Coss Ear2
lakbima.lk
COSS Ear 1

තනි තරුවේ, තරු දෙකේ ජෙනරාල්ලා රටුන් අතර ප්‍රසිද්ධියට පත්වූයේ තිස් වසරක් පුරා පැවැති ඊළාම් සටනේදීය. එකල ඔවුන්ගේ සුරුවිරුකම්වලින් පත්තර පිටු පිරී තිබුණේය. එනමුත් තනි තරුවේ ජෙනරාල්වරයකු වූ ප්‍රියංක ප්‍රනාන්දු එක රැයකින් මුළු ලෝකයේම ප්‍රසිද්ධ චරිතයක් බවට පත්වූයේ යුද්ධය අවසන් වී නව වසරකුත් ගත වූ මොහොතකය. ඒ රණ බිමේදී නොවේ. ලංකාවට කිලෝමීටර් දහස් ගණනක් දුරින් පිහිටි ලන්ඩන් නුවරදීය.
යුද හමුදා බසින් තනි තරුවේ ජෙනරාල්වරයකු යනුවෙන් හැඳින්වෙන්නේ බ්‍රිගේඩියර්වරයෙකි. ප්‍රියංක ප්‍රනාන්දු ද යුද හමුදාවේ රාජකාරි කරන දුසිම් ගණනක් බ්‍රිගේඩියර්වරුන් අතරින් එක් අයෙකු පමණි. එහෙත් යුද හමුදාවේ සෑම බ්‍රිගේඩියර්වරයෙකුට නොලැබෙන අවස්ථාවක් ඔහුට ලැබුණි. ඒ රාජ්‍ය තාන්ත්‍රික සේවයය. ඔහුට ලැබුණේ බ්‍රිතාන්‍යයේ ශ්‍රී ලංකා මහ කොමසාරිස් කාර්යාලයේ  ආරක්ෂක උපදේශක ධුරයය. මේජර් ජෙනරාල් ප්‍රසාද් සමරසිංහ, මේජර් ජෙනරාල් ප්‍රසන්න සිල්වා, මේජර් ජෙනරාල් නිර්මාල් ධර්මරත්න වැනි යුද හමුදා නිලධාරීහුද මින් පෙර එම ධුරය දැරූහ.
බ්‍රිගේඩියර් ප්‍රියංක ප්‍රනාන්දු බ්‍රිතාන්‍යයේ ශ්‍රී ලංකා මහකොමසාරිස් කාර්යාලයේ ආරක්ෂක උපදේශක ධුරයට පත්වන්නේ දෙදහස් දාහත අවුරුද්දේය. එහෙත් බ්‍රිගේඩියර් ප්‍රියංක ප්‍රනාන්දු ලන්ඩන් නුවර සිටින බව මෙපමණ කලක් රටුන් දැන ගෙන හුන්නේ නැත. එවැනි අයෙකු ලන්ඩන් නුවර සිටියද ඒ ගැන රට්ටුන්ට ප්‍රශ්නයක් නැත. බ්‍රිගේඩියර් ප්‍රනාන්දු ලන්ඩන් නුවර සිටීම අදාළ වූයේ විදේශ කටයුතු අමාත්‍යාංශය හා යුද හමුදා මූලස්ථානයට පමණි. ඒ ඔහු ලන්ඩන් නුවර ගියේ පැවැරුමකට බැවිනි. ඔහු පමණක් නොව ලොව පුරා පිහිටි ශ්‍රී ලංකාවේ තානාපති හා මහ කොමසාරිස් කාර්යාලවලට අනුයුක්තව ත්‍රිවිධ හමුදා නිලධාරීහු පත්ව සිටිති. ඔවුන්ගේ පැවැරුම වන්නේ තානාපති හෝ මහකොමසාරිස් කාර්යාලයේ ආරක්ෂක කටයුතුය. එසේ නැතිනම් ශ්‍රී ලංකාවට එරෙහිව එම රටවල්වල සිට ක්‍රියාත්මක වන කටයුතු සොයා බැලීමය. එවැනි සිද්ධීන් යුද හමුදා මූලස්ථානය මගින් බුද්ධි තොරතුරු විශ්‍ලේෂණය කෙරෙන්නේය.
යුද්ධය පැවැති සමයේ එතෙරදී එල්.ටී.ටී.ඊ. සාමාජිකයන් අත්අඩංගුවට ගැනීම, ඔවුන්ගේ අවි ආයුධ ජාවාරම මැඩලීම වැනි ජාතික  ආරක්ෂක කටයුතුවලදී තානාපති හා මහ කොමසාරිස් කාර්යාලවල හුන් ආරක්ෂක උපදේශකයෝ ප්‍රශංසනීය මෙහෙවරක්     ඉටුකළෝය.
කෙසේ නමුදු පිටරටවල තානාපති හා මහ කොමසාරිස් කාර්යාලවල ආරක්ෂක උපදේශකයන් ගැන ඉකුත් හතරවැනිදා තෙක් ලංකාවේදී හා හූවක් නොවීය. එවැනි තනතුරක් තිබෙනවාදැයි බොහෝ දෙනෙක් දැන සිටියේද නැත. එහෙත් ඒ සියල්ල වෙනස් වූයේ ලන්ඩන් නුවරදී ඉකුත් හතර වැනිදා එළියට ආ වීඩියෝවක් සමගය. ඒ කතාව ඇරඹෙන්නේ ශ්‍රී ලංකාවේ හැත්තෑවැනි නිදහස් සැමරුම සමගය. බ්‍රිතාන්‍යයේ ශ්‍රී ලංකා මහ කොමසාරිස් කාර්යාලයේ නිලධාරීහු නිදහස් උළෙල සමරමින් සිටියදී කාර්යාලය ඉදිරිපිට විරෝධතාවන් පැවැත්වෙමින් තිබුණි. එය සංවිධානය කර තිබුණේ සංක්‍රාන්ති දෙමළ ඊළමට සහය දෙන පිරිසකි. එල්.ටී.ටී.ඊ. ධජ රැගෙන පැමිණි ඔවුහු අපට ඕනෑ යුක්තිය, අපේ වීරයා ප්‍රභාකරන්, අපේ දේශය ඊළාම් යනුවෙන් කෑ ගැසූහ. මෙවැනි විරෝධතා ලන්ඩන් නුවරට සාමාන්‍ය සිද්ධියකි.
මේ අතරේ විරෝධතාකරුවන් අසලට ආවේ බ්‍රිගේඩියර් ප්‍රියංක ප්‍රනාන්දුය. එතැන් සිට වූයේ මුළු ලොවම දුටුවේ සමාජ ජාල ඔස්සේ අතින් අතට ගිය වීඩියෝවකිනි. එම වීඩියෝව පිළිබඳ මුලින්ම දුන් අර්ථකථනය වූයේ තම නිල ඇඳුමේ ඇති සිංහ කොඩිය එල්.ටී.ටී.ඊ. හිතවාදීන්ට පෙන්වා ඔවුන්ගේ ගෙල සිඳින ආකාරය බ්‍රිගේඩියර්වරයා අභිනයෙන් පෙන්වූ බවය. මේ සිද්ධියට මුලින්ම විරෝධය දැක්වූයේ බ්‍රිතාන්‍ය ‍ලේබර් පක්ෂය නියෝජනය කරන ජොආන් රයන් හා සියොහායාන්් මැක්ඩෙනාය. ඔවුන් බ්‍රිතාන්‍ය විදේශ ‍ලේකම් බොරිසෝ ජොන්සන් වෙත ලිපියක් යවමින් කීවේ. බ්‍රිතාන්‍ය රාජ්‍යය තුළ නිල මට්ටමේ අමුත්තෙකු වන ඔහුගේ හැසිරීම නුසුදුසු හා තර්ජනාත්මක බවය. එබැවින් ඔහු බ්‍රිතාන්‍යයෙන් නෙරපා හරින ලෙස ඔවුන් ඉල්ලා තිබුණි.
කෙසේ නමුදු බ්‍රිතාන්‍යයට පෙර බ්‍රිගේඩියර් ප්‍රියංක ප්‍රනාන්දු ගැන පියවරක් ගත්තේ ශ්‍රී ලංකාවේ විදේශ කටයුතු අමාත්‍යාංශයය. බ්‍රිගේඩියර්වරයාගේ එම ක්‍රියාව යුද හමුදාව පරීක්ෂණයක් කරනු ඇති බවත්, එතෙක් ඔහු රාජකාරි කටයුතුවලින් ඉවත් කරන ලෙස බ්‍රිතාන්‍යයේ ශ්‍රී ලංකා මහ කොමසාරිස්වරිය වෙත දන්වා ඇති බවද විදේශ කටයුතු අමාත්‍යාංශය නිවේදනය කළේය. බ්‍රිතාන්‍යයේ ශ්‍රී ලංකා මහ කොමසාරිස්වරිය වන්නේ අගමැති රනිල් වික්‍රමසිංහගේ ඥාතිවරියක වන අමරි විජයවර්ධනය.
කෙසේනමුදු විදේශ කටයුතු අමාත්‍යංශය බ්‍රිගේඩියර් ප්‍රියංක ප්‍රනාන්දුට එරෙහිව යුද ප්‍රකාශ කළද යුද හමුදාපති ලුතිනන් ජෙනරාල්   මහේෂ් සේනානායකගේ මතය වූයේ සමාජ ජාලා වබේ අඩවිවල විකාශය වූ වීඩියෝවකට අනුව නිලධාරියෙකුට එරෙහිව චෝදනා ගොනු කළ නොහැකි බවය. මේ අතරේ මෙම සිද්ධියට පක්ෂ හා විපක්ෂව අදහස් පළ වෙද්දී තවත් කතාවක් කරළියට ආවේය. ඒ බ්‍රිගේඩියර් ප්‍රියංක ප්‍රනාන්දු අභිනයෙන් පෙන්වූයේ විරෝධතාකරුවන්ගේ ගෙල සිඳින ආකාරය නොවන බවය. දෙමළ ඊළමක් වෙනුවෙන් සටන් කළ ප්‍රභාකරන් මරණයට පත්වූ බව ඔහු නිරූපණය කළැයි පැවැසුණි. අවසානයේදී මේ සිද්ධිය මහා බ්‍රිතාන්‍ය පමණක් නොව ලංකාවේ දේශපාලනයද රත් කළේය. බැඳුම්කර වංචා, උදයංග වීරතුංග අල්ලා ගැනීමේ කතා යටට ගොස් බ්‍රිගේඩියර් ප්‍රියංක ප්‍රනාන්දු කරළියට ආවේය. ඊට ආසන්නම හේතුව පළාත් පාලන ඡන්දයය.
අවසානයේදී බ්‍රිගේඩියර් ප්‍රියංක ප්‍රනාන්දු ගැන අවසන් තීන්දුව ගත්තේ සන්නද්ධ හමුදාවල සේනාධිනායකයා වන මෛත්‍රීපාල සිරිසේන ජනාධිපතිවරයාය. බ්‍රිගේඩියර් ප්‍රියංක ප්‍රනාන්දුට නැවත පෙර රාජකාරි පවරන ලෙස ඔහු විදේශ කටයුතු අමාත්‍යාංශයට නියෝග කළේය.
ජනාධිපතිවරයාගේ නියෝගය පරිදි ඔහු නැවත වරක් බ්‍රිතාන්‍යයේ ලංකා මහ කොමසාරිස් කාර්යාලයේ ආරක්ෂක උපදේශක ධුරයේ රාජකාරි ආරම්භ කරනු ලැබිය. ඒ පිළිබඳ යුද හමුදා මූලස්ථානය නිවේදනය කළේ යුද හමුදාව කිසිවිටකත් ඔහුගේ සේවය අත්හිටුවීමක් හෝ ඔහු ලංකාවට කැඳවීමට ක්‍රියා නොකළ බවය. අවසානයේදී යුද හමුදා මූලස්ථානය ප්‍රකාශ කළේ බ්‍රිගේඩියර් ප්‍රියංක ප්‍රනාන්දුට එරෙහිව යුද හමුදා පරීක්ෂණයක් කිරීමට කිසිදු අවශ්‍යතාවයක් නැති බවය. ඒ බව යුද හමුදා මූලස්ථානය ජනපතිවරයාටද දැනුම් දී තිබුණි. ඒ අනුව පැහැදිලි වන්නේ මේ සිද්ධියේදී මුලින්ම වැට පැන්නේ විදේශ කටයුතු අමාත්‍යාංශය බවය.
එක දවසකින් මුළු රටම හෙල්ලූ මේ බ්‍රිගේඩියර් ප්‍රියංක ප්‍රනාන්දු කවුද. ඔහු ගැමුණු හේවා රෙජිමේන්තුවට අයත් නිලධාරියකි. එක්දහස් නවසිය හැට හයේ දෙසැම්බර් නවවැනිදා උපන් ඔහු ඉගෙන ගත්තේ කොළඹ ඩී.එස්. සේනානායක විදුහලෙනි. නිලධාරී බඳවා ගැනීමේ පාඨමාලා අංක විසිහය යටතේ කැඩෙට් නිලධාරියෙකු ලෙස ප්‍රියංක ප්‍රනාන්දු යුද හමුදාවට එක් වන්නේ එක්දහස් නවසිය අසූහයේ ඔක්තෝබර් විසිහත් වෙනිදාය. එවිට ඔහුගේ වයස අවුරුදු විස්සකි. ඔහු දෙවන ලුතිනන්වරයකු ලෙස අධිකාරිය ලැබුවේ එක්දහස් නවසිය අසූ හතේ ජූලි විසිතුන් වැනිදාය. මේ වන විට ඔහුගේ සේවා කාලය වසර තිස්දෙකකි.
ඔහු ගැන මින් පෙර කතාබහට ලක්වූයේ සිව්වැනි ඊළාම් සමයේදීය. එකල ඔහු නිලයෙන් ලුතිනන් කර්නල්වරයෙකි. එකළොස් වැනි ගැමුණු හේවා රෙජිමේන්තුවේ අණදෙන නිලධාරියාය. සිව්වැනි ඊළාම් යටතේ දුෂ්කරම සටන් පෙරමුණෙන් වූයේ 59 වැනි සේනාංකය මුලතිව් බලා ගිය ගමනය. ප්‍රභාකරන් කලක් සැඟව හුන් වන් ෆෝ බේස් කඳවුරු සංකීර්ණය විනාශ කෙරුණේ එම සේනාංකය විසිනි. 59 වැනි සේනාංකයේ පළමු බල සේනාව වූ 591 බලසේනාවට එකල අණ දුන්නේ කර්නල් (දැන් බ්‍රිගේඩියර්) අරුණ ආරියසිංහය. මුලතිව් බලා ගමන් කළ එම බලසේනාව යටතේ ලුතිනන් කර්නල් ප්‍රියංක ප්‍රනාන්දු අණ දුන් 11 වැනි ගැමුණු හේවා බලඇණියද තිබුණි.
දෙදහස් අටේ ජනවාරි අට වැනිදා 59 වැනි සේනාංකය මුලතිව් අල්ලා ගැනීමට වැලිඔයෙන් ගමන් ඇරඹීය. ඒ අවස්ථාවේදී කොටි පාලන ප්‍රදේශයට මුලින්ම පහර දුන්නේ ජනකපුරයෙන් ගමන් ඇරඹූ යුද පෙරමුණය. උතුරේ අන්තිම සිංහල ගම්මානය වූ ජනකපුරයෙන් ගමන් ඇරඹූ එම යුද පෙරමුණේ ක්ෂේත්‍ර අණදෙන නිලධාරියා වූයේ ලුතිනන් කර්නල් ප්‍රියංක ප්‍රනාන්දුය. එකල ඔහු අණදුන් 11 වැනි ගැමුණු හේවා බලඇණිය මුලතිව් කැලෑව පීරා එල්.ටී.ටී.ඊ.යේ භූගත කඳවුරු රැසක් අල්ලාගනු ලැබිය. ඉන්දීය සාම සාධක හමුදාවට පවා අල්ලා ගැනීමට නොහැකි වූ මුලතිව් කොටි කඳවුරු සංකීර්ණයේ කඳවුරු ද ඒ අතර තිබුණි.
කෙසේ නමුදු මුලතිව් යුද පෙරමුණේ ඔහු දැක්වූ  දක්ෂතා හේතුවෙන් ලුතිනන් කර්නල් ප්‍රියංක ප්‍රනාන්දුට ක්ෂේත්‍ර උසස්වීමක් ලැබුණි. ඒ අණදෙන නිලධාරී ධුරයේ සිට බලසේනාධිපතිවරයකු හැටියටය. ඒ අනුව ඔහු කර්නල් අතුල ගලගමගේ අණ දුන් 5 වැනි කාර්ය සාධක බළකාය යටතේ 651 වැනි බල සේනාධිපති ලෙස පත්වීම් ලැබිය. පසුකලක ඔහු යළිඳු වරක් මුලතිව් 591 බලසේනාධිපති ලෙස පත්වීම් ලැබිය. එකල ඔහු මුලතිව් ජනතාව අතර ජනප්‍රිය චරිතයකි. මුලතිව් වැසියන්ට හොඳින් සංග්‍රහ කළ හමුදා නිලධාරියෙකි.
කෙසේ නමුදු බ්‍රිගේඩියර් ප්‍රියංක ප්‍රනාන්දු ලන්ඩන් නුවරදී එල්.ටී.ටී.ඊ. හිතවාදීන්ට දැක්වූ ප්‍රතිචාරය ගැන විවිධ පාර්ශ්වවලට විවිධ ආර්ථකථන තිබිය හැකිය. සමහරුන්ට ඔහු වීරයකු වන විට තවත් පිරිසකට ද්‍රෝහියාය. ඒ පිළිබඳ අවසන් නිගමනයක් දීමට මේ තීරුව නොතැනය. එහෙත් ආණ්ඩුවෙන් අසන්නට ප්‍රශ්නයක් ඇත්තේය.
ඒ මේ සිද්ධියේදී විදේශ කටයුතු අමාත්‍යාංශයේ හැසිරීමය. බ්‍රිගේඩියර් ප්‍රියංක ප්‍රනාන්දුට එරෙහිව විදේශ කටයුතු අමාත්‍යාංශය පරීක්ෂණ ඇරඹුවේ සමාජ ජාලාවල විකාශනය වූ වීඩියෝවේ ඇත්ත නැත්ත නොසොයාය. හැරත් විදේශ කටයුතු ඇමැතිවරයා එ.ජා.ප. ආණ්ඩු සමයක රජයේ ප්‍රධාන නීති උපදේශකයා වන නීතිපති ධුරය දැරූ ජනපති නීතිඥවරයෙකි. අගමැතිවරයාගේ සමීප කවයේ ඇමැතිවරයෙකි. ඔහුගේ අමාත්‍යාංශය සමාජ ජාලා බලා බ්‍රිගේඩියර් ප්‍රියංක ප්‍රනාන්දු දඬු කඳේ ගසන්නට තිබූ හදිසිය ‍පොලිස් මූලස්ථානයේදී ‍පොලිස්පති පූජිත ජයසුන්දර විසින් සෝපාන සේවකයාට පහරදීමට තැත් කළ බව කියන සමාජ ජාලා වීඩියෝව සම්බන්ධයෙන් නීතිය හා සාමය භාර ඇමැතිවරයාට නොතිබුණේ ආණ්ඩුව තමන්ට කැමැති විදිහට නීතිය නවන නිසා දැයි ප්‍රශ්නාර්ථයකි.

 මිහිරි ෆොන්සේකා

ස්වාධීන රූපවාහිනියෙන් විකාශය වන කූඹියෝ ටෙලි නාට්‍යය මෙගා නාට්‍ය රැල්ලට යටවී තිබූ මෙරට ටෙලි නාට්‍ය කර්මාන්තයේ හැරවුම් ලක්ෂයක් සනිටුහන් කළ ටෙලි නාට්‍යයක් බවට විවාදයක් නැහැ. කූඹියෝ කොටස් 50කට ආසන්න සංඛ්‍යාවක් මේ වන විට විකාශය වී තිබියදී ඊට පැසසුම් වගේම චෝදනාද ඇතැම් ප්‍රේක්ෂකයන්ගෙන් එල්ලවීමට පටන් ගෙන තිබෙනවා. වසර තුන හතරකට කලින් රූගත කර අවසන් කළා කියන කූඹියෝ සඳහා අලුතින් දර්ශන එකතු කර තිබෙන නිසා ටෙලි නාට්‍ය දැන් වෙනස් මගකට ගමන් කරනවා කියලයි ඇතැමුන් පවසන්නේ. කූඹියෝ අධ්‍යක්ෂ ලක්මාල් ධර්මරත්නව අප මෙලෙස සංවාදයකට එක්කාසු කර ගත්තේ එම චෝදනාවලට පිළිතුරු දීමට සුදුසුම පුද්ගලයා ඔහු වන නිසයි. 
 
50කට ආසන්න කොටස් සංඛ්‍යාවක් විකාශය වෙලා තියෙද්දී “කූඹියෝ” ගැන ප්‍රේක්ෂකයන්ගෙන් විවිධ චෝදනා පවා එල්ල වෙන්න පටන් අරන්. අධ්‍යක්ෂවරයා විදිහට ඔබ ඒ ගැන දැනුවත්ද? 
 
ඔව්. ඒ විදිහේ චෝදනා එල්ලවීම මටත්, “කූඹියෝ” පිටපත් රචක  දමිතටත් පුදුමයක් ‍නෙවෙයි. මොකද ටෙලි නාට්‍යයේ මේ අවධියට එද්දී ප්‍රේක්ෂකයන් සහ අපි අතරේ යම්කිසි ඝට්ටනයක් ඇතිවේවි කියලා අපි බලා‍පොරොත්තුවෙනුයි හිටියේ. 
 
ඔය කියන ඝට්ටනය ඇතිවීමට ප්‍රධාන හේතුව ටෙලි නාට්‍යය හදිසියේම ප්‍රේක්ෂකයන් නොහිතපු දිසාවකට ගලා යාමයි කීවොත් නිවැරදියි නේද? 
 
ඒක ඇත්ත. හැබැයි  මම විශ්වාස කරන දෙයක් තමයි අපි ප්‍රේක්ෂකයන්ට දෙන්නේ ඔවුන් බලා‍පොරොත්තු වෙන දේ නම් නිර්මාණකරුවෝ විදිහට අපෙන් වැඩක් නැහැ කියන එක. ඒ නිසා කූඹියෝ තුළින් ප්‍රේක්ෂකයන් නොහිතන විදිහේ දේවල් දෙන්නයි අපි නිතරම උත්සාහ කළේ. 
 
2014 වසරේ රූගත කළා කියන “කූඹියෝ” ටෙලි නාට්‍යයට 2015 වසරේ බලයට පත්වූ වත්මන් ආණ්ඩුව හඳුන්වාදුන් “බස් ‍ලේන්” වල දර්ශන ඇතුළත් වුණේ කොහොමද කියලා ප්‍රේක්ෂකයෝ ප්‍රශ්න කරනවා? 
 
කූඹියෝ ටෙලි නාට්‍යයට ප්‍රේක්ෂකයන්ගෙන් තිබෙන ඉහළ අවධානය නිසා ඔවුන් ටෙලි නාට්‍යයෙන් පෙන්වන ඉතාම සුළු දේවල් ගැන පවා හුඟක් සැලකිලිමත් වෙනවා.  බස් ‍ලේන් ගැන. හැබැයි Advertise කළේ වත්මන් ආණ්ඩුව වුණාට කලිනුත් ඒ ව්‍යාපෘතිය ක්‍රියාත්මක වුණා. මම මේ කියන ගැටලුවට ෆේස්බුක් හරහාත් සාක්ෂි ඇතිව පිළිතුරු දුන්නා. 
 
ඔබ කියන්නේ ටෙලි නාට්‍යයට අතරමැදදී කොටස් එකතුවුණේ නැහැ කියලද? 
 
ඔව්. ටෙලි නාට්‍යය පටන් ගනිද්දීත් මම කිව්වා කූඹියෝ කොටස් 58කින් අවසන් වෙනවා කියලා. අදටත් මම ඉන්නේ ඒ ස්ථාවරයේම තමයි. ඊට වඩා එක කොටසක්වත් වැඩිපුර විකාශය වෙන්නේ නැහැ. 
 
ඒ කියන්නේ අලුතෙන් කොටස් රූගත කරලා කියලා සමහරු කියන කතාවේ කිසිදු පදනමක් නැද්ද? 
 
සමහර Time lapses කිහිපයක් පමණක් අලුතින් රූගත කරන්න සිද්ධ වුණා. නමුත් එයින් කතාවේ කිසිදු   වෙනසක් වෙන්නේ නැහැ. මොකද මුල් පිටපත අපි දශමයකින්වත් වෙනස් කරලා නැහැ. ප්‍රේක්ෂකයන්ගේ බයක් තියෙනවා වෙනත් සමහර ටෙලි නාට්‍යවලට වෙනවා වගේ විවිධ අයගේ වුවමනාවන්ට අනුව කූඹියෝත් වෙනස් වේවි කියලා. නමුත් අධ්‍යක්ෂවරයා විදිහට මම පැහැදිලිව කියනවා කාගෙවත් බලපෑම්වලට “කූඹියෝ” යටනොවන බව. 
 
කූඹියෝ ටෙලි නාට්‍යයේ ප්‍රියන්තගේ චරිතය දැන් හැසිරෙන්නේ ලංකාවේ ප්‍රකට දේශපාලකයෙක් වගෙයි කියලා ඇතැම් ප්‍රේක්ෂකයන් කියනවා. ඇත්තටම ඒ චරිතය ගොඩනගද්දී යම් කිසි දේශපාලකයකුව ආභාෂයට ගත්තාද? 
 
එහෙම කවුරුවත් ඉලක්ක කරගෙන ‍නෙවෙයි අපි ඒ චරිතය ගොඩනැගුවේ. අවසන් කොටස නැරඹුවාට පස්සේ ප්‍රේක්ෂකයන්ට මේ හැමදෙයක්ම තෝරා බේරාගන්න හැකි වේවි. 
 
කූඹියෝ මෙතරම් ජනප්‍රිය වෙලත් එහි නිර්මාණකරුවන්ට එයින් තවමත් පාඩුයි කියලාත් ඔබ මුහුණු‍පොතේ සටහනක් තබමින් පවසා තිබුණා. 
 
ඔව් තවත් කාලයක් තියාගෙන ඉන්න බැරි නිසයි අපි අඩු මුදලකට “කූඹියෝ” ස්වාධීන රූපවාහිනියට දුන්නේ. ටෙලි නාට්‍යයක් ලාබ ඉපැයුවා කියලා ලාබයෙන් කොටසක් එහි නිර්මාණකරුවන්ට දෙන ක්‍රමවේදයක් ලංකාවේ තවම ඇතිවෙලා නැහැ. ඒක ස්වාධීන රූපවාහිනියේ වරදක් ‍නෙවෙයි. ඒක මේ මුළු සිස්ටම් එකේම තියන වරදක්. මම ඒ අසාධාරණ ක්‍රමයට එරෙහිව දිගටම සටන් කරනවා.
 
කිෂාන් කංනකේ

දමිතා අබේරත්න මේ දවස්වල ලොකු මන්නයකුත් අරගෙන මාළු පෙට්ටියකුත් මෝටර් බයිසිකලයක බැඳගෙන කොට්ටාව පාරේ වටේට “මාළු....... මාළු.......” කියලා කෑ ගහමින් ඇවිදින බව අපිට ආරංචි වුණා. දමිතා නිළිකම අතහැරලා මාළු වෙළෙඳාමටවත් බැහැලාද? අපි ඒ ගැන විමසන්නයි පසුගිය දවසක දමිතව හමු වුණේ. දමිතා කොහොමද මේ දවස්වල මාළු බිස්නස් සරුද? 
 
අ‍පොයි ඔව්. මේ දවස්වල මං කරන්නේ මාළු බිස්නස්. ජාතික රූපවාහිනියේ විකාශනය වන “රැජිණියෝ” ටෙලි නාට්‍යයේ නිර්මලාගේ චරිතය හින්දයි මට මාළු, මාළු, කිය කියා  පාර දිගේ ඇවිදින්න සිදුවුණේ. ඇත්තටම මේ චරිතය මගේ ජීවිතයට ලැබුණු සුවිශේෂී අවස්ථාවක්. 
 
මොන විදියටද මේ චරිතය ගලාගෙන යන්නේ? 
 
විශේෂයෙන්ම කියන්න ඕනේ  “රැජිණියෝ” ටෙලි නාට්‍ය පුරාවටම කතා කරන්නේ කාන්තාවන්ට සිදුවෙන අසාධාරණකම් ගැන කියන එක. ප්‍රධාන චරිත පහ අතරින් මම නිරූපණය කරන්නේ මාළු නිර්මලාගේ චරිතයයි. මාළු නිර්මලා කියන්නේ බොහොම අහිංසක ගැහැණියක්. නමුත් පසුව බොහෝ තාඩන පීඩනවලට ලක් වෙලා. ඇය ශක්තිමත් කාන්තාවක්් බවට පත් වෙනවා. ඒ හින්දම කාට හරි අසාධාරණයක් සිදුවුවහොත්,  ඒ වෙනුවෙන් ඉදිරිපත් වෙන්න නිර්මලා දෙපාරක් හිතන්නේ නැහැ. 
 
මේ වගේ චරිතයකට පණ පෙවීම ඔබට ‍ලේසි වුණාද? 
 
මම වෙජිටේරියන්. ඒ නිසා මාළු කපන කොටන වැඩ ටිකක් මට දරාගන්න අමාරු වුණා. ඒත් බොහොම අමාරුවෙන්, අකමැත්තෙන් මම දැන් මාළු කපනවා. සමහර දවස්වලට මම ගෙදර ඇවිත් පැයක් විතර නානවා. මොකද මාළු පෙට්ටියේ ගඳ මට ඉවසාගන්නම බැහැ. ඒත් චරිතෙට තියෙන ආශාව හින්දා හැම ගඳක්ම ඉවසාගෙන ඉන්නවා. 
 
දමිතාත් මාළු නිර්මලා වගේ තීන්දු තීරණ ගන්න අවස්ථා තියෙනවද? 
 
ඔය අහන්නේ මම මාළු නිර්මලාට සමාන වෙන අවස්ථා ගැන නේද? ඇත්තටම සමහර තැන්වලදී මම සමහර දේවල් කියනකොට හරි දැඩියි. නිර්මලා වගේම දෙයක් කියන්න තිබ්බොත් මං ඒ දේ කෙළින්ම කියනවා. ඒක මට ‍පොඩි කා‍ලේ ඉඳලාම තියෙන පුරුද්දක්. සමහරුන්ට මාව අල්ලන්නේ නැත්තේත් මම කෙළින් කතා කරන හින්දා වෙන්න ඇති. හැබැයි මං ‍පොඩි කා‍ලේ ඉඳලාම අහිංසක විදියට ජීවත් වෙන කෙනෙක්. ඒත් සමාජය විසින් සමහර තැන්වලදී අපේ හිත් ගල් කරනවා. 
 
මේ දවස්වල මාළු නිර්මලාට ලැබෙන්නේ මොන වගේ ප්‍රතිචාරද? 
 
ප්‍රතිචාර නම් හරිම හොඳයි මං මෝටර් බයිසික‍ලේ පැදගෙන මාළු......... මාළු.......... කියාගෙන කොට්ටාව ගම වටේට යනකොට සමහරු ඇවිත් කියනවා ෂා... මරුනේ කෑ ගහන විදිහෙන් අපි ඇත්තටම හිතුවේ ඇත්තම මාළු කාරියක් කියලයි. කොහොමත් මං කරන ඕනෑම චරිතයකට ලැබෙන ප්‍රතිචාර ඉතාමත් ඉහළයි. මං හිතනවා අපි දෙයකට අවංක වුණාම ඊට සොබා දහම විසින්ම හොඳ ප්‍රතිචාර ලබාගන්න අපට අවස්ථාව සලසා දෙනවා කියලා. 
 
මාළු නිර්මලා කියන චරිතය එක්කම ජීවත් වෙන කොට අමතක නොවන සිදුවීම් එහෙමත් වෙලා ඇති නේද? 
 
අ‍පොයි ඔව්. මම මෝටර් බයිසික‍ලේ පදින්න හරිම බයයි. ඒත් මාළු නිර්මලාගේ චරිතේ කරන කොට වැටි වැටී මෝටර් බයිසික‍ලේ පැදපු අවස්ථා හරි සුන්දරයි. ඒ වගේම මාළු කපන සිද්ධියත් මට අමතක කරන්න හරිම අමාරුයි. ඒක මගේ ඔළුවේ දිගටම රෙජිස්ටර් වෙලා තියෙනවා. මං මාළු මන්නේ අතට ගත්තාම දෙයියනේ සමහරු මිනිසුන්ව කපන්නෙත් මේ විදියට නේද කියන මහා භයානක සිතුවිලි මගේ හිතට එනවා. 
 
ඔබේ ඉදිරි කලා කටයුතු පෙළ ගැසී ඇති ආකාරය ගැන දැන ගන්නත් “රිද්ම” පාඨකයෝ කැමති වෙයි? 
 
‘‘සල්සපුනා’’ ටෙලි නාට්‍ය මේ දවස්වල විකාශය වෙනවා. බොහෝ දෙනා මට කියනවා අපි සල්සපුනා බලන්නේ දමිතා ඔයා නිසාමයි කියලා. ඒ වගේම අයිස්ක්‍රීම්, ස්වර කියන චිත්‍රපට දෙක එන්න තියෙනවා. ටෙලි නාට්‍ය ගත්තොත් වර්ණ, පූරී කියන නිර්මාණ දෙකත් ඉදිරියේදී විකාශය වෙයි. 
 
සමන්මලී නැලිගම

“කාටවත් නොකී රහසක්” රිද්මට කියන මේ අවස්ථාවේ මම හෙළි කරන්න යන රහස නම් ටිකක් බරපතළ එකක්. ඒ රහස හෙළි කරන්න කලින් මට විශේෂයෙන් කිවයුතු දෙයක්  තියෙනවා. 
“නිළියෝ ගණිකා වෘත්තියේ යෙදෙනවා” කියන්නේ ඇත්තද? කියලා දවසක් එක්තරා මාධ්‍යවේදියෙක් මගෙන් ඇහුවා. “නිළියෝ ගණිකා වෘත්තියේ යෙදෙන්නේ නැහැ. ඒත් ගණිකාවෝ නිළිකමට එන හින්දයි ඔය වගේ කතාවක් හැදිලා තියෙන්නේ” කියලා මම ඔහුට උත්තර දුන්නා. නැතිබැරිකමට, අසරණකමට ගැහැනුන් ගණිකා වෘත්තියට යනවා. ඒත් තමන්ගේ ආත්මය පාවා දීලා හම්බ කරනවට වඩා කුලී වැඩක් කරලා ජීවිකාව ගෙනියන්න බැරිද කියන එකයි මට තියෙන ප්‍රශ්නය. ඒ කොහොම වුණත් ඒක ඒ අයගේ පෞද්ගලිකත්වය. තමන්ගේ ශරීරය අලෙවි කිරීම තමන්ගේ කැමැත්තට ඒ අය කරනවා කියමුකෝ. ඒත් ඒ වටිනාකම වැඩිකරගන්න. 
“මම නිළියක්” කියාගන්න රූප පෙට්ටියේ මූණ දාගන්න කලාව වගේ උත්තරීතර දෙයක් පාවා දෙන එකනම් අනුමත කරන්න බැහැ. හැමදේම කරලා කරන්න දෙයක් නැති වුණාම රඟපෑම තෝරා ගන්න එක අනුමත කරන්න බැහැ. ඒ හින්දයි මම මේ රහස හෙළි කරන්න තීරණය කළේ. 
මෙන්න මේකයි කතාව. විදෙස් රටක පදිංචි ශ්‍රී ලාංකික හිතවතෙක් ලංකාවට ආවා. ඔහු මටයි මගේ සැමියා සුජීවටයි රාත්‍රී ආහාරයට ආරාධනා කළා. ඉතින් අපි දෙන්නත් ලෑස්ති වෙලා මේ කියන අයගේ නිවසට ගියා. අපිව බොහොම සුහදව පිළිගත්තු ඔහු ටිකක් අපිත් එක්ක කතා කර කර හිටියා.
“ඩාලින්...ඉක්මනට ඔය කූල් ඩ්‍රින්ක්ස් ගෙනෙන්න...”
අර මනුස්සයා ගේ ඇතුලට හැරිලා එහෙම කියද්දී මට ඇතිවුණේ කුතුහලයක්. එයා බැඳලා දරුවෝ පවා ඉන්න කෙනෙක්. බිරිඳයි දරුවොයි එයයි ඉන්නේ පිටරට. සති දෙකකට ලංකාවට ආවේ තනියම කියලයි මේ පුද්ගලයා අපට කිව්වේ. එතකොට කවුද මේ “ඩාලිං” කියලා මම හොඳට බැලුවා. ඔය වෙලාවේ එක්තරා තරුණියක් ශීතකල බිම බඳුන් සහිත බන්දේසියක් අරගෙන අපි ළඟට ආවා. මට මේ ගෑනු ළමයගේ මුහුණ හොඳට පුරුදුයි. මම උනන්දුවෙන් එයා දිහා බලාගෙන හිටියා. 
“අක්කි.... අක්කිට මතකද මාව.... අපි අර... “.....” ටෙලි නාට්‍යයේ අපි දෙන්නා එකට රඟපෑවේ.
මේ ළමයා කිසිම ලැජ්ජාවක් නැතුව එහෙම කියද්දී තමයි මට මතක් වුණේ ඇය මා රඟපාපු ටෙලි නාට්‍යයක අතිරේක දර්ශනයක හිටි බව. ඒත් එක්කම මම වැලමිටෙන් සුජීවගේ කිහිල්ලට ඇන්නා. “අපිට හදිසි ගමනක් තියෙනවා. ඒකට නොයාම බැහැ. ආයේ දවසක මුණගැහෙමු....” 
මගේ හැටි දන්න සුජීව කිව්වා. ‘රෑ කෑමට ඉන්න’ කියලා අර පුද්ගලයා බලකරත් අපි ඒ වෙලාවෙම එතැනින් පිටත්වෙලා ආවේ කේන්තිය දරාගන්න බැරිකමටයි. 
ඒ පුද්ගලයා ලංකාවේ ඉන්න සති දෙක තුනට තමන්ගේ පාළුව මකාගන්න කෙනෙක් හොයලා දෙන්න කියලා තැරැව්කරුවෙකුට කියලා තියෙනවා. ඒ අතරමැදියා තමයි ඔහුට “නිළියක්” සපයලා තියෙන්නේ. නිළියක් හින්දා නියමිත මුදලට වැඩි මුදලක් වැය කරන්නත් ඔහුට සිදුවෙලා. අර ගෑනු ළමයගේ පූර්ණ කාලීන රැකියාව තමයි ගණිකා වෘත්තිය. ඒ අතරතුර කොහොම හරි ටෙලි නාට්‍යයකට මූණ දා ගන්නවා. ටෙලි නාට්‍යයක සමූහ දර්ශනයකට හිටියත් “මම නිළියක්” කියන අය ඉන්නවානේ. මේ ළමයත් “මම නිළියක්” කියලා තමන්ගේ ගැණුම්කරුවන්ගෙන් අය කරන මිල වැඩිකරගන්නවා. 
ඊට කාලෙකට පස්සේ මම රඟපෑ තවත් ටෙලි නාට්‍යයක සමූහ දර්ශනයකට ඇය ඇවිත් හිටියා
“හා කොහොමද.. ඊට පස්සේ කාත් එක්කවත් ගියේ නැද්ද...?” 
මම උපහාසයෙන් එහෙම ඇහුවේ ඇගේ පෞද්ගලිකත්වය මට අදාළ හින්දා නොවෙයි, ඇය නිළිකමට කරන අපහාසය මට අදාළ නිසා. 
“අනේ.... අක්කි... කියන ඒවා...” 
ඒ ළමයා කිසිම ලැජ්ජාවක් නැතුව එහෙම කියලා හිනාවුණා. පස්සේ එයාගේ විස්තර ඇහුවම නම් මටත් අනුකම්පාවක් ඇතිවුණා. ඇය ප්‍රශ්න ගොඩක ඉන්න කෙනෙක්. මුදල් අවශ්‍යතාවයටයි මෙහෙම කරන්නේ. ඒත් ගැහැනියක් අසරණ වුණාට තියෙන එකම විකල්පය ගණිකා වෘත්තියද..? අනෙක එවැනි වෘත්තියක යෙදෙන කෙනෙක් තමන්ගේ මිල වැඩිකරන්න රූප පෙටිටියට මූණ දාගන්න ක්‍රමයක් විදියට උත්තරීතර කලාව පාව්ච්චි කරන එක හරිද? 
 
ආරියවංශ කුලතිලක

ගෙලෙහි බාහිර කැපුම් නොමැතිව සිදුකරන Trannsoral Laparoscopic Thyroidectomy නමැති සැත්කම කුලියාපිටිය මූලික රෝහ‍ලේදී අති සාර්ථකව ඊයේ (8) සිදුකර ඇත.ලංකාවේ ප්‍රථම වරට සිදුකළ මෙම සැත්කම දකුණු ආසියාවේ තායිලන්තය, ඉන්දියාව වැනි ස්ථාන කිහිපයක පමණක් සිදුකර ඇති අතර ඉන්දියාවේ පවා සිදුකර ඇත්තේ මීට මාස 10 කට ඉහතදී බවට තොරතුරු ඇති බව පවසන කුලියාපිටිය මූලික රෝහ‍ලේ උගුර, කන, නාසය පිළිබඳව විශේෂඥ වෛද්‍ය රිස්නි සක්කාෆ් මහතා දකුණු ආසියාවේ සිවුවැනි වරට සිදුකළ අවස්ථාව මෙය බවද පැවැසීය. සෑම අයකුම සාමාන්‍යයෙන් ගෙලෙහි කැපුම් යොදා සිදුකරන සැත්කම්වලින් හටගන්නා කැලැල් හේතුවෙන් ඇතිවන බාහිර පෙනුමේ අවලක්ෂණ ස්වභාවයට අකමැති බැවින් මෙම සැත්කම සිදුකිරීමෙන් අනතුරුව රෝගියා නිර්වින්දනයෙන් මිදුණ පසු අවම වේදනාවකින් හා අවම රුධිර වහනයකින් සිදුකළ හැකි අතර ගෙල ප්‍රදේශයේ කැපුම් තුවාල කැලැල් ඇති නොවන බවද වෛද්‍යවරයා පැවැසීය.
වෛද්‍ය රිස්නි මහතා පවසන්නේ තාක්ෂණික දෝෂ බොහොමයක් නොතිබෙන්නට ඉතා සුළු වේලාවකින් අදාළ ශල්‍ය කර්මය සිදුකළ හැකි බවයි.


කුලියාපිටිය මූලික රෝහ‍ලේ වෛද්‍ය අධිකාරී අයි. එස්. යද්දෙහිගේ මහත්මිය ඇතුළු විශේෂඥ වෛද්‍ය කාර්ය මණ්ඩලය, වෛද්‍ය කාර්ය මණ්ඩලය, හෙද හා කණිෂ්ඨ කාර්ය මණ්ඩලය මෙලෙස ලංකාවේ ප්‍රථම වරට කොළඹින් පිටතදී සිදුකරන සැත්කමක් වුවත් ඊට අවදානම නොගෙන තමන් පිළිබඳව විශ්වාසය තබා දැක්වූ සහය මෙම සැත්කම සාර්ථකව සිදුකිරීමට ශක්තියක් වූ බවද විශේෂඥ වෛද්‍ය රිස්නි සක්කාෆ් මහතා පැවැසීය.

ඇම්. ඊ. සෝමසිරි - කුලියාපිටිය

මේ එළඹ ඇත්තේ මැතිවරණ සමයකි. මෙවැනි ඡන්දවලදී විශේෂයෙන් සමාජ කරලියට පැමිණෙන පුද්ගලයෝ වර්ග කිහිපයක් වෙති. ඔවුන් අතුරින් මැතිවරණ අනාවැකි කීමට කල එළි බසින ‍ජ්‍යොතිෂවේදීන්ට අප සමාජයෙන් විශේෂ ආකර්ෂණයක් හිමි වෙයි.

රූපවාහිනී රියැලිටි වැඩසටහන් මගින් 'තරු' බිහි කිරීම මේ දිනවල ශීඝ්‍රාකාරයෙන් සිදුවෙමින් තිබේ. රියැලිටි වැඩසටහන් මගින් නොවුණත් ජනමාධ්‍ය මගින් දොරට වඩමවන '‍ජ්‍යොතිෂ තරු' කිහිපයක්  මේ රටේ සිටිති. ඉතා තරඟකාරී මට්ටමින් එකිනෙකා පරයමින් අසන්නවුන්ගේ ලොමු දැහැ ගැන්වෙන අන්දමේ අනාවැකි කීම නිසා ඔවුහු එලෙස ජනකාන්ත බවට ද, තරු බවටද එසේ නැතහොත් නවීන ග්‍රාම්‍ය ව්‍යවහාරයට අනුව කිවහොත් '‍පොරවල්' බවටද පත්ව හිඳිති.

මොණර නැටුම් බැලීමට අපි කවුරුත් කැමැත්තෙමු. සුවිසල් නීල වර්ණ අවානක් සේ පිල් විහිදුවා නටන මොණර නැටුම අතිශය දැකුම්කළුය. එහෙත්, ඒ සුන්දරත්වය ඇත්තේ  ඉදිරිපසින් බලන විට පමණි. එම මොණර නැටුම පිටුපසින් සිට නරඹන්නකු හට එම අලංකාරය වෙනුවට දැකගත හැක්කේ බාහිරව විවෘතව පවතින මොණරාගේ අධෝ මුඛයයි. සාමාන්‍ය ජන සමාජයට විසිතුරු මොණර නැටුමක් සේ පෙනෙන මෙම ජනකාන්ත ‍ජ්‍යොතිෂ තරු පවසන අනාවැකි සම්බන්ධයෙන් කීමට ඇත්තේ ද ඒ ටිකමය. ඊට හේතුව ‍ජ්‍යොතිෂය පිළිබඳ සෛද්ධාන්තික පසුබිම හදාරා ඇති ඕනෑම කෙනෙකුට ඔවුන්ගේ එම අනාවැකි තුළ පවතින ශාස්ත්‍රීය නිර්වස්ත්‍ර භාවය මැනවින් පෙනී යාමය.

2015වසරේ පැවැති ජනාධිපතිවරණය ‍ජ්‍යොතීර්වේදයේ නාමයෙන් රඟ දැක්වුණු මොණර නැටුම් රැසක් එක්වර  සමාජ කරලියට පැමිණි අවස්ථාවකි. මේ මැතිවරණයෙන් මහින්ද රාජපක්ෂ මහතා බලයට නාවොත්  ඔබ මොකද   කරන්නේ? සිරස රූපවාහිනී සජීවී වැඩසටහනකට සම්බන්ධවූ එවන් මොණර කුලයේ ‍ජ්‍යොතීර්වේදියෙකුගෙන් මාධ්‍යවේදී කිංස්ලි රත්නායක ඇසීය. එවිට ගත් මොහු ගත්කටටම කීවේ 'මම මෙතැනට ඇවිත් වෙඩි තියා ගන්නවා' යනුවෙනි. කෙසේ හෝ එම ජනපතිවරණයෙන් මහින්ද රාජපක්ෂ මහතා පරදවා මෛත්‍රීපාල සිරිසේන මහතා ජනාධිපති පදවිය භාර ගැනීමෙන් පසු ඔබ එදින ප්‍රසිද්ධියේ ‍පොරොන්දු වූ පරිදි වෙඩි තබා නොගත්තේ ඇයි?යනුවෙන් මාධ්‍යවේදියෙකු එම ඊනියා ‍ජ්‍යොතීර්වේදියාගෙන් ප්‍රශ්න කළේය. එවිට ඔහු දී ඇත්තේ මෙබඳු රසාලිප්ත පිළිතුරකි. 'මං වෙඩි තියාගත්තම දරුවව ඉස්කෝලෙ ගෙනියන්නේ කවුද?'

කිසියම් මැතිවරණයක් ජයග්‍රහණය කරන පක්ෂය හෝ පුද්ගලයා ‍ජ්‍යොතිෂය මගින් කල් ඇතිව හඳුනාගත හැකිද?ඒ සම්බන්ධයෙන් 'කණා පල්ලම් ගැසීමකින්' හැරුණු කොට එවන් අනාවැකියක් කීමේ කිසිදු හැකියාවක් ‍ජ්‍යොතිෂය සතුව නොමැති බව සහතිකය.

 සමුද්‍ර යාත්‍රිකයන්ට ප්‍රදීපාගාර උපකාරී වන්නේ යම් සේද ‍ජ්‍යොතීර්වේදීන් හට එලෙසින්ම උපකාර ලබාගත හැකි ‍ජ්‍යොතීර් ශාස්ත්‍ර සංග්‍රහ විශේෂයක් තිබේ. ඒවා හැඳින්වෙනුයේ 'පංචාංග ලිත්' යනුවෙනි. එම ලිත් අතරින් දැනට අප රටේ ග්‍රහස්පුට පංචාංග ලිතට හිමිවනුයේ මුල් තැනකි. එමෙන්ම එම පංචාංග ලිත් සංස්කරණය කරනුයේ සෛද්ධාන්තික ‍ජ්‍යොතීර්වේදය පිළිබඳ  ප්‍රාමාණික දැනුම් සහිත විද්වතුන් විසිනි. ග්‍රහස්පුට පංචාංග ලිතේ සංස්කාරක වරුන්ව සිටි එස්.ඩබ්ලියු කරුණාරත්න සහ ඇම්.කේ රොහාන් සිසිර කුමාර යන විද්වතුන් විසින් 'හඳහන් බැලීමේ ගුරු මුෂ්ටි' නම් ‍ජ්‍යොතිෂ ග්‍රන්ථයක් රචනා කොට තිබේ. එය ‍ජ්‍යොතිෂයට අත්පොත් තබන නවකයන් හට ඒ සම්බන්ධ වැදගත් ගුරු හරුකම් රැසක් ලබා දෙන කෘතියකි. එම කෘතියෙහි දෙවන කාණ්ඩයේ පෙරවදනේම මෙවන් සඳහනක් තිබේ.

.... "මේ ශාස්ත්‍රය අනුව අකුරක් අකුරක් පාසා ඉලක්කමක් ඉලක්කමක් පාසා හරියටම හරියන ආකාරයට සියල්ලම කිරි ගහට ඇන්නා වගේ කීමට කිසිවකුටත් නොපුළුවන. එසේ කිව හැකි ස්ථිර නිවැරදි ශාස්ත්‍ර නීති ද මෙහි නැත. කල්ප ගණනක් පෙනෙන කුශාග්‍ර බුද්ධිමත් සෘෂිවරුන් විසින් රචනා කර තිබෙන සූර්ය සිද්ධාන්ත, බ්‍රහ්ම සිද්ධාන්ත ආදී මූලික ‍ජ්‍යොතිෂ ග්‍රන්ථවල පවා ග්‍රහ ගමන් ආදිය පිළිබඳ එකිනෙකට වෙනස් ගණිත චක්‍ර පෙන්වා තිබේ. ඒ ස්ථිර තැනම සොයා ගැනීමට නොහැකි නිසා තමන්ගේ ඥානයට පෙනෙන එයට ඉතා ආසන්න ගණන බව දත යුතුය.

මෙයින් අපට සිතන්නට තිබෙන්නේ සමහර විට මේ ශාස්ත්‍රය සියයට සියයක්ම සත්‍ය සිද්ධාන්ත ක්‍රම මතම ගොඩනැගූ විද්‍යාවක් නොවන බවත් එම ශාස්ත්‍රීය ක්‍රමවත් හරි හැටි ඉගෙන ගත් ‍ජ්‍යොතිෂ ශාස්ත්‍රඥවරුන් ලොව පහළවී නැති බවත්ය. "

ජනමාධ්‍ය මගින් මොණර රැඟුම් පා තම පශ්චාත් භාගය සමාජ කරලිය හමුවේ එළිදැක්වීමෙන් පසුව මේ දිනවල මුලුගැන්වී සිටින රාජකීය ‍ජ්‍යොතීර්වේදීන් වශයෙන් පවා මාධ්‍ය මගින් හඳුන්වනු ලැබූ රාජකීය කට්ටයන්  සහ වෙට්ටපිත්තලයන් කිහිප දෙනෙකි. නමුත්  ඔවුන් තම ලජ්ජා බය අතහැර ඉදිරි මැතිවරණ ඉලක්ක කර ගනිමින්ද ‍ජ්‍යොතිෂ අනාවැකි මගින් මොණර රැඟුම් පෑමේ යම් හැකියාවක් තිබේ.

 එහෙත් එවන් තොරොම්බල් කාරයන් හැරුණු කොට ‍ජ්‍යොතිෂය ආදී වෛදික ශාස්ත්‍රයන් පිළිබඳව ගැඹුරටම හැදෑරූ පඬිවරුන් ද අප රටේ සිටි හා සිටින බව තවමත් බොහෝ දෙනෙක් නොදනිති. පේරාදෙණිය විශ්වවිද්‍යාලයීය දර්ශන අංශයේ මහාචාර්ය පදවිය හොබවා දැනට මෙලොවින් සදහටම සමුගත් ගුණපාල ධර්මසිරි විද්වතාණන් එවන් ‍ජ්‍යොතීර් ආයුර්වේද ආදී ප්‍රාචීණ විෂයන් පිළිබඳ හදාරා තිබූ පඬිරුවනකි.

‍ජ්‍යොතිෂය සම්බන්ධයෙන් මා තුළ පවත්නා ආකල්පය කෙසේ වුවත් මානව ශාස්ත්‍රඥයකු වශයෙන් මගේ ගෞරවාදරයට ලක්ව සිටි මෙම පඬිවරයා මට මුල්වරට මුණගැසුණේ 2002වසරේ දිනයෙක පේරාදෙණිය විශ්වවිද්‍යාලයීය ශාස්ත්‍ර පීඨ කාර්යාලයේදීය. එහිදී ඔහු කේන්ද්‍ර බැලීම සම්බන්ධයෙන් කළ මෙම ශාස්ත්‍රීය විග්‍රහය අදටත් මගේ මතකයේ තදින්ම රැඳී පවතී.

 "යමෙක් උපදින දිනය, වෙලාව, ස්ථානය මුල්කරගෙන ජන්ම පත්‍රයක් සකස් වුණත් ඒක මූලික වශයෙන් ඒ පුද්ගලයාගේ දෙමාපියන්, සහෝදර සහෝදරියන්, විවාහ වුණාට පස්සේ බිරිඳ, දරුවන් මේ හැමෝගෙම ග්‍රහචාර එක්ක සම්බන්ධ වෙනවා. ඒ වගේම තමන් ජීවත් වෙන භූගෝලීය, දේශගුණික, සමාජ, ආර්ථික, සංස්කෘතික මේ හැමදෙයක්මත් එකිනෙකට සම්බන්ධ වෙනවා. උදාහරණයක් ගත්තොත් රාජ යෝගයක් එක්ක මෙලොව එළිය දකින පුද්ගලයා වටා ඒකරාශී වන මේ වගේ තුලනාත්මක පසුබිම් කරුණු මුල්කරගෙන ඒ පුද්ගලයාට රටක, පළාතක, ගමක හරි නායකත්වයක් හම්බු වෙන්න පුළුවන්. එහෙම නැත්නම් ඒ පුද්ගලයාට අනිත් හැමෝටම යටත්, යාචක, ජීවිතයක් අත් වෙන්නත් පුළුවන්. එහෙම තමයි සෛද්ධාන්තික ‍ජ්‍යෝතීර්වේදයේ හැඳින්වෙන්නේ,"මහාචාර්ය ගුණපාල ධර්මසිරි විසින් එදා කළ ඒ ඓතිහාසික ප්‍රකාශය 2015මැයි 08දා සිදුවූ ඔහුගේ අභාවයෙන් පසු පේරාදෙණිය විශ්වවිද්‍යාලයීය ශිෂ්‍ය සහ ආචාර්ය ප්‍රජාව විසින් එළිදක්වන ලද 'ගුණපාල ධර්මසිරි - ජීවිතය සහ දර්ශනය' නම් ශාස්ත්‍රීය ලිපි කළඹට  එක් කිරීමට මට  හැකිවිය. එමෙන්ම වත්මන් මාධ්‍ය කරලියේ රැඟුම්පාන තරු ගණයේ ඊනියා තොරොම්බල්කාර ‍ජ්‍යොතිෂ මොණරුන්ගේ පශ්චාත් භාගය දැකීමෙන් හටගන්නා අප්‍රසාදය සහ පිළිකුල මැඩගැනීමේ කැමැත්තෙන් සිටින්නවුන්ගේ මනදොළ සපුරාලනු පිණිස හඳහන් විශ්වාස නොකළ ‍ජ්‍යොතිෂ පඬිවරයා නම් වන එම පරිච්ජේදය මා විසින් සම්පාදනය කරන ලදුව පසුගිය දා එළිදැක්වුණු 'මනරංජන මිථ්‍යා කතා කෘතියේ යාවත්කාලීන සංස්කරණයටද එක් කළෙමි.

තිලක් සේනාසිංහ

 

 

IMAGE

බසයේදී දුන් බොරු විවාහ පොරොන්දුවෙන් පවුල්ජීවිතේ 'හබක්'

IMAGE 2018 Feb 23 12:25
ඔහු අගනුවර ප්‍රසිද්ධ සමාගමක විධායක නිලධාරියෙකි. වයස අවුරුදු 40 ඉක්මවූ ඔහුට රූමත් බිරිඳක් සහ...
Views - 4012

අහිමි පෙම ඉල්ලා පෙම්වතියට ප්‍රසිද්ධියේ ගුටි ඇනලා

IMAGE 2018 Feb 23 10:42
පැරණි පෙම්වතියගෙන් අහිමි වූ ආදරය නැවත ඉල්ලා එය නොලැබුණු විට නාරාහේන්පිට ප්‍රදේශයේදී ඇයට...
Views - 2653

සංසාර සිහිනයේ ගී සංකල්පනය මම 'ටැබ් එකේ ටයිප් කරපු' එකක්

IMAGE 2018 Feb 21 12:00
සනුක වික්‍රමසිංහ ගායනා කරන “සංසාර සිහිනේ” කලක පටන් බොහෝ ගීත දර්ශකවල පෙරමුණ ගෙන තිබෙන...
Views - 3729

මම නාට්‍ය කලාවෙ ඉන්නේ ඒ ගැන තියන 'උණ' නිසයි

IMAGE 2018 Feb 21 11:53
වේදිකාව, පුංචිතිරය සහ සිනමාව යන මාධ්‍ය ත්‍රිත්වයෙහිම සිය ප්‍රතිභාව ප්‍රකට කළ කලාකරුවකුවන...
Views - 2245

බිරිඳ රැකියාවක් නොකිරීම මගේ සාර්ථකවයට හේතුවක්

IMAGE 2018 Feb 20 14:38
“සිරස ජූනියර් සුපර් ස්ටාර්..” තරගය ගැන මුලින්ම අප ඔබගෙන් විමසන්න කැමතියි.. ඇත්තෙන්ම “සිරස...
Views - 7448

බිරිඳට පින් තකා සුනඛයන්ට දිනපතා සහල් කිලෝ 08ක දනක්

IMAGE 2018 Feb 20 14:23
මිනිසා තිරිසනුන් වන අවස්ථාත් තිරිසනා මිනිසුන් වන අවස්ථාත් අපට බොහෝ විට දක්නට ලැබුණද...
Views - 4597

Please publish modules in offcanvas position.