක් ගන්නවා කියලා සඳහන් වෙනවා එතුමා ඒ ගැන ඔබලා සමග කතා කළාද?
මම හිතනවා එයාලා හරි තීන්දුවක් ගනියි කියලා.
• මේ රජයේ  ඇතැම් අය පාර්ලිමේන්තු වරප්‍රසාදවලට මුවා වී නීතිපති, මාධ්‍යවේදීන් විවේචනය කරනවා. මේක ප්‍රජාතන්ත්‍රවාදයද?
මොන ප්‍රජාතන්ත්‍රවාදයක්ද? මේක ඒකාධිපති ගමනක ලක්ෂණ.  රටේ නීතියක් තියෙන්න ඕනේ. එයාලා හිතන විදියට නීතිපති බය කරන්න නම් ටිකක් අමාරුවෙයි. මේ අය දැන් අධිකරණ තීන්දු ගැනත් විවිධ ප්‍රකාශ ප්‍රසිද්ධීයේ  කරනවා. ඒකෙන් ඒ අය අධිකරණයටත් බලපෑම් කරන බව පැහැදිලියි.
• විගණන කොමිෂන් පනත වසර 2 1/2ක් වෙනවා හදලා. තවමත් සම්මත කර ගන්න බැරිවෙලා. ඒකෙන් අදහස් වන්නේ රජය රජයේ ආයතනවල දූෂණ වංචා යට ගහන්න හදන එකද?
ඒක ගැන ප්‍රශ්නයක් තියෙනවා. යෝජිත විගණන කොමිෂන් සභා  පනතට රජයේ නිලධාරීන් විරුද්ධයි. ඒ ගැන මත දෙකක් තියෙනවා. ඒ වුණත් පනත ගෙනාවා      නම් ගේන්න ඕනේ නැත්නම් නිකන් ඉන්න ඕනේ.
• ඔබලාට විරුද්ධව ඇති චෝදනාවලට ඔබලා නිවැරදි නම් නඩු දාන්න ඉක්මන් වීම ගැටලුවක් ‍නෙවෙයි නේද?
ඔව් අපි උසාවියට ගිහිල්ලා නඩුවලට තීන්දු ලබා ගන්න සූදානම්. හැබැයි ඒවා නියමිත  ක්‍රමවේදයට උසාවියට යන්න ඕනේ. තමන්ට ඕනෑ විනිශ්චය කරුවෝ පත් කරගෙන ඔවුන්ට ඕනෑ නඩු විතරක් විභාග කරන්න කියලා බලපෑම් කරනවා නම් ඒක වැරදියි. එයාලා බලා‍පොරොත්තු වෙන්නේ තමන්ට හිතවත් නඩු කාරයෝ තෝරා ගෙන  ඔවුන්ටත් බලා‍පොරොත්තු  දීලා නඩු අහනවා නම් ඒක වැරදියි. මම පෞද්ගලිකවම විශ්වාස කරන්නේ අධිකරණය ස්වාධීනව කටයුතු කරනවා කියලයි. බලපෑම්වලට යට නොවී ස්වාධීනත්වය ආරක්ෂා කර ගන්න කියලයි අපි ඉල්ලන්නේ.
• අලුත් මුදල් ඇමැතිතුමා බයිසිකල් බදු අඩු කරලා තවත් සහන දීලා තියෙනවා. අය වැයේදීත් මිල අඩු කිරීම් කරලා සහන දුන්නොත් පළාත් පාලන  මැතිවරණයට බලපෑමක් කරන්න පුළුවන් නේද?
මැතිවරණ ළංවෙන කොට අඩු කළාට මැතිවරණ ඉවර වුණාම ආයෙත් වැඩි කරයි. මේවා ගැන දැන් ජනතාව දන්නවා. මේවාගෙන් ජනමතය වෙනස් කරන්න ලැබෙන්නේ නෑ.
• ශ්‍රීලනිප සභාපති කවුරු කියලද කීවේ?
මම තමයි තවමත් ශ්‍රීලනිප සභාපති.
• ශ්‍රීලනිප තරුණ මහ ‍ලේකම් කියන්නේ ඔබතුමා ජනාධිපතිවරණයට  පසු ශ්‍රීලනිප සභාපති කම පරිත්‍යාග කළා කියලා.
මම සභාපතිකමෙන් අස් වුණෙත් නෑ. කවුරුත් මම අස් කරලත් නෑ. ඒනිසා සභාපති  මමයි. තමන්ට තියෙන තනතුරු බලෙන් වෙනත් අයට දෙන අය දැන් නෑ. ඒවා ඉතිං ඒ අය හදා ගත්තු කතානේ.
• දැන් ශ්‍රීලනිප සභාපති ගන්නා තීරණ ඔබ වෙනස් කරනවාද?
ඒවා බලමු ඒ නීති ප්‍රශ්නනේ.
මෙහිදී හිටපු ජනාධිපතිවරයා මෙසේද කීවේය. මේ රජය අහෝසි කරලා තියෙන ජනතා සහන සියල්ල අපි නැවත ලබා දෙනවා. රණවිරුවන්ගේ ගෞරවය අභිමානය නැවත ඔවුන්ට ලබා දෙනවා. දැන් ඇතැම් අය ඉඩම් ඔප්පු තමන් ළඟ තියෙනවා කියලා පුරසාරම් දොඩවනවා. ඉඩම් ඔප්පු නම් කොච්චර තියෙනවාද? අපි ඒ අයගේ ඔප්පු තිරප්පු ගැන කතා කරන්නෙ නෑ. විප්ලවාදීයෝ කියල, කියා ගත්තු අය අද අලියගෙ පස්සෙන් යනවා. ජනතාවට බොරු කියලා ජනතාව රවට්ටලා මේ අයට ආණ්ඩු කරන්න බෑ. අද රජයේ මැති ඇමැතිවරු අපිට අපහාස කරනවා. අපි මිනිමරුවෝ කරන්න හදනවා”යැයි සඳහන් කළා. හිටපු ජනාධිපතිවරයා අපට අපහාස කරන ඇමැතිවරු දෙතුන් දෙනෙකුට විරුද්ධව නඩු පවරන්න දැන් අපි කටයුතු කර ගෙන යනවා යැයිද කීවේය.

ජයසූරිය උඩුකුඹුර

IMAGE

අද කාලේ කඨින පිංකම් අස්සේ 'බෝතල් පාටි'ත් දානවා

IMAGE 2017 Sep 22 15:40
කඨින චීවර මාසයක් ළඟ ළඟම එයි. බෞද්ධයන්ට සිදුකළ හැකි අට මහ කුසල් අතරින් මුල්ම කුසලය වන කඨින චීවර...
Views - 660

16 වියැති සිසුවිය බස් නැවතුමේ දී හෘදයාබාධයකින් මියයයි

IMAGE 2017 Sep 22 11:12
තම දූ පුතුන් පාසල් ගොස් යළි නිවසට පැමිණෙන තුරු දෙමාපියන් සිටිනුයේ දැඩි විමසිල්ලකින් බව...
Views - 2517

සුමති සම්මාන හිමිකරගත් කලා ලොවේ දිදුළන තරු

IMAGE 2017 Sep 21 12:27
ජාතියේ මහා කලා මංගල්‍යය හෙවත් සුමති සම්මාන උළෙල 20 දා  ප.ව. 6.30ට කොළඹ නෙළුම් ‍පොකුණ රඟහ‍ලේදී 22...
Views - 3296

'සවුදං ජෙමා' ගේ ඇත්තම තොරතුරු මෙන්න

IMAGE 2017 Sep 21 11:42
පසුගිය දා අන්තර්ජාලයේ අගනුවර ආපන ශාලාවක ඇති 'බුෆේ' එකක් පිළිබඳ දැන්වීමක් පළ විය. ඒ 'බුෆේ'...
Views - 2428

කුස තුළ දරුවන් නොමරා අපට බාර දෙන්න

IMAGE 2017 Sep 21 09:43
“අපි මේ ලෝකේ වැඩියෙන්ම ආදරය කරන්නේ අම්මටයි. අපට අසනීපයක් හැදුණාම, වේදනාවක් දැනුණාම, අපි...
Views - 1329

හෙළ කලා අඹරේ රජ ඔටුණු පැළඳේ

IMAGE 2017 Sep 21 00:50
පුංචි තිරයේ අසිරිමත් මහා කලා මංගල්‍යය හෙවත් සුමති සම්මාන උළෙල (20) කොළඹ, නෙළුම් ‍පොකුණ...
Views - 5714

Please publish modules in offcanvas position.