Home    |    Daily Lakbima    |    Sunday Lakbima    |   Rajina |    Archive    |    Advertise With Us    |     Careers Email - lakbimaonline@gmail.com youtube
Coss Ear2
lakbima.lk
COSS Ear 1
                                                                                        එසැනින් පුවත් | ගොසිප් | විශේෂ පුවත් | සුන්දර ලක්බිම | ව්‍යාපාරික පුවත්     

මෙවර අයවැය ලෝකයේ දියුණුම ආර්ථික සංකල්පයක් වන නීල-හරිත ආර්ථිකයට රට යොමු කරවන්නක් බව මුදල් අමාත්‍ය මංගල සමරවීර මහතා අය වැය කතාවේදී ප්‍රකාශ කළා. ඒක හරියට යන්තම් විළිවැහෙන අමුඩ කෙටියක් ගහගෙන ඉන්න මිනිහෙකුට ෆුල් සූට් එකක් අන්දවන්න සැලසුම් කළා වගේ.

නමුත් දැනට මීගමුව ආශ්‍රිතව පැන නැඟිලා තියෙන සමුද්‍ර කලපු සහ ගොඩබිම් ආශ්‍රිත පාරිසරික ප්‍රශ්න සම්බන්ධයෙන් රජය ගන්නා පියවර අනුව අපට නම් හැගෙන්නේ ඒ ෆුල් සූට් ඇන්දවීම කොහොම වෙතත් ඒක ඇගේ තියෙන අමුඩ කෙටියත් ගලවා ගන්න දරන උත්සාහයක් වගේ.

ලක්බිම ඔන්ලයින් සමඟ එම අදහස් ප්‍රකාශ කළේ මීගමුව ධීවර සංවිධාන එකමුතුවේ වර්ණකුලසූරිය ජූඩ් නාමල් මහතාය.

එහිදී වැඩිදුරටත් කරුණු දැක්වූ ඔහු මෙසේද කීය.

ශ්‍රී ලංකාවේ අතිශය පලදායි මුහුදු කලාපයක් වන මීගමුව ආශ්‍රිත සාගර කලාපයට ඒ ජෛවමය ගුණය ලැබී ඇත්තේ මීගමු කළපුව ඒ ආශ්‍රිත කඩොලාන ඇතුළු හරිත වැස්ම නිසයි. නමුත් මේ රජය ඒවා ආරක්ෂා කිරීම සම්බන්ධයෙන් කිසිදු පියවරක් අරගෙන නැහැ. ඒ වෙනුවට සිදු කොට ඇත්තේ ඒවා විනාශ මුඛයට යන අන්දමට කටයුතු යෙදීමයි. මීගමු කලපුව කියන්නේ ශ්‍රී ලංකාවේ කලපු අතරින් විශිෂ්ටතම දෙදිය හුවමාරුවක් සහිත සක්‍රීය කලපුවක්. ඒ කලපුව සඳහා මිරිදිය සම්පත ලබාදෙන ප්‍රධානතම ජල මූලාශ්‍ර දෙකක් තියෙනවා. ඒ දඬුගම් ඔය ලෙසින් මීගමු කලපුවට සම්බන්ධ වන අත්තනගලු ඔය සහ ජා ඇළ දෙසින් මීගමු කලපුවට සම්බන්ධ වන ඌරුවල් ඔයයි. නමුත් අද වන විට මේ ගංගාධාර අවට පිහිටි කර්මාන්ත ශාලා වලින් විශාල වශයෙන් නිකුත්කෙරෙන විෂ රසායනික මේ ජල ප්‍රවාහයන් ඔස්සේ මීගමු කලපුවට එකතු වෙනවා.

ඒ සම්බන්ධයෙන් අතනින් මෙතනින් කෙනෙකු අල්ලා නඩුවක් දෙකක් පවරනවා හැරුණු කොට මේ සමස්ත ක්‍රියාවලිය මුළුමනින් නතර කිරීමට මෙතෙක් කිසිවෙකුත් සමත් වී නැහැ. ඊට හේතුව එම පරිසර බලධාරීන් එම කර්මාන්ත ශාලා හිමියන්ගෙන් විශාල වශයෙන් අල්ලස් හා කප්පම් ලබා ගැනීම බවට අප තුළ සාධාරණ සැකයක් තියෙනවා.

එහිදී වැඩිදුරටත් අප හා අදහස් දැක්වූ ජුඩ් නාමල් මහතා කියා සිටියේ දඬුගම් ඔයේ වරින් වර මසුන් දහස් ගණන් එක්වරම මිය යාම ප්‍රදේශවාසීන්ට සහ ධිවරයන්ට කලක පටන් රහසක් නොවන බවය.

එම ජලජ ජීවින්ගේ විනාශයට හේතුව දඬුගම් ඔයේ ජලයට විෂ රසායනික එක් වීම බව අතිශයින් පැහැදිලිව පෙනුණද ඒවා පිළිබඳ විමර්ශනය කරන නිලධාරින් එසේ මිය ගිය මත්ස්‍යයෙකු මරණ පරීක්ෂණයට ලක් කර එම මත්ස්‍යයා මහළු වී මිය ගිය බව පවා ප්‍රකාශ කළ අවස්ථා ඇති බව කීය.

මෙලෙස මිගමු කලපුවට විෂ රසායනික ඇතුළු ඉලෙක්ට්‍රොනික් අපද්‍රව්‍ය (E waste) අසීමාන්තිකව එක් කිරීම නිසා මුලික වශයෙන් එම මසුන් මිය ගියද කෙමෙන් උන් එම විෂ සහිත ද්‍රව්‍යයන්ට අනුවර්තනය වීම එම මත්ස්‍ය අස්වැන්න ආහාරයට ගන්නවුන්ට පිළිකා ඇතුළු මාරක විපත් පමුණුවන බවද කිය.

මෙහිදී ඒ සම්බන්ධයෙන් තව දුරටත් කරුණු දැක්වූ ජූඩ් නාමල් මහතා මෙසේද කීය.

මීගමු මුහුදු කලාපයේ මසුන් අස්වැන්න වැඩිවීම සම්බන්ධයෙන් මුතුරාජවෙළ ආශ්‍රිත දැවැන්ත කඩොලාන පද්ධතිය සෘජු සාධනීය ප්‍රතිථිපලයක් උදාකරන බව පර්යේෂණ සිය ගණනකින් තහවුරු කර තියෙනවා.

එමෙන්ම මීගමු කලපුවේ ජල දූෂණය අවම කිරීම පිණිස මෙම කඩොලාන පද්ධතිය ස්වභාවික ජල පෙරණයක් ලෙස ඉටු කරන මෙහෙවර අතිවිශාලයි.

ඒ වගේම කටුනායක ගුවන්තොටුපල ඇතුළු ජනාකීර්ණ කාර්මික කලාප රාශියක් සමීපයේ පිහිටි මේ ස්වභාවික පරිසර පද්ධතිය නිසා ප්‍රදේශයේ වායු දූෂණය බොහෝ දුරට යටපත් වී තිබෙනවා.

නමුත් අද මහ නගර සංවර්ධනය මුවාවෙන් මුතුරජවෙල පරිසර පද්ධතිය දැඩි දූෂණයකට ලක් කර තිබෙනවා.

පසුගිය කාලයේ මුතුරාජවෙළ අනවසර ගොඩ කිරීම් සම්බන්ධයෙන් පරිසර වේදීන් සහ ධීවරයන් තොරතුරු දැනගෙන ඒ විනාශයට එරෙහිව විශාල හඬක් නැගුවා. නමුත් අද වන විට මුතුරාජවෙල තෙත්බිම තුළ අනවසරයෙන් සිදුවන මහා පරිමාණ ගොඩ කිරීම් පිළිබදව අඩුම තරමින් ඒ ප්‍රාදේශීය ලේක්ම් වරුන්වත් දන්නේ නැහැ. මහනගර සංවර්ධනය කියමින් සිදුකරන තෙත් බිම් සංහාරයට එරෙහිව කිසිවෙකුත් හඬ නගන්නේ නැහැ.

වර්තමාන රජයෙන් සිදු කෙරෙන මේ මහා පරිමාණ තෙත් බිම් සංහාරය සහ පරිසර දූෂණය පිළිබඳව හිටපු කතානායක වරයෙක් සහ කැබිනට් අමාත්‍යවරයෙක් සහ එම ප්‍රදේශයේ වැසියෙකු වන ජෝෂප් මයිකල් පෙරේරා මහතා පසුගියදා දැඩි විවේචනයක් එල්ල කළා. ඔහු එහිදී කියා සිටියේ වෙන මොන සංවර්ධනයක් නැතත් හෙට අනිද්දා වන විට ජා ඇළ ප්‍රදේශය ගංවතුරෙන් නම් සංවර්ධනය වන බවයි.

මුතුරාවෙල සිදුවන මෙම මහා පරිමාන පස් පිරවීම සඳහා පස් ලබා ගන්නේ දිවුලපිටිය ආසනයෙන්. එහිදී එම පස් ඉවත් කර ගන්නා ස්ථානයක සිට දිවුලපිටිය ප්‍රාදේශීය ලේකම් වරියට දුරකථනයෙන් කතා කළ නියෝජ්‍ය අමාත්‍ය රංජන් රාමනායක මහතාට දුරකතනයෙන් පිළිතුරු දුන්  දිවුලපිටිය ප්‍රාදේශීය ලේකම් වරිය කියා සිටියේ එවැන්නක් තියෙනවා නම් ලිඛිතව දැනුම් දෙන ලෙසයි.

තමන්ගේ ප්‍රාදේශීය ලේකම් කොට්ඨාශයෙන් දිනකට පස් ටිපර් සිය ගණනක් ඉවත් වන බව ප්‍රාදේශීය ලේකම් නොදැන සිටියා යැයි කියන්නේ කොහොමද? එවිට ඉන් ආවේගයට පත් රංජන් රාමනායක මහතා කවුරුන් හෝ ඇවිත් ඔබ තුමියගේ හොම්බට ඇත්න හොත් ඒකත් ලිඛිතව ඉල්ලා සිටිනවාදැයි ඇසීමෙන් ඔහු රාජ්‍ය නිලධාරීන්ට තර්ජනය කළ බවට ජන මතයක් ඇති කිරීමට පිරිසක් උත්සාහ කළා.

ඒ එම පස් ජාවාරම් කාරයන් බව ප්‍රසිද්ධ වුණත් අවසානයේ ඔවුන්ට ජය අත්කොට දී රංජන් රාමනායක මහතා දිවුලපිටිය ආසනයෙන් ඉවත් කිරිමට වත්මන් රජය කටයුතු කළා. ඒ බව දැන් කිසිවෙකුටත් රහසක් නෙවෙයි.

එවන් අවුල් සහගත පසුබිමක් තුළයි මේ නීල-හරිත අයවැය රජය ඉදිරිපත් කරන්නේ. අද මීගමුව ආශ්‍රිත මුහුදේ දැල් එලීමේදී දැල් එළිය නොහැකි ප්‍රදේශ ගණනාවක් මීගමු කළපුවේ සහ මුහුදේ ධීවරයන් හඳුනාගෙන තියෙනවා.

ඔවුන් එවා නම් කරන්නේ 'පොලිතීන් මඩ' කියායි. මේවා ටොන් දහස් ගණනක් මීගමු කලපුවෙත් මුහුදේත් තිබෙන බව ධීවරයන් දන්නවා. නමුත් මහ මුහුද සම්බන්ධ පරිසර බලධාරීන් මේ සම්බන්ධයෙන් අන්ධ භාවයක් පළ කරනවා.

අතීත ධීවරන්ට සාපේක්ෂව වර්තමාන ධීවරයන් පරිසරය කෙරෙහි තරමක් දුරට සංවේදීයි. ඊට හේතුව වර්තමානයේ  පවතින දැඩි පාරිසරික තර්ජන නිසා මීගමුවේ ධීවර කර්මාන්තයටද දැඩි තර්ජන එල්ල වී ඇති බව ඔවුන්ට කෙමෙන් ඒත්තු යාම නිසයි.

එසේ කී ජූඩ් නාමල් මහතා අවසානයේ මෙසේද කිය.

ඒ නිසා නීල-හරිත අය වැයක් ගැන කතා කළ වත්මන් රජයට අප කියන්නේ අමුඩ කෙටියක් ඇඳ සිටින මිනිසාට නීල-හරිත ආර්ථිකය නම් ෆුල් සූට් එක දීමට පෙර ඔහුගේ අමුඩ කෙටිය උදුරා ගැනීමට වෙර දරන යහපාලන රජයේ ඇතැම් පාර්ශවයන්ට එම බිහිසුණු ක්‍රියා මාර්ග ගැනීමට තව දුරටත් ඉඩ නොදෙන ලෙසයි. එසේ කළ හොත් ඒ සංවර්ධනය අපිට හැඳින්විය හැකි වන්නේ 'ලෙඩා මළත් බඩ සුද්දයි' සංවර්ධනයක් කියායි.

ප්‍රසංග පෙරේරා ජා ඇළ

අද මට ඉතාමත් සතුටු දවසක්. ඉන්දියාවේ ජාතික ක්‍රිකට් කණ්ඩායමේ විරාත් කෝලි සහ ඔහුගේ කණ්ඩායමත් චන්දිමාල් ඇතුළු ශ්‍රී ලංකා කණ්ඩායමත්, කපිල් දේව්, රවී ශාස්ත්‍රි, මොහොමඩ් අසුරුඩීන්, ඩේවිඩ් බූන් වගේම ඉන්දියානු ක්‍රිකට් කණ්ඩායමේ ප්‍රධාන පරිපාලක නිලධාරීනුත්, ක්‍රිකට් හා සම්බන්ධ සුවිශේෂී අමුත්තන් පිරිසක් මැද ජග්මොහාන් දල්මියා නමැති විශිෂ්ට ක්‍රිකට් පරිපාලකයා පිළිබඳව ලෝකයා දැනුවත් කිරීමට මට අවස්ථාව ලැබිම සුවිශේෂී අවස්ථාවක් විදියටයි මා සලකන්නේ.
1995 වසර වන විට, එනම් මම ශ්‍රී ලංකා ක්‍රිකට් පාලක මණ්ඩලයේ උප සභාපති වශයෙන් කටයුතු කරන අවධියේදී ජගු මහතා ඉන්දියානු ක්‍රිකට් පාලක මණ්ඩලයේ ‍ලේකම් වශයෙන් කටයුතු කළා. එවකට ඉන්දියාව පාකිස්තානය සහ ශ්‍රී ලංකාව එක්ව කමිටුවක් පිහිටුවනු ලැබූ අතර ඒ හේතුව නිසා මට ජගු මහතාව දැන හඳුනා ගැනීමට අවස්ථාව ලැබුණා. එම කමිටුව කළ සාකච්ඡාවේ ප්‍රතිඵලයක් ලෙස අප රටවල් ත්‍රිත්වයට 1996 දී ලෝක කුසලානය පැවැත්වීමට හැකියාව ලැබුණා. ජග්මොහාන් දල්මියා මහතා සමග එම කාලපරිච්ජේදය තුළ සමීපව කටයුතු කරන්න මට හැකියාව ලැබුණා. සංවිධාන ශක්තිය අතින් ගත් කල, ජාත්‍යන්තර ක්‍රිකට් කවුන්සිලය එවකට ඉතාම කුඩා සංවිධානයක් වුණා. එම නිසා ක්‍රිකට් ලෝක කුසලානය එම කාලයේදී සංවිධානය කළේ ජාත්‍යන්තර ක්‍රිකට් කවුන්සිලය නොවේ. ඒ හේතුව නිසා අප PILCOM නමින් විශේෂ සංවිධානයක් ඇතිකරා සහ එහි කැඳවුම්කරු සහ ‍ලේකම් තනතුරට දල්මියා මහතා පත්කරනු ලැබුවා. කැඳවුම්කරු සහ ‍ලේකම් තනතුරට දල්මියා පත්කර ගත්විට ලෝක කුසලාන තරගාවලි කාලය තුළ ජාත්‍යන්තර ක්‍රිකට් කවුන්සිලයේ ප්‍රධාන විධායක නිලධාරී තනතුරේ නිල බලයෙන් කටයුතු කිරීමට ඔහුට අවස්ථාව ලැබෙනවා.

ඒ අනුව ඔහු ජාත්‍යන්තර ක්‍රිකට්  කවුන්සිලයේ කාර්ය භාර ප්‍රධාන විධායක නිලධාරී ලෙසට තරගාවලියට අදාළව විනිසුරුවන්ගේ, තරග තීරකයන්ගේ ප්‍රධානියා ලෙසද තරගාවලි නීති රෙගුලාසි සඳහාද  ප්‍රධානියා වුණා. එහි ප්‍රතිඵලයක් ලෙස ශ්‍රී ලංකාවේ ක්‍රිකට් ඉදිරියට ආවේ කියලා ඔබ සැමට මතක ඇති. කෙසේ නමුත් 1996 ජනවාරි 31 වන දින ඉතා අවාසනාවන්ත සිදුවීමකට ශ්‍රී ලංකාවට මුහුණදීමට සිදුවුණා. එදින අප රටේ මහ බැංකුවට බෝම්බ ප්‍රහාරයක් එල්ල වුණා. එනිසා මගේ රට තුළ ක්‍රිකට් ක්‍රීඩා කිරීම සඳහා ආරක්ෂිත නොවන තැනක් බවට ලොවටම හැඟී ගියා. ඒ හේතුව නිසා ඕස්ට්‍රේලියාව සහ බටහිර ඉන්දීය කොදෙව් කණ්ඩායම් 1996 ලෝක කුසලානය සඳහා අප රටේ සංචාරය කිරීම ප්‍රතික්ෂේප කිරීමටත් කටයුතු කළා. නමුත් සිම්බාබ්වේ, කෙන්යා ඇතුළු අනෙකුත් කණ්ඩායම් සිය සහයෝගය දක්වමින් ශ්‍රී ලංකාවේ සංචාරය කිරීමට කැමැත්ත පළකර සිටියා. නමුත් ජනවාරි 31 වන දින සිද්ධියෙන් පසුව එළඹෙන පෙබරවාරි 5 වන දින පැවැත්වීමට නියමිතව තිබූ තරගය සඳහා ආරක්ෂාව වැඩිදියුණු වී ඇත්ද යන්න ප්‍රශ්නාර්ථයක් වුණා. එහි ආරක්ෂක තත්ත්ව සනාථ කිරීමට සාක්ෂි තිබුණේ නැහැ. විනිසුරුවන්, තරග තීරකයන්, මාධ්‍යවේදීන් අනෙකුත් නිලධාරීන්ට කොළඹටයාමට සිදුව තිබුණා. ඒ පිළිබඳව එදා කල්කටාහි අප මේ දැන් සිටින ගොඩනැගිල්ල තුළ සාකච්ඡාවක් පැවැත් වුණා. එහිදී අප කරුණු දක්වමින් ආයාචනා කළා. එහිදී PILCOM ජාත්‍යන්තර ක්‍රිකට් කවුන්සිලයේ  සභාපති ඇතුළු සියලු දෙනා සිටියත් ආරක්ෂක තත්ත්වය මත එය ඉතා අසීරු කටයුත්තක් වුණා. නමුත් අපි වාසනාවන්ත වුණා අපගේ  PILCOM  හි කැඳවුම්කරු සහ ‍ලේකම් ජග්මොහාන් දල්මියා වන ඒ අසහාය සොඳුරු මිනිසා එම ලෝක කුසලාන තරගාවලිය භාරව සිටීම ගැන. එහිදී ජගු මහතා අප සමග තරගයන් පැවැත්වීම පිළිබඳ සාකච්ඡා කොට ඔහුගේ සුවිශේෂී ප්‍රමන්ත්‍රණ දක්ෂතා තුළින් අනෙකුත් සියලු පාර්ශ්වයන් අස්වසමින් ශ්‍රී ලංකාවේ ක්‍රීඩා තරග පැවැත්වීමට තීරණය කිරීමට මූලිකත්වය ගෙන කටයුතු කළා. ඒ අනුව අපගේ ආරක්ෂක තත්ත්වයේ යහපත් භාවය ප්‍රදර්ශනය කිරීම සඳහා ඉන්දියාව සහ පාකිස්තානය එක්ව ක්‍රීඩකයන් 11 දෙනකු අන්තර්ගත කරමින් ක්‍රිකට් තරගයක් ක්‍රීඩා කිරීමට තීරණය කළා. ඒ අනුව ඉන්දියාවේ අසාරුඩීන් සහ පාකිස්තානයේ වසීම් අක්‍රම් ඇතුළු දෙරටේ ක්‍රීඩකයින් 11 දෙනකු එක්ව තරගයක් ක්‍රීඩා කිරීමට කටයුතු කළා. ඔබ හිතන්න එම කාලයේදී පාකිස්තානය සහ ඉන්දියාව එක්ව එකට තරගයක් ක්‍රීඩා කිරීම කෙසේ වන්නට ඇත්ද කියා.

ඒ අනුව සෑම දෙයක්ම හොඳින් තීරණය කෙරුණා. ඒ අවස්ථාවේදී මට මතකයි ධර්මෙ මහතා එම සාකච්ඡා මේසයේදී ඇසුවා, සර් කවුද එම තරගයේ නායකත්වය දරන්නෙ? ඊට තවත් විනාඩි 10කට පමණ පසුව වසීම් මහතාත් ඇවිල්ල ඇහුවා, සර් කවුද නායකත්වය දරන්නේ කියලා... එහිදී අපිට අලුත් ප්‍රශ්නයක් පැන නැගුණා. එහිදී ජගු මහතා විනාඩි 5ක් පමණ සිට ඉන්ටිකාබ් අලාම් මහතා හට කතා කොට, මෙය ලෝක කුසලාන තරගාවලියක් පැවැත්වීමට යන මොහොතක්. වඩාත් වැදගත් වන දේ තමයි කණ්ඩායමේ නායකත්වය. ඉතින් කවුද ඔබ කණ්ඩායම භාරව ඉන්නේ. එවිට ඉන්ටිකාබ් මහතා මම තමයි භාරව ඉන්නේ යැයි පවසා සිටියා. එවිට ජගු මහතා වඩාත්ම වැදගත් වන්නේ කණ්ඩායමේ  කළමනාකරණයයි. ඒ නිසා ඔයා කණ්ඩායම කළමනාකරණය කරන්න ඉන්දියාව ඔබ යටතේ නායකත්වය දරනු ඇත කියා පවසා සිටියා. එවන් විශාල ප්‍රශ්නයක් එතරම් සුළු වේලාවකින් ඉතා දක්ෂ ලෙස විසඳීමට හැකිවීම අති විශාල දක්ෂතාවයක් ලෙස මා සලකනවා. ඊට පස්සේ අපිට දැන ගැනීමට ලැබුණා ඒ කාලය තුළ ක්‍රිකට් ලෝක කුසලානය සඳහා අනුග්‍රාහකයා ලෙස කටයුතු කළ WILLS  සමාගම හැර වෙනත් අනුග්‍රාහකයෙක් ලබා ගැනීමේ හැකියාවක් නොමැති බව. ඉතින් අපට පැය 48කට ආසන්න කාලයකින් තරගය පැවැත්වීමට නියමිතව තිබුණා. එහෙත් WILLS  සමාගම පැවැසුවා ඔබ හට මෙහෙම තරගයක් පැවැත්වීමට ගිවිසුම්ගතව අයිතියක් නැහැ, මොකක්ද මේ තරගය කියා? එවිට ජගු  මහතා පවසා සිටියා ඔව් මේ WILLS 11 තරගය කියා. WILLS  11 ආයතනයට එය ප්‍රහේළිකාවක් වුණා. එවිට ජගු මහතා පවසා සිටියේ, ඔව් පාකිස්තානය සහ ඉන්දියාව එක්ව එකම කමිසයක් යටතේ එකම කණ්ඩායමක ක්‍රීඩා කිරීමට ඔබට මින් මතු කෙදිනකවත් දක්නට නොලැබෙන දෙයක්. එය ඔබට ලැබෙන විශාල වාසියක්. ඉතින් එයින්ම WILLS ආයතනය මේ තරගය සඳහා එකඟ වුණා. ඒ අනුව එකම කණ්ඩායමක් වශයෙන් ඉන්දියානු සහ පාකිස්තාන ක්‍රීඩකයන් එකම කමිසයක් යටතේ තරග කිරීමටත්, ශ්‍රී ලංකාව සදා තනි නොකිරීමටත් ලබාදෙන සහයෝගය සඳහා පැවැත්වීමට නියමිත තරගයට සහභාගි වීමට කොළඹට පැමිණීම මුළු මහත් ලෝකයම දෑස් දල්වා බලා සිටියා. එම තරගය සාර්ථකව පැවැත් වුණා. ඒ හේතුවෙන් සිම්බාබ්වේ සහ බටහිර ඉන්දීය කොදෙව් කණ්ඩායම්ද ශ්‍රී ලංකාවේ සංචාරය සඳහා සිය කැමැත්ත පළකර සිටියා. ජගු මහතාගේ එම ගනුදෙනු කිරීමේ සහ සාකච්ඡා කිරීමේ, නම්මවා ගැනීමේ ශෙලීන් සැබවින්ම කලාවක්. ජගු මහතා ඒ සඳහා උපන් හපනෙක්.
ඉන් පසුව අප 1996 ලෝක කුසලානය දිනා ගනු ලැබුවා. ඉන් පසු අපි එංගලන්තයට ගියා. ඉන්පසු අපගේ ශ්‍රේෂ්ඨ ක්‍රීඩක මුත්තයියා මුරලිදරන්ගේ පන්දු දැමීමේ විලාශය සැක කරමින් විශාල ප්‍රශ්නයක් ඕස්ට්‍රේලියාවේදී ඇතිකරනු ලැබුවා. ඊට පෙර පන්දුව පලුදු කිරීම ගැනද චෝදනා කළා. ඉතින් අපට වුවමනා වුණා මුරලිදරන්ගේ ගැටලුව පිළිබඳ විනිසුරුවන් තීරකයන් සහ සියලුදෙනාම සමග ඔහුගේ නිර්දෝෂී භාවය ඔප්පු කිරීමට. ඒ කා‍ලේ ඒ සම්බන්ධයෙන් වන සියලු දේ අප සොයා බැලුවා. ශබ්ද කෝෂයන් පිරික්සමින් බාහුවක දිග හැරුම් ආදී නොයෙකුත් දෑ පිළිබඳව අපට සොයා බැලීමට සිදුවුණා. මේ සියල්ල අතරතුර ජගු මහතා නිසා අපට පුළුවන් වුණා අපගේ ලෝක කුසලාන ක්‍රීඩකයන් නම් කරන්න. මේ වගේ බොහොම අරුත්බර ආදර්ශමත් කතා බොහොමයක් ජගු මහතා ගැන මට දැක්වීමට පුළුවන්. ඉන් මාස කිහිපයකට පසුව ඉතා වැදගත් සිද්ධියක් වුණා. ඒ වනවිට අප ආසියානු ක්‍රිකට් කවුන්සිලය නියෝජනය කරනවා. ජගු ඉන්දියානු ක්‍රිකට් පාලක මණ්ඩලයේ ‍ලේකම් විදිහට කටයුතු කළා. බින්ද්‍රා මහතා තමයි එවකට ඉන්දීය ක්‍රිකට් පාලක මණ්ඩලයේ සභාපති වශයෙන් කටයුතු කළේ. එවකට පැවැති අසාධාරණ, අසමානත්වයෙන් සැලකීම පිළිබඳව බොහෝ දෙනා කම්පිතව සිටියා. විවිධ ජාතීන්ට වෙනස් විදිහට සැලකීමට කටයුතු කර තිබුණා. ඒ වනවිට අප ඉන්දීය පාලක මණ්ඩලයේ සභාපතිතුමාගෙන් අසා සිටියා මේ සිදුවන අසාධාරණය සහ නොසැලකීම් පිළිබඳව ඇයි ඔබ හඬක් නොනගන්නේ කියලා. එවිට බින්ද්‍රා මහතා කියා සිටියා මම ‍නෙවෙයි එයට සරිලන පුද්ගලයා, ජගු තමයි ඒ සඳහා ජවය, ශක්තිය සහ නම්මවා ගැනීමේ හැකියාව තිබෙන ඒ සඳහා ඔබින පුද්ගල චරිතය, ඔහුගේ මූලිකත්වයෙන් අපගේද සහාය ඇතිව අපි මෙය කරමු කියා පවසා සිටියා. ඒ අනුව අප සියලුදෙනා ඒකමතිකව ජගු මහතා ජාත්‍යන්තර ක්‍රිකට් පාලක මණ්ඩලයේ සභාපති තනතුර සඳහා 1996 වසර සඳහා නාමයෝජනා කරනු ලැබුවා. අප මේ සඳහා සියලු දෙනාගේම සහාය ගත්තා. අවසාන ප්‍රතිඵලය වූයේ 23 ට 17ක් ලෙස ජගු එම නිලවරණය දිනනු ලැබුවා. එහෙත් අප හට ජාත්‍යන්තර ක්‍රිකට් කවුන්සිලයෙන් ලිපියක් ලබා දෙමින්, ජගු නිලවරණය ජයගත්තත් සභාපතිත්වය දැරිය නොහැකි බවට දන්වා තිබුණා. ඕනෑම ප්‍රජාතාන්ත්‍රික නිලවරණයකදී වැඩි ඡන්ද සංඛ්‍යාවක් ලබා ගත් තැනැත්තා සභාපති තනතුරට පත්වෙන බව අප දන්වා සිටියත්, නෑ නෑ එසේ විය නොහැකියි. නීති තියෙනවා. ක්‍රිකට් කවුන්සිලයේ නිශේධ බලය ඇත්තේ ඕස්ට්‍රේලියාවටයි යනාදී ලෙස දක්වමින් එය ප්‍රතික්ෂේප කළා. ඒ අනුව 1996දී ජගු ජාත්‍යන්තර ක්‍රිකට් කවුන්සිලයේ නිලවරණය දිනනු ලැබුවත්, ඔහුට එහි සභාපති විය නොහැකි වුණා. ඒ අනුව අප 1996දී මැ‍ලේසියාවට ගොස් එහිදී ජාත්‍යන්තර ක්‍රිකට් කවුන්සිලය ලියාපදිංචි කරනු ලැබුවා. එමගින් සියලු පූර්ණ සාමාජිකයන් සඳහා සම අයිතිවාසිකම් ලැබෙන ව්‍යවස්ථාවක් ඇතිකරනු ලැබුවා. කවුන්සිලයේ 75ක හිමිකාරීත්වය පූර්ණ සාමාජිකයන්ටද 25 ඉතිරි අයිතිය අනෙකුත් සාමාජිකයන් හටද පිරිනමනු ලැබුවා. ඉන්පසුව පමණයි අප හට සම අයිතිවාසිකම්  හා මාරුවෙන් මාරුවට නියෝජිතත්වය දැරීමට හැකියාව ලැබුණේ. ඒ අනුව සියලුම අනෙකුත් සාමාජිකයන් හට අවස්ථාව ලැබුණා පූර්ණ සාමාජිකයන් හට හිමි අයිතිවාසිකම් සමව දැරීමට. ඉන්පසුව 1997 ජගු නැවත ජාත්‍යන්තර ක්‍රිකට් කවුන්සිලයේ සභාපතිත්වයට නාම යෝජනා භාර දුන්නා. එවිට ජගු හා තරග කිරීමට පවා කිසිවකු ඉදිරිපත් වූයේ නැහැ. එතරම්ම ජගුගේ ජයග්‍රහණය ගැන සියලු දෙනා දැන සිටියා. ඒ අනුව ජගු මහතා 1997දී සංස්ථාගත ජාත්‍යන්තර ක්‍රිකට් කවුන්සිලයේ ප්‍රථම සභාපතිවරයා ලෙස තේරී පත්වුණා.
අද වන විට අනෙකුත් ආසියානු සභාපතිවරුන්ටත්, ජාත්‍යන්තර ක්‍රිකට් කවුන්සිලයේ සභාපතිවීමේ දොරටු විවර වී තිබෙනවා. එදා දල්මියා මහතා ඒ පුටුවට නොගියා නම් මට විශ්වාසයෙන් කියන්න පුළුවන් අද වනවිට ලෝක ක්‍රිකට් ක්‍රීඩාව මේ තරම් දියුණු තත්ත්වයකට පත් නොවන බව. ඒ අනුව ජගු මහතාට ගෞරවයක් වශයෙන් ඒ මහතාගේ සේවයට ගෞරවයක් වශයෙන් අපට ඉගෙන ගන්න විශාල පාඩමක් තිබෙනවා. ඒ තමයි අප සියලුදෙනාම එක්සත්ව සහ එකමුතුව ‍පොදු අරමුණක් වෙනුවෙන් කටයුතු කළොත් අපිට අනිවාර්යයෙන්ම සාර්ථක ප්‍රතිඵල ලැබෙන බව. අන් කවරදාටවත් වඩා මේ එකමුතුතාව, එක්සත්කම අවශ්‍ය මොහොතේ බෙංගාලි ක්‍රිකට් සංගමය අද කළ මේ දේ ඉතිහාස ගතවේවි කියලා මා හිතනවා.

ජග්මොහාන් දල්මියා අනුස්මරණ දේශනය පවත්වමින් ශ්‍රී ලංකා ක්‍රිකට් සභාපති තිලංග සුමතිපාල කියයි

ගීත් ගුණසේකර - ඉන්දියාවේ කල්කටා නුවර සිට

ඔහු මධ්‍යම පළාතේ වාණිජ බැංකුවක කළමණාකරුවෙකි.  ඔහුගේ වයස අවුරුදු 45 ක් පමණ වේ. ක්‍රිස්තියානි පියෙකුට දාව බෞද්ධ මවකගේ කුසින් උපන් ඔහු අධ්‍යාපනය ලබා ඇත්තේ කන්ද උඩරට සුප්‍රකට කිතුණු පාසලකය. මව අනුව යමින් බෞද්ධ වත් පිළිවෙත් කෙරෙහි මහත් ඇල්මක් දැක්වූ ඔහු ඉන් පසුව බුදු දහම පිළිබඳ පොත පත කියවීමට ද යොමු වී ඇත. මේ වන විට විවාහක දෙදරු පියෙකු වන ඔහු ඉතා යහපත් සමාජ ආර්ථික පසුබිමකින් යුත් අයෙකි. ඔහුගේ බිරිඳද රජයේ උසස් තනතුරක් හොබවන්නියකි. සාමාන්‍ය ජීවිතයේ දී ඉතා ප්‍රසන්න ඇවතුම් පැවතුම් සහිත ඔහු තම බැංකුවට ගණුදෙනු කරුවන් ළංකර ගැනීමට රුසියෙකි.

එසේ තමන් හමුවට එන ධනවත් ව්‍යාපාරිකයන්ට ජීවිතය, සමාජය, ලෝකය ගැන විවිධ පාඩම් කියා දෙන මෙම බැංකු කළමණාකරු ඉන්පසුව ජීවිතයේ අනිත්‍ය බව, සංසාරය ආදිය පිළිබඳවද ඔවුනට  නොයෙකුත් ධර්ම කරුණු කියා දෙයි. ඔහුගේ මෙම කරුණු පහදාදීමේ හැකියාව කොතෙක්ද යත් කිසිදු ස්වාමීන් වහන්සේ  නමකටවත් ඔහු තරම් හොඳින් දම් දෙසිය නොහැකි බව පවසන්නෝද හිඟ නොවෙති. මෙසේ තමන් ලත් බුදු දහම පිළිබඳ දැනුමෙන් ජීවිතයේ අනිත්‍ය බව, සංසාරය සහ නිර්වාණය පිළිබඳව දහම් කරුණු ඉදිරිපත් කරන ඔහු තමන්ට අතිශය සමීප වූවන්ට මෙබඳු දහමක් දෙසයි.

"දැනට අපි බුදු දහම කියලා හඳුන්වන දේ පිරිසිදු බුදු දහම නොවේ. පිරිසිදු බුදු දහම පොත පතින් වත්, කවුරුන් කියන දේකින් වත් ඉගෙන ගන්න බැහැ. ඒක ඉබේටම ප්‍රඥාවට නතුවෙන්න ඕන දෙයක්. මීළඟට බුදු වෙන මෛත්‍රී බුදුහාමුදුරුවො ගැන බණ පොත් වල තිබෙන කාරණා පට්ටපල් බොරු. නමුත් මුළු බෞද්ධ සමාජයම ඒවයින් මුලා වෙලා තියෙන්නේ. වැඩි දෙනෙකුට නොකියනව නම් මම ඒ ගැන වැදගත් රහසක් කියන්නම්."

බැංකු කළමණාකරු තම ගණුදෙනු කරුවන් අතරින් තමන්ට වඩාත් සමීපතම වූවන්ට එසේ කියා මෙලෙස ද කියයි.

 "මම තමයි මෛත්‍රී බුදුහාමුදුරුවො හැටියට ඊළඟට ‍ලෝකෙට පහළ වෙන්න ඉන්නෙ. නමුත් මේ කථාවට වැඩි ප්‍රසිද්ධියක් දෙන්න එපා. කවුරුවත් ඒක විශ්වාස කරන එකක් නැහැ."

 කෙසේ හෝ තමන් හමුවට පැමිණි ධනවත් ව්‍යාපාරිකයක් කිහිප දෙනෙකුට ඔහු හෙළි කළ මෙම විස්මිත රහස එම ව්‍යාපාරිකයන් අතරේ මුනුමුනුවක් සේ ශීඝ්‍රයෙන් පැතිරෙන්නට විය. අවසානයේ එම බැංකු කළමණාකරු ලවාම ඒ සම්බන්ධයෙන් වැඩි විස්තර දැන ගැනීමට එම ව්‍යාපාරික කිහිපදෙනෙකුට අවශ්‍ය විය. එනිසා තම හිතමිතුරු පවුල් වල පිරිසක් එක්ව මහනුවරට නොදුරු මහවැලි ගඟ ආසන්නයේ තිබූ සංචාරක නිකේතනයක ඔවුහු මෙම 'මතු බුදුවන බෝසතාණන්' ගේ දෙසුමක් සංවිධානය කළහ.

 එවිට ඊට එක්වූ ඔහු කියා සිටියේ මෙම දෙසුම සංවිධානය කරන ලද්දේ සාංසාරික වශයෙන් මෛත්‍රී බුදුන් වන තමන් හමුවේ මතු නිවන් දැකීමට පෙරුම්පුරා සිටින මහා භාග්‍යවන්තයින් පිරිසක් බවය. ඒ අනුව එම දෙසුම අවසානයේ ඔහු විසින් ඔවුනට 'නිල තල' ප්‍රදානයක් ද සිදුකරන ලදී.

 ඒ අතර සැරියුත් හිමියන් වශයෙන් එක් පුද්ගලයෙකු නම් කරන ලද අතර මුගලන් හිමියන් වශයෙන් තව පුද්ගලයෙකු නම් කරන ලදී. ඉන් පසුව සුදවුන් රජු, මහාමායා දේවිය, අනේ පිඬු සිටු තුමා, කොසොල් රජතුමා ආදී නිළ තල ද ඔහු විසින් පත් කරන ලද අතර ඊට අමතරව විශාකාව, සුජාතාව, මල්ලිකාව, ආදී වශයෙන් තවත් තනතුරු කිහිපයක් ඔහු විසින්ම ප්‍රදානය කරන ලදී.

ඉන්පසුව ඊළඟ මාසයේත් එම හෝටලයේම පෙරවරුවක මෙම දහම් හමුව පැවැත්වීමටත්; එය අවසානයේ එම දහම් හමුවට එක්වන පිරිස සඳහා නිර්මාංශ ආහාර වේලක් ලබා දීමටත්; එසේ ඔහු වෙතින් නව තනතුරු ලත් ව්‍යාපාරිකයන් කිහිප දෙනෙක් ඉදිරිපත් වූහ. ඒ අනුව දෙවන දහම් හමුවේ දී ඊට තවත් ව්‍යාපාරිකයන් කිහිපදෙනෙකු එක් වූ අතර ඔවුහු මෙම දහම් හමුව දැඩිව විවේචනය කරන්නට වූහ. ඒ මෙය මුළුමනින් බෞද්ධ විරෝධී ක්‍රියාවක් බව පවසමිනි.  එවිට එසේ 'මතු බුදු වන බෝසතාණන්' එසේ විවේචනය කළ පිරිස දේවදත්ත, චිංචිමානවිකාව, සච්චක බමුණා ලෙස නම් කරමින් ඔවුන් ඒ දහම් හමුවෙන් පිටමං කරන ලද්දේ තම අනුගාමිකයන්ගේ සාධුකාර හඬ මධ්‍යයේය.

කෙසේ හෝ ඉන්පසු සෑම මාසයකම පෙරවරුවේ මෙම දහම් හමුව පැවැති අතර ඒ සඳහා මූල්‍ය අනුග්‍රහය ලබා දීමට ඔහුගේ මීළඟ බුදු සසුනේ තනතුරු ලත් ව්‍යාපාරිකයින් කිහිප දෙනෙක් ඉදිරිපත් වූහ.

මෙම බැංකු කළමණාකරුගේ අනුගාමිකයන් අතරින් ප්‍රමුඛතම සාමාජිකයෙකුගේ නැන්දනිය මිය යන ලද්දේ ඔය අතරය. ඉන් පසු එහි හත් දවසේ මතක බණ සඳහා මෙම පිරිස සමඟ එම 'මතු බුදු වන බෝසතාණන්' ද සහභාගී විය. එදින එම දම් දෙසුම පැවැත් වූ හිමි නම මෛත්‍රී බුදුන් ගේ පහළ වීම පිළිබඳව යමක් කීමට සූදානම් වූවා පමණි; බණ අසන පිරිසේ සිටි 'බෝසතානෝ' හනික අසුනෙන් නැගී සිටියහ.

"අනේ හාමුදුරුවනේ; පින් සින්ද වෙයි ඔය පට්ට පල් බොරු නවත්ත ගන්න; මෙතන ඉන්න කිසිම කෙනෙක් ඒවා විශ්වාස කරන්නේ නැහැ."

ඔහු කෑ ගසන්නට විය.

නමුත් ‍එම මිය ගිය කාන්තාවගේ පවුලේ ඥාතීන් සහ සෙසු ඥාති මිත්‍රාදීන් මෙම 'බෝසතාණන්' පිළිබඳ නොදැන සිටීම නිසා ඔහු එම පිරිසෙන් ගුටි නොකා බේරුණේ අනූ නමයෙනි.

එසේම මෙම කලහය අතරට පැමිණි 'බෝසතාණන්ගේ' බිරිඳ මෙසේ කීවාය.

"මගේ මහත්තයා හැම අතින්ම හොඳ කෙනෙක්; නමුත් මෙයා හිතාගෙන ඉන්නේ එයා මතු බුදු වන මෛත්‍රී බෝධි සත්වයෝ කියලා. මෙයා ඉන්න හැටියට ඒක අහන සමහරු ඒක පිළිගන්නවා. නමුත් අපිට නම් තේරෙනවා මෙයාගේ මොකක් හරි මානසික විකෘතියක් කියලා. කොහොමත් අපි වුණත් එයාගේ මතයට විරුද්ධ වෙච්ච හැටිය එයා පුදුම විදිහට කේන්ති ගන්නවා."

බිරිඳගේ එම ප්‍රකාශය හමුවේ ඔහු කියා සිටියේ තම බිරිඳ සාංසාරික වශයෙන් තමන්ට සතුරුව ක්‍රියා කරන්නියක බවත් තමන් බුද්ධත්වයට පත්වූ පසුද ඇය තමන්ට සතුරුකම් කරන බවත්ය.

ඒ කෙසේ හෝ මේ පුද්ගලයාට වැළඳී ඇත්තේ 'අභිමාන මෝහය' (Grandiose Delusion) නම් මානසික රෝගය බවත් එම රෝගය වැළඳුණු අය හට සාමාන්‍ය ජීවිතයේ සෙසු කටයුතු වල දී ‍එය බල නොපාන බවත් එහි පැමිණ සිටි ඒ පිළිබඳව තතු දත් අයෙකු පහදා දුන් අතර ඔහු වැඩිදුටත් කියා සිටියේ මෙම පුද්ගලයන් මෙසේ  තමන් එල්බ ගත් වැරදි විශ්වාසය පදනම් කර ගත් කරුණේ දී පමණක් අතිශය සංවේදී වන බවත් කෝප වන බවත් ය. ඒ කෙසේ හෝ මනෝ වෛද්‍යවරයෙකු හමුවී කලක් ප්‍රතිකාර ගතහොත් ඔහුගේ මෙම මානසික විකෘති තාවය දුරු වෙතැයි ඇතැමුන් පැවසුවද ඒ සඳහා ඔහුගේ අනුගාමිකයන් මේ දක්වා ඔහුට කිසිදු අවසරයක් දී නැත. ඊට හේතුව ඔහුගේ එම මානසික රෝගය සුව වුවහොත් ඔහු පවසන ඊළඟ බුදු සසුනේ තමන්ට හිමි තනතුරු අහිමි වන නිසාද විය හැක.

 

තිලක් සේනාසිංහ

වත්මන් ශ්‍රී ලාංකීය ජන සමාජයේ දික්කසාද වීම් සහ පවුල් අර්බුද පැන නැගීම සම්බන්ධයෙන් කලා කරුවන්, ක්‍රීඩකයන් ඇතුළු ජනප්‍රිය පුද්ගලයන් ද සෘජුවම වගකිවයුතු බව පේරාදෙණීය විශ්වවිද්‍යාලීය සමාජ විද්‍යා අධ්‍යනාංශයේ මහාචාර්ය දයා අමරසේකර මහතා පවසයි.

මේ ඒ සම්බන්ධයෙන් ඔහු වෙතින් කළ වැඩිදුර කරුණු විමසීමකි;

  • අපේ රටේ දික්කසාද ඇතුළු පවුල් අර්බුද වැඩිවීම කෙරෙහි කලා කරුවන් ඇතුළු ජනප්‍රිය පුද්ගලයන් සහ මාධ්‍ය වගකිවයුතු වන්නේ කෙසේද?

මේකට හැම ජනප්‍රිය පුද්ගලයෙක්ම, හැම මාධ්‍යක්ම එකසේ වගකිවයුතු නැහැ; නමුත් ඔවුන්ගෙන් වැඩි පිරිසක් තමන්ගේ ජනප්‍රියත්වය තහවුරු කරගැනීම සඳහා කරන ක්‍රියාවන් සහ ඒවා මාධ්‍යය මගින් පතුරුවා හැරීම මේ තත්ත්වයට ඉවහල් වන බව පැහැදිළිවම පෙනෙනවා.

  • ඒ තත්ත්වය වඩාත් විස්තර කළොත්?

 ලෝකය පුරාම කලා කරුවන් ඇතුළු ජනප්‍රිය පුද්ගලයන්ගේ පෞද්ගලික තොරතුරු දැන ගැනීම කෙරෙහි සාමාන්‍ය ජනතාව තුළ විශාල උනන්දුවක් තිබෙනවා. ඒ කලා කරුවන් කෙරෙහි සමහරුන් දක්වන්නේ අසීමිත භක්ත්‍යාදරයක්. ඒ අනුව ඔවුන්ගේ ජීවන පැවැත්ම, ජීවන චර්යාවන් අගය කිරීමට සේම ඒවා අනුකරණය කිරීමට ද ජීවිත පරිඥාණය අඩු රසිකයන් කටයුතු කරනාවා. නමුත් කලා කරුවන් ඇතුළු බොහෝ ජනප්‍රිය පුද්ගලයන් මාධ්‍ය මගින් ජනතාව අතරට පත්කරන්නේ තමන්ගේ ජීවිත පිළිබඳ සැබෑ අභ්‍යන්තරික තත්ත්වය නොවේ.

  • මොකක්ද ඒකට ‍හේතුව?

කලා කරුවන් ඇතුළු ජනප්‍රිය පුද්ගලයන් කියන්නේත් මේ සමාජ ප්‍රපංචයේම එක්තරා පැතිකඩක්. ඔවුන් සමාන්‍ය ජනතාවගෙන් ව්‍යුක්ත ඊට වඩා වෙනස් ජීවන රටාවක පසුවෙනවා ය කීම මිථ්‍යාවක්. නමුත් බොහෝ කලා කරුවන් තමන්ගේ පවුල් ජීවිත සම්බන්ධයෙන් කරනු ලබන විස්තර පුහු ආටෝපයෙන් සහ අතිශෝක්තියෙන් පිරුණු ඒවා බව ඒ කරුණු කෙරෙහි විමසිල්ලෙන් බලන විට පෙනී යනවා.  කොටින්ම ඔවුන් සමහරවිට තම ‍පවුල් ජීවිත සම්බන්ධයෙන් කියන්නේ පට්ටපල් බොරු.

  • ඔවුන් එසේ වංක ලෙස කටයුතු කරන්නේ ඇයි?

ඒක වංක බවකටත් වඩා වර්තමානයේ පවතින ජනප්‍රිය සංස්කෘතියේ දුර්දාන්ත ලක්ෂණයක් ලෙස හැඳින්වීමයි නිවැරදි. මෙහිදී ඔවුන් තමන්ගේ ජීවිත වල යථාර්තය සඟවා තමන්ගේ ජීවිතය හා සම්බන්ධ කරුණු ව්‍යාජ, ආටෝපකාරී ලෙසින්  ඉදිරිපත් කරන්නේ තමන් පිළිබඳ අලෙවි ප්‍රවර්ධනයට හෙවත් තමන්ව මාකට් කරගැනීම සඳහායි. වර්තමාන අධිපරිභෝජන සමාජයේ මේ 'මාකටින්' කියන දෙය ප්‍රධාන පුරුෂාර්ථයක් වශයෙන් සැලකෙනවා. ඒ නිසා එම ක්‍ෂේත්‍රවල පැවැත්ම සඳහා තමන්ව මාකට් කර ගැනීමත් ජනප්‍රිය සංස්කෘතිය තුළ වැදගත් අවශ්‍යතාවයක් ලෙස හඳුන්වන්නට පුළුවන්.

  • ඒ විදිහට ව්‍යාජ ප්‍රකාශ කිරීම තුළින් රසිකයන්ට සිදුවන අයහපත් බලපෑම කුමක්ද?

බොහෝ රසිකයන් ඒ ජනප්‍රිය පුද්ගලයන්ගේ ප්‍රකාශ හා තමන්ගේ ජීවිත සංසන්දනය කිරීමට පෙළඹෙනවා. කිසියම් ජනප්‍රිය කාන්තාවක් ඇගේ සැමියා පිළිබඳව කරන අසීමාන්තික පුහු වර්ණනාව දකින ජීවිත පරිඥාණයෙන් තොර කාන්තාවක් ඒ කලා කාරිය කියන 'කල්පිත සැමියා' සහ තම සැමියා සංසන්දනය කිරීමට පෙළඹිය හැකියි. බොහෝ විට ඒ ව්‍යාජ තොරතුරුවලට රැවටෙන ඇයට ඒ කලා කරුවාගේ සැමියා දෙවියෙකු ලෙසත්; තමන්ගේ සැමියා රාස්සයෙකු ලෙසත් පෙනී යා හැකියි. නමුත් එහි ඇති ඇත්ත තත්ත්වය නම් තමන්ගේ සැමියා රාස්සයෙක් නම් ඒ කලාකරියගේ සැමියා පරාස්සයෙකු බව ඇය මාධ්‍යයට හෙළි නොකිරීමයි. ඇතැම්විට ඒ කලා කාරිය ගෘහස්ථ ප්‍රචණ්ඩත්වයට ලක්වන කඳුළින් පිරි ජීවිතයක් ගතකරන තැනැත්තියක විය හැකියි. මෙසේ තමන්ට ජීවිතයේ අහිමි තත්ත්වයන් පිළිබඳව සත්‍ය සඟවා ඒ සම්බන්ධ ව්‍යාජ තොරතුරු පුන පුනා ප්‍රකාශ කිරීම මනෝ විද්‍යාවේ අධිහානිපූරණය (Overcompensation) නමින් හැඳින්වෙනවා.

නමුත් මේ කටුක යතාර්ථය තේරුම් නොගන්නා සාමාන්‍ය රසිකයන් එම ව්‍යාජ ප්‍රකාශ මත පදනම්ව තම ජීවිත වල්මත් කර ගැනීම බොහෝ විට දක්නට ලැබෙනවා.

  • සාමාන්‍ය අයගේ යුග ජීවිත වලට වඩා කලා කරුවන් ඇතුළු ජනප්‍රිය පුද්ගලයන්ගේ යුග ජීවිත අවුල් සහගත බවක් සමහරුන් කියනවා.

සරල ග්‍රාමීය සමාජ ක්‍රමයක දී යුග ජීවිතයකට එළඹිය හැකි ගැටළු අර්බුද වලට වඩා සංකීර්ණ නාගරික සමාජ ක්‍රමයක  යුග ජීවිතයක ඇතිවන ගැටළු අර්බුද බහුලයි. විශේෂයෙන් කලා කරුවන් ඇතුළු ජනප්‍රිය පුද්ගලයන් අතිශය සමාජශීලී වීම  ජනප්‍රියත්වය මත පදනම් කර ගනිමින් ඔවුන්ට ඇති සමාජමය ඉල්ලුම ආදිය නිසා යුගදිවියක් පවත්වාගෙන යාමේදී ඔවුන්ට මුහුණ දෙන්නට සිදුවන ගැටළු අභියෝග බහුලයි. ඒ සඳහා මනා සිහිබුද්ධියෙන් කටයුතු නොකිරීම මත ඔවුන්ගේ විවාහ බිඳී යාමේ වැඩි නැඹුරුවක් තිබෙනවා. මෙය එක් එක් ආකාර වලින් ලොවටම පොදු තත්ත්වයක්.

  • නමුත් දික්කසාද වන කලා කරුවන් නැවත විවාහ වීමේදීත් පෝරුවේ චාරිත්‍ර පවා අනුගමනය කරනු අපට මාධ්‍ය මගින් දැක ගන්නට පුළුවන්.

ඒක අතිශයින් නරක තත්ත්වයක්; විවාහ වී දරුවන් පවා සිටින මව්වරු පියවරු නැවත සාම්ප්‍රදායික විවාහ මංගලෝත්සවයක වැදගත්ම අංගයක් වන පෝරුව පවා යොදා ගනිමින් විවාහ වීම මතුපිටින් හාස්යෝත්පාදක කරුණක්. නමුත් ඔවුන් පිළිබඳ භක්ත්‍යාදරයෙක් පසුවන රසිකයන් ඒ කලා කරුවන්ගේ එවැනි ක්‍රියාත් ඇගයීමකට ලක් කීරීමටත් ඒවා සාධාරණය කිරීමටත් ඇතැම් විට ඒවා අනුකරණය කිරීමටත් පෙළඹෙන්න පුළුවන්. මේක සමාජ අපගමනයට නිසැකලෙසම තුඩු දෙන කරුණක්.

විශේෂයෙන් කලා කරුවන් තම දෙවන තුන්වන විවාහ මෙලෙස ආටෝපකාරී අයුරින් ඉදිරිපත් කිරීමෙන් විවාහය සම්බන්ධව ඇති ගෞරවනීය ආකල්පය අප ජන සමාජයෙන් තුරන් වී යන්නට පුළුවන්. එය සමාජයට ඉතා අහිතකර තත්ත්වයක්.

  • සමහර කලා කරුවන් තමන්ගේ විසිපස්වන විවාහ සංවත්සර ආදියත් මංගල්‍යයක ස්වරූපයෙන්ම සමරන අවස්ථාවන් අපි මාධ්‍ය මගින් දකිනවා.

ඕනෑම කෙනෙකුට තමන්ගේ විවාහ සැමරුම ඕනෑම ආකාරයකට සිදුකර ගත හැකියි. නමුත් බොහෝ කලා කරුවන් මේවා කරන්නේ තමන්ගේ විවාහක බැඳීම මුල්කරගත් අවංක අභිලාශයකට වඩා ඒ තුළිනුත් තමන් පිළිබඳ අලෙවි ප්‍රවර්ධනයක් ඇතිකර ගැනීමේ බලාපොරොත්තුවෙන්. ඒ වගේම ගැටළු අර්බුද බහුල විවාහ ගත කළ පුද්ගලයන් පවා තමන්ගේ විවාහ ජීවිතයේ සාර්ථකත්වය ‍සමූජය හමුවට ව්‍යාජ ලෙස ඉදිරිපත් කිරීම පිණිසත් මෙවැනි ආටෝපකාරී උත්සව ගන්නා බව අපට පෙනෙනවා.

  • නමුත් එමගින් සමාජය සිදුවන අයහපත කුමක්ද?

වයස්ගත පිරිමින් මනමාලයන් ලෙසත්, ඔවුන්ගේ බිරියන් මනමාලියන් ලෙසත් බොළඳ රංගනයක යෙදීම තුළින් ඔවුන් වැඩිහිටි බවේදී හිමිකරගත යුතු ගෞරවයට, ගාම්භීරත්වයට බරපතල හානි සිදුකරගන්නවා. ඒ නිසා තමන්ගේ පෞද්ගලික ජීවිතයේ ගැටළු අර්බුද සමාජයෙන් වසන්කර ගැනීමට හෝ තමන් සම්බන්ධයෙන් අලෙවිප්‍රවර්ධනයක් ඇති කර ගැනීමට හෝ ඔවුන් එසේ කටයුතු කිරීම යෝග්‍ය නොවන බවයි මගේ වැටහීම.

අනෙක දූ දරුවන් දීග තළ දෙන වයස්වල සිටින වැඩිහිටි මාපියන් මනමාලයන්, මනමාලියන් සේ හැසිරීම ඒ දූ දරුවන්ගේ වයස්වල හිමි උරුමයන් පවා අයථාලෙස උදුරාගැනීමක් ලෙසයි මා දකින්නේ.  

 

දමයන්ති ගමගේ

 

‘ෆේස්බුක්’ කියන්නේ නම කියූ මණින් අද උපන් දරුවාගේ සිට සිහිකල්පනාවක් ඇති මහල්ලා දක්වාම දන්නා දෙයක්. කිසිදු සීමා මායිමක් නොමැතිව ලොව පුරා (ඇතැම් රටවල තහනම් වුවත්) විහිදී පවතින සමාජ ජාලයක්. අදින් අවුරුදු 13 කට පෙර එනම් 2004 පෙබරවාරි 4 වැනිදා මාර්ක් සකර්බර්ග්, එඩුවාඩෝ සැවරින්, ඇන්ඩෲ මැකොලම්, ඩසටින් මොස්කොවිට්ස් සහ ක‍්‍රිස් හග්ස් යන අය එකතු වී ආරම්භ කළ මෙහි වර්තමාන ප‍්‍රධානියා වන්නේ මාර්ක් සකර්බර්ග්. සාමාන්‍ය පරිශීලකයන් තමන්ගේ අන්තර්ජාල දත්ත වියදම් කරමින් මෙය භාවිත කරන අතරේ 2016 වසර වන විට ෆේස්බුක් සමාගම එ් පරිශීලකයන් බිලියන 2 හරහා ලබා ඇති ආදායම ඇමෙරිකානු ඩොලර් බිලියන 27,638ක් වෙනවා. මේ අතරින් ශුද්ධ ආදායම ඇමෙරිකානු ඩොලර් බිලියන 10,217ක් වෙනවා. 2017 ජුනි 30 වැනිදා වෙද්දී මෙහි සේවය කළ සේවකයන්ගේ සංඛ්‍යාව 20,658ක්. ඉන්ස්ට‍්‍රග‍්‍රැම්, මෙසෙන්ජර්, වටස්ඇප්, ඔකුලස් වී.ආර් යන එ්වා මෙහි උප සමාගම් විදියට හඳුන්වා දෙන්නට පුළුවන්. ඇමෙරිකා එක්සත් ජනපදයේ කැලිෆෝර්නියා ප‍්‍රාන්තයේ මෙන්ලෝ උද්‍යානයේ මූලස්ථානය පිහිටුවා ඇති ෆේස්බුක් ආයතනය ගැන මේ සඳහන් කළ තොරතුරු බොහෝ දෙනෙක් දන්නා එ්වා වන්නට ඇති ඉඩකඩ බොහොමයි. නමුත් බොහෝ දෙනෙක් දන්නේ නැති බවට ඉඩ කඩක් ඇති තොරතුරු ද තිබෙනවා. මේ කියන්න යන්නේ එ් වගේ විස්තර ටිකක්. 

 
ෆේස්බුක් එකේ මුල්ම මුහුණ 
 
ෆේස්බුක් කියන එක කෙළින්ම සිංහලයට හැරෙව්වොත් කියවෙන්නේ ‘මුුහුණුපොත’ කියලා. තවත් අය ‘වත පොත’ වගේ නම් දාගෙන ඉන්නවා. කොහොම වුණත් මෙහි සාමාජික වෙන සෑම කෙනෙකුටම තමන්ගේ මුහුණේ පැහැදිලි පින්තූරයක් මෙයට දැමීමේ අවස්ථාව තිබෙනවා. මේ විදියට මුලින්ම මුහුණක් දාපු කෙනා තමයි ‘අල් පැසිනෝ’ කියන්නේ. ඔහු ඇමෙරිකානු රංගන ශිල්පියෙක්. නමුත් එ් පින්තූරය දැම්මේ ඔහු නෙවෙයි. එ්ක කළේ ෆේස්බුක් සමාගමින්මයි.
 
ෆේස්බුක් නිල් පාට ඇයි? 
ෆේස්බුක් එකේ ආරම්භකයා වගේම වර්තමාන ප‍්‍රධානියා වන මාර්ක් සකර්බර්ග් වර්ණ අන්ධතාවයෙන් පෙළෙන්නෙක්. ඔහුට රතු - කොළ කියන වර්ණ හොදින් පෙනෙන්නේ නැහැ. මේ නිසා ඔහුට හො`දින් පැහැදිලිව පෙනෙන නිල්, මෙහි මූලික වර්ණය ලෙස යොදාගෙන තිබෙනවා. එ් වගේම විශ්වාසය සහ සුරක්ෂිතභාවය නිරූපණය කරන්නට ලොව පුරා භාවිත වන වර්ණයක් තමයි නිල් කියන්නේ. මේ නිසා මාර්ක් සකර්බර්ගේ වර්ණ අන්ධතාවය පැත්තකින් තිබ්බත් මේ පාට ෆේස්බුක් එකේ මූලධර්ම එක්ක හොදින් ගැළපෙනවා.
 
ෆේස්බුක් ලාංඡනය 
 
මේ ලාංඡනය නිර්මාණය කළේ මාර්ක් සකර්බර්ගේ මිතුරකු වගේම මෙහි ආරම්භයට දායාක වුණු ඇන්ඩෲ මැකලම්.
 
‘ලයික්’ බොත්තම 
 
ෆේස්බුක් හි කවුරුන් හෝ දමන ලද දෙයකට අපගේ කැමැත්ත පළ කරන්නේ ‘ලයික්’ (Like) බොත්තමෙන්. කොහොම වුණත් ෆේස්බුක් හි මෘදුකාංග ඉංජිනේරුවකු වූ ඇන්ඩෲ බොස්වර්ත් මෙය මුලින්ම නිර්මාණය කළේ වෙනත් නමිකින්. එය හ`දුන්වනු ලැබුණේ ‘ ඕසම්’ (Awesome) නමින්. අනෙක් මෘදුකාංග ඉංජිනේරුවන් ද මෙයට මහත් කැමැත්තක් පළ කළා. නමුත් 2007 වසරේ දී මාර්ක් සක්ර්බර්ග් එය නිෂේධ කරමින් ‘ලයික්’ බොත්තම හඳුන්වා දුන්නා. අද එය ෆේස්බුක් පරිශීලකයන් මහත් කැමැත්තකින් භාවිත කළත්, එදා මාර්ක් ගත්තු තීරණය ගැන ෆේස්බුක් ආයතනයේ බොහෝ දෙනෙක් එ් තරම් කැමැත්තක් දැක්වූයේ නැති බව ඇන්ඩෲ බොස්වර්ත් පවසනවා.
 
ෆේස්බුක් දත්ත ප‍්‍රමාණය 
 
ෆේස්බුක් වෙබ් අඩවියට හැම මොහොතකම එකතු වන පින්තූර, වීඩියෝ ආදියේ ප‍්‍රමාණය මෙතෙකැයි කියා කියන්න බැහැ. එ් සියල්ල ෆේස්බුක් ආයතනයේ දත්ත සේවා පරිගණකවල තැන්පත් වෙනවා. මේ වන විට මේ පරිගණකවල තැන්පත්ව ඇති පරිශීලක දත්ත ප‍්‍රමාණය ‘පෙටාබයිට්’ 300ක් පමණ වෙනවා. පෙටාබයිට් එකක් කියන්නේ ගිගාබයිට් මිලියන 1ක ප‍්‍රමාණයක්. ලෝකයේ භාවිත වන භාෂාවන්ගෙන් වගේම පැරණි, අභාවිත භාෂාවන් පවා මෙහි අඩංගුව පවතිනවා. මේ නිසා සමස්ත මිනිස් වර්ගයාගේ විශාලතම ලේඛන එකතුව ෆේස්බුක් ලෙසත් ඇතැමුන් හඳුන්වනවා. 
 
ෆේස්බුක් වර්ධනය 
 
සෑම මිනිත්තු 15කටම වරකත් ෆේස්බුක් සමග එකතු වන පරිශීලක සංඛ්‍යාව 7,246ක් පමණ වන බව ගණන් බලා තිබෙනවා. 
 
පෝස්ට් දමන්න හොඳම වෙලාව 
 
ෆේස්බුක් භාවිත කරන ඔබට එයට පෝස්ට් එකක් දමන්න වෙලාවක් කලාවක අවශ්‍ය නැති බව ඇත්ත. නමුත් ෆේස්බුක් ආයතනයම කියන විදියට එ්ක එහෙම නෙවෙයි. ඔවුන් පවසන්නේ රෑ 10ත් 11ත් අතර කාලයේ දමන පෝස්ට්වලට 88% ක වැඩි අවධානයක් ලැබෙන බවයි. එ් වගේම ප‍්‍රශ්නාර්ථයකින් අවසන් වන පෝස්ට්වලට 162% ක වැඩි අවධානයක් ලැබෙන බවත් ඔවුන් සොයාගෙන තිබෙනවා.
 
වැඩියෙන්ම බෙදාහදා ගැනීම් 
 
ෆේස්බුක් වෙබ් අඩවියේ වැඩියෙන්ම හුවමාරු වෙන්නේ මොනවාද? පින්තූර කියා බොහෝ දෙනෙක් හිතුවොත් ඇත්තටම එ්ක එහෙම නෙවෙයි. වැඩියෙන්ම හුවමාරු වෙන්නේ වීඩියෝ. එ් වගේම 2014 වසරේ දී පමණක් ෆේස්බුක් පරිශීලකයන් දිනකට වීඩියෝ බිලියන 1 කට වඩා නරඹා තිබෙනවා. වර්තමානයේ එම ප‍්‍රමාණය දිනකට බිලියන 4කටත් වඩා වැඩියි.
 
සකර්බර්ගේ බොරුව 
 
ෆේස්බුක් නිර්මාණය කළ මාර්ක් සකර්බර්ගේ විස්තර තියෙන තැන සඳහන් වෙන්නේ ඔහු හාවර්ඞ් සරසවියේ පරිගණක විද්‍යාව හදාරා උපාධියක් ලබා ගත් ශිෂ්‍යයකු බවයි. නමුත් එ්ක බොරු කතාවක්. ඇත්තටම ඔහු එයින් උපාධියක් ගත්තේ නැහැ. ෆේස්බුක් ආයතනයේ වැඩකටයුතු අධික වීම නිසා ඔහුට එයින් ඉවත් වන්නට සිදු වුණා.
 
ෆේස්බුක් හොරකම් 
 
ෆේස්බුක් නිසා සොරකමකට ලක් වූවන්ගේ සංඛ්‍යාව බොහොමයි. බොහෝ දෙනෙක් තමන් එ් මොහොතේ සිටිනා ස්ථානය දක්වා ‘ස්ටේටස්’ යාවත්කාලීන කරන්නට පුරුදුව සිටිනවා. මෙයින් ප‍්‍රයෝජනය ගන්නා සොරු එම පුද්ගලයන්ගේ නිවාස කොල්ල කනවා. ලොව පුරා මංකොල්ලකරුවන්ගෙන් 80%ක්ම ෆේස්බුක් ස්ටේටස් පරීක්ෂා කරන බව සොයා ගෙන තිබෙනවා.
 
ෆේස්බුක් අපරාධ 
 
ලොව වටා සිදුවන අපරාධවලින් 40%ක්ම ෆේස්බුක් සමග සම්බන්ධයක් ඇති බවට සොයාගෙන තිබෙනවා. ෆේස්බුක් නිසා හ`දුනාගත් පුද්ගලයන් අතින් මිය යන සංඛ්‍යාව ද දිනෙන් දින වැඩි වන බවට වාර්තා ලැබෙනවා. මිනිසුන් ඝාතනය කිරීමේ මානසික උන්මාදයකින් පසුවන්නන් එ් සඳහා ගොදුරු සොයාගැනීමේ ඉල්ලමක් ලෙස ෆේස්බුක් භාවිතා කරනවා.
 
තහනම් රටවල් 
 
ඇතැම් රටවල් ස්ථිර ලෙසත්, ඇතැම් රටවල් තාවකාලික ලෙසත් ෆේස්බුක් තහනම් කොට තිබෙනවා. චීනය, ඉරානය, උතුරු කොරියාව ආදිය ස්ථිර ලෙසම ෆේස්බුක් තහනම් කොට තිබෙනවා. ඊට අමතරව බංග්ලාදේශය, ඊජිප්තුව, ජර්මනිය, ඉන්දියාව, මැලේසියායාව ආදී තවත් රටවල් ගණනාවක් වරින් වර තාවකාලිකව ෆේස්බුක් තහනම් කොට තිබෙනවා.
 
නිරංජන් චාමින්ද කරුණාතිලක

හැංගි මුත්තම් සෙල්ලමක් අතරදී වයස අවුරුදු 10 ක වන පාසල් සිසුවියක දුෂණය කළ බව කියන 16 හැවිරිදි පාසල් සිසුවෙකු අත්අඩංගුවට ගෙන ඇති බව හලාවත පොලීසිය කියයි.

අතවරයට පත්ව ඇති දැරිය සහ සැකකරු අසල්වැසියන් බව ද පොලීසිය කියයි. සිද්ධිය වූ දින දැරිය, සැකකරු සහ තවත් දරුවන් කීප දෙනෙකු හැංගි මුත්තන් සෙල්ලම් කර ඇත. එසේ සෙල්ලම් කරමින් සිටින අතර තුර දැරිය ඇදක් යට සැගවී තිබේ. එම අවස්ථාවේදී සැකකරු විසින් ඇඳ යටට විත් දැරියට අතවර කර ඇති බව මූලික විමර්ශණ වලදී හෙලිවී ඇත.

නමුත් ඒ බව ඇය මුලදී කිසිවෙකුටත් පවසා නැත.

මේ අතර දැරිය අධ්‍යාපන ලබන පාසලේම වෙනත් සිසුවියක්ද පසුගිය දිනක අතවරයට ලක්ව ඇත. ඒ සම්බන්ධයෙන් සැකකරුවෙකු හලාවත පොලීසිය විසින් අත්අඩංගුවට ගෙන අධිකරණයට ඉදිරිපත් කිරීමෙන් අනතුරුව රක්ෂිත බන්ධනාගාර ගත කර තිබේ.

එම සිද්ධිය දැන ගෙන ඇති දැරිය තමන්ට ද සිදුව ඇත්තේ මෙවන් සිද්ධියක් බව වටහා ගෙන එම අතවරය සම්බන්ධයෙන් පාසලේ ගුරුවරියක් දැනුවත් කර තිබේ. එම ගුරුවරිය දැරියගේ මව්පියන් කැදවා මේ බව දැනුම් දීමට කටයුතු කර ඇත. ඒ අතර සිද්ධිය දැන ගෙන ඇති දැරියගේ ඥාතියෙකු මේ බව ජාතික ළමා ආරක්ෂණ අධිකාරියට දැනුම් දීමට කටයුතු කර තිබේ.

ජාතික ළමා ආරක්ෂණ අධිකාරිය විසින් කරන ලද දැනුම් දීමක් මත සිදු කරන ලද විමර්ශණයකින් අනතුරුව සැකකරු පොලීසිය විසින් අත්අඩංගුවට ගෙන ඇත.

පොලීසිය විසින් මෙසේ අත්අඩංගුවට ගෙන ඇත්තේ හලාවත - මුගුණුවටවන, මාලිගාවත්ත ප්‍රදේශයේ පදිංචි අයෙකි.

මේ අතර, හලාවත පොලීසියේ නිලධාරීන් පිරිසක් පසුගියදා මුගුණුවටවන - මාලිගාවත්ත ප්‍රදේශයේදී නීති විරෝධී ලෙස මත් පැන් තොගයක් ත්‍රිරෝද රථයකින් ප්‍රවාහනය කරමින් සිටි අයෙකු අත්අඩංගුවට ගෙන තිබේ. එම අවස්ථාවේදී එහි සිටි කීප දෙනෙකු පොලිස් නිලධාරීන් විසින් පරීක්ෂා කර ඇත. පාසල් දැරියට අතවර කිරීම සම්බන්ධයෙන් අත්අඩංගුවට ගෙන ඇති පාසල් සිසුවාද ඒ අතර සිට තිබේ.

තමාව පරීක්ෂා කළ පොලිස් නිලධාරියා  තමන් ඇඳ සිටි සරම කඩා දැමූ බව පවසමින් සැකකාර සිසුවා පාසල් යාම ප්‍රතික්ෂ්ප කර ඇත. නමුත් පොලිස් නිලධාරියෙකු සැකකාර සිසුවාගේ සරම කඩා දමා නොමැති බවත්, සිසුවා පාසල් යාම ප්‍රතික්ෂේප කර ඇත්තේ දැරියට අතවර කිරීමේ සිද්ධියෙන් පසුව බවත් විමර්ශණ වලදී අනාවරණය වී ඇති බව හලාවත පොලීසියේ නිලධාරියෙක් පැවසීය.

අතවරයට පත්ව ඇති දැරිය වෛද්‍ය පරීක්ෂණයක් සදහා හලාවත මහ රෝහලට ඇතුළත් කර ඇත.

සැකකාර සිසුවා හලාවත දිසා අධිකරණයට ඉදිරිපත් කිරීමට නියමිතය.

ජුඩ් සමන්ත

IMAGE

මගේ ගීත ගායනා කරන්න එපා වික්ටර්ගෙන් පුතුන්ට නියෝගයක්

IMAGE 2017 Dec 17 11:32
නව පරපුරේ සංගීතවේදියකු වන ඉරාජ් වීරරත්න මීට මාස කිහිපයකට පෙර නිර්මාණය කළ දැණුනා නම්වූ...
Views - 54

රුපියල් දහසේ නෝට්ටු මවන භූතයෙක්

IMAGE 2017 Dec 17 10:13
නිවෙස්වලට කඩාවැදී ගෙහිමියන්ට වින පමුණුවන භූතයන් ගැන අපි කොතෙකුත් අසා ඇත්තෙමු. එහෙත්,...
Views - 136

ෆේස්බුක් එකෙන් ඔබේ හිතේ ලෙඩ ගැනත් කියන්න පුළුවන්

IMAGE 2017 Dec 15 10:42
ඔබටත් ෆේස්බුක් ගිණුමක් තිබෙනවාද? එසේ ගිණුමක් තිබෙනවා නම් ඔබ ඒ සඳහා දවසකට; සතියකට හෝ මාසයකට පැය...
Views - 2013

සුද්දන්ට උණවටුන එපා කරවන ඩිස්කෝ ඩාන්ස්

IMAGE 2017 Dec 14 07:56
ආචාර්ය ආතර් සී. ක්ලාක් විද්වතා පවසන ආකාරයට උණවටුන වෙරළ තීරය ලෝකයේ ඇති දර්ශනීය වෙරළ දොළහෙන්...
Views - 3435

ගැබිණි නිලධාරිනිය අධ්‍යක්ෂක හා 'හනිමූන්' ගිහින්

IMAGE 2017 Dec 13 10:33
ඔහු මෙරට ප්‍රමුඛතම සමාගමක අධ්‍යක්ෂ වරයෙකි. වයස අවුරුදු 40 ක් පමණ වන ඔහු දරු දෙදෙනෙකුගේ පියෙක්...
Views - 9282

2017 විශ්ව රූ රැජින ඩෙමී සහ අපේ ක‍්‍රිස්ටියානා

IMAGE 2017 Dec 13 10:17
ලෝක රූ රැජින තේරීමේ තරගයේ උණුසුම පහව යෑමටත් පෙර තවත් සුරූපිනියක් විශ්ව රූ රැජින ලෙස  කිරුළ...
Views - 4830

Please publish modules in offcanvas position.