Home    |    Daily Lakbima    |    Sunday Lakbima    |   Rajina |    Archive    |    Advertise With Us    |     Careers Email - lakbimaonline@gmail.com youtube
lakbima.lk

                                                                                        එසැනින් පුවත් | ගොසිප් | විශේෂ පුවත් | සුන්දර ලක්බිම | ව්‍යාපාරික පුවත්     

“ගමනක් බිමනක් යාම සඳහා උදයේ නිවසින් පිටවන විට මුලින්ම නෙත ගැටෙන පුද්ගලයා සතා හෝ වස්තුව කෙරෙහි ඔබ කොතෙක් සංවේදීද? මම මේ පැනය සමාජයේ විවිධ තරාතිරම්වලට අයත් බොහෝ දෙනෙකුගෙන් වරින් වර අසා ඇත්තෙමි. එවිට උදයේ ගමනක් යන විට මුලින්ම හමුවන පුද්ගලයා සතා හෝ ද්‍රව්‍ය පිළිබඳව කිසිදු සංවේදීතාවයක් නොදක්වන බව පවසා සිටියේ ඉතා සුළු පිරිසකි. මගේ නිගමනය අනුව එය සියයට දහයකටත් අඩු ප්‍රතිශතයකි. 
සෙසු පිරිස එවන් පෙරමග නිමිති පිළිබඳව කිනම් හෝ සංවේදීතාවයක් කරන බව කී අතර එය කරුණු දෙකක් මත පදනම් වන බවක් පැහැදිලි විය. 
එනම් තමන් යන ගමනේ වැදගත්කම පුද්ගලයා සතා හෝ වස්තුවේ සුවිශේෂී බව නිදසුනක් ලෙස සම්මුඛ පරීක්ෂණයක්, විභාගයක් නඩු විභාගයක් මුදල් ගනුදෙනුවක් දේපළ මිලදී ගැනීමක් විවාහ කටයුත්තක් ආදී විශේෂිත කරුණුවලටද බොහෝ දෙනකු පෙරමග නිමිතිවල සම්බන්ධයක් සංවේදී වන බව මෙහිදී අනාවරණය විණි. මීට අමතරව ගමනේ දුර ප්‍රමාණය හා අවදානම අනුවද මෙම සංවේදීතාව ඉහළ නංවන අයුරක් නිරීක්ෂණය කළ හැකි විය. 
ඊට අමතරව මෙම පෙර මග නිමිත්ත වශයෙන් හඳුන්වාගත හැකි පුද්ගලයා සතා හෝ වස්තුවෙහි ඇති සුවිශේෂත්වය මතද සමහරුන් සංවේදී වන බව අනාවරණය විය. නිදසුනක් ලෙස කිසියම් ගමනක් යාමට මගට බසින විට ඉදිරියට අවමංගල්‍ය රථයක් හමුවීම අසුබ නිමිත්තක් සේ යමකුට හැඟී යා හැක. ආබාධ සහිත යාචකයකු ඉදිරියට මුණගැසීමද එවන් අසුබ සංඥාවක් සේ සැලකේ. 
මෙලෙස පෙරමග නිමිතිවලින් යන ගමනේ සුබ අසුබ නිශ්චය කළ හැකිය යන විශ්වාසය එක් රටකට සංස්කෘතියකට හෝ ජන සමාජයකට සීමා වූවක් නොවේ. කිසිදු ආගමකට අයත් නොවූවද ආගමික විශ්වාසයන්ගෙන් බැහැරව ලොව පුරා බොහෝ දෙනකු අදහනු ලබන මේවා සමාජ විද්‍යාවේදී හැඳින්වෙනුයේ අධි විශ්වාසය යනුවෙනි. මෙම අධි විශ්වාස ආගමික සංස්කෘතික පදනමක් තිබිය හැකි අතර එසේ නොවන ලොවටම ‍පොදු පෙරමග නිමිතිද තිබේ. 
රථයකින් ගමනක් යාම අරඹන විටම කළු බළලකු පාර හරහා පැනීම ඒකාන්ත වශයෙන්ම අසුබ පලයක් ගෙන දෙන බවට ලොව පුරා පැතිර යන අධි විශ්වාසයක් තිබේ. ඇතැම් ජන සමාජයන්හි මෙම විශ්වාසය කොතෙක් බරපතළ ලෙස මුල් බැස තිබේද යත් එලෙස පාර හරහා මාරු වන කළු බළලකු වාහනයකට හසු වුවහොත් එම වාහනය යළි භාවිතයට නොගෙන කීයකට හෝ විකුණා දමන්නෝද අප රටේද සිටිති. 
එක් එක් ජන සමාජයන්හි පෙරමග නිමිතිවල සුබ අසුබ බව තීරණය කෙරෙන ආකාරයන්ද එකිනෙකට වෙනස්ය. එමෙන්ම ඇතැම් විට ඒවා ආර්ථික බවින්ද තොරය. පැරණි භාරතීය පෙරමග නිමිත ශාස්ත්‍රයට අනුව පෙරමග හමුවන ශ්‍රමිකයා අසුබ නිමිත්තකි. ගණිකාව සුබ නිමිත්තකි. ඒ කෙසේ හෝ පෙරඅපර දෙදිග පෙරමග නිමිති ශාස්ත්‍රයන් හි ඇති විෂමතාවයන් සේම පෙරදිග පෙරමග නිමිති ශාස්ත්‍රය තුළද මෙවන් නොයෙකුත් විෂමතා සහ පරස්පරතා දක්නට ලැබේ. 
බල පෙරමග නිමිති සුබ නැකතටත් වැඩි කෝට්ටේ යුගයේ තොටගමුවේ ශ්‍රී රාහුල හිමිපාණන් විසින් රචනා කරන ලද සැලලිහිණි සංදේශ කාව්‍යයේ එන එම කවිපදය අදටත් අප ජන සමාජයේ මුවින් මුව නිරතුරුවම රැව් පිලිරැව් දෙන්නකි. එහිදී කතුවරයා සංදේශ කාරක සැලලිහිණියාට උපදෙස් දෙනුයේ නැකත් බැලීමටත් වඩා පෙරමග නිමිති බැලීමට උත්සුක වන ලෙසය. එවක තත්ත්වය එසේ වුවද නුතන සමාජය නැකත් බැලීමට දක්වන උනන්දුව පෙරමග නිමිත කෙරෙහි නොදක්වන බව නම් අතිශයින් පැහැදිලිය. මක් නිසාද යත් රාජ රාජමහා මාත්‍යවරුන්ගේ සිට සාමාන්‍ය ජනතාව දක්වා අද ‍ජ්‍යොතිෂයට වහ වැටී හිඳින බැවිනි. පෙර දිග හින්දු ආභාෂයෙන් අපට හිමිව ඇති නැකත් සේම පෙරමග නිමිති ආදිය කෙරෙහි විශ්වාසය තැබිම මූලික බුදුදහමට ඉඳුරාම පටහැනිය. එහෙත් මහනුවර යුගයේ රජ කළ කීර්ති ශ්‍රී රාජසිංහ රාජ්‍ය කාලයේ සිට එතුමන්ගේ මනාපය පරිදි මෙවන් අන්‍යාගමික විශ්වාස බුදු දහම පදනම් කරගනිමින් අප විසින්ම තනාගත් 'බුද්ධාගමට' බරපතළ ලෙස ඇතුළු වී තිබේ. එහෙත් මෙබඳු විශ්වාස දරන්නවුන් උපාසක චණ්ඩාලයන් උපාසක දීනයන් ලෙස බුදුන් වහන්සේ විසින් හඳුන්වා ඇති අන්දම අංගුත්තර නිකායේ පංචම නිපාතයේ් එන උපාසක චණ්ඩාල සූත්‍රය කියැවීමෙන් මනාව වටහා ගත හැක. 
දැන් අපි මේ සියලු පෙරමග නිමිති නියෝජනය වන පරිදි කළු බළල් පෙරමග නිමිත්ත වෙත නැවත යොමු වෙමු. 
ගමනක් යන පෙරමගට පළමුව කළු බළලකු පිවිසිය හොත් විපතක් සිදු වන්නේය යන කරුණෙහි සම්භාවිතාවක් තිබේ. එහෙත් එය සැබැවින්ම අර්ථකථනය කළ යුත්තේ එපරිද්දෙන් නොවේ. ගමනක් යන පෙරමගට කළුබළලකු පිවිසීම මගතොට විපත් වලින් අත්මිදීමට හේතුවක් නොවන බව සනාථ කරවීමෙනි. මෙය වඩාත් පැහැදිලි ලෙස මෙලෙස දැක්විය හැක. 
 
1. පෙරමගට කළු බළලකු පිවිස  මඟතොට විපතක් සිදුවීම 
2. පෙරමගට කළු බළලකු පිවිස මගතොට විපතක් සිදු නොවීම 
3. පෙරමගට කළු බළලකු නොපිවිස මගතොට විපතක් සිදුවීම. 
 
පසු සිදුවීම පෙර සිදුවීමේ  ප්‍රතිඵලයක්ය යන්න මිථ්‍යා තර්කයකි. ඒ අනුව බොහෝ විට මෙම කළු බළල් මග පෙර නිමිත්ත විමසා බැලෙනුයේ රිය අනතුරක් වැනි මගතොට විපතක් මුල් කොට ආපසු කරුණු විමසා බැලීමේදී එවන් අනතුරක් හෝ මගතොට විපතක් මුල් කොට යළි කරුණු විමසීමේදී ඇතැම් විට  ඒ කරුණු අතර තිබි කළු බළල් සාධකයක් හමුවීමට පුලුවන. එවිට ඒ අනතුර, විපත, පිළිබඳව කතා කරන සැම විටෙකම ඒ කළු බළල් සාධකයද ඉදිරිපත් වීම නිසා එම මිථ්‍යා තර්කය සමාජය පුරා ශීඝ්‍රයෙන් පැතිර යයි. නමුදු එසේ කවර හෝ වැදගත් ගමනක් යන විටෙක කළුබළලකු පෙරමග හමුවී එම ගමන නිරුපද්‍රිතව සාර්ථක ලෙස අවසන් කළ හැකි වුවහොත් ඉහත සඳහන් කළු බළල් සාධකයද නිරායාසයෙන්ම යටපත් වනු ඇත. එවිට කිසිවෙක් ඒ පිළිබඳව කතා නොකරති. 
ඒ අනුව මෙම පෙරමග නිමිති සම්බන්ධයෙන් කීමට ඇත්තේ එම නිමිති මුල් කොට ප්‍රතිඵලය විමසීමක් නොව ප්‍රතිඵලය මුල් කොට එම පෙරමග නිමිත විමසීමක් පමණක් බව කිව යුතුය. එය මුලුමනින්ම අවිද්‍යාත්මක පර්යේෂණ ක්‍රමවේදයකි. ඒ කෙසේ හෝ පෙරමග නිමිති ඇතුළු මෙවන් ගුප්ත විශ්වාස දැඩිව සිත දරා හිඳින්නවුන් යථාර්ථවාදී ලෙස සිතන්නවුන්ට වඩා මානසික කම්පන ගැටුම් අර්බුදවලට මුහුණ දෙන බව ලොව පුරා සිදු කරනු ලැබු විවිධ සමීක්ෂණවලින් අනාවරණය වී තිබේ. ඒ අනුව මෙම කළු බළල් පෙරමග නිමිත්තක් දැක තමන්ට කිනම් හෝ අනතුරක් සිදුවේය යන විශ්වාසයේ දැඩිව එල්බගැනීම මත හදිසි අවස්ථාවකදී ආත්ම විශ්වාසය ගිලිහී ගොස් අනතුරකට මං පාදන්නක් වීමටද බැරි කමක් නැත. එවිට සිදුවනුයේ ඒ හේතුව නිසාම එම කළු බළල් වැනි පෙරමග නිමිති මිථ්‍යාවන් සමාජය පුරා තවදුරටත් පැතිර යාම පමණි. 
 
තිලක් සේනාසිංහ 

බ්‍රිතාන්‍යයේ කිරුළ හිමි විලියම් කුමරුගේත්, කේට් මිඩ්ල්ටන් කුමරියගේත් වැඩිමල් පුතු වන ජෝර්ජ් කුමරු කේන්ද්‍ර කරගෙන මේ වනවිට යම් ආන්දෝලනයක් හටගෙන තිබේ. එයට පසුබිම් වූයේ ඔහු අයිසිස් සංවිධානයේ ඉලක්කයක් බවට පත්ව ඇති බව ඇඟවෙන ආකාරයේ පණිවුඩයක් සම්බන්ධයෙන් පැතිරුණු ආරංචියයි. තවමත් පස්වෙනි වියේ පසුවන ජෝර්ජ් කුමරු මේ ආකාරයෙන් සිය ඉලක්කයක් බවට පත්ව ඇති බව අයිසිස් සංවිධානය ඉඟි කර තිබූ බව පැවැසුණේ එක්තරා සමාජ මාධ්‍ය අඩවියක පළ කර තිබූ පණිවුඩයක ය. මෙම පණිවුඩයත් සමග ජෝර්ජ් කුමරු ඉගෙන ගන්නා පෞද්ගලික පාස‍ලේ ඡායාරූපයක්ද පළ කර තිබූ බව සඳහන් වෙයි. එම ඡායාරූපයත් සමග 'රාජකීයයන්ට පවා පාඩුවේ ඉන්න දෙන්නේ නැත' වැනි අදහසක් ගම්‍ය වන ආකාරයේ වැකියක්ද සඳහන් වී තිබේ. මෙම පණිවුඩය නිසා මේ වනවිට කිසියම් තැතිගැන්මක් හටගෙන තිබෙන්නේ ජෝර්ජ් කුමරුට ඔහුගේ පාසල තුළදී කිසියම් අනතුරක් කිරීමට අයිසිස් සංවිධානය පියවර ගනු ඇත්ද කියාය.
ජෝර්ජ් සිය පාසල් ගමන ආරම්භ කර දැන් වැඩි කාලයක් නැත. ඔහු පළමු වරට පාසල් ගියේ සැප්තැම්බර් මාසයේ 7 වෙනිදා ය. ලන්ඩනයෙ හි පිහිටි මෙම පාසල හැඳින්වෙන්නේ තෝමසස් බැටර්සි යන නමිනි. ඒ වනවිට ජෝර්ජ්ගේ මව වන මිඩ්ල්ටන් කුමරිය අසනීප තත්ත්වයෙන් පසු වූ නිසා විලියම් කුමරුට සිය පුතු පාසලට බාර දීමට යාමට සිදු වූයේ තනිවමය. (ජෝර්ජ් පාසල් යන්නේ එතරම් ආසාවකින් නොවන බවක් පසුගිය දිනෙක විලියම් සඳහන් කර තිබිණැයිද මාධ්‍ය වාර්තා කර තිබිණි.)
ජෝර්ජ් පාසලට ඇතුළත් වීමට ටික දිනකට පෙර එහි ආරක්ෂාව සම්බන්ධයෙන් තරමක ආන්දෝලනයක් ඇති කළ සිදුවීමක්ද විය. එක්තරා කාන්තාවක් පාසලට ඇතුළු වී එහි ඇතැම් ස්ථාන වීඩියෝගත කිරීමට පියවර ගෙන තිබූ අතර පසුව ඇය පවසා තිබුණේ තමාට කිසිවෙකුගෙන් අවහිරයක් සිදු නොවුණු බවයි. මෙයින් ඇය පෙන්වා දීමට පියවර ගත්තේ පාස‍ලේ ආරක්ෂක තත්ත්වයේ ඇති දුර්වලතාව ගැනය. තමාට අවශ්‍ය වී නම් බෝම්බයක් වුවද රැගෙන යාමට තිබුණු බව ඇය පවසා තිබූ බැව් සඳහන් විය.


තවත් අවස්ථාවක පාසලට අනවසරයෙන් ඇතුළු වීමට ගිය වෙනත් කාන්තාවක අත්අඩංගුවට ගැනීමක් ගැනද වාර්තා විය. ජෝර්ජ් මෙම පාසලට පැමිණීමට නියමිත බව දැනගත් ඒ ආසන්නයේ පදිංචිකරුවන් මෙන්ම පාස‍ලේ ඉගෙනුම ලබන සෙසු දරුවන්ගේ මව්පියන්ද ආරක්ෂාව සම්බන්ධයෙන් වැඩි සැලකිල්ලක් දක්වන්නට පටන් ගත් බව සඳහන් වෙයි. කෙසේ වෙතත් ජෝර්ජ් කුමරු පාසලට ඇතුළත් වීමෙන් පසු එයට සුවිශේෂී ආරක්ෂාවක් යොදන්නට පියවර ගෙන තිබේ.
අයිසිස් සංවිධානය ජෝර්ජ්ට අදාළව පළ කර ඇති පණිවුඩය සුළුවෙන් නොතැකිය යුතු බවට ඇතැම් ආරක්ෂක විශේෂඥයින් අදහස් දක්වා තිබෙනු දැකිය හැකි විය. ඒ පිළිබඳව විශේෂ අවධානයක් යොමු කළ යුතු බව ඔවුන්ගේ විශ්වාසය බව පෙනේ. මෙයට පෙර ද කිහිප වතාවකම බ්‍රිතාන්‍ය රජ පවු‍ලේ අය ඉලක්ක කර මෙවැනි තර්ජන ඉදිරිපත් වූ බව රහසක් නොවේ. ලෝක යුද්ධයේ 70 වෙනි සැමරුම පැවති 2015 වසරේ මහ රැජින සම්බන්ධයෙන්ද මෙවැනිම තර්ජනය කිරීමක් සිදු විය. ඉන්පසු හැරී කුමරුටද තමුන් සමග සටනට එන ලෙස අයිසිස් සංවිධානය අභියෝග කර තිබූ බැව් වාර්තා විය.
ජෝර්ජ් කුමරුට අදාළව අයිසිස් පණිවුඩය පළ වූ සමාජ මාධ්‍ය අඩවිය මේ වනවිට බ්‍රිතාන්‍ය බුද්ධි අංශවල විශේෂ පරීක්ෂාවට ලක්ව ඇති බව මාධ්‍ය වාර්තා කර තිබිණි. ඒ අයිසිස් සංවිධානයේ කටයුතු පිළිබඳ අවධානයෙන් පසුවීම සඳහාය. ඒ අතර ජෝර්ජ් වැනි කුඩා දරුවෙකු මේ ආකාරයෙන් ඉලක්ක කිරීම ගැන විශාල විරෝධයක් සමාජ මාධ්‍ය ඔස්සේ පළවෙමින් ඇති බවටද තොරතුරු වාර්තා විය.

ජෝර්ජ් කුමරු විලියම් සහ කේට් දෙපළගේ වැඩිමල් පුතු වන අතර ඔහුට චාලට් නමින් නැගණියකද සිටියි. ඇගේ වයස අවුරුදු 2 කි. මේ වනවිට කේට් මිඩ්ල්ටන් කුමරිය තුන්වෙනි දරු උපත සඳහාද සූදානම් වෙමින් සිටින අතර මෙවර ඇය නිවුන් දියණියන් දෙදෙනකු බිහි කිරීමට යන බවටද ආරංචි පළ වී තිබිණි. කේට් කුමරියට ජෝර්ජ් සමග පළමු දිනයේ පාසලට යාමට නොහැකි වූයේද ගැබිනි බව නිසා හටගත් අසනීප තත්ත්වය හේතුවෙනි.

කිත්සිරි මල්වත්ත

තරුණ තරුණියන්ගේ මනැස් විකෘති කොට ඔවුන් රංගනයට හා ලිංගික ක්‍රියා කෙරෙහි යොමු කරන නැටුම් පෙති (Dancing tablet) නමින් හැඳින්වෙන මත් ද්‍රව්‍යයක් රට පුරා ව්‍යාප්ත කිරීමේ දැවැන්ත ක්‍රියාන්විතයක් පිළිබඳ වාර්තා වේ.

රුපියල් කෝටි ප්‍රකෝටි ගණන් වැය කරමින් ජාත්‍යන්තර මත් ද්‍රව්‍ය ජාවාරම් කරුවන් සමඟ එක්ව දේශීය මත්ද්‍රව්‍ය ජාවාරම් කරුවන් මෙහෙයවන මෙම වැඩපිළිවෙළේ ප්‍රධාන අංගයක් වනුයේ අප්‍රකටව පවත්වන සාද වලදී මේවා තරුණ තරුණියන් අතට පත් කිරීමය.

මෙම සාද විශේෂය ‘පෙති පාටි‘ යනුවෙන්ද සමහරෙක් හඳුන්වති. මේ සම්බන්ධ ආසන්නතම සිදුවීම වාර්තාවනුයේ අනුරාධපුරයෙනි.

අනුරාධපුර නගරයේ පාසල්වල අධ්‍යාපනය ලබන වයස අවුරුදු 20 නොඉක්මවූ සිසු සිසුවියන් අතර මෙම පෙති වර්ගය ප්‍රචලිත කිරීමේ සාදයක් පසුගියදා අනුරාධපුර මල්වතු ඔය ආසන්නයේ පිහිටි වනගත ස්ථානයක පවත්වාගෙන යන නිවාඩු නිකේතනයක පවත්වා තිබේ.

මීට පෙර අනුරාධපුර යාපනය හන්දියේ ආසන්නයේ නිවාඩු නිකේතනයක පැවැති මෙවන් සාදයක් පිළිබඳව මාධ්‍යවලින් ප්‍රචාරය වීම නිසා මෙම  සාදය  ඉතා රහසිගතව පැවැත්වීමට සංවිධායකයන් කටයුතු කර තිබුණි.

පසුගිය මාස කිහිපයේම හෙරොයින් මත්පෙති හා වෙනත් මත්ද්‍රව්‍යවලට ඇබ්බැහි වී සිටින තරුණ තරුණියන් සිය ගණනක් මෙම වැඩසටහනට සහභාගී වූ බව අනාවරණය කළ අතර පසු මෙවර පැවැති මත් පෙති සාදය ‍පොලිස් බුද්ධි අංශවලට හා මාධ්‍යයට අනාවරණය නොවන අන්දමින් පැවැත්වීමට සංවිධායකයන් කටයුතු කර තිබුණි.

මත්පෙතිවලට පමණක් සීමා වූ මෙම සාදයට අනුරාධපුර නගරයේ පාසල්වල ඉගෙනුම ලබන සාමාන්‍ය පෙළ, උසස් පෙළ හා අමතර පන්ති සඳහා සහභාගිවන සිසුන් පනස්දෙනකුට ආසන්න පිරිසක් එක්ව සිටි බව වාර්තා විය. කිසිදු ඡායාරූපයක්, පටිගත කළ දර්ශන මුහුණු ‍පොතේ නොදමන ලෙසත් මාධ්‍යකරුවන්ට  මෙම සාදය ප්‍රවෘත්තියක් වීමට ඉඩ නොතබන ලෙසත් සාදය සංවිධානය කළ පිරිස ඊට සහභාගිවූවන්ට තරයේ අවවාද කර තිබුණු බව වාර්තා විය.

එම සාදය පිළිබඳව අනාවරණය කළ ලක්බිම මාධ්‍යවේදියාට තර්ජනය කිරීම සඳහා පසුගිය දිනක කිසියම් තරුණ කණ්ඩායමක්  ඔහුගේ නිවසටම පැමිණීමද විශේෂත්වයකි.

මේ අතර මීගමුව,සෙත්තප්පාඩුවේ හෝටලය ක  පසුගිය 22දා රාත්‍රිය පුරා පැවත්වූ අමුතුම මාදිලියේ සාදයක් පිළිබඳව මේ වන විට පසුගියදා විවෘත කළ මීගමුව,දුන්ගාල්පිටිය පොලීසියේ උකුසු ඇස යොමුවී ඇත.
ළාබාල තරුණ තරුණියන් 300කට ආසන්න ප්‍රමාණයක් සහභාගිවී ඇති මෙම සාදයේදී තරුණ තරුණියන් අධික ලෙස මත්ද්‍රව්‍ය භාවිතයට ගෙන ඇති අතර එහිදී ඔව්හු වීශේෂ මත්පෙති වර්ග භාවිතා කර ඇති බවට ද පොලිසියට තොරතුරු ලැබී ඇත.

මෙයද මෙම පෙති පාටියක් බවද තොරතුරු ලැබී තිබේ.

යුරෝපීය ජාතිකයකුගේන් අයථා ලෙස මුදල් ලබා ගැනීම නිසා ධනවතෙකුවූ මෙම හෝටලයේ අයිතිකරු මෙම ප්‍රදේශයේ තරුණ තරුණියන් අතරේ මෙම මත්පෙත්ත පැතිරවීමට කටයුතු කරන බව ප්‍රදේශවාසිහු කියති.

මේ අතර ජා ඇල උදම්මිට ප්‍රදේශයේ සංචාරක හෝටලයක පසුගියදා පැවැති මෙවන්  සුවිසල් සාදයක් සම්බන්ධයෙන් ගම්වාසීන්ගේ දැඩි විරෝධතාවය එල්ල විය.

බාහිරින් පැමිණි කණ්ඩායමක් විසින් සංවිධානය කර ඇති මෙම සාදය සඳහා තරුණ තරුණියෝ 1000ක් පමණ සහභාගී වී වුහ. ඒ අතර ගැබිණි තරුණ කාන්තාවෝද සිටියහ. මෙයද පෙති පාටියක් යැයි චෝදනා කළ ගම්වාසිහු හෝටලය වටලු අතර එය අවටදී තරුණ තරුණියන් කිහිප දෙනෙක් පහර කෑම්වලට ලක්ව ඇතැයි ද කියනු ලැබේ.

මේ සම්බන්ධයෙන් අපහා අදහස් දැක් වූ ප්‍රදේශවාසියෙකු කියා සිටියේ මීට සහභාගී වූවන්ගෙන් තරුණ තරුණයන්ගෙන් කිහිප දෙනෙක් හෝටල් භූමියෙන් පිට වාහන තුළ පවා අශෝබන ලෙසින් හැසිරිමෙන් සිටිනු දුටු නිසා ගම්මුන් මෙසේ කුපිත වී ඇති බවය.

කෙසේ හෝ ගම්වාසීන් පවසා ඇත්තේ සමාජ ජාල වෙබ් අඩවියක මිතුරු මිතුරියන් පිරිසක් සංවිධානය කළ මේ සඳහා දිවයිනේ විවිධ ප්‍රදේශ වලින් තරුණ පිරිස් සහභාගී වි සිටින බවය.

මිය ගිය ගායකයෙකුගේ ගායක පුතෙකු මෙම පෙති පාටියේ සංවිධායක වශයෙන් සිටි බව කියති.

තරුණ තරුණියන් මෙම මත් ද්‍රව්‍ය කෙරෙහි යොමු කරවන පෙති පාටි සංවිධානය කෙරෙනුයේ මත් ද්‍රව්‍ය ජාවාරම් කරුවන් වුවද එම තරුණ තරුණයන්ගේ සිත් දිනා ගැනීම සඳහා ජනප්‍රිය ප්‍රසිද්ධ පුද්ගලයන් ඒ සඳහා යොදා ගන්නා බවත් ඒ වෙනුවෙන් ඔවුන්ට විශාල වශයෙන් මුදල් ගෙවන බවත් දැන ගන්නට ඇත.

‍මේ අතර පසුගිය වසරේ ඔක්තෝබර් විසිනම වැනිදා ජාඇල සහ උණවටුන ප්‍රදේශවල වෙරළ සාද වශයෙන් මෙවන් පෙති පාටි දෙකක්ම සංවිධානය කර තිබුණි. එම සාද දෙක සඳහා විශාල තරුණ තරුණියෝ පිරිසක්‌ සහභාගි වුහ.  ඉන් ජාඇල වෙරළ සාදය සංවිධානය කර තිබුණේ ටෙලි නාට්‍ය  ක්‌ෂේත්‍රයට සම්බන්ධ කාන්තාවකි.

මැය ටෙලිනාට්‍ය කිහිපයක රඟපා ඇති අතර ඇය විවිධ වංචනික ක්‍රියාවන්ට සම්බන්ධ කාන්තාවක බවද කියනු ලැබේ.  

මේ අතර උනවටුනේ පැවැති පෙති පාටිය සංවිධානය කර ඇත්තේද එම ප්‍රදේශයේ කුප්‍රකට කාන්තාවකි. එයද පසුගිය දිපවාලි දිනයම යොදා ගැනිම සැලසුම් සහගතව සිදුවුවක් දැයි තොරතුරු අනාවරණය වී නැත.

 මෙම සාද වලට සහභාගි වූ තරුණ තරුණියන් දැන හැඳුනුම්කම් වලින් තොරව පවා ලිංගිකව හැසිරීම තරම කාම අධික වන අතර ඒ සාදය සඳහා විදේශිකයන්ද සහභාගී වු බව පැවසේ.

ජාඇල සහ උණවටුන ප්‍රදේශයන්හි පැවැත්වුණ වෙරළ සාද සම්බන්ධයෙන් වහා ක්‍රියාත්මවු සුරා බදු නිලධාරීහු වෙරළ සාද දෙකම වැටලුහ. එවිට එම සාද දෙකේදීම විවිධ වර්ගයේ මත්පැන් බෝතල් හාරසීයක්‌ පමණ සොයා ගැනීමට හැකිවිය.

එහෙත් මෙම මත්පැන් අලෙවිය එම සාදයේ මුලික සංකල්පය වන මත්පෙති ප්‍රචාරනයට අමතරව සිදුවන්නක් බවත් එම මත් පෙති පානය කරන කෙනෙකුට අවශ්‍ය නම් මත් පැන් පානය කිරීම සඳහාද එහි මත්පැන් සුදානම් කර තිබූ බවත් පැවසේ.

Club Drug, Rave drugs, Party Drugs or pill යනුවෙන් හඳුන්වන මෙම මත් පෙති ශ්‍රී ලංකාවට ගෙන ඒම සඳහා ඉන්දියානු සහ පාකිස්තානු මත්ද්‍රව්‍ය කල්ලි සමඟ මෙරට මත් ද්‍රව්‍ය ජාවරම් කරුවන් සෘජුව කටයුතු එක්ව කරන බව වාර්තා වේ. 

පසුගිය මාර්තුවේ කොළඹ ටෙක්නිල් හන්දියේදී පොලිස් අත්අඩංගුවට ගත් පුද්ගලයකු අත තිබූ පැකට්ටුවක් පරික්ෂා කිරීමේදී ඔහු සන්තකයේ තිබි මෙබදු මත්පෙති පැකැට්ටුවක් සොයා  ගැනිණ. එහි ග්‍රෑම් 12 යි මිලිග්‍රෑම් 300ක අධික මත් පෙති තිබිණ

 මෙම පෙත්ත භාවිත කිරීමේදී කුසගින්න, මහන්සිය හෝ නිදිමත නොදැනෙන අතර කිසිදු වෙහෙසක් නොදැනෙන බව ද කියති. මේ මත් ස්වභාවය පැය 24කට අධික කාලයක් පවති. ඒ නිසා ඒ කාලය තුළ කිසිදු ආහාරයක් නොගෙන ජලය පමණක් පානය කිරීමෙන් පමණක් කුස ගින්න නිවා ගත හැක. එමෙන්ම මෙම පෙත්ත ගත් විට කළහකාරි හැසිරීම් වාර්තා නොවන අතර නර්තනය ලිංගික සංසර්ගය වැනි කටයුතු වලට ඔවුන් තුළ විශේෂ උනන්දුවක් ඇති වෙයි.

එහි බිහිසුනුම තත්වය වනුයේ මේ පෙති භාවිතයත් සමඟ ලැජ්ජාව විළිබිය සහ ශිෂ්ටචාරය පිළිබඳ හැඟීම් ඔවුන්ගේ මනැස්වලින් පහව යාමය. එවිට තමන් ඉදිරියේ සිටින්නා කවරෙකු වුවද ඔහු හෝ ඇය හා ලිංගික හැසිරීමට එම පෙත්ත භාවිතා කළ තැනැත්තාට පුළුවන.

රාත්‍රී සමාජ ශාලා ආශ්‍රිතව මෙම පෙත්තක් රුපියල් 8000ක් තරම් මුදලකට අලෙවි කෙරෙන බව පැවසෙයි. එමෙන්ම රුපියල් 3500ක අවම මිලක් යටතේද මේවා අලෙවි කරන්නට ජාවාරම්කරුවෝ ක්‍රියා කරති.

මෙම පෙති පාටි වලදී ඒවා තරුණ තරුණියන් අතරට මුලින් පත්කරනුයේ ඉතා සුළු මුදලකටය. මෙහි ඇති වඩාත් බිහිසුණු තත්වය වනුයේ මෙම පෙති භාවිත කරන්නවුන් ඊට ඇබ්බැහි වීමත් ඉන් පසු එම පෙති භාවිතයෙන් තොරව ඔවුන්ට ජීවත් විය නොහැකි වීමත්ය. කෙසෙ හෝ දිගු කාලිනව මෙම පෙති භාවිතයෙන් ස්නායු රෝග රැසක් වැළදෙන අතර ස්නායු අකර්මන්‍යතා හේතුවෙන් ඔවුන් අකල් මරණවලට ලක් වන බවද අනාවරණය වෙයි.

එමෙන්ම මෙය හුදු ජාවාරමකටත් වඩා ශ්‍රී ලාංකීය ප්‍රධාන ජනවර්ගයේ අනාගත පරපුර වැනසීම පිණිස අන්‍යාගමික අන්‍ය සංස්කෘතික බලවේගයක් විසින් මෙහෙයවුනු ලබන සූක්ෂම ක්‍රියාදාමයක් බවද සමහරෙක් කියති.

පසුගියදා කොළඹදී අත්අඩංගුවට පත් මෙම මත්පෙති ජාවාරමේ නිරත වූ තැනැත්තා පීර් සයිබු වීදිය, කැඩිච්චවත්ත, කොළඹ 12 පදිංචි 28 හැවිරිදි තරුණයෙකු බව පොලීසිය කියයි.  විමර්ශනයේදී අනාවරණය වී ඇත්තේ මොහු මීගමුව ප්‍රදේශයේ පුද්ගලයකුගෙන් පෙති ලබාගෙන කොමිස් මත විකුණන බවය.

මේ වනවිට තරුණ තරුණියන් අතරට කෙමෙන් පත්වෙමින් ඇති ඩාන්සින් ටැබ්ලට් නොහොත් නැටුම් පෙත්ත මාළිගාවත්ත, කෙසෙල්වත්ත, වනාතමුල්ල, ඔබේසේකරපුර ඇතුළු අඩු ආදායම් ලාභි ප්‍රදේශවල ව්‍යාප්තව තිබෙන බව සඳහන් වේ.

එමෙන්ම මෙම පෙති පාටි මගින් මේවා මධ්‍යම පාන්තික තරුණ තරුණියන් අතර ව්‍යාප්ත කිරීමට මෙම ජාවාරම් කරුවන් මහත් වෙහෙසක් දරන අතර ඒ සඳහා ෆේස්බුක් වෙබ් අඩවිය යොදා ගන්නා බවද මේ වන විට අනාවරණවී තිබේ.

කෙසේ හෝ මෙම නැටුම් පෙත්ත සහ පෙති පාටි මැඩලීම පිණිස පොලීසිය විසින් මෙතෙක් විධිමත් වැඩපිළිවෙලක් යොදා නොමැති බව පැහැදිලිවම පෙනී යයි.

දමයන්ති ගමගේ

පසුබිම් වාර්තා - බුද්ධික මහේෂ් විජේසූරිය - අනුරාධපුරය, ප්‍රසංග පෙරේරා - ජා ඇළ

දේශීය රූපවාහිනී නාට්‍ය කලාවේ නිම් වළලු ප්‍රසාරණය කරමින්, ප්‍රථම ත්‍රිමාණ සජීවීකරණ ටෙලි නාට්‍යය වන 'භවත්‍රා' නිෂ්පාදනය කළ ඔහු දේශීය ප්‍රාසාංගික ටෙලි නාට්‍ය ඉතිහාසයේ මතෛක් වැඩිම සම්මාන සංඛ්‍යාවකින් පිදුම් ලද 'දඬුබස්නාමානය' මෙන්ම, 'වෙද හාමිනේ', 'සසල ඉම', 'ඔරු බැඳි සියඹලාව' වැනි සම්මානනීය ටෙලි නාට්‍ය රැසක් රූපවාහිනී ප්‍රේක්ෂකයන් වෙත තිළිණ කළේය. මෙයට අමතරව සම්මානනීය වෙළෙඳ දැන්වීම් 1000 කට අධික ප්‍රමාණයක් නිර්මාණය කළ ඔහු නමින් සුනිල් රත්නායකය. ඔහුගේ කලා දිවියේ 30 වස් සැමරුම් උළෙල මේ මස 10 වන දින කොළඹ බණ්ඩාරනායක ජාත්‍යන්තර සම්මන්ත්‍රණ ශාලාවේදී පැවැත්වේ.
 
'යශෝරාවය', 'දඬුබස්නාමානය' වැනි ජන ප්‍රසාදය දිනාගත් නිර්මාණ පුංචි තිරයට රැගෙන ආ ඔබ අද පවතින ටෙලි නාට්‍ය කලාව ගැන දක්වන්නේ මොන වගේ අදහසක්ද?
බුදුහාමුදුරුවොත් දේශනා කරලා තියෙනවානේ වෙනස් නොවන එකම දේ වෙනස්වීමයි කියලා. ඒ නිසා අපි වෙනස් විය යුතුයි. වෙනස් නොවන ජීවීන්, නැත්නම් අනුගත නොවන ජීවීන් අභාවයට යනවා කියලත් කියනවනේ. අපි හැමදාමත් යශෝරාවය නොබැලිය යුතුයි. යශෝරාවයම නොහැදිය යුතුයි. තව අලුත් දේවල් නිර්මාණය කළ යුතුයි. මේ ආකාරයට අලුතින් නිර්මාණය වුණු අංශයක් විදියට තමයි දැන් පවතින මෙගා නාට්‍ය කලාව මම දකින්නේ. මම කවදාවත් මෙගා රැල්ල නවත්තන්න කියන සටන්වලට ගිහින් නෑ. මෙගා කියන්නේ කාලීන සමාජ වුවමනාවක්. අනෙක් සෑම එකකම වාගේ මේකෙත් හොඳ නරක දෙකම තියෙනවා. මම ඒ ගැන දැන් කතා කරන්න යන්නේ නෑ. නමුත් සමාජය අද මේ නාට්‍ය පිළිගන්නා තත්ත්වයට ගොඩනැගිලා තියෙනවා. මේකයි මගේ අදහස. දැන් කරන්නේ මෙගා නාට්‍යම නම් මගේ අරමුණ සහ උත්සාහය වෙන්නේ ඒ අතරිනුත් හොඳම මෙගා නාට්‍ය නිර්මාණය කිරීමයි.
 
ඔබ ජයන්ත චන්ද්‍රසිරි වැනි එවකට තරුණ නිර්මාණකරුවන් රැසක් ටෙලි නාට්‍ය නිර්මාණකරණයට ගෙන එනවා. නිෂ්පාදකයෙක් විදියට මේ වගේ අවදානමක් ගැනීමට බයක් ඇතිවුණේ නැද්ද?
මුලින්ම කියන්න ඕනෑ මම ව්‍යවසායකයෙක් බව. ව්‍යවසායකයාගේ ස්වභාවය තමයි අවදානමක් ගැනීම. ඒ වගේ අවදානමක් ගැනීමේ ශක්තියක් නැතිනම් ඔහුට සාර්ථක ව්‍යවසායකයෙක් වෙන්නත් බැහැ. ඒ වගේම අවදානම මනා ලෙස කළමනාකරණය කරගැනීම සඳහා සාර්ථක වැඩපිළිවෙළක්ද ඔහු සතුව තිබිය යුතුමයි. මේ දෙකම මගේ ළඟ තියෙනවා. ඒක සාර්ථකව මෙහෙයවීමේ හැකියාව තියෙනවා කියලා මම තදින්ම විශ්වාස කරනවා. අනෙක් කාරණය තමයි, මට තෝරාගැනීම් සම්බන්ධයෙන් විශේෂ දක්ෂතාවක් වගේම දැනුමකුත් තියෙනවා. මම මුදල් තිබුණට නාට්‍ය නිෂ්පාදනයට යොමුවුණ කෙනෙක් ‍නෙවෙයි. වෘත්තීය නිෂ්පාදකයෙක්. ටෙලි නාට්‍ය, චිත්‍රපට හෝ මොනයම් මාධ්‍යයක වෘත්තීය නිෂ්පාදකයකුට ඒ හා සම්බන්ධ සෑම ක්ෂේත්‍රයක් ගැනම හොඳ අවබෝධයක් තිබිම අත්‍යවශ්‍ය කාරණයක්.
 
'ටෙලිවිව්' ඇකඩමිය ආරම්භ කිරීමට මූලිකත්වය ගත්තේ ඔබයි. 'ටෙලිවිව්' ඇකඩමිය ආරම්භ කිරීමට පසුබිම් වූ හේතුව මොකක්ද?
මම රූපවාහිනී නිෂ්පාදන කාර්යයන්වලට පිවිසුණු කා‍ලේ වැඩි හරියක් චිත්‍රපට ක්ෂේත්‍රයේ නිරත වුණු අය තමයි හිටියේ. ඒ අයත් සමග වැඩ කිරීමේදී මට ඇත්තටම නුහුරු ගතියක් දැනුණා. මේ අයගේ භාෂා රටාව, ඇඳුම් පැළඳුම්, හැසිරීම් වගේ දේවල්වලින් මට අප්‍රසන්න හැඟීමක් ඇතිවුණා. මේ නිසා මාගේ කාර්යයන් කරගෙන යාමට මට ගැළපෙන කිසියම් හික්මීමක් ඇති පිරිසක් යොදාගැනීම අවශ්‍යතාව මට ඇතිවුණා. මෙවැනි පිරිසක් නිර්මාණය කරගැනීමේ අරමුණින් තමයි මම මුලින්ම මේ ඇකඩමිය ආරම්භ කිරීමට යොමුවුණේ.
 
ඔබගේ තිස් වසරක කලා දිවිය සැමරීම වෙනුවෙන් පැවැත්වෙන උත්සවය පිළිබඳව කතා කළොත්?
ගොඩක් වෙලාවට මේ වගේ සැමරුම් උත්සව තියන්නේ විශ්‍රාම ගැනීම අරමුණු කරගෙන. නමුත් මේ උත්සවය පවත්වන්නේ මගේ ගමනේ ඉතාම වැදගත් සන්ධිස්ථානයක් වශයෙන් වගේම මගේ ඉදිරි කාර්යයන් සඳහා නව උත්තේජනයක් ලබාගැනීමේ පරමාර්ථයෙනුයි. ජනාධිපති මෛත්‍රීපාල සිරිසේන සහ අගමැති රනිල් වික්‍රමසිංහ යන මහත්වරුන්ගේ ප්‍රධානත්වයෙන් සහ නළු නිළි, ගායක ගායිකා ඇතුළු විවිධ කලාකරුවන්ගෙන් සහ සම්භාවනීය අමුත්තන් රැසකගේ සහභාගිත්වයෙන්, කොළඹ බණ්ඩාරනායක ජාත්‍යන්තර සම්මන්ත්‍රණ ශාලාවේ ප්‍රධාන පරිශ්‍රයේදී පැවැත්වෙන මෙම උළෙල නම්කර ඇත්තේ සුනිල ප්‍රතිභා ප්‍රභා නමින්. 
 
පාලිත අබේලාල්

අනුරාධපුරය යනු ශ්‍රී ලාංකීය බෞද්ධයන්ගේ ප්‍රමුඛතම ආධ්‍යාත්මික පුරවරයකි. නමුත් පසුගිය කාලය තුළ ඊට ඉඳුරාම වෙනස් අතිශ්‍ය අප්‍රසන්න සහගත තත්ත්වයක් පිළිබඳවද අනුරාධපුරයෙන් වාර්තා විය.

ඊට හේතුව ශ්‍රී ලංකාවේ ගණිකා ගහණයෙන් වැඩිම ප්‍රතිශතයක් අනුරාධපුරයෙන් වාර්තා වීමය. මෙයට ප්‍රධානතම හේතුවක් වී තිබුණේ පසුගිය යුද සමයේ උතුරුකරයේ සේවයේ යෙදුණු හමුදා සාමාජිකයන්ගේ සංක්‍රමණ (Transit) නගරයක් ලෙස අනුරාධපුරය පැවතීමය.

ඇතැම් විට මාස දෙක තුනක වැටුප්ද සහිතව පලාලි සිට අනුරාධපුරය දක්වා ගුවන් මඟින් එන හමුදා සෙබලුන් ඩැහැගැනීම සඳහා අනුරාධපුරය ආශ්‍රිත ගණිකා ව්‍යාපාරය ප්‍රබල ලෙස ව්‍යාප්ත වී තිබුණි. ඊට අමතරව එම ගණිකාවන් වෙත යන ආරක්ෂක සාමාජිකයන්ගේ මාස දෙක තුනක වැටුප් මුදල් පවා අහිමි වූ සිද්ධීන් විශාල වශයෙන් අසන්නට ලැබිණ.

මීට අමතරව වන්දනාවේ එන මුවාවෙන් අනුරාධපුරයට පැමිණෙන සල්ලාලයන් හට ගණිකාවන් සැපයීමේ යාන්ත්‍රණයක් ද අනුරාධපුරයේ ක්‍රියාත්මක විය. ඔවුන් ගණිකා නිවාස වෙත කැඳවාගැනීමට අමතරව  අනුරාධපුරය හා ඒ ආශ්‍රිතව ඇති සිය ගණනක් ලැඟුම්හල් වලින් කොටසක් වෙත එම ගණිකාවන් සැපයීමේ යාන්ත්‍රණයක් ද ක්‍රියාත්මක වූ අතර අනුරාධපුර ප්‍රදේශයේ ඇතැම් ත්‍රිරෝද රථ රියදුරන් එම ජාවාරමට සෘජුව හා වක්‍රව හවුල් වන බවටද තොරතුරු වාර්තා වී තිබේ.

තත්ත්වය එසේ තිබියදී ආයුර්වේද සම්බාහන මධ්‍යස්ථාන (Spa) පවත්වාගෙන යන මුවාවෙන් අනුරාධපුර නගරයට පැමිණෙන පුද්ගලයන්ට කතුන් අලෙවි කළ ස්ථාන පහක් පස්වන වතාවටත් වැටලීමට පෙරේදා (06) පොලිසිය සමත්විය. එහිදී ගණිකා වෘත්තියේ නිරත වූ කතුන් දසදෙනකු අනුරාධපුර මූලස්ථාන ‍පොලිස් පරීක්ෂකවරයා ඇතුළු පරීක්ෂක ශ්‍රේණියේ නිලධාරීන් පිරිසක් විසින් පෙරේදා (06) සවස අත්අඩංගුවට ගනු ලැබිය.

සැකකාරියන් අනුරාධපුර පොලිස් ස්ථානයට ගෙන ආ අවස්ථාව

අත්අඩංගුවට පත් සැකකාරියන් මීට පෙරත් අවස්ථා ගණනාවකදීම අවකල් ක්‍රියාවේ නිරත වීමේ චෝදනාවට අත්අඩංගුවට ගෙන අධිකරණයට ඉදිරිපත් කර තිබෙන බව ‍පොලීසිය පැවැසූ අතර පසුගිය මාස කිහිපයේ අඛණ්ඩව කළ වැටලීම්වලදී ගණිකා වෘත්තියේ නිරත වූ කාන්තාවන් අසූදෙනකු පමණ ‍පොලිස් අත්අඩංගුවට ගෙන අධිකරණයට ඉදිරිපත් කර තිබෙන බවද පොලීසිය පැවසීය.

ඉතා රහසිගතව සම්භාහන මධ්‍යස්ථාන වල හිමිකරුවන් කතුන් විකිණීමේ ව්‍යාපාරය පවත්වාගෙන යන බවට අනුරාධපුර මූලස්ථාන ‍පොලීසියේ ස්ථානාධිපතිවරයාට දිගින්දිගටම ලැබුණු පැමිණිලි මත අනුරාධපුර ප්‍රධාන මහේස්ත්‍රාත් අධිකරණයෙන් ලබාගත් සෝදිසි වරෙන්තුවලට අනුව රහසිගතව කළ මෙහෙයුමක් මගින් මෙම අත්අඩංගුවට ගැනීම සිදුකරන ලදී.

වැටලීම සිදු කරද්දී ඇතැම් ආයතනවල හිමිකරුවන් ගේට්‌ටුවලට අගුළු දමා පොලිසිය පැමිණේ දැයි විමසිලිමත්ව සිටි බවත් ඔවුන්ට ගේට්‌ටු විවෘත කරන ලෙස පොලිසිය පැවසූ විට යතුරු නැතිවී ඇතැයි කීම නිසා පොලිසිය තාප්ප උඩින් පැන ආයතනවලට ඇතුළු වී බලද්දී තරුණ කාන්තාවන් කාමරවල සඟවා සිටි බවත් පොලිසිය පවසයි.

වයස අවුරුදු 25 - 40 අතරේ පසුවන අනුරාධපුර මැදවච්චිය පුත්තලම තඹුත්තේගම යන ප්‍රදේශවල පදිංචිකාරියන්  දසදෙනෙකු මෙලෙස අත්අඩංගුවට පත් වූ බව ‍පොලීසිය කීය.

සෝදිසි වරෙන්තු 16ක් ලබාගෙන එම ස්ථාන සියල්ල වැටලීමට උත්සහ කළත් මීට පෙර කිසියම් ආකාරයකින් සම්භාහන මධ්‍යස්ථාන හිමියන්ට වැටලීම කරන බව කලින් සැලවීමත් සමඟ ඔවුන් ආයතන වසා දමා පලාගොස් තිබූ බව ‍පොලීසිය කීය. අනුරාධපුර නව නගරය, දහයියාගම, පුබුදුපුර හා ෆ්රීමන් මාවත යන ප්‍රදේශවල පවත්වාගෙන ගිය සම්භාහන මධ්‍යස්ථාන තුනක් හා නිවාඩු නිකේතන දෙකක් වටලා සැකකාරියන් අත්අඩංගුවට ගත් බව ‍පොලීසිය පැවැසීය.

මෙලෙස අනුරාධපුර නගරය ආශ්‍රිතව සිදුකෙරෙන ගණිකා ජාවාරමේ සමස්ත යාන්ත්‍රණය පිළිබඳ තොරතුරු මේ වන විට හෙළිව ඇතැයි පවසන පොලිසිය අනුරාධපුර නිවාඩු නිකේතන, ලැඟුම්හල්, විශ්‍රාමශාලා වෙත ගණිකාවන් සපයන පුද්ගලයන් සහ තැරැව්කරුවන් පිළිබඳවද ඔවුන් ගැවසෙන ස්ථාන පිළිබඳවද මේ වන විට තොරතුරු ලැබී ඇතැයි පොලිසිය ප්‍රකාශ කරයි.

අනුරාධපුර කොට්ඨාස භාර ‍පොලිස් අධිකාරී තිළිණ හේවාපතිරණ සහ සහකාර ‍පොලිස් අධිකාරී චූලනී සී. වීරරත්න යන මහත්වරුන්ගේ උපදෙස් මත අනුරාධපුර මූලස්ථාන ‍පොලීසියේ ස්ථානාධිපති ප්‍රධාන ‍පොලිස් පරීක්ෂක සංජීව මහනාම, ‍පොලිස් පරීක්ෂක එම්.එස්. කුමාරසිංහ, උප ‍පොලිස් පරීක්ෂකවරුන් වන ඩී.බි.අයි. ප්‍රේමරත්න, විමල් රංජිත්, කේ.ඒ. රත්නසිරි සහ උප ‍පොලිස් පරික්ෂිකා යමුනා කාන්ති යන මහත්ම මහත්මීහු මෙම වැටලීම කළහ.

 

බුද්ධික මහේෂ් විජේසූරිය- අනුරාධපුරය

 

මේ දිනවල දිවයින පුරා  පවතින ඉන්ධන හිඟය හේතුවෙන් කොළඹ නගරයේ පමණක් නොව දිවයිනේ සෑම ඉන්ධන පිරවුම් හලකම දිගු ‍පෝලිම් දක්නට ලැබුණ බව දැක ගන්නට ලැබිණි.

ඉන්ධන නොමැතිවීමෙන් දුෂ්කරතාවන්ට පත්ව සිටින  ජනතාවගේ අදහස් දැන ගැනීමට කොළඹ අවට පිහිටි ඉන්ධන පිරවුම්හල් කිහිපයකට අපි ගියෙමු. එහිදී කිලෝමීටර ගණනක් දිගු ‍පෝලිම් දක්නට ලැබුණි. එමෙන්ම ඉන්ධන පිරවුම්හල්වල ආරක්ෂාව සඳහා ‍පොලීසියද යොදවා තිබෙනු දක්නට තිබිණි.

ඉන්ධන නොමැතිව කුපිත වූ ජනතාව අතර ස්ථාන කිහිපයකදී බහින් බස්වීම් ද අපි දැක්කෙමු. මේ එම ‍පෝලිම්වල සිටි ජනතාවගේ අදහස්ය.

ෂෙඩ් 10 ක විතර ‍පෝලිම්වල හිටියා
ටී. සිවපාලන් - යටියන්තොට

මම යටියන්තොට ඉඳන් ලෙඩෙක් අරන් හයර් එකක් ආවේ. අවිස්සාවේල්‍ලේ ඉඳන් ෂෙඩ් දහයක විතර ‍පෝලිමේ හිටියා. පැය ගාණක් ‍පෝලිමේ ඉඳලා ටිකක් ඉස්සරහට යන කොට ෂෙඩ් එකේ පෙට්‍රල් ඉවරයි කියනවා. ඔරුගොඩවත්තේ මේ ෂෙඩ් එකෙත් පැය ගාණක් තිස්සේ ‍පෝලිමේ ඉන්නේ. ඒත් පෙට්‍රල් ගහන්නේ රුපියල් 500 ක විතරයි. මට පෙට්‍රල් ගහගන්න බැරි වුණොත් අද මේ ලෙඩත් එක්ක පාරේ තමයි ඉන්න වෙන්නේ.
මිනිස්සු හැමෝම අපහසුතාවට ලක්වෙලා.රජයට තෙල් ටිකවත් බෙදා ගන්න බැරිනම් වැඩක් නෑනේ.

හැම කරදරයක්ම අපි වගේ අයටයි
එම්. අස්කාර් - ග්‍රෑන්ඩ්පාස්

මම දරු පවුලක් නඩත්තු කරන්නේ ත්‍රීවිල් රස්සාව කරලා. දවස් දෙකක ඉඳන් හයර් එකක් දුවාගන්න බැරිවුණා. අපි දවසේ වියදම හොයා ගන්නේ හයර් දුවලයි. මෙහෙම තව දවස් කිහිපයක් පෙට්‍රල් නැති වුණොත් අපි වගේ මිනිස්සු කී දාහක් දුක් විඳිනවාද? ‍පෝලිම්වල ඉඳලම එපා වෙලා තියෙන්නේ. ‍පොඩි මිනිහාටම තමයි, ඔක්කොම ප්‍රශ්න. මිනිස්සු හරිම කේන්තියෙන් ඉන්නේ. ඒ කේන්තිය සාධාරණයි.
 

 


අණ්ඩුව ගැන විශ්වාසයක් නෑ
ජේ.පී. කුමාර - මාලිගාවත්ත

ඊයේ රෑ දහයට මතෛන්ට ආවේ. පෙට්‍රල් ගහන්නත් සල්ලි කීයක් හරි හොයා ගන්න ඕනේ. ඒකට හයර් එකක් දුවන්න ඕනේ. මේ ආණ්ඩුව මොනවා කරනවාද දන්නේ නෑ. ඉන්ධන නැතිව රටේ කිසිම දෙයක් කරන්න බෑ. ඒක විසඳගන්නත් ආණ්ඩුවට බැරිනම්, මිනිස්සු ආණ්ඩුව විශ්වාස කරන්නේ කොහොමද? පාරවල්වල යන්න බෑ පාරවල් කැඩිලා. ඒ පාරවල් බේරගෙන මිනිස්සු තෙල් ගහන්න එන්නත් ඕනේ. පාරෙ ට්‍රැෆික් එකේ හිරවෙලා ඉන්න කොට තියෙන තෙල් ටිකත් පිච්චෙනවා. කවද්ද මේ ආණ්ඩුව ‍පොඩි මිනිහා ගැන බලන්නේ.

පාන්දර 3 ඉඳලා දවල් 1.00 වෙනකල් හිටියා
නලින් ප්‍රශාන්ත - කැලණිය
 
ත්‍රීවිල් එකේ පාන්, බනිස් විකුණන එකයි මගේ රැකියාව. මේ ත්‍රීවිල් එකත් මගේ ‍නෙවෙයි. ත්‍රිවිල් එක කුලියට අරගෙනයි, බනිස් විකුණන්නේ. ත්‍රීවිල් එකේ අයිතිකාරයටත් මම දවසකට රුපියල් 500 ක් ගෙවන්න ඕනේ දිව්වත් නැතත්. අද පාන්දර තුනේ ඉඳන් මම ෂෙඩ්වල ‍පෝලිමේ ඉන්නවා.දැන් වෙලාව දවල් එකයි. ඒත් තවම බැරි වුණා,පෙට්‍රල් ටිකක් ගහගන්න. ලොකු වාහනවලට, කාර්වලට කිසි ‍පෝලිමක් නෑ. ඒ අය ආපු ගමන්ම පෙට්‍රල් ගහලා යවනවා. අපි වරු ගණන් ‍පෝලිමේ ඉන්නවා. මගේ මේ රස්සාවෙන් පවු‍ලේ පස් දෙනෙක් ජීවත් වෙනවා.අද රස්සාව කර ගන්න බැරි වුණා. හෙටත් බැරි වුණොත් අපේ ගෙදරවුන්ට කන්න දෙන්නේ කොහොමද මම?.
 


හරිනම් ඇමැති අස්වෙන්න ඕනෑ
පකීර් නසීර් ඛාන් - වත්තල

මම මෙතැන ඉන්නේ පාන්දර තුනේ ඉඳන්. මගේ දරු පවුල ජීවත් කරන්නේ මම මේ ත්‍රීවිල් රස්සාවෙන්. මේ ආණ්ඩුවට තෙල් ටිකවත් හරියට ගෙන්නලා බෙදා දෙන්න බැරිද? මිනිස්සු මේ විදිහට මහපාරේ ‍පෝලිම්වල තියන්න නම්, මේ රටට ආණ්ඩුවක් ඕනේද? තෙල් ටික හරියට බෙදන්නවත් ඇමැතිට බැරි නම්, ඒ ඇමැති අයින් වෙන්න ඕනේ. අයින් වෙන්නේ නැත්නම්, අයින් කරන්න ඕනේ. ‍පොඩි මිනිහාට හැමදාම හිමි වුණේ මහපාර. ඒ සංස්කෘතිය තාමත් මේ රටෙන් ඉවත් කරන්න කාටවත් බැරිවුණා. ඡන්දේ ගන්න එන්නේ නම්, අරක දෙනවා, මේක දෙනවා කියලා. ‍පොඩි මිනිහට මොනවාද හම්බ වුණේ. අපිට උරුම වුණේ මහපාරයි, ‍පෝලිමයි විතරයි.

පුදුම දුකක් අපි විඳින්නේ
ප්‍රසාද් ලක්මාල්  - වැල්ලම්පිටිය.

මම මේ ත්‍රීවිල් එක දුවන්නෙත් කුලියට අරගෙන. හවසට ත්‍රීවිල් එකට රුපියල් 500 ක් දෙන්න ඕනේ. පාන්දර ඉඳන් ‍පෝලිමේ හිටියත් තාම පෙට්‍රල් ටිකක් ගහගන්න බැරි වුණා. හවසට රුපියල් 500 ගෙවන්නවත් අද හයර් එකක් දුවා ගන්න බැරි වුණා. දැන් ෂෙඩ් එකෙන් කියනවා, තෙල් ඉවරයිලු. ආයෙත් තෙල් බවුසරයක් අවොත් තෙල් දෙන්න පුළුවන්ලු. කීයට එනකම්, කියලා බලාගෙන ඉන්නද?



වාහනේ නැත්නම් තෙල් දෙන්නේ නෑ
කේ. ඩී. සුමිත් - ඔරුගොඩවත්ත

මගේ ත්‍රීවිල් එකේ තමයි ළමයි ඉස්කො‍ලේ යන්නේ. උදේ ඉස්කෝලෙට එක්ක යනකොට පෙට්‍රල් ඉවර වුණා.මම ළමයින්ට කිව්වා පෙට්‍රල් ගහගත්තොත් එක්ක යන්න එන්නම්, නැත්නම් බස් එකේ එන්න කියලා. අද කා‍ලේ ළමයෙක් පාරේ තනියම යවන්න පුළුවන් ද?
වාහනේ තෙල් නැති නිසා මම කෑන් එකක් අරන් ආවා තෙල් ගෙනියන්න. කෑන්වලට තෙල් දෙන්න බැරිලු. වාහනේ එන්න තෙල් නැත්නම්, කරේ තියන් එන්න කියලාද? කියන්නේ. මේවා හරි මෝඩ අසාධාරණ තීරණ. මිනිස්සුන්ට හරියට තෙල් ටික බෙදන්න බැරි නම්, මේ ඇමැතිගෙන් ඇති වැඩේ මොකක්ද?

තෙල් නැතිනම් වාහනේ උස්සන් එන්නද?
නන්දා රංජිනි - කිරිබත්ගොඩ

මම කිරිබත්ගොඩ ඉඳන් ආවේ, මගේ දුවගේ බයිසික‍ලේට තෙල් ටිකක් ගෙනියන්න. මගදි ෂෙඩ් තුනකින් බැස්සා. ඒ එකකවත් පෙට්‍රල් තිබුණේ නෑ. මතෛන්ට ආවාම, කෑන්වලට තෙල් දෙන්න බැරිලු. වාහනේ තෙල් නැත්නම්, කොහොමද වාහනවල එන්නේ. ආණ්ඩුවට මේ ප්‍රශ්න විසඳන්න බැරි නම්, පුළුවන් කෙනෙකුට මේක කරන්න දෙන්න ඕනේ.
 

 

 

පෙට්‍රල් ටිකත් හිඟාකන්න වෙලා
ප්‍රදීප් කුමාර - පිටකොටුව

මම උදේ පාන්දර හතරේ ඉඳන් ෂෙඩ්වල ‍පෝලිමේ.අපි පත් කර ගත්ත ආණ්ඩුවට අපිටම බනින්න වෙලා. උන්ට වඩා මුන් හොඳයි කියලා පත් කර ගත්තා. දැන් උනුත් එකයි, මුනුත් එකයි. මගේ නැන්දම්මා ඉස්පිරිතා‍ලේ එයාව තුන්වේලම බලන්න යන්න ඕනේ. පාරේ ට්‍රැෆික්. බස් එකේ යනකොට මගටම කා‍ලේ ගතවෙනවා.කාර්වලට ෂෙඩ්වලින් ලීටර් 20 ක් තෙල් ගහනවා.ඒත් එදා වේල හම්බ කරන් කන ත්‍රීවිල්වලට ගහන්නේ ලීටර් 3යි. ‍පොඩි මිනිහාට කොයි ආණ්ඩුවත් සලකන්නේ මෙහෙම තමයි. අපිට අද පෙට්‍රල් ටිකටත් හිඟා කන්න වෙලා. මේවා ෆොටෝ ගහලා ඉන්ටනෙට් දැම්මම අපි හිඟාකන රටක් කියලා මේ ආණ්ඩුවට ලැජ්ජා නැද්ද? මේ ආණ්ඩුව මේවට වගකියන්න ඕනේ.

දරු පවුලම දැන් අනාථයි
නයිසර් මොහොමඩ් - ග්‍රෑන්ඩ්පාස්

මම උදේ පාන්දර ඉඳන් මේ ‍පෝලිමේ ඉන්නේ. මම දරුවෝ තුන් දෙනෙක් ජීවත් කරන්නේ ත්‍රීවිල් රස්සාව කරලා. දැන් දවස් දෙකක ඉඳන් හයර් එකක්වත් දුවන්න බැරි වුණා. ෂෙඩ්වල ‍පෝලිමේ හිටපු එකයි කළේ.ආණ්ඩුව මේකට වග කියන්න ඕනේ. ආණ්ඩුව කියන විදිහට මේ ප්‍රශ්නය විසඳන්න තව දවස් දෙකක් විතර යනවාලු. එතකන් අපි ‍පෝලිම්වල ඉන්නද මේ ආණ්ඩුව කියන්නේ.






කමණී හෙට්ටිආරච්චි
ඡායාරූප - තුෂාර අතපත්තු

IMAGE

55 වියැති බැංකු ලොක්කා 29 කන්තෝරු නෝනා සමඟ 'හනිමූන්' ගිහින්

IMAGE 2017 Nov 22 12:50
බැංකුවක උසස් නිලයක් දරන පනස්පස් හැවිරිදි සිය සැමියා වසර ගණනාවක් තිස්සේ විසිනව හැවිරිදි රජයේ...
Views - 1943

අහසේ සිට බිමට පනින එස්.ටී.එෆ්. යුවතියෝ

IMAGE 2017 Nov 22 10:55
අම්පාර උහන ගුවන් ධාවන පථයෙන් අහසට නැඟගත්, එම්. අයි. 17 වර්ගයේ හෙලිකොප්ටරය  නිලඹර දෙපළු කරමින්...
Views - 1272

මිහිදුම සහ වැස්ස ගැන 'කාලගුණ විද්‍යාවෙන්' බොරු කී‍වේ ඇයි?

IMAGE 2017 Nov 22 10:43
මේ දිනවල අළුයම් කාලයේ අගනුවර ඇතුළු ප්‍රදේශ රැසක දැඩි මිහිදුම් තත්ත්වයක් දක්නට ලැබුණු බව...
Views - 644

මුගාබේගේ බිරිඳ ද පක්ෂයෙන් නෙරපයි

IMAGE 2017 Nov 21 09:37
වසර 37  ක කාලයක් සිම්බාබ්වේ දේශය පාලනය කළ රොබට් මුගාබේ නිවාස අඩස්සියට ගනිමින් හමුදාව එරට...
Views - 1657

ඒ ආදර කතාව ඉවරයි මම දැන් සින්ගල්

IMAGE 2017 Nov 19 17:31
සිරස ජුනියර් සුපර් ස්ටාර් කියන්නේ මේ දවස්වල ප්‍රේක්ෂකයන් ආදරයෙන් වැළඳ ගත් රියැලිටි...
Views - 5282

කේන්ද්‍රයක මාරක අපල තිබීමටත් වඩා නොතිබීම භයානකය

IMAGE 2017 Nov 19 15:19
මහජන බැංකු විශ්‍රාමික සංගමයේ පිළියන්දල කැස්බෑව ශාඛාවේ අටවන සංවත්සරික සභාව පසුගිය...
Views - 3244

Please publish modules in offcanvas position.

Web Analytics