lakbima.lk
                                                                                        එසැනින් පුවත් | ගොසිප් | විශේෂ පුවත් | සුන්දර ලක්බිම | ව්‍යාපාරික පුවත්   

ඉන්ද්‍රානි පෙරේරා කියන අපි කවුරුත් ආදරය කරන ජනප්‍රිය ගායිකාවගේ ලොකු නිහැඩියාවක් අද පෙනෙන්නට තිබෙනවා. ඇයි ඒ?
ගෘහස්ථ ප්‍රසංගවල නම් මම තවමත් ගී ගයනවා. එළිමහන් ප්‍රසංගවලට නම් සහභාගි වෙන්නේ නැති තරම්. 1969 ඉඳන් නිදි මැරුවා ඇතිනේ. ඒකයි මම නිහඬ වෙලා වගේ පේනවා ඇත්තේ.
 
තවමත් ඔබ එදා ගැයූ ගී ජනප්‍රියයි. ඒත් අලුත් නිර්මාණයක් නම් අහපු කාලයක් මතක නැහැ.
ඔය ප්‍රශ්නෙට උත්තර දෙන්න කලින් මම පුංචි කතාවක් කියන්නම්. පසුගිය දවසක මම එක්තරා  ගුවන් විදුලි නාලිකාවක වැඩසටහනකට සහභාගි වුණා. ඒ වැඩසටහන අහන්න අදාළ නාලිකාව හොයාගන්න පැය එකහමාරක් රේඩියෝ එක එහාට මෙහාට කරකවන්න වුණා. මම දන්න තරමට අද වෙද්දී ගුවන් විදුලි නාලිකා 40කට වැඩිය තියෙනවා. ඒත් ඒවායේ අපේ ගී ප්‍රචාරය වෙන්නේ නැහැ. ඒ හින්දා හැමෝම අහනවා අලුත් ගීත කළේ නැද්ද කියලා. හැබැයි මේ වෙද්දී කරපු අලුත් ගීත කීපයක්ම තියෙනවා. 
 
නව පරපුර ක්‍ෂේත්‍රයට එද්දි ඔබලා යටපත් වෙලා යනවද? 
එහෙනම් අපේ පරණ සිංදු තවමත් ජනප්‍රියත්වයේ තියෙන්නෙ නැහැනේ. එදා අපි සිංදුවක් කරලා ගුවන් විදුලියට දුන්නාම එය ප්‍රචාරය වෙනවා. ගීතය ජනප්‍රිය වනවා. ඒත් අද ගීත ප්‍රචාරය කරවන්න වෙහෙසෙන්න ඕනේ. මට දැන් එහෙම කරන්න බැහැ. අනික අද ගීතයක් ජනප්‍රිය වන්න මියුසික් වීඩියෝ එකක් කළ යුතුයි කියන මට්ටමට Music Video කලාව ප්‍රබලයිනේ. ඒ නිසාම මගේ අලුත් ගීතයකටත් Music Video එකක් කරන අදහසක් මට තියෙනවා. 
 
ඇතැම් ප්‍රවීණයෝ Music Video වලට බැණ වදිනවා. ඔබ Music Video කරන්න යන බව පවසනවා.
නව පරපුරට, නව සංගීත රටාවලට, නව තාක්ෂණයට අලුත් වගකීම්වලට මම බණින්නේ නැහැ. ඒ හැමදේම හොඳ විදියට යහපත් විදියට වෙනවා නම් හොඳයි. හැබැයි ඔය Music Video කරන අය හිතන්න ඕන තමන් සිංහල පවුලක ඉපදී අපේ සංස්කෘතියත් එක්ක හැදුණු වැඩුණු අය බව. තමන්ගේ Music Video එක දවසක තමන්ගේ දරුවෙක් දකින්න පුළුවන් කියලා හිතාගෙන හැදුවොත් Music Video හොඳයි.
 
අලුත් දේ අගය කරනවා නම් ඉන්ද්‍රානිටත් පුළුවන්නේ නව පරපුර හා එකතු වෙලා නිර්මාණයක් කරන්න
මට ආවේණික ශෛලියක් තියෙනවා. ඒක නව සංගීත රටාවට ගැළපෙනවද, නව සංගීත රටාවට අනුව මගේ ශෛලිය වෙනස් කළොත් මිනිස්සු ඒක පිළිගනීද කියන ප්‍රශ්නය තියෙනවා. අනික මම නව සංගීතයට අනුව මගේ ශෛලිය වෙනස් කළොත් මම අලුත් පිරිසව කොපි කරනවා කියන චෝදනාව එල්ල වෙන්නත් බැරි නැහැ.
 
ඔබේ ගීතයන් “රී මේක්” කරන්න කැමති නැද්ද? 
ඉස්සර සංගීත අධ්‍යක්ෂවරු ගීතනු නිර්මාණය කළේ ගායක ගායිකාවන් ගැන හිතලා. ඒ ජනප්‍රිය ගීත අලුතින් රී මේක් කරලා ඒ සංගීතවේදීන්ට අපහාස කරන්න මම කැමති නැහැ. 
 
ඔබේ ගීත අද වෙනත් ගායිකාවන් අලුත් විදියට ගයනවා නේද?
ඒ කිසිම දෙයක් මගේ අවසරය පිට සිදුවන දේවල් ‍නෙවෙයි. මම නිහඬව සිටියේ ඒ ගීතවලට දායක වූ සංගීතවේදීන් ගැන හිතලා. හැබැයි මේ විදියට මගේ ගීත මංකොල්ල කන්න ගියොත් මගේ ඉවසීමේ සීමාවත් නැතිව යා හැකියි. 
 
ඉන්ද්‍රානිගේ පෞද්ගලික ජීවිතේ අලුත් තොරතුරු මොනවද?
පුතා නිමේන්ද්‍ර ධනංජය ජේම්ස්. දැන් ජනතා දේව සභාවේ පාස්ටර් කෙනෙක්. දුව අංජලි චාරුතේෂි සිංගප්පුරුවේ බැංකුවක උප සභාපති විදියට කටයුතු කරනවා. දෙදෙනාම විවාහකයි. මම සහ සැමියා ජේම්ස් සාමාන්‍ය විදියට අපේ ජීවිත ගත කරනවා.
 
චන්ද්‍රලතා තන්ත්‍රිගේ

සුනිල් පෙරේරා කියන්නේ අමුතුවෙන් අටුවා ටීකා සහිතව හඳුන්වා දිය යුතු කලාකරුවෙක් නමෛයි. ඔහු දශක ගණනාවක් තිස්සේ කණ්ඩායම් සංගීතයේ නොමැකෙන විදිහේ සටහන් තැබු සංගීතඥයෙක්. ඒ වගේම ඇතැම් අවස්ථාවලදී ආන්දෝලනාත්මක ප්‍රකාශ කරන කලාකරුවෙක් විදිහටත් ඔහු ප්‍රකටයි. තමන්ගේ එවැනි එක්තරා ප්‍රකාශයක් නිසා සුනිල් පෙරේරාට ප්‍රසංගයකදී පහර කෑමට පවා ලක් වීමට සිදු වූ බවට පුවතක්ද මෑතකදී අන්තර්ජාලය ඔස්සේ පැතිර ගියා.
එහි ඇත්ත නැත්ත ගැන කියන්නයි සුනිල් පෙරේරා මේ විදියට ‘රිද්මට’ කතා කළේ. 
 
සුනිල් පෙරේරා කෙළින් කතා කරන කලාකරුවෙක් විදිහටයි රටේ ප්‍රසිද්ධ. කෙළින් කතා කරන එක අවාසියක් කියලා කවදාවත් ඔබට හිතිලා නැද්ද? 
අ‍පොයි නැහැ. මොකද මම මගේ හෘද සාක්ෂියට අනුව තමයි අදහස් පළ කරන්නේ. 
 
පසුගිය දිනෙක සංගීත ප්‍රසංගයකදී පහරදීමකට ලක්වෙන්න සිදුවුණෙත් හෘද සාක්ෂියට අනුව අදහස් පළ කරන්න ගිහින්ද? 
ඔය කතාව පට්ට පල් බොරුවක්. වත්තල ප්‍රදේශයේ පැවැත්වුණු ප්‍රසංගයකදී මම ගුටි කෑවා කියන පුවත අන්තර්ජාලයේ පැතිර ගිය බොරු කතාවක් විතරයි. 
 
එතකොට එවැනි ප්‍රසංගයකට ඔබ සහභාගි වුණේවත් නැද්ද? 
ඒ ප්‍රසංගයට මම සහභාගි වුණු බව ඇත්ත. ඔය කියන විදිහේ කිසිම පහරදීමක්වත් එදා සිදුවුණේ නැහැ. මම කියන්නේ බොරු නම් මේ ගැන ඇත්ත නැත්ත ප්‍රසංගයේ සංවිධායකවරුන්ගෙන් ඕනෑම කෙනෙකුට අහලා දැන ගන්න පුළුවන්. 
 
මේ විදිහේ අසත්‍ය පුවත් පතුරුවා ඔබට මඩ ගහන්න වුවමනාව තියෙන්නේ කාටද? 
මගේ දේශපාලන මතවලට අකමැති අයට තමයි ඒ ඕනෑකම තියෙන්නේ. 
 
වැරදි පුවත් පළ කරන අයට එරෙහිව නීතිමය ක්‍රියාමාර්ග නොගත්තේ ඇයි? 
අනුන් හෙළන්නට වළක් කපන්නා ඒ තුළ වැටිලා මියයන්නේ කියලා වික්ටර් රත්නායකයගේ ගීතයකත් තියෙනවනේ. මේ දේවල් කරන අයට කවදා හරි එහි විපාකත් විඳින්න සිද්ධ වේවි. ඒ නිසා ඒකට අමුතුවෙන් වෙහෙසෙන්න වුවමනා නැහැ. 
 
දේශපාලනය ගැන මත පළ කිරීම නිසා ඔබ වටා හිටපු ඇතැම් රසිකයන් ඈත්වෙනවා කියලා හිතෙන්නේ නැද්ද? 
මම කියන්නේ මට දැනෙන දේ. ඒක මම එදා ඉඳන්ම කරපු දෙයක්. කවුරු ඒකට කැමති වුණත් අකමැති වුණත් මට කරන්න දෙයක් නැහැ මම කියන්න තියෙන දේ කෙළින් කියනවා. මගේ කට වහන්න කාටවත් බැහැ. 
 
දේශපාලනය ගැන ඔය තරම් උනන්දුවක් තියෙනවා නම් ඡන්දය ඉල්ලලා දේශපාලනයට පිවිසෙන්න තිබුණා නේද? 
දේශපාලනයට එන්න තරම් දැනුමක් සහ උගත්කමක් මට නැහැ. උගත්කමක් නැති අය දේශපාලනය කරන නිසානේ අද අපේ රටේ දේශපාලනය මේ තරම් පිරිහිලා තියෙන්නේ. 
 
කෙටි කලකින් විසිරී යන සංගීත කණ්ඩායම් අතරේ ජිප්සීස්ලා දශක ගණනාවක් තිස්සේ ස්ථාවරව ඉන්නේ කොහොමද?
විශ්ව ශක්තිය සහ පින්බලය කියන දේවල් මම හුඟක් විශ්වාස කරනවා. ඒක තමයි අපේ සාර්ථකත්වයේ රහස. 
 
ජිප්සීස්ලාට ඉස්සර වගේම දැනුත් යහමින් ප්‍රසංග ලැබෙනවාද? 
අ‍පොයි ඔව්. අපට ලැබෙන දේවල්වලින් අපි සතුටු වෙනවා. කිසිම කදරයක් නැතිව ජීවත් වෙන්න මේ ලැබිලා තියෙන දේවල් හොඳටෝම ඇති. 
 
පෙරේරා පවු‍ලේ අයගේ එකමුතුවෙන් “කුස්සියේ” නමින් වෙනස්ම විදිහේ ගීත වීඩියෝවක් ජිප්සීස්ලා පසුගියදා එළි දැක්වුවා. ඇයි එවැනි ගීතයක් නිර්මාණය කරන්න හිතුවේ? 
ඒ ගීතය මගේ මල්ලි පියල්ගේ අදහසකට අනුවයි නිර්මාණය වුණේ. ජිප්සීස් සංගීත කණ්ඩායම පටන් ගෙන අවුරුදු 47ක් වෙනවා. ඒ කාලය තුළ පවු‍ලේ උදවිය එකතු කරගෙන ගීතයක් එළිදක්වන්න ලැබුණේ පළමු වතාවටයි. 
 
පවු‍ලේ ලොකු පිරිසක් මේ වීඩියෝවට එකතු වුණා නේද? 
ඔව්. ඔක්කොම 45 දෙනෙක් ඒ ගීත වීඩියෝවේ පෙනී සිටිනවා. අපේ අම්මා පවා එහි ඉන්නවා. 
 
මේ වන විට විදේශගත වෙලා සිටින ඔබේ පුතා ගයාන් කොහොමද මේ වැඩේට එක්කාසු වුණේ? 
ජිප්සීස්ලා ළඟදී ඇමෙරිකාවේ ගිය වේලාවේ ගයාන් නැවතිලා සිටින අපාර්ට්මන්ට් එකේදීම තමයි ඔහුගේ කොටස රූගත කළේ. නමුත් නරඹන අයට එහි වෙනසක් තේරෙන්නේ නැහැ. 
 
කිෂාන් කනංකෙ

මේ කාලයේ කොළඹ කොටුව දුම්රිය ස්ථානය ඉදිරිපිට උද්ඝෝෂණයක් නැති දවසක් සොයා ගත නොහැකි තරම්ය. එහෙත් ඊයේ (10) පස්වරු 4.00 ට පමණ එම උද්ඝෝෂණ සඳහා යොදා ගන්නා බිමෙහි ය‍කැදුරන් විසින් සිදුකරනු ලබන ශාන්තිකර්මයක් දැකිය හැකි විය.

මෙය උද්ඝෝෂකයන් පලවා හැරීම පිණිස කිසියම් පාර්ශවයක් විසින් සංවිධානය කරනු ලැබූ  විශේෂ ශාන්තිකර්මයක් ද යන්න විමසා බැලීමට එදෙසට හිස පෙවූ මට දැක ගත හැකි වූයේ එය වීදි නාට්‍යයක් බවය. එහෙත් එහි විශේෂත්වය වූයේ එම වීදි නාට්‍ය කොළඹ මධ්‍යම කොට්ඨාශයේ පොලිස් නිලධාරීන් සහ නිලධාරිනියන් විසින් ඉදිරිපත් කරනු ලැබීමය.

මේ පුවත දැනගත් සැණින් මම ඒ පිළිබඳ වැඩි විස්තර දැනගත හැක්කේ කාගෙන් දැයි එහි රාජකාරියේ නියුතු පොලිස් නිලධාරියෙකුගෙන් ඇසීමි. එවිට ඔහු කීවේ එම ශාන්තිකර්මයේ ප්‍රධාන යකැදුරාගේ චරිතය රඟපාන නළුවාගෙන් ඒ පිළිබඳව කරුණු දැන ගත හැකි බවකි. එබැවින් අපි ගුරුන්නාන්සේ යනුවෙන් අමතා ඔහුගෙන් මේ පිළිබඳව විස්තර විමසුවෙමි.

ඒ ගුරුන්නාසේ කෙසෙල්වත්ත පොලිසියේ රථවාහන අංශයේ සැරයන් ජූඩ් දීපාල්ය. මෙම නාට්‍යයේ පිටපත, නිෂ්පාදනය සහ පුහුණු කිරීම් කටයුතු සිදු කර ඇත්තේ මේ 'සැරයන් ගුරුන්නාසේ' විසිනි.

දැනට අපේ රටේ පවතින මත්ද්‍රව්‍ය, ළමා අපචාර, කාන්තා හිංසනය, ඩෙංගු ව්‍යාප්තිය, මංකොල්ල කෑම්, ගැට කැපීම සහ මං පැහැරීම්, රථ වාහාන නීති ආදී කරුණු සම්බන්ධයෙන් මහජනතාව සුහදශීලිව දැනුවත් කරන්න කොළඹ මධ්‍යම කොට්ඨාශයේ පොලිස් නිලධාරීන්, නිලධාරිනියන් ගෙන් සමන්විත වීදි නාට්‍ය කණ්ඩායමක් බිහිකළා.

මෙහි දැනට සැරයන්වරු තුන් දෙනෙක්, කොස්තාපල්වරුන් හය දෙනෙක් සහ කොස්තාපල්වරියන් තුන් දෙනෙක් විවිධ චරිත රඟපානවා. මේ සියලු දෙනාම රංඟනය සම්බන්ධයෙන් මනා දක්ෂතාවයක් සහ පුහුණුවක් සහිත අයයි.

එම වීදි නාට්‍ය කණ්ඩායමේ පුහුණුකරු සැරයන් ජූඩ් දීපාල් මහතා කීය.

රඟපෑම සම්බන්ධයෙන් මා තුළත් යම් හැකියාවක්, උනන්දුවක් වගේම පුහුණුවක් තියෙන නිසා මම මේ නාට්‍ය කණ්ඩායමට යෝගී ව්‍යායාම, මානසික අභ්‍යාස සහ රංගන අභ්‍යාස සියල්ල ලබා දී ජනතාව වඩාත් ආකර්ෂණය වන ආකාරයේ නාට්‍ය පෙළක් කොළඹ මධ්‍යම පොලිස් කොට්ඨාශයේ විවිධ ස්ථාන වල රඟ දැක්වීමට කටයුතු කරනවා.

පොලිසිය සහ මහජනතාව අතර ඇති සබැඳියාව වඩාත් තහවුරු කරමින් වඩාත් සුහදශීලී පොලිස් සේවාවක් පවත්වාගෙන යාම සඳහා කොළඹ මධ්‍යම පොලිස් කොට්ඨාශයේ ජ්‍යෙෂ්ඨ පොලිස් අධිකාරී සාලිය ද සිල්වා මහතාගේ මාර්ගෝපදේශනය සහ උපදේශකත්වය යටතේ අපි මේ කටයුත්තේ නිරතවන්නේ ඔහු වැඩිදුරටත් කීය.

ඒ කෙසේ හෝ  ඇගේ ලේ රත්වන උද්ඝෝෂණ සමඟ පොලිස් බැටන් පොලු, ජල ප්‍රහාර, කඳුළු ගෑස් ප්‍රහාර එල්ල කරන කොටුව දුම්රියපොළ ඉදිරියේ ජනතාවගේ ගමන් වෙහෙස නිවමින් ඔවුන්ට විනෝදයක් සේම එදිනෙදා ජීවිතයට පැහැදිලි මඟපෙන්වීමක් කීරීමට මේ පොලිස් නිලදරුවන්ට, නිලධාරිනියන්ට  ඇති හැකියාව සුළු පටු නොවන බව මා හට වැටහීගියේ  පුරා අඩහෝරාවක් අප ඉදිරියේ රඟදුන් එම වීදි නාට්‍ය නරඹා හමාර වූ මොහොතේය.

සහන් සංකල්ප සිල්වා

දුටුගැමුණු රජතුමාගේ මඟුල් කඩුව අතුරුදන් වී ඇති බවටත් එය පසුගිය සමයේ රාජ්‍යනායක පවුලක සාමාජිකයකු විසින් පැහැරගත් බවටත් පසුගිය කාලයේ කටකතා පැතිරිණ.

එහෙත් දුටුගැමුණු රජතුමා සඳහා පරිච්ඡේද 11 ක්ම වෙන්කොට ඇති සිංහලයේ අසමසම ඵෙතිහාසික මූලාශ්‍රය වන මහාවංසයේ වත් දුටුගැමුණු රජුගේ මඟුල්කඩුවක් පිළිබඳව සඳහනක් නැත.

අඩුමතරමින් ඉන් සියවස් කීපයකට පසුව ලියැවුණු එහිම අටුවාව වන වංසත්තපකාසිනියේ වත් එවැනි කඩුවක් පිළිබඳව සඳහනක් නැත.පැරණි යුද ආයුධ ගැන සඳහන් කරන විට කඩු - කස්තාන යනුවෙන් සඳහනක් ඇත. මෙහිදී කස්තානය(Carved sword) යනු කැටයම් කළ හෙවත් වැඩ දැමූ කඩුවකි. එය බොහෝ විට රාජ්‍යත්වය සහ ප්‍රභූත්වයේ සංකේතයක් ලෙස යොදා ගනු ලබන්නකි.

වසර 44කට පසුව ශී‍්‍ර ලාංකීය රාජ්‍ය නායකයෙකුට රුසියාවේ නිල සංචාරයක් සඳහා ලැබුණු පළමු නිල ආරාධනය සනිටුහන් කරමින් පසුගිය මාර්තු මාසයේ රුසියාවේ තෙදින නිල සංචාරයක නිරතවූ ජනාධිපතිතුමාගේ සංචාරයට ලබා දුන් ඉහළ පිළිගැනීමක් ලෙස රුසියානු ජනාධිපතිවරයා විසින්  අතීතයේ අප සතුව තිබූ මෙම ඓතිහාසික කස්තානය ජනාධිපති මෛතී‍්‍රපාල සිරිසේන මහතා වෙත පිළිගන්වා ඇත.
පෞරාණික වටිනාකමකින් යුත් මෙම කස්තානය මහනුවර යුගයට අයත් වූවකි. එය ඒකාන්තයෙන්ම මහනුවර යුගයේ රාජකීයකු විසින් භාවිතා කරන ලද්දකි. ඒ 1906දී පමණ එංගලන්තයට ගෙනගොස් තිබියදී එංගලන්තයේ පැවති කෞතුක භාණ්ඩ වෙන්දේසියකින් රුසියාව විසින් මිලදී ගෙන තිබේ.

මෙම කස්තානය ඉතාමත් දුර්ලභ ගණයේ රාජකිය ආයුධයකි. එපමණක් නොව ඓතිහාසික වශයෙන් අගයක් ඇති දුර්ලභ ගණයේ නිර්මාණයකි. රුසියානු සමූහාණ්ඩුවේ අපරාධ නීති සංග‍්‍රහයේ 243වගන්තියට අනුව පෞරාණික වටිනාකමින් යුතු පුරාවස්තූන් හා සංස්කෘතික අගයෙන් යුත් වස්තූන්ට හානි කිරීම හෝ විනාශ කිරීම අපරාධයක් ලෙස සඳහන් වෙයි.  ඒ අනුව එම වස්තූන් ආරක්ෂා කිරීමේ වගන්තියට මෙම කස්තානය ද අයත්ව තිබුණි.එහෙත් මෙම කස්තානය පිළිබඳව බොහෝ දෙනෙක් නොදත් රහසක් ලක්බිම ඔන්ලයින් වෙත හෙළි කිරීමට හිටපු ජාතික  කෞතුකාගාර අධ්‍යක්ෂකවරයකු, කැලණි විශ්ව විද්‍යාලීය පුරාවිද්‍යා පශ්චාත් උපාධි ආයතනයේ හිටපු අධ්‍යක්ෂවරයකු  වන ශ්‍රී ලංකා පුරාවිද්‍යාඥයන්ගේ සභාවේ සමාරම්භක ලේකම් ආචාර්ය සිරිනිමල් ලක්දුසිංහ මහතාට හැකිව තිබේ.

මෙතෙක් සැඟවුණු එම  රසවත් ප්‍රවෘත්තිය ඔහුගේම වචන වලින් මෙලෙ‍සිනි,

“මීට අවුරුදු 45 කට විතර කලින් 1972 අවුරුද්දේ සිරිමාවෝ බණ්ඩාරනායක මැතිනියගේ රජය කාලයේ සෝවියට් - ශ්‍රී ලංකා සංස්කෘතික ගිවිසුමක් සම්බන්ධ කටයුත්තකට අපි තුන් දෙනෙක් රුසියාවට ගියා. ඒ ශ්‍රී ලංකාවේ කීර්තිමක් පුරාවිද්‍යාඥයෙක් වන ආචාර්ය රෝලන්ඩ් සිල්වා මහත්තයයි, සංස්කෘතික අමාත්‍යාංශයේ හිටපු ලේකම් වරයකු වන නලීන් රත්නායක මහත්තයයි, මමයි.

එහිදී රුසියානුවෝ අපිව බොහොම ආදරයෙන් පිළිඅරගෙන ඒ රටේ සංස්කෘතිය දැක්වෙන හැම තැනක්ම හැම කලාවක්ම අපට ඉදිරිපත් කළා. අන්තිමට අපි තුන්දෙනාව ‍ ‘හර්මිටේජ්’ කෞතුකාගාරයට කැඳවාගෙන ගියා. ඒකෙ රුසියාවේ විතරක් නෙවෙයි ලෝකයේ වෙන රටවල් වල පුරාවස්තු කෞතුක භාණ්ඩ විශාල ප්‍රමාණයක් තිබුණා. ඒ අතරෙ ඉන්දියානු පුරාවස්තු  සමග කඩු - කස්තාන රාශියක් තිබුණා. ඒ කඩු කස්තාන අතර තිබිච්ච එක කස්තානයක් දැක්ක හැටියෙ මාව විස්මයට පත් වුණා.  මොකද ඒක ඉන්දියාවට කිසිම සම්බන්ධයක් නැති අපේ රටේ මහනුවර යුගයේ කස්තානයක්. මම ඒ වෙලාවෙම ඒක භාරව සිටි අභිරක්ෂක නිලධාරිනියට කිව්වා; ඔයාලට ලොකු වැරදීමක් වෙලා
(ආචාර්ය සිරිනිමල් ලක්දුසිංහ)

තියෙනවා; මේක ඉන්දියානු කෞතුක භාණ්ඩ ගොඩට දාන්න එපා; මේක ශ්‍රී ලංකාවෙ කස්තානයක්; ඒක සියයට සියයක්ම තහවුරු කරන්න පුළුවන් කියලා.

ඊට පස්සෙ ඒ අභිරක්ෂක වරිය ඒ ගැන බොහොම උනන්දුවෙලා මම කියපු හැම දෙයක්ම එයාගේ අතේ තිබුණ  පුංචි නෝට් පොතේ ලියාගත්තා. ඒ වෙලාවෙ සංස්කෘතික ලේකම් නලීන් රත්නායක මහතයටත් මම කිව්වා දෙරට අතරෙ සංස්කෘතික ගිවියුමක් ඇති වෙනව නම් මේ ව‍ගේ දේවල් ගැනත් විශේෂයෙන් සැලකිලිමත් වෙන්න කියලා.

කොහොම නමුත් මේක නැවත ලංකාවට ලැබෙයි කියලා මම කීයටවත් හිතුවේ නෑ. මගේ ජීවිත කාලය තුළම ඒක ලංකාවට  හිමිවෙලා මම කලක් සේවය කරපු ජාතික කෞතුකාගාරයේ තැන්පත් වීම ගැන මගේ හිතේ අහිංසක සතුටක් තියෙනවා.”

මෙම කස්තානය කෞතුකාගාරයට භාරදීමේ උත්සව සභාව ඇමතූ පුස්තකාල හා ප‍්‍රලේඛණ සේවා මණ්ඩලයේ සභාපති ආචාර්ය ඩබ්.ඒ. අබේසිංහ මහතා ලොව ප‍්‍රබල නායකයෙකුගෙන් ලැබුණු මෙම ඓතිහාසික තිළිණය තම පෞද්ගලික වස්තුවක් බවට පත් කර නොගෙන එය ජාතික උරමයක් බවට පත්කරමින් එයට හිමි නිසි ස්ථානයේ තැන්පත් කිරීමට කටයුතු කිරීම තුළින් රාජ්‍ය නායකයෙකු ලෙස ජනාධිපති මෛතී‍්‍රපාල සිරිසේන මහතා අපේ රටේ සංස්කෘතිය සහ ජාතික උරුමයන් පිළිබඳ දරණ නිවැරදි ආකල්පය මැනවින් පිළිඹිබු වන බව පැවසීය.

මහනුවර යුගයේ රාජකීයකු සතුව තිබූ මෙම අගනා ඵෙතිහාසික කෞතුක වස්තුව දැන් ඔබටත් ජාතික කෞතුකාගාරයේ දී නැරඹිය හැක.



දමයන්ති ගමගේ

 

පසුගිය කාලය තුළ ශීඝ්‍රයෙන් පැතිර ගිය ඩෙංගු ව්‍යසන තත්ත්වය දැන් පහ වෙමින් පවතී.

එය සිදු වූයේ ඩෙංගු මදුරුවා මැඩ පැවැත්වීම සඳහා ගන්නා ලද ක්‍රියා මාර්ගයන් නිසාද නැතහොත් වැසි සහිත කාලගුණික තත්ත්වය පහ වී යාම නිසා ද යන්න ගැන සිතා බැලීම වැදගත්ය.

ඩෙංගු තත්ත්වය අඩුවීමට හේතුව පරිසරය වියළීම ය. අපේ රටේ ඩෙංගු රෝගය වැළැක්වීම සඳහා ක්‍රියා මාර්ග ගැනීම කෙරෙහි බලධාරීන් මෙන්ම මහජනතාවද යොමු වෙන්නේ ඩෙංගු බොහෝ සෙයින් ව්‍යාප්ත වී රෝහල් පිරී ඉතිරී සෑහෙන පිරිසක් මියගියාටත් පසුවය. මෙය විශාල අඩුපාඩුවකි.

අපේ රටේ ඩෙංගු මදුරුවන් ව්‍යාප්ත වන කාල සීමාවන් දෙකක් තිබේ. ඒ මෝසම් වැසි සමයයි. වසරේ ජුනි - ජූලි මාසවල එක් මෝසම් වැසි සමයක් පවතින අතර ඊළඟ මෝසම් වැසි සමය එළඹෙන්නේ නොවැම්බර් - දෙසැම්බර්  කාලයේදීය.

වර්ෂාව නිසා වතුර එකතු වන ස්ථානවල ඩෙංගු මදුරුවා බිත්තර දැමීම සිදුවෙයි. ඩෙංගු මෙලෙස ව්‍යාප්ත වූ පසු කළ යුතු ප්‍රතිකාර, පිළිපැදිය යුතු පිළිවෙත් සහ කසල ඉවත්  කිරීමත්, කානු, වැහිපීලි ආදිය පිරිසිදු කිරීමත් ගැන මිස ඩෙංගු ‍වැළැක්වීම සම්බන්ධ විද්‍යාත්මක කථිකාවක් අපේ රටේ තවමත් සිදු කෙරෙන්නේ නැත.

ඩෙංගු වැළැක්වීමට නම් ඩෙංගු මදුරුවන් බෝවීම වැළැක්විය යුතුමය. මේ සඳහා ආකාර කිහිපයක් තිබේ.

පළමු සහ ප්‍රධාන ක්‍රියාමාර්ගය විය යුත්තේ මෝසම් සුළං ඇති වීමට පෙර, එනම් මෝසම් සුළං සමය ආසන්නයේ පරිසරය පිරිසිදු කිරීම ආරම්භ කිරීමයි. ‍මෝසම් සුළං ආසන්න කාලය කාලගුණ විද්‍යාඥයන් හට මාධ්‍ය හරහා දැනුවත් කිරීමේ හැකියාව ඇත. සෞඛ්‍ය වෛද්‍ය නිලධාරීන්, මහජන සෞඛ්‍ය පරීක්ෂකවරුන් සහ පොදුවේ මහජනතාව ක්‍රියාත්මක විය යුත්තේ මේ කාල සීමාවේදීය.

අපි ප්‍රධාන වශයෙන්ම ඩෙංගු රෝගය හඳුනාගැනීම, ඩෙංගු රක්තපාතය, ඩෙංගු පැතිරයාම, ප්‍රතිකාර පිළිබඳව මෙන්ම රෝහල් වල ඩෙංගු රෝගීන් සඳහා අලුතින් දැඩි සත්කාර ඒකක ඉදිකිරීම පිළිබඳව පවා සාකච්ඡා කරමු. මේ සියලුම දේ ඩෙංගු වැළඳීමෙන් පසු සිදුවන ඒවාය. නමුත් ඩෙංගු මදුරුවන් හට ගැනීම වැළැක්වීම සඳහා වන ක්‍රම ගැන ඊටත් වඩා කතා බහ කළ යුතුය.  එය සිදුවිය යුත්තේ ඉහතද කී පරිදි ‍මෝසම් වැසි සමය ආරම්භ වීමට පෙරය. ඒ අනුව අප දැන් ඩෙංගු මැඩළීමට ක්‍රියා කරනුයේ වඳුරන් ගෙවල් හදන ආකාරයට තරමක් සමාන ක්‍රමයකට බව කිව යුතුය.

දුම් ගැසීමද ඩෙංගු මදුරුවෝ පලවා හරින එක් ක්‍රමයකි. නමුත් මෙය තාවකාලික පිළියමකි.  මෙමගින් මදුරුවන් බෝවීම වැළැක්විය නොහැක. අනික්   අතට ඩෙංගු ව්‍යාප්තිය වළක්වා ලීම වෛද්‍යවරුන්ගේ කටයුත්තක්ද නොවේ. වෛද්‍ය විද්‍යාවේදී ප්‍රගුණ කරන්නේ රෝග පිළීබඳව හා ඊට කරනු ලබන ප්‍රතිකාරත්, රෝගවලින් බේරී සිටීමට ගත යුතු පිළිවෙත් පිළිබඳවත්ය. එනිසා මදුරුවන් බෝවීම වැළැක්වීම පිළිබඳව රජය කීට විද්‍යාඥයන්, පරිසර විද්‍යාඥයන්, පරපෝෂ විද්‍යාඥයන් මෙන්ම ගෘහ නිර්මාණ ශිල්පීන් වෙතින් ද උපදෙස් ලබා ගත යුතුය. මේ සියලු දෙනාගේ මෙන්ම කාලගුණ විද්‍යාඥයන් වෙතින්ද සැලසුම් කමිටුවක් පත් කිරීම වඩාත් ඵලදායී වෙයි. නමුත් මේ සාමූහික වගකීමෙන් වැඩිකොටස වෛද්‍යවරුන්ගේ කර මත පැටවීමෙන් අයහපතක් මිස යහපතක් සිදුනොවෙයි.

මදුරුවන් බෝවීම වළෑක්වීමට වෙනත් රටවල Larvicidal trap නමින් හඳුන්වන භාජන විශේෂයක් භාවිතා කෙරේ. මෙම භාජනයට අධිසීනි ද්‍රාවණයක් දමා මදුරුවන් බහුල ගස් ආශ්‍රිත ස්ථාන වැනි අඳුරු තැන්වල තැබිය යුතුය. මෙම භාජනයට මදුරුවන් ඇතුල් වී බිත්තර දමනු ඇත. එයට ඇතුල් වූ පසු මදුරුවන්ට මෙන්ම මදුරු කීටයන්ටවත් ආපසු යා හැකි නොවේ. මෙගා බෝතලයකින් වුවද මෙවැනි බඳුනක් සාදා ගැනීමට හැකියාව පවතියි.

සාමාන්‍යයෙන් එක ආසන්නයේ නිවෙස් කිහිපයකම ඩෙංගු රෝගීන් සිටියේ නම් ඒ ප්‍රදේශයේ මීටර් 200 ක් පමණ වපසරියක් තුළ ඩෙංගු මදුරුවන් සිටින බව කිව හැකිය. ඩෙංගු මදුරුවකුට පියාසර කළ හැක්කේ එවැනි දුර ප්‍රමාණයක් පමණකි. එවැනි ප්‍රදේශයක ස්ථාන කිහිපයක Larvicidal trap කිහිපයක් තැබිය හැකි නම් මදුරු ඝණත්වය අඩු කර ගත හැකිය. මෙය ලොව පිළිගත් මදුරු නාශක ක්‍රමයකි.

BTI බැක්ටිරියාව ද මදුරුවන් මර්දනය සඳහා යෙදිය හැකිය. පසුගිය කාලයේ අපේ රටේ බලධාරින් කියා සිටි පරිදි මේවා හෙලිකොප්ටර් මගින් පරිසරයට මුදා හැරීමට කරදර විය යුතු නැත.  බොහෝ රටවල මේවා කැට වශයෙන් නිෂ්පාදනය කරන අතර වෙළඳසල් වලින් පාරිභෝගිකයන්ට මිලදී ගැනීමට ද හැකියාව ඇත. මදුරු කොයිල් මිලදී ගන්නා අයුරින් මේවාද ජනතාව මිලදී ගැනීමට කටයුතු කරන්නේ නම් වතුර එකතුවන හැම ස්ථානයකම මේවා දැමීම තුළින් මදුරුවන් බෝවීම වළක්වා ගැනීමට හැකියාව ලැබේ.

මීට සමාන බැක්ටීරියා විශේෂයක් අපේ රටේ පේරාදෙණිය හා කැලණිය විශ්ව විද්‍යාල මගින් නිපදවා ඇත. මෙය වෙළඳපොළට නිකුත් කළ හැකි මට්ටමට රජයට අමතරව පෞද්ගලික අංශයටද සම්බන්ධ වී නිෂ්පාදනය කළ හැකි නම් මදුරුවන් බෝවීම වැළැක්වීම අපහසු නොවේ.

ජානමය වශයෙන් වෙනස් කරන ලද වඳ මදුරුවකු ඩෙංගු මදුරුවන් ගැවසෙන ප්‍රදේශවලට මුදා හැරීම තවත් ඵලදායි ක්‍රමයකි. මෙය බ්‍රසීලය වැනි රටවල සුලබව භාවිතා වේ.  මේ වඳ මදුරුවා මදුරු ගැහැනු සතුන් හා එක්වීම සිදු වුවත් එම මදුරුවන් ගෙන් ඊළඟ පරම්පරාවක් හට ගන්නේ නැත.

පාසල් නිල ඇඳුම වෙනස් කිරීම ද සමහර රටවල් වල දක්නට ලැබෙන ක්‍රමයකි. සාමාන්‍යයෙන් ඩෙංගු මදුරුවා බහුල උදය හා සවස් කාලයේය. එසේම මෙම මදුරුවා පියාසර කරන්නේ පහළ මට්ටමකය. එබැවින් පාසල් දරුවන්ට දිගු කලිසම් ඇඳීම අත් දිග කමිස ඇඳීම මගින් මදුරු දෂ්ටනයෙන් වැළකී සිටිය හැකිය. ගැහැනු ළමයින්ට කලිසම් ඇඳීමට ඉඩ දිය නොහැකි නම් සුදු ගවුමට යටින් ස්ටොකින්ස් නමැති දිගු මේස් විශේෂය භාවිතා කිරීමට ඉඩ සලසා දීම සුදුසුය. අඩුම තරමින් මදුරු වසංගතය පවතින කාලයටවත් මෙලෙස පාසල් නිල ඇදුම් වෙනස් කිරීමට පියවර ගැනීම සුදුසු වේ.

මෙවැනි ක්‍රම පොදුවේ හදුන්වන්නේ Integrated vector control ලෙසිනි. මදුරුවන් පලවා හරින්නට මෙම එක් ක්‍රමයක්  ප්‍රමාණවත් නැත. මේ ආකාරයට විවිධ ක්‍රම කිහිපයක්ම අනුගමනය කරන්නට සිදු වනු ඇත. නමුත් අවාසනාවන්ත තත්ත්වය වන්නේ මෙබඳු විධිමත් ක්‍රම වේදයක් අපේ රටේ ක්‍රියාත්මක නොවීමය.

මෙම කතාවෙන් කොටසක් සහිත වීඩි‍යෝව -:

ළමා රෝග විශේෂඥ වෛද්‍ය අජිත් අමරසිංහ

සැකසුම - ඉන්දු පෙරේරා

පතුලක් නැති ළිඳක් ඇති බව පිළිගැනීමට පවා ඔබ අකමැති වනු ඇත. පසුගිය යුද ජයග්‍රහණයෙන් පසු එතෙක් යාපනයේ අර්ධද්වීපයේ අප්‍රකටව පැවති මෙම පතුල නැති ළිඳ පිළිබඳව සුවිසල් ප්‍රසිද්ධියක් ලැබුණි.

යාපනය කන්කසන්තුරය මාර්ගයේ චුන්නාකම් අසලින් හෝ චාවකච්චේරිය සිට ගමන් ගන්නේ නම් සරසාලෙයි හරහා චුන්නාකම් අසලින් දිවෙන මාර්ගයේදී හමුවන පූතූර් නගරය අසල දී නිලාවරි ගම්මානය හමුවෙයි. මුළුමනින්ම පාහේ කෘෂිකාර්මික මුහුණුවරක් ගත් මෙහි පිහිටි පොකුණක ස්වරූපය ගත් මෙම පතුලක් නොමැති ළිඳ හැඳින්වෙන්නේ ‘නාවක්කන්නි’ ළිඳ යනුවෙනි.

‘නාවක්කන්නි’ යන දෙමළ වදනෙහි සිංහල අරුත ‘නාග කන්‍යාව’ යන්නය. ඒ අනුව ශ්‍රී ලංකාවේ ආර්ය ජනාවාස පිහිටුවීමට පෙර නාග ගෝත්‍රිකයන් හා සම්බන්ධ පුරාවෘත්ත කිහිපයක් මෙහි ගැබ්ව තිබේ.

එමෙන්ම මිහිපිට වෙසෙන නාගයන්ට නාගලොවට යා හැකි දෝනාමාර්ගයක් හෝ පියගැට පෙළක් මෙම ළිඳ පත්ලෙහි ඇති  බව කියනු ලැබේ.

මෙම නීලාවරී ළිඳ පිළිබඳව දෙ‍වන ජනප්‍රවාදය වන්නේ රාම රජු හා යුද කොට  රාම කුමරුන් සීතා දේවිය රැගෙන ඉන්දියාවට යන ගමනේ දී ඇයට ඇති වූ දිය පිපාසය සන්සිඳවනු පිණිස රාමකුමරුන් තම ත්‍රිශූලයෙන් පොළවට ඇන මෙම ළිඳ කපා දිය මතු කර ගත් බවය.

එමෙන්ම බුදුරාජාණන් වහන්නේ නාගදීපයට වැඩම කළ අවස්ථාවේ උන්වහන්සේට දිය පිපාසයක් දැනුණු බවත් එවිට ශක්‍රදේවේන්ද්‍රයා විසින් උන්වහන්සේට පැන් පානය කිරීමට මෙම ළිඳ නිර්මාණය කළ බවත් පැවසේ.

සාමාන්‍යයෙන් ළිඳක් යැයි ව්‍යවහාර වූවද බාහිර ස්වරූපය අනුව මෙය ළංවන්නේ පොකුණකටය. එම පොකුණට බැසීමට  අඩි 20 ක පමණ පිය ගැට පෙළක්  ද තනා තිබේ.

පැරණි සිතියම්ගත ලේඛනයන්හි වඩදිය බාදිය ළිඳක් (Tidel Well) ලෙස ප‍්‍රකට මෙම ළිඳ පිළිබඳව  තවත් විවිධ ජනප‍්‍රවාද පවතී.

 ඉතා නිල්වන් පැහැදිලි ජල වර්ණය (Astonishing aqua marine) මෙම ළිඳට අලංකාර ස්වභාවික පිහිටීමක් එක්කර ඇත. මෙම පත්ල නොමැති ළිඳ පිළිබඳව විවිධ අවස්ථාවන්හි විද්‍යාත්මක පර්යේෂණ පැවැත්විණි.

ඒ අතරින් 2013 වර්ෂයේ අගෝස්තු මස මධ්‍යම සංස්කෘතික අරමුදලේ මුහුදු පුරාවිද්‍යාඥ කණ්ඩායමක් මගින් ගවේෂණයක් සිදුකිරීම කැපී පෙනේ. හත් දෙනෙකුගෙන් සමන්විත මුහුදු පුරාවිද්‍යාඥ කණ්ඩායමේ සාමූහික කැප කිරීම මත මෙතෙක් පැවැති ළිඳ සම්බන්ධ ගුප්ත විශ්වාසයන්ට  තිත තැබිණි.

එනම් මෙම ළිඳේ පත්ල අනාවරණය කර ගැනීමයි. ඒ අනුව මෙහි උපරිම ගැඹුර මීටර් 50 ක් හෙවත් අඩි 164 ක ප‍්‍රමාණයක් වන බව නිගමනය කෙරුණි.

පතුලක් නැති ළිඳක් යනුවෙන් හැඳින්වෙන මෙම ස්ථානය පිළිබඳව භූ විෂමතා ආශි‍්‍රත සටහන් තුළින් හෙළිදරව් කෙරෙනුයේ හුණුගල් පාෂාණ සහිත ස්ථරයකින් නිර්මාණය වූ මෙම කලාපයේ මුහුදට සම්බන්ධ වන ප‍්‍රදේශයේ කබොල්ල පොළොව මට්ටමේ සිට මුහුදු මට්ටම දක්වා කැඞී යෑමෙන් හෙවත් ස්වභාවික ඛාදනයට ලක්වීමෙන් මෙම ගැඹුරු ආගාධය නිර්මාණය වී ඇති බවයි.

මේ පිළිබඳව අදහස් දක්වන ජාතික ජලජ සම්පත් පර්යේෂණ සහ සංවර්ධන නියෝජිත ආයතනයේ (NARA) ජ්‍යෙෂ්ඨ සාගර විද්‍යාඥ ආචාර්ය කේ. අරුලානන්දන් මහතා ප්‍රකාශ කරනුයේ මෙම ප්‍රදේශයේ පවතින හුණුගල් පාෂාණය කාලාන්තරයක් තිස්සේ සාමුද්‍රික බලපෑමට  ලක්ව ඛාදනය වීම නිසා මෙම  ළිදෙහි පත්ල සහ මුහුද අතර කුහර නිර්මාණය වී ජලජමය සම්බන්ධයක් ඇති බවයි.

ඒ අනුව මෙහි මතුපිට ජලය මිරිදිය ලෙසද පතුලෙහි ජලය කරදිය ලෙසද පවතිනු ඇතැයි ඔහු කීය.

එමෙන්ම මෙම ළිඳ සහ කන්කසන්තුරේ පිහිටි කීරමලෙයි පොකුණ අතර අන්තර් ජලජ සම්බන්ධතාවයක් ඇති බව යාපන වැසියන් ‍ප්‍රකාශකරන බව කී ආචාර්ය අරුලානන්දන් මහතා නීලාවරි ළිඳට දමනු ලබන දෙහි ගෙඩි, පොල් කැබලි ආදී පූජා භාණ්ඩ කිරමලේ  පොකුණෙන් මතුවන පුවත එක් වරම විද්‍යතාත්මකව බැහැර කළ නොහැකි බව ද කීය.

යාපනය අර්ධද්වීපයේ කෝපායි ප‍්‍රාදේශීය ලේකම් කොට්ඨාසයේ නවක්කේනි ග‍්‍රාම නිලධාරි වසමේ මෙම පිහිටි මෙම ළිඳ ‘නීලාවරි’ පොකුණ වශයෙන් 1486/2007/02/23 ගැසට් පත්‍රය මගින් පුරාවිද්‍යා ස්මාරකයක් ලෙස ලියාපදිංචි කොට තිබේ.
 මෙය මෙම ළිඳට අමතරව   පුරාවිද්‍යාත්මක සාධක සහිත භුමියක් ද වෙයි.

පෘතුගීසි සමයේ යාපනයේ විසූ පිලිප් බැල්දියුස් දේවගැතිවරයාගේ දේශාටන වාර්තා අනුව මෙම ළිඳ ආසන්නයේ පැරණි බෞද්ධ විහාරයක් තිබූ බවත්, එම ස්ථානයේ සිංහල හා පෘතුගීසින් අතර සටනක් පැවැති බවත් සඳහන් කරයි.

එසේම 1917 වර්ෂයේ එවකට යාපනයේ දිසා විනිසුරුවරයාව සිටි පෝල් ඊ. පීරිස් විසින් යාපනය පිළිබඳව තබන සටහනේ ද මෙම ස්ථානය පිළිබඳව කරුණු දක්වා ඇත. ඒ අනුව ඉහත නම සඳහන් ළිඳට අමතරව බෞද්ධ  නටබුන් රැසක් එහි තිබූ බව ද පවසයි.

මෙම ළිඳ සමීපයෙන් හමුවූ බුද්ධ ප‍්‍රතිමාවක් මේ වන විට යාපනය පුරාවිද්‍යා කෞතුකාගාරයේ ප‍්‍රදර්ශනයට තබා ඇත. වර්තමානයේ වුව හුණුගලින් නිර්මිත දාගැබ් ද්විත්වයක නටබුන් ඒ අසල භූමියේ දැකිය හැකිය. එමෙන්ම මෙම ස්ථානයට යාබඳව පැරණි බෝධි වෘක්ෂයක් ද දැකිය හැකිය.

බැල්දියුස්ගේ දේශාටන වාර්තාවල සඳහන් මෙම ස්ථානයේ පිහිටියේ යැයි සඳහන් ඓතිහාසික විහාරය සිංහල රජ සමයේ   ”බුද්ගමුව” නමින් හැඳින්වූ ගම්මානයට අයත්ය. කි‍්‍ර. ව. 1053 වර්ෂයේදී සොළීන් හා සටන් වැදුණු විජයබා රජු විසින් මෙම විහාරය ප‍්‍රතිසංස්කරණය කරවූ බව ඉතිහාසයේ එයි.

ඒ අනුව නාගග්‍රෝතික සහ රාම රාවනා පුරාවෘත්ත වල සිට බෞද්ධ ඵෙතිහාසික සහ පුරාවිද්‍යාත්මක සාධක සහිත ස්ථානයක් වශෙන් වැදගත් වන මෙම නිලාවරි ළිඳ ජාති ආගම් බේදයකින් තොරව අප කාගේත් පොදු උරුමයක් සේ සල කිය හැකිය.





ඒ.ජී රේණුකා

IMAGE

දේවභක්තියක් නැතත් යකඩ කොකු වලින් එල්ලෙන්න පුළුවන්!

IMAGE 2017 Aug 16 16:24
ශරීරයේ විවිධ ස්ථාන වලට ගසන ලද යකඩ කොකු වලින් එල්ලී කිසිදු වේදනාවකින් තොරව ඇතැම්විට සතුටින්...
Views - 211

හම්බන්තොට වරායේ තාත්තාත් මං බාප්පාත් මං

IMAGE 2017 Aug 16 11:43
කීර්තිමත් දේශීය ව්‍යාපාරිකයකු වන ආරියශීල වික්‍රමනායක සමුද්‍රිය කටයුතු පිළිබඳ...
Views - 1872

සිඳූ නිසා මලීට අසාධාරණයක් වුණේ නැහැ

IMAGE 2017 Aug 16 07:52
මලී ටෙලි නාට්‍යයේ මලී ලෙසින් අසීමිත ජනතා ආකර්ශණයට පත් සමාධි ආරුණචායා මලී - 3, සිඳු ටෙලි...
Views - 1416

මත්පැන් ‘තිත්ත කරන’ පෙත්ත අතුරුදන්?

IMAGE 2017 Aug 15 17:23
මත්පැන් පානයට ඇබ්බැහිවූවන් ඉන් මුදවාලීම පිණිස නිෂ්පාදනය කොට ඇති ඖෂධ වර්ගයක් මේ දිනවල...
Views - 1133

කාලගුණ විද්‍යාඥයන් සුනාමි ගැන දන්නෙ කොහොමද? (Voice cut)

IMAGE 2017 Aug 15 13:00
සුනාමි ඇතිවීම, එහි බලපෑම, දුර ප්‍රමාණය ආදිය පිළිබඳව සමීක්ෂණ‍ සිදුකොට ඇත්තේ සාගර...
Views - 678

අත්තනගලු ඔයේ මාළුන්ට දන්සලක් (Video)

IMAGE 2017 Aug 14 12:58
ලක් ඉතිහාසයේ එදා මෙදා තුර වාර්තා වන සුවිසල්ම දානය සිරිසඟබෝ රජතුමා විසින් පිරිනමන ලද්දකි. ඒ...
Views - 2030

Please publish modules in offcanvas position.