Coss Ear2
lakbima.lk
COSS Ear 1

මගතොටදී කාන්තාවක මුණගැසෙන බොහෝ දෙනකු පවසන ‍පොදු කරුණක් ඇත. ඒ අනේ ඔයා හොඳටම මහත්වෙලානේ යන්නය. එහෙත් එය හුදෙක් ආවාට ගියාට කරනා ප්‍රකාශයක් නොවනා බව දැන් සැබැවින්ම තහවුරුව ඇත. පසුගියදා ජන හා සංඛ්‍යා‍ලේඛන දෙපාර්තමේන්තුව සිදු කළ පර්යේෂණයකින්ද අනාවරණය වූයේ මෙරට කාන්තාවන්ගෙන් සියයට 30ක් දෙනා අධි බරින් යුක්ත වන බවය. එම ප්‍රතිශතය කොළඹ දිස්ත්‍රික්කය තුළ පමණක් සියයට 50ක් බව එම සමීක්ෂණයෙන් වැඩි දුරටත් අනාවරණය වී තිබේ. 
කෙසේ නමුත් කාන්තාවන්ගේ ස්ථූලභාවය හෙවත් බර වැඩි වීම ඇය හෘද රෝග, දියවැඩියාව, අධි රුධිර පීඩනය, ආඝාතය හා පිළිකාව වැනි බෝ නොවන රෝග රැසකට ගොදුරු වීම වැළැක්විය නොහැකි බව මේ වන විටත් හෙළිව තිබේ. ශ්‍රී ලංකාවේ පවුල් ඒකක කාන්තාවන් මුල් කර බිහිව ඇති බැවින් නිවසේ මවගේ සෞඛ්‍ය පිරිහීම සමස්ත පවු‍ලේම දියුණුවට බාධාවක් වන බව නොරහසකි.
කාන්තාවකගේ බර වැඩි වීම ආරම්බ වන්නේ වයස අවුරුදු 9 දීය. එනම් පාස‍ලේ හතර, පහ වසරට පිය නැගීමත් සමගය. ඊට ප්‍රධාන හේතුව ශිෂ්‍යත්ව විභාගය ඉලක්ක කර ගනිමින් ආරම්භ වන  අධ්‍යාපනයේ තරගකාරී බවය. දරුවන් පුටුවට සීමා කරවන තරගකාරී අධ්‍යාපනය නිසා ඔවුන් රෝගීන් බවට පත්වන බව බොහෝ දෙනා නොසිතන්නේය.  ඊට හේතුව  එම කාලය තුළ දෙමාපියන් දරුවන්ගේ අධ්‍යාපනයට මුල් තැන දෙන නමුත් ඔවුන්ගේ ‍පෝෂණයට ලබා දෙන්නේ දෙවන හෝ තුන්වන තැන වීමය. මේ අනුව දරුවන්ට සමබල ආහාර වේලක් ලැබෙන්නේ කලාතුරකිනි. ඔවුන්  නිතරම බුක්ති විඳිනුයේ තෙල්, සීනි, ලුණු, පිටි අධික  කෑම බිමය. රෝල්ස්, කට්ලට්, බනිස්, බයිට්, පැණි බිම දරුවන්ගේ ආහාර රටාවේ ප්‍රධාන අංගයන් බවට අද පත්ව තිබේ.
එසේ ක්ෂණික හා කෙටි කෑම බිමවලට  යොමු වන අතරම ‍පොත පතට පමණක් දවසේ වැඩි කාලයක් ගත කිරීමට සිදු වීම තුළ දරුවන්ට සෙල්ලම් කිරීමට විනෝද වීමට කාලයක් නොලැබේ. මේ අනුව  ශරීරයට නිසි ව්‍යායාමයක් නොලැබෙන අතර ඔවුන්ගේ ශරීරවල අතිරික්ත කැලරි දහනය කිරීමට නොහැකි වීම ශරීරයේ බර වැඩි වීමට ප්‍රධාන හේතුව වන්නේය.
පාසල් කාලය තුළදී මෙසේ බර වැඩි වන ගැහැනු  දරුවන් ක්‍රමයෙන් එම බර අඩු කර ගැනීම වෙනුවට සිදු වන්නේ එම බර තව දුරටත් එසේම පවත්වාගෙන යාම හෝ වැඩි කර ගැනීමය. දරුවන් එකතැන වාඩි වී ක්‍රියාශීලී බවින් ඈත්ව කටයුතු කිරීමෙන් හුරු කර ගන්නා අලස ජීවන රටාවෙන් මිදීමට අකමැත්තක් පෙන්වති. පහ වසර ශිෂ්‍යත්ව විභාගයෙන් ආරම්භ වන අලස ජීවිතය අ‍පොස සාපෙළ , උසස් පෙළ, විශ්වවිද්‍යාල අධ්‍යාපනය දක්වා  පමණක් නොව ඔවුන්ගේ මුළු ජීවිතය පුරාම පවතිනු ඇත.
ඉන් අනතුරුව කාන්තාවකගේ දෙවන වරට  බර වැඩි වන්නේ දරුවෙකු ප්‍රසූත කිරීමෙන් පසුවය. දරුවෙකු ලැබිමට සිටින කාන්තාවක් දෙදෙනකුට සෑහෙන ආහාර ගත යුතු බව පවසමින් අධිකව ආහාර ලබා දීමට අපේ ඇතැම් වැඩිහිටියෝ පෙළඹෙති. මේ හේතුවෙන් ගර්භණී මව්වරුන්ගෙන් සියයට 25ක් දෙනා අධි බරෙන් යුක්ත බව ද මෑතක කරන ලද සමීක්ෂණවලින් තහවුරුව ඇත. 
එපමණක් නොව දරුවා බිහිකළ පසුව  දරුවාට කිරි දීමට අවශ්‍ය බව පවසා ගර්භණී කාලය තුළ ලබා දුන් ‍පෝෂණයේ කිසිදු අඩුවක් නොකර ඇතැම් විට ඊටත් වඩා ආහාර ප්‍රමාණයේ වැඩි වීමක් කර එම කාන්තාවට ලබා දේ. මෙසේ ලබා දුන්නද ඇය කය වෙහෙසා දහඩිය පිට වන සේ වැඩ පලක් නොකරන බැවින් කැලරි දහනය අවම තත්ත්වයේ පවතී.  මේ තත්ත්වය නිසි ව්‍යායාමයෙන් තොර කල් පවතින සෞඛ්‍ය ගැටලු රැසක් ලාංකික කාන්තාවන්ට ඇති කර තිබේ. එකවර දෙදෙනකුට සෑහෙන්න ආහාර  ලබා දීම කිසිසේත් සුදුසු නොවේ. වැදගත්ම කරුණ වනුයේ ලාංකික ආහාර රටාවේ වැඩියෙන් ඇත්තේ පිෂ්ඨය වන නිසා බොහෝ විට අපට ලැබෙනුයේ පිෂ්ඨය මිස ‍ප්‍රෝටීන් නොවීමයි.
කාන්තාවකගේ තුන්වන වරට බර වැඩි වන්නේ වයස අවුරුදු 40 ඉක්ම ගිය පසුවය. සාමාන්‍යයෙන් කාන්තාවගේ පරිවෘත්තීය ක්‍රියාවන් වයස අවුරුදු 40 ඉක්ම යාමත් සමග අඩු වේ. ඒත් සමගම ශරීරයේ හෝමෝනයන්හි ක්‍රියාකාරකම් වෙනස් වීම, ආර්ථව චක්‍රය නතර වීම වැනි හේතු මත කාන්තාවක් තමන් දිනකට  ගන්නා කැලරි ප්‍රමාණය අඩු කළ  යුතුය. එක් අතකින් ඔවුන්ගේ පරිවෘත්තීය ක්‍රියාවන් අඩු වීමත් සමග ශරීරයට අවශ්‍ය  කැලරි ප්‍රමාණය අඩු කළ යුතුය. එසේම වයස් ගත වීමත් සමග ක්‍රියාශීලීව වැඩ කිරීමට නොහැකි වීම හේතුවන් ද ගන්නා ආහාර ප්‍රමාණයන් ක්‍රමයෙන් අඩු කළ යුතු වන්නේය. 
 සාමාන්‍යයෙන් වයස අවුරුදු 40 ඉක්ම වන  කාන්තාවක් දිනකට ගන්නා ආහාරයේ අන්තර්ගත කැලරි ප්‍රමාණයෙන් 200ක් අඩු කර ගත යුතු වන්නේය. එහෙත් කනගාටුවට කරුණක් වන්නේ අපේ කාන්තාවන් තම ආහාර වේල තුළ අන්තර්ගත කැලරි අඩු කරනවා වෙනුවට සිදු කරන්නේ වැඩි කිරීමය. මේ හේතුවෙන් අපගේ කාන්තාවන් බහුතරයක්  වයස් ගත වීමත් සමග බර වැඩි වීමක් පෙන්නුම් කරනු ඇත.
කෙසේ නමුත් අපගේ ඇතැම් වැඩිහිටියන්ගේ මතයක් වී ඇත්තේ වයස්ගත වීමත් සමග හොඳින් ‍පෝෂණය ලබා දිය යුතු බව පවසමින් ආහාර පාන වැඩි වශයෙන් ලබා දේ. ඒත් එහි කිසිදු සත්‍යතාවක් නොමැත. සිදු වන්නේ ශරීරයේ බර වැඩි වීම හා ඒ හරහා රෝගී වීම පමණි.
වැයවන ශක්තිය අනුව ආහාර ලබාගැනීම සඳහා නිසි ‍පෝෂණයෙන් යුත් ආහාර, විධිමත් ප්‍රමාණයකින් ලබා ගැනීම වැනි දේ මගින් නිරෝගිමත් ජීවිතයක් ලබා ගැනීමට හැකිවනු ඇත.
 
ශ්‍රියානි විජේසිංහ

හිසට සෙවණක් ලබා ගැනීම කියන මූලික අවශ්‍යතාවයවත් සපුරා ගන්න බැරුව අන්ත අසරණ තත්ත්වයකට පත්වූ පවුල් ගැන විටින් විට මාධ්‍ය ඔස්සේ අසන්නට ලැබුණා. එවැනි පුවතකින් දැනුවත් වූ ජනප්‍රිය තරුණ රංගන ශිල්පියෙක් අසරණ පවුලකට පසුගියදා පිහිට වුණා. ඒ රංගන ශිල්පියා තමයි විශ්ව කොඩිකාර. විශ්ව කොඩිකාර තමන්ගේ පියා වන පද්මසිරි කොඩිකාර සමග එක්වෙලයි මේ කටයුත්තට දායක වෙලා තිබුණේ. ඒ ගැන වැඩිදුර තොරතුරු විශ්ව ‘රිද්ම’ට කීවේ මේ අයුරිනුයි. 
 
විශ්ව පසුගියදාක ලොකු පින්කමක් කළා නේද? 
ඔව්. අපි හැමෝගේම මූලිකම අවශ්‍යතාවක් තමයි නිවහනක් ලබා ගන්න එක. ඒ වාසනාව නොතිබුණු පවුලකට උපකාරයක් වීමයි මම කරපු ඒ පින්කම. ඉන්න හිටින්න තැනක් නැතුව පරණ අබලන් වෙච්ච වාහනයක ජීවත් වන පවුලක් ගැන පුවතක් දෙරණ නාලිකාවෙන් විකාශය වෙලා තිබුණා. අම්මා ඒක දැකලා මට ඒ ගැන දැනුම් දුන්නේ. පස්සේ මමයි තාත්තයි එකතුවෙලා දෙරණට කතා කරලා ඔවුන්ගේ තොරතුරු අරගෙන ඒ අයට ඉඩමක් පරිත්‍යාග කළා.
බෙලිඅත්තේ ව්‍යාපාරිකයකු වන මධුසංඛ එම ඉඩමෙහි නිවස හදාදෙන්නට ඉදිරිපත් වුණා.
 
විශ්ව මේවගේ දෙයක් කරපු පළමු වතාව මෙය නොවෙයි නේද? 
2013 වසරේ මගේ උපන්දිනය දවසේ පවුල් 5කට පර්චස් 20 බැගින් ඉඩමක් කොටස් කරලා ත්‍යාග කළා. 2014දී පවුල් දෙකකට ඉඩම් ලබා දුන්නා. පූජා භූමියකටත් ඉඩමක් පූජා කළා. මේ වගේ පින් අතේ වැඩ මට අලුත් දෙයක් ‍නෙවෙයි. 
 
විශ්ව මේ වෙද්දී ඉඩම් කොපමණ ප්‍රමාණයක් මේ විදියට දන් දීලා තියෙනවාද? 
අක්කර 4ක් පමණ දන් දීලා තිබෙනවා. හැබැයි ඒ ගැන විශේෂයෙන් දෙයක් කියන්න තියෙනවා. 
 
මොකක්ද ඒ... ? 
මේ සියලුම ඉඩම් කට්ටි මගේ තාත්තාට (පද්මසිරි කොඩිකාර) අයිති ඒවා. ඒවා කවදාහරි මටයි අක්කටයි තමයි අයිතිවෙන්නේ. අපි දෙන්නයි අම්මයි තුන්දෙනාම තාත්තා කරන කටයුත්තට සහය දුන්නා. 
 
මේ විදියට ඉඩම් කට්ටි පරිත්‍යාග කරන්න හිතුවේ ඇයි ? 
තාත්තා පුංචි කා‍ලේ ඉඳන් අපිට ඉගැන්නුවේ ඕනෑම දෙයක් අපිට අවශ්‍ය ප්‍රමාණයට  විතරක් තියාගන්න කියලයි. වැඩිපුර තියන දේවල් තවත් කෙනෙකුට දෙන්න කියන පාඩම අපි කුඩා කා‍ලේ දීම ඉගෙන ගත්තු දෙයක්. 
 
විශ්වගේ බිරිඳ මේ කටයුතුවලට මොකද දක්වන ප්‍රතිචාරය?
ඇය මම කරන හැම කටයුත්තකටම උපරිම සහය ලබාදෙන බිරිඳක්. මේ වගේ පුණ්‍ය කටයුතුවලට දායක වෙන්න ඇයත් ගොඩක් ආසයි. 
 
විශ්ව මේ වෙද්දී දරුවෝ දෙන්නෙකුගේ තාත්තා කෙනෙක්. දැන් පවුල් ජීවිතේ වගකීමුත් වැඩිවෙලා නේද?
ඔව්. ලොකු දුවට දැන් අවුරුදු දෙකයි. පුතාට මාස 2යි. ලොකු දුව එයාගේ මල්ලිට ගොඩක් ආදරෙයි. මම ගෙදර ඉන්න වෙලාවට දෙන්නම මට ළංවෙලා ඉන්න තමයි කැමති.
 
පවුල් ජීවිතයේ වැඩ රාජකාරි රංගන ජීවිතයට බාධාවක් නැද්ද?  
අ‍පොයි නෑ, රංගන කටයුතුවලත් මම සුපුරුදු විදියටම යෙදෙනවා. අලුත්ම ටෙලි නාට්‍යයකට පසුගියදා සම්බන්ධ වුණා.
 
චන්ද්‍රලතා තන්ත්‍රිගේ
 
ඡායාරූපය - කසුන් - කමෝජ්

ඔස්ටින් අයියා'' යන නම කියූ සැණින් බොහෝ දෙනාගේ සිහියට නැගෙනු  ඇත්තේ මේ දිනවල විකාශය වන ජනප්‍රිය ටෙලි නාට්‍යයක චරිතයක්. එම චරිතය ඇතුළත් වෙන්නේ කූඹියෝ ටෙලි නාට්‍යයේ. ටෙලි නාට්‍යය තුළ නිතර පෙනී නොසිටියත්, ලැබෙන සෑම අවස්ථාවකදීම පාහේ ප්‍රේක්ෂකයන්ට මතක හිටින යමක් ඉතිරි කිරීම නිසාවෙන් ඔස්ටින් අයියා ගේ චරිතයට අද වෙද්දී බොහෝ ප්‍රේක්ෂකයන් ඇළුම් කරනවා. අපට ඔස්ටින් අයියා ගැන මෙබඳු සටහනක් තබන්නට සිදුවූයේ එම චරිතය පිටුපස සිටි ප්‍රතිභාපූර්ණ රංගන ශිල්පියා මීට දින කිහිපයකට පෙර හදිසියේ මෙලොවින් සමුගත් නිසායි. කූඹියෝ මෙන්ම 'ගිනි අවි සහ ගිනිකෙළි', 'ඇඩ්‍රස් නෑ' ආදි කලා නිර්මාණවලින්ද ඔහු ප්‍රකට කළ ප්‍රතිභාව ප්‍රේක්ෂක ජනතාවට අමතක නැතුවාට සැකයක් නැහැ. ඔහු ප්‍රවීණ රංගන ශිල්පී සේනක ටයිටස් ඇන්තනී. ටෙලි නාට්‍ය සහ වේදිකා නාට්‍ය රැසකට සිය රංගන දායකත්වය සැපයූ ඔහු, වේදිකා නාට්‍යයක් රංගගත කිරීම සඳහා විදෙස් ගතව සිටියදීයි මෙලොව හැර ගියේ. සේනක, ප්‍රවීණ කලාකරු ජැක්සන් ඇන්තනීගේ වැඩිමල් සොහොයුරායි. සිය සොහොයුරාගේ හදිසි වියෝවෙන් පසු ජැක්සන් 'රිද්ම' සමග ඔහු ගැන මතකය දිග හැරියේ මේ අයුරින්. 
 
සේනක ටයිටස් කියන කලාකරුවා ගැන කතාබහ කරන්න සුදුසුම පුද්ගලයා තමයි ඔබ. මොකද, කලාවේදී වගේම පෞද්ගලික ජීවිතයේදීත් ඔබ තමයි ඔහුව ළඟින්ම ඇසුරු කළේ? 
ඔව්, අපේ පවු‍ලේ සහෝදරයෝ පස්දෙනයි. වැඩිමලා තමයි අයියා. මම පවු‍ලේ දෙවැනියා. අපි දෙන්නා අතරේ වයස් පරතරය අවුරුදු එකහමාරක් දෙකක් විතර ඇති. ළමා කාලයේදී සහෝදරයෝ වගේම යාළුවෝ විදියට තමයි අපි දෙන්නා එකට හැදුණේ වැඩුණේ.
 
ඔබට සොහොයුරා ගැන අමතක කරන්න බැරි ළමා වියේ මතකයන් ඇති? 
ළමා කාලය ගැන සිහිපත් කරද්දී මට අයියා ගැන එක්වරම සිහියට එන එක්තරා සිදුවීමක් තියෙනවා. ‍පොඩි කා‍ලේ අපි ජීවත් වුණේ පේරාදෙණියේ කුලී නිවසක. අපේ අම්මාට තුන්වැනි දරුවා ලැබෙන්න සිටියදී මාවයි අයියවයි අල්ලපු ගෙදර නවත්තලා අම්මයි තාත්තයි මහගෙදර ගියා. අපිට ඒ කා‍ලේ හරිම දුකයි. වෙනදාට හැමදාම කඩල කන්න කියලා ගෙදරින් ලැබුණු සත පහත් ඒ දවස්වල අපට නැතිව ගියා. දවසක් අපි දෙන්නා බඩගින්නට කඩල ටිකක් හොරකම් කරන්න හිතුවා. මම තමයි ඒ හොරකම කරන්න ඉදිරිපත් වුණේ. නමුත්, ඒ හොරකම කරද්දී මාව අහුවුණා. අපිව ‍පොලීසියට අල්ලලා දෙනවා කියලා මිනිස්සු අපව බය කරද්දී අයියා තමන් පන්තියේ පළමුවැනියා බව සටහන් වෙලා තිබුණු රි‍පෝට් කාඩ් එක පෙන්නලා අනුකම්පාව දිනාගෙන මාව බේරගත්තා. 
 
සේනක සහ ජැක්සන් (ඉදිරිපස වාඩිවී) සිය සොහොයුරන් සමග කලකට ඉහත දී ගත් ඡායාරූපයක්
 
ඔබ දෙදෙනා කලා කටයුතු පටන් ගත්තෙත් එකටමයි? 
ඔව්, රාගම ‍පොඩිවී කුඹුරේ පදිංචියට ආවාට පස්සේ අපි දෙන්නා වේදිකා නාට්‍ය පෙන්වන්න පටන් ගත්තා. අපේ තාත්තා ඒකට අපිට වේදිකාවකුත් හදලා දීලා තිබුණා. 1977 අවුරුද්දේ අපි දෙන්නා නෙවිල් ඩයස් සුබසිංහගේ වාරුවෙන් යන මිනිස්සු වේදිකා නාට්‍යයේ රඟපෑවා. අයියා තමයි එහි ප්‍රධාන චරිතය රඟපෑවේ. මම කළේ සුළු චරිතයක්. ඒ නාට්‍යය සම්මාන හතක් දිනා ගනිද්දී ඒ අතරින් එකක් ලැබුණේ අයියාට.
 
ඒ අතරතුර ඔහු පුවත්පත් කලාවේදියෙකු ලෙසත් නමක් දිනාගන්නවා
මම විශ්ව විද්‍යාලයට යන කා‍ලේ වෙනකොට අයියා මල්ටිපැක්ස් පුවත්පත් ආයතනයේ සේවයට බැඳුණා. පුවත්පත් කලාවේදීයෙක් විදිහටත් ඔහු බොහෝ අයට උදව් උපකාර කළා. ජයන්ත චන්ද්‍රසිරිගේ පවා පළමු පුවත්පත් ලිපිය කරන්න අයියා තමයි ඔහුව ආතර් යූ. අමරසේන මහතාට හඳුන්වා දුන්නේ. මම ඇඳපු මුල්ම චිත්‍ර කතාවට කතාව ලිව්වෙත් අයියා. මේවගේ අපි හැමෝගෙම ජීවිතවල සේනක ටයිටස් කියන චරිතය හිටියා.
 
ඔබ දෙදෙනා එකට රඟපෑ නිර්මාණ අතරේ ප්‍රේක්ෂකයන්ගේ තදින් මතකයේ රැඳුණු විදිහේ ඒවාත් තියෙනවා නේද?
ඔව්, වීර විකුම් පෑ ජෙනරල් වැලන්ටයින් උතුමාණෙනි කියන ගීතය ඇතුළත් වෙන්නේ මෙතනින් මාරුවෙනු කියන වේදිකා නාට්‍යයේ. ඒ ගීතය අදටත් හිටි ගමන් රූපවාහිනියෙන් විකාශය වෙනවා. හැබැයි එම දර්ශනයේ මා සමග රඟපාන්නේ මගේ අයියා කියලා හුඟක් අය දන්නේ නැහැ. ඔහු තමයි එහි පැබ්ලෝ ගේ චරිතය නිරූපණය කළේ.
 
ඔබේ නිර්මාණවලට ඔහු ඉතා කැමැත්තෙන් දායක වුණා නේද?
ඔව්, ජුලියට්ගේ භූමිකාවෙන් පටන් ගත්තාම, අබා, ඇඩ්‍රස් නෑ, සී රජ ආදිය ඇතුළුව මගේ හැම නිර්මාණයකට පාහේ අයියා රංගනයෙන් දායක වුණා.
 
දශක ගණනාවක් කලා ක්‍ෂේත්‍රයේ රැඳී සිටි ප්‍රතිභාපූර්ණ නළුවකු වූ ඔහුට කලා ජීවිතයේදී සිය හැකියාවන් එළිදැක්වීමට ලැබුණු අවස්ථාවන් ගැන ඔබට මොනවාද හිතෙන්නේ?
ඔහු හොඳ කටහඬක් තිබුණු, ඉතා දක්ෂ චරිතාංග නළුවෙක්, නමුත් අපේ රටේ එවැනි චරිතාංග නළුවන්ට නිසි තැනක් ලැබෙන්නේ නැහැ. ඒ නිසා දන්නා කියන නිර්මාණකරුවන්ගේ කලා නිර්මාණවලට පමණයි ඔහුට දායක වෙන්න ලැබුණේ. කූඹියෝ ටෙලි නාට්‍යයේ ඔස්ටින් අයියාගේ චරිතය නිසා ඔහු ගැන ලොකු අවධානයක් ඇති වෙමින් තිබුණා. ඉදිරියේදී එහි ඔහුගේ චරිතය තවත් ප්‍රබල ලෙස ඉස්මතු වේවි. සාමාන්‍ය ප්‍රේක්ෂකයා තුළ ඔහු ගැන කතාබහක් ඇති වෙමින් තිබියදී තමයි ඔහු වියෝ වුණේ. ඇත්තටම ඔහු ජීවත්ව සිටිය යුතුව තිබුණු කාලයේ තමයි ඔහුට මෙලොව හැරයාමට සිදුවුණේ. 
 
කිෂාන් කනංකෙ

ශනුද්‍රි, සාමාන්‍ය ජීවිතයේදී සතුටින් සැහැල්ලුවෙන් ඉන්න කෙනෙක්ද? එහෙම නැත්නම් ‍පොඩි දේටත් හඬා වැටෙන චරිතයක්ද? 
මං හිතන්නේ මම ඔය අන්ත දෙකේ අතරමැද ඉන්න චරිතයක්. 
 
ඒ කියන්නේ ඔබ සතුටයි, දුකයි නිහඬවම දරාගන්න කෙනෙක්? 
දුක නම් නිහඬව දරාගන්නවා. හැබැයි සතුට නිහඬව දරා ගන්නේ නැහැ. 
 
සතුටට කොයි විදියටද මුහුණ දෙන්නේ? 
මහ හයියෙන් කෑ ගහලා හිනාවෙලා අනිත් අයටත් මගේ සතුටට හේතුව කියලා ඒ අය එක්කත් සතුට බෙදාගෙන තමයි මම සතුටට මුහුණ දෙන්නේ. 
 
ඔබ දුක කියන හැඟීමට මුහුණ දෙන්නේ ඒ විදියට නමෛයි?
ඉවසන්නම බැරි දුකක් ආවොත් සමීපතම අයට කියනවා. නැත්නම් කාටත් හොරෙන් අඬනවා. හැබැයි සමාජය ඉදිරියේ නම් මම මගේ කඳුළු පෙන්නන්නේ නැහැ. මොන දුකක් ආවත් ඒක වහගෙන හිනාවෙලා ඉන්නවා.
 
ශනුද්‍රි වැඩියෙන්ම දුක්වෙන්නේ මොන වගේ දේවල්වලටද? 
එකක් කියලා නැහැ කාගෙන් හරි රිදෙන වචනයක් කියවුණොත් මට දුක හිතෙනවා. වෙන කෙනෙකුට අතුරු ආන්තරාවක් වුණත් මගෙ හිත රිදිලා දුකක් දැනෙනවා. 
 
ඒ විදියට තදින්ම දුක්වුණ අවස්ථාවක් මතකද? 
ඒ වගේ අවස්ථා නම් ගොඩක් තියෙනවා. මෑත කාලයේ ඒ වගේ අවස්ථාවක් වුණේ දසුන් අයියගේ (දසුන් නිශාන්) මරණය වෙනුවෙන්. 
 
කට කතා හින්දා දුක්වූ අවස්ථා නැද්ද? 
තමන් ගැන කටකතාවක් ඇහෙද්දි කාටද දුක හිතෙන්නේ නැත්තේ? මටත් එහෙමයි. ඒත් මම කටකතා ගැන වැඩිදුර හිතන්න යන්නේ නැහැ.  
 
රූපවාහිනී වැඩසටහනකදී නිවේදක අහපු ප්‍රශ්නෙකට වැරදි පිළිතුරක් දීලා අන්තර්ජාලයේ දිගට හරහට ශනුද්‍රිට මඩ ගහද්දිත් දුක් නොවී ගණන් ගන්නේ නැතුව හිටියද? 
ඒ වේලාවේ නම් දුකක් දැනුණා තමයි. ඒත් පස්සේ ඒ දුක සතුටකට හැරුණා. ඔය අන්තර්ජාල මඩ ප්‍රහාරවලින් මාව වට්ටන්න බැහැ. 
 
කොහොමද ඒ දුක සතුටකට හැරුණේ? 
ඔය සිද්ධිය වුණේ මම උසස් පෙළට ලියන කාලෙදි. ඒ විදියට අන්තර්ජාලයෙන් දිගට හරහට මඩ ගහලා මානසිකව වට්ටන්න හැදුවේ උසස් පෙළට මුහුණ දෙන ළමයෙකුව. මම ඒ වෙලාවේ ඒ ගැන හිතන්නේ නැතුව පාඩම් කළා. මම ඉහළින්ම උසස් පෙළ සමත් වුණා. ඒ වේලාවේ අර දුක සතුටකට හැරුණා. 
 
ජීවිතේ වැඩියෙන්ම සතුටු වුණේ එදාද? 
එදත් සතුටු වුණා. මගේ උපාධියේ පළමු කොටස සමත් වූ අවස්ථාවේදීත් සතුටු වුණා.
 
කලා ජීවිතේ වැඩියෙන්ම සතුටු වුණේ? 
පුංචි කා‍ලේ රඟපෑවත් ඉන්පසු කලාවෙන් ඈත්වෙලා ඉඳලා මම දෙවැනි වතාවට රඟපාන්න ආවේ දෙවැනි ඉනිමෙන්. ඒ ටෙලිනට්‍යය හිතුවටත් වඩා ජනප්‍රියත්වයක් මට ලබා දුන්නා. අද පාරේ යද්දි පුංචි දරුවෝ පවා මට ආදරෙන් කතා කරනවා. ඒ ගැන හිතන විට නම් ලොකු සතුටක් ඇතිවනවා. 
 
ඒත් ජනප්‍රිය නිළි සම්මානය ලැබුණේ දෙවැනි ඉනිමේ ඔබ සමග රඟපෑ අනිත් නිළිය නයනතාරාට. ඒ වේලාවේ නම් දුකක් ඇතිවෙන්න ඇති. 
අයියෝ කිසිම දුකක් ඇති වුණේ නැහැ. එයාට ලැබිය යුතු දේ එයාට ලැබුණා. නයනතාරාට ජනප්‍රිය නිළි සම්මානය ලැබුණාම මම දුක්වෙන්නේ ඇයි? 
 
ශනුද්‍රි ඔහොම කිවුවට ජනප්‍රිය සම්මානය හින්දා ශනුයි නයනතාරයි අතර පුංචි විරසකයක් ඇති බව අන්තර්ජාලයෙන් හුවමාරු වූ දේවලින් පෙනුනා. දුකක් නැත්නම් ඇයි එහෙම වෙන්නේ. 
අන්තර්ජාලයෙන් ඔය වගේ දේවල් පළ වෙනකොට ඒ දිහා බලලා නයනතාරයි මමයි හිනාවෙන බව ඔය වගේ දේවල් පළකරන අය දන්නේ නැහැ. අපි දෙන්න දෙවැනි ඉනිම දර්ශන තලයේදී ෆුල් ජොලියෙන් ඉන්න චරිත දෙකක්. 
 
ආරියවංශ කුලතිලක
 
ඡායාරූප - මංජුල පෙරේරා

ඇය නිරන්තරයෙන් නාලිකාවක් ගානේ විවිධ ටෙලි නාට්‍යය තුළින් අප දකින නිළියක නොවේ. ඉඳ හිට හෝ තමන්ට ගැළපෙන චරිතයකින් රංගනයට  එක්වී ඉන් ප්‍රේක්ෂක ආකර්ෂණය දිනාගැනීම ඇගේ අරමුණයි. නිළියක සේම නිවේදිකාවක ලෙසත් සිය කුසලතා පලකළ නිපුනිකා හේවාගමගේ රංගනයෙන් දායක වන “මිල්ලෑව වලව්ව“ මේ දිනවල පුංචි තිරයේ දිගහැරේ. 
 
නිපුනිකා නිතර දකින්නට ලැබෙන නිළියක් නොවේ ..ඇයි ඒ රංගනයේ යෙදෙන්නේ තෝරා බේරාගෙනද .. ?
මම මහ ලොකු තෝරා ගැනීමක් කරන්නේ නැහැ. ඒත් මගෙ සීමාවන් තුළ කළහැකි චරිත පමණයි මම භාරගන්නේ.අනික මට තෝරාගෙන රඟපාන්න තරම් ආරාධනා රැසක් ලැබෙන්නෙත් නෑ.. 
 
වැඩියෙන්ම ගැමි චරිතම රඟපෑවට නිපුනිකා කොළඹ යුවතියක් .
ඔව් .. ඇත්තටම මෙච්චර කල් මම රඟපෑ චරිත අතුරින් වැඩිම ප්‍රමාණයක් රඟපෑවේ ගැමි චරිත තමයි. ඒත් මම ඉපදුනේ හැදුණේ වැඩුණේ කොළඹ.  මගේ ගම ගල්කිස්ස. ඉගෙනගත්තේ කොළඹ 7 කාන්තා විදුහලින් .
 
එහෙම පසුබිමක මේ තරම් අපූරුවට ගැමි චරිත රඟපාන්නේ කොහොමද.. ?
මම හිතන්නේ මගේ පෙනුම ඊට බලපානවා ඇති. අනික අපේ ගෙදර පරිසරය තුළ තියෙන්නෙත් නාගරික සංකර බවක් ‍නෙවෙයි. පුංචි කා‍ලේ ඉඳන් මම හැදුනෙත් නීතිරීති මැද.
 
පුංචි කා‍ලේ විතරක් ‍නෙවෙයි දැනුත් නිපුනිකා අම්මගෙන් දඬුවම් ලබන අවස්ථා තියෙනවා කියල තමයි ආරංචි
ඒක ඇත්ත. තාත්තා නම් දඬුවම් දෙන්නෙ නැහැ. ඒත් අම්මගෙන් නම් ගුටිකාපු අවස්ථා අනන්තයි අප්‍රමාණයි. 
 
පවු‍ලේ සහෝදර  සහෝදරියන් අතරින් වැඩියෙන්ම ගුටිකාලා තියෙන්නේ නිපුනිකා නේද .?
පවු‍ලේ ඉන්නේ අම්මයි තාත්තයි මමයි මල්ලියි විතරයි. මල්ලි එච්චර දඟ නැහැ. මම නම් පුංචි කා‍ලේ ඉඳන් ටිකක් දඟ චරිතයක් . ඒ හින්දා වැඩියෙන්ම ගුටිකාලා තියෙන්නේ මම.
 
ඒ අතරින් මතකයේ තදින්ම රැඳුණු සිද්ධිය මොකක්ද.. ?
ඒක වුණේ මම උසස්පෙළ හදාරන කාලෙදි. එක දවසක් මොකක්දෝ වරදකට අපේ අම්මා මගේ ටියුෂන් 
ක්ලාස් එක ඉස්සරහදීම මට ප්ලාස්ටික් බෝත‍ලේකින් ගැහුවා. ඒ සිද්ධිය පන්තියේ හැමෝම බලාගෙන හිටියා. 
 
රටම හඳුනන නිළියක් වුණාට පස්සෙ අන්තිමට අම්මගෙන් ගුටි කෑවේ කවදද .. ?
නිළිියක් වුණත් ගෙදරදී මම සාමාන්‍ය ගෑනු ළමයෙක්. අදටත් මම හැදෙන්නේ නීතිරීති මැද.. දැනටත් මම අම්මගෙන් ගුටිකන අවස්ථා තියෙනවා. මීට  මාස කීපයකට කලිනුත් අම්මත් එක්ක එකට එක කියන්න ගිහින් ගුටිකන්න වුණා.
 
නිපුනිකා මේ වෙනවිට ටෙලි නාට්‍යය කීයක රඟපාලා තියෙනවද .. ?
ටෙලි නාට්‍යය 35 ක විතර රඟපාලා තියෙනවා. 
 
ඒ අතුරින් වඩාත්ම ප්‍රිය කරන ටෙලි නාට්‍යය මොකක්ද .. ?
මගේ මුල්ම ටෙලි නාට්‍යය නාලන් මෙන්ඩිස් මහතාගේ “දූවරු” ටෙලි නාට්‍යය. අදටත් මම වඩාත්ම ප්‍රිය කරන්නේ “දූවරු” නාට්‍යයට
 
මොනවද ඉදිරි නිර්මාණ .. ?
මේ දවස්වල අලුත් ටෙලි නාට්‍යය දෙකකට සම්බන්ධවෙලා ඉන්නවා. කලින් කරපු නිර්මාණ කීපයකුත් එන්න තියෙනවා.
 
 ටෙලි නාට්‍යවල ප්‍රේමවන්තිය වන නිපුනිකා සැබෑ ජීවිතේදිත් පෙම්වතියක්ද .. ?
ඔව් ..
 
ඔබේ ප්‍රේමවන්තයා නළුවෙක්ද ... නැත්නම් කලාවට සම්බන්ධ කෙනෙක්ද .. ?
නළුවෙකුත් ‍නෙවෙයි. කලාවට කිසිම සම්බන්ධයකුත් නැහැ.. වැඩි විස්තර ඉදිරියෙදි කියන්නම් .. 
 
ආරියවංශ කුලතිලක 

නූතන කාන්තාවන් අතර පවත්නා 'පොදු සිහින' පිළිබඳ විමසුමක් කළ හොත් සම සුදු පැහැ කරගැනීම ඉන් මුල් තැනකටම පැමිණෙනු නියතය.

අප බොහෝ දෙනෙකු දන්නා පරිදි කාන්තාවන් තුළ පවත්නා මේ 'සුදු වීමේ උන්මාදය' මෑතකදී ඇරඹි ශීඝ්‍රයෙන් වර්ධනය වන්නකි. එමෙන්ම කාන්තාවන් තුළ පවත්නා මේ සුදු වීමේ උනන්දුව සමාජගත කිරීම සඳහා වෙළඳ ප්‍රජාවෙන් ලැබී ඇති පිටිවහල ද කිසිවෙකුටත් රහසක් නොවේ.

මීට දශක කිහිපයකට පෙර වෙළඳපොළට හඳුන්වා දුන් සම සුදු වීමේ ක්‍රීම් වර්ග වල සිට පෙති වර්ග සේම එන්නත් වර්ගද අතිශයින් ජනප්‍රිය වී තිබේ. නමුදු මේවා හුදෙක් පිළිගත් ඖෂධ නොවන බවද විශේෂයෙන් කිව යුතුය. එබැවින් මේවායින් සිරුරට සිදුවන පිළිකා හානි ඇතුළු බිහිසුණු ප්‍රතිවිපාක ගැන වටහා ගත හැක්කේ කතුන් ඒම ඛේදවාචකයන්ට ලක් වූ පසුවය.  එමෙන්ම එවන් කාන්තාවක් පිළිකා වැනි බිහිසුණු රෝගයකට ලක් වූ පසු හේතුව නිශ්චය කරගැනීම පිණිස වන ක්‍රමෝපායන්ද ඉතා අඩු බව කිව යුතුව තිබේ.

කාන්තාවන් තුළ පවත්නා මෙම 'සුදු වීමේ උන්මාදය' ප්‍රයෝජනයට ගත් පිරිස් අතර රූපලාවන්‍ය ආලේපන, පෙති, එන්නත් නිශ්පාදකයන් සහ අලෙවිකරුවන් සේම රූපලාවන්‍යාගාර හිමියන්ද හිඳිනා බව නොරහසකි. මේ පිළිබඳව ජනමාධ්‍ය කෙරෙහි සංවේදී වන ඔබට ඔවුන් කවුරුන්දැයි පැහැදිළිවම හඳුනාගත හැක. එ‍හෙත් කාන්තාවන් තුළ පවත්නා මේ 'සුදු වීමේ උන්මාදය' ට සැබෑ හේතුව අප මානව, සමාජ සහ මනෝ විද්‍යාත්මකව ද හඳුනා ගත යුතුය.

මේ අතර ඇතැමුන් හට තරුණ වියේ දී වැළදෙන Body Dysmorphic Disorder  රෝග කාණ්ඩයක් තිබේ. ශරීරයේ යම් යම් ඉන්ද්‍රියන්හි ප්‍රමාණය, හැඩය, පැහැය ආදියේ ඌණතාවයන් ඇතැයි සිත තුළ පැන නගින පීඩනය මුල්කොට ගත් මෙම රෝග කාණ්ඩය සඳහා මනෝ වෛද්‍ය ප්‍රතිකාර ගත යුතුමය.

ලොව ප්‍රකට ගායක මයිකල් ජැක්සන් පවා මෙම රෝගයෙන් පෙළුණු බව පැවසේ.

එහෙත් නූතන සමාජයේ පැතිර පවත්නා මේ 'සුදුවීමේ උන්මාදය' තුළ ඇත්තේ එවන් මානසික සෞඛ්‍යය සම්බන්ධ ගැටලුවක් නොවේ. රූමත් බවේ සංකේතය 'සුදු' ය යන ජන විඥානය තුළ පවත්නා පොදු මිථ්‍ය‍ා ආකල්පයයි. එය නූතන වෙළඳ ප්‍රචාරණ මාධ්‍ය මඟින් නැවත නැවත කුලුගැන්වීම නිසා එය  සමාජ උන්මාදයක් බවට පත්ව තිබේ.

'සුදු' යනු රූමත් බවේ සංකේතයක් වන්නේ කෙසේද?

මෙය පළමුව මානව විද්‍යාත්මකව විමැසිය යුතු පැනයකි. දුරාතීතයේ අප රට ඇතුළු ඉන්දියානු උප මහද්වීපයේ  ජීවත් වූයේ 'කළු සම' සහිත මිනිසුන්ය. ඉන්පසුව ඉතිහාසයේ ආදීතම කාලයක මධ්‍ය ආසියාවේ ටෙක්සාස් තණ බිම් ආශ්‍රිතව ජීවත් වූ සුදු පැහැති සම සහිත ජන කොටසක් දේශගුණික විපර්යාස ආදී හේතූන් මත   ඉන්දියානු උප මහද්වීපයටත්, යුරෝපයටත්, මැදපෙරදිගටත් සංක්‍රමණය වූහ.

'ආර්යය' යනුවෙන් පසුව ඉන්දියාවේ දී හැඳින්වෙන ලද්දේ මෙම සුදු පැහැති ජන කොටසය. එ‍හි දී එවක ඉන්දියානු උප මහද්වීපයේ සිටි ස්වදේශිකයන් හෙවත්  කළු සම සහිත වූවන් ගේ සමාජ තලය තලා පෙලා දමන්නට මෙම 'ආර්යයෝ' දැඩි වෙහසක් දැරූහ.

'සුදු' හෙවත් 'ශුක්ල' උසස් ලෙසත්, 'කළු' හෙත් 'කෘෂ්ණ' පහත් ලෙසත් සැලකූ ඔවුහු එවක ඉන්දියාවේ කළු මිනිසුන් ඇදහූ දෙවිවරුන් සම්බන්ධ දේව සංකල්ප වලට නවතම 'පුරාණෝක්ති' ලබා දී කළු පැහැයෙන් යුතු එම දෙවිවරුන් එලෙසින්ම වන්දනා කරන්නට වූහ.

පසුකාලීනව හින්දු ආර්යයන් විසින් ප්‍රමුඛතම තලයෙහි ලා අදහන්නට වූ විෂ්ණු සහ ඔහු ගේ අවතාරයක් වන ක්‍රිෂ්ණ කළු පැහැයෙන් යුතු වන අතර ශිව හෙවත් ඊශ්වරද කළු පැහැයෙන් යුත් දෙවියෙකි. එලෙස කළු පැහැති දෙවිවරුන් අදහන්නට වූ සුදු පැහැති ආර්යයන් කළු පැහැති ජනතාව ආර්ය සමාජයේ දාසයන් සේ සලකන්නට වීම විස්මයකි.

එමෙන්ම අනාදිමත් කාලයක අප රටේ ජීවත් වූ රාවණා, විභීෂණ ආදී දෙවිවරුන්ද ඒකාන්ත වශයෙන්ම කළු පැහැයෙන් යුතු වූ අතර ආර්යයන්ගේ පුරාණෝක්ති වල එන 'සුර අසුර යුද්ධය' මෙම 'සුදු කළු' මිනිසුන් අතර ඇති වූ සමාජ අරගල සංකේතනය කරන්නකි. එහිදී රාම රාවණා යුද්ධයේ දී රාවණ සහ විභීෂණ යන රජවරු 'රාක්ෂස' ලෙස ‍නම් කොට ඇත්තේ ඔවුන්ගේ සමේ පැහැය ද සලකමිනි. එහිදී 'සුර' හෙවත් 'ශුක්ල (සුදු)' පක්ෂය ගන්නා රාම රජු විෂ්ණුගේ දස අවතාර වලින් එකක් සේ  සැලකූ 'ආර්යයන්' කළු සමකින් යුත් විෂ්ණුට  වැඳුම් පිදුම් කිරීම හාස්යෝත්පාදකය.

එමෙන්ම දුරාතිතයේ දී ශ්‍රී ලංකාව 'තම්බපණ්නී' නම් 'යකින්නන් ගේ දේශයක්' ලෙස ආර්යයන්ගේ ලේඛණ වල සඳහන් වෙයි. පන්සිය පනස් ජාතක පොතේ ද 'වලාහස්ස හෙවත් වලාහක' ජාතකය ඊට කදිම නිදසුනකි. එහි පැවසෙනුයේ අතීතයේ මෙහි වාසය කොට ඇත්තේ 'මිනී කන යකින්නක්' බවය. 'මිනී කන යකින්නක්' නම් අනිවාර්යයෙන් කළු පැහැ විය යුතු බවත් සුදු පැහැයෙන් යුතු 'මිනී කන යකින්නන්' සිටිය නොහැකි බවත් අපට බැලූ බැල්මට වුව වැටහෙනු ඇත.

එමෙන්ම දුරාතීතයේ අප රටෙහි ජීවත් වූ යක්ෂ ගෝත්‍රිකයන්ද ඒකාන්ත වශයෙන් 'කළු පැහැ' සමින් යුතු වන්නට ඇති අතර ඔවුන් අතර රුවැති කාන්තාවන් සේම අභිරූපිකාවන්ද සිටි බව පිළිගැනීමට අපට සිදුවේ.

ලක් ඉතිහාසයේ මුල්ම රජ බිසව විය යුතු 'කුවේණිය' ද එවැනි කළු අභිරූපිකාවක බවට සැක නැත. එහෙත් පාලි වංශකතාවේදී ඇය හඳුන්වා ඇත්තේ 'කුවණ්ණා' යනුවෙනි.  'කු+වණ්ණා' යන්නෙහි අරුත අයහපත් වර්ණයක් ඇත්තිය යන්නය. මෙහි ආර්යවාදී ලේඛකයා 'අයහපත් වර්ණය ' ලෙස දකින ලද්දේ කළු පැහැය බව ඒකාන්ත සත්‍යයකි. ආර්යයන්ගේ ප්‍රමුඛතම දෙවියකු වන 'ශිව' හැඳින්වෙනුයේ ද 'මහා කාල' යනුවෙනි. එහි සිංහල අරුත 'මහ කළු' යන්නය. 'කාලි' යන්න 'කාල' යන්නෙහි ස්ත්‍රී වාචිකයයි. එහි වචනාර්ථය වනුයේ ද 'කළු තැනැත්තිය' මිස අන්කිසිවක් නොවේ.

මහා වංශයෙහි දැක්වෙන ආකාරයට යුද්ධයෙන් පැරදී 'වලගම්බා රජු' පලා යන විට ගිරි නිගණ්ඨයා කෑ ගැසුවේ 'පලා යති මහා කාල සීහලෝ' යනුවෙනි. එහි සිංහල අරුත ' මහා කළු සිංහලයා පලා යනවෝ' යන්නය. මෙය 'මහා කළු' බව හා සිංහල කම කෙතරම් සම්බන්ධ දැයි මනාව හුවා දක්වන්නකි. ඒ කෙසේ හෝ මෙකී සකල විධ ජන සංයුතිය තුළ කිසිදු 'කළු අභිරූපිකාවක' නොසිටියේ යැයි නිගමනයට එළඹිය හැක්කේ කෙසේද?

අප ඉහත දැක්වූ ආර්යයන් යුරෝපයට සංක්‍රමණය වීමෙන් පසු එහි ශිෂ්ඨාචාර ගොඩනගා ගනිමින් ශීඝ්‍ර දියුණුවකට පත් වූහ. ඒ වන විට එම රටවල සිටි 'සුදු ජාතිකයන්' සහ සම්මිශ්‍රණය වූ ඔවුහු වෙළඳාම් සහ ආක්‍රමණය පිණිස දේශ සංචාරය කරන්නට ද පටන් ගත්හ. එලෙස අප රටට පැමිණි මුල්ම අපරදිග ආක්‍රමණික පිරිස වූවෝ පෘතුගීසීහුය.

එවක සිටි සිංහලයන් පෘතුගීසීන්ගේ සුදු සම දෙස බලන ලද්දේ අතිශය පිළිකුලෙනි. සිංහලයන් තුළ පැවැති සුදු සම මුල්කොට පැවැති ඒ පිළිකුල කොතෙක්ද යන් ඔවුන් පෘතුගීසීන් හඳුන්වනුයේ 'පරංගි' යන නමිනි. ඊට හේතුව පෘතුගීසින්ගේ සමේ පැහැය අනුව ඔවුන්ට කිසියම් රෝගයක් (Yaws) වැළඳී ඇතැයි එවක ශ්‍රී ලාංකිකයන් අනුමාන කළ බැවිනි. එහෙත් පසුකාලීනව අප රටට පැමිණි ඕලන්ද ජාතිකයන් අප සමාජයේ බටහිර ශිෂ්ටාචාර ලක්ෂණ ව්‍යාප්ත කරත්ම 'සුදු පැහැය' කෙරෙහි සිංහලයන් තුළ පැවැති සාම්ප්‍රදායික පිළිකුල කෙමෙන් අඩුවී ගොස්  'සුදු' වටිනා වර්ණයක් ලෙස ඔවුන්ට දිස්වන්නට විය.

සිංහලයන් තුළ පැවැති මෙම ආකල්ප පෙරළිය උඩුයටිකුරු වීමට පටන් ගත්තේ ඉංග්‍රීසි අධිරාජ්‍යය ලෝකයම යටත් කර ගත් පසුබිමකය.

දහ අට වෙනි සියවසේ යුරෝපයේ ඇති වූ 'කාර්මික විප්ලවය' මුල්කොට ගත් ලෝක පිළිගැනීමද දාහනවවෙනි සියවසේ දී ශ්‍රී ලංකාව ඉංග්‍රීසි යටත් විජිතයක් වීමද සිංහලයන් තුළ පැවැති දේශමාමකත්වය සිදී බිඳී ගොස් අධිරාජ්‍ය ගැති මානසිකත්වයක් දේශීය ජන විඥානය තුළට පිවිසීමට හේතුවිය. ඒ සමඟ ශ්‍රී ලාංකීය ජනතාව තුළ  'සුදු සම' කෙරෙහි අැති ගෞරවණීය ආකල්ප ජනිත වූ බව පෙනේ. මේ වන විටත් ලෝකය පුරා 'සුදු යනු ලස්සනය' යන සමාජ මිථ්‍යාව පැතිර පවතිනුයේ ඉහත සඳහන් සමාජ මනෝ විද්‍යාත්මක සාධකය අනුවය.

සුදු පැහැය කළු පැහැයට වඩා වේගවත්ව නෙත් ඇද ගන්නා බව නොරහසකි. ඒ නිසා කළු කාන්තාවකට වඩා සුදු කාන්තාවක් මූලිකව ආකර්ශනයකට ලක් විය හැක. එහෙත් ඒ නෙත් ඇද ගැනීම 'සිත් ඇද ගැනීමක්' සේ හුවා දැක්වීම ඉඳුරාම වැරදිය.

කාන්තාවකගේ රූමත්කම සඳහා මූලිකව ඉවහල් වනුයේ මුහුණ ඇතුළු ශරීරාංග මනා සේ  පිහිටීමය.  පංච කල්‍යාණයෙහි එන 'ඡවි කල්‍යාණය' සුදු පැහැය ලෙස සමහරුන් අර්ථ දැක්වුවද එය ඉඳුරාම වැරදිය.  එහි දැක්වෙනුයේ සමෙහි 'නිරෝගී බව' පදනම් කර ගත් 'ඔපය' සහ 'පැහැපත් බව' (Fairness) මිස  සුදු පැහැය නොවේ. මා එසේ කියන්නේ 'සුදු පැහැයට' අමතරව තවත් පැහැයන් ඕනෑතරම් ඇති බැවිනි.

ඒ කෙසේ හෝ නවීනතම ලෝක දත්තයන් අනුව 'සුදු සම' කෙරෙහි තිබූ වටිනාකම වර්තමානය තුළ ශීඝ්‍රයෙන් අඩුවෙමින් තිබේ. උපතින්ම 'සුදු සමක්' සහිත යුරෝපීය කතුන් තම පැහැය අඩුකොට 'ලෝකඩ පැහැ' (Bronze Skin) සමක් ඇති කර ගැනීමට දක්වන උනන්දුව සුළුපටු නැත. ඊට අමතරව සුදු සහ නීග්‍රෝ ජාතික මාපියන්ගේ දරුවන්ට හිමි 'මුලාටෝ (Mulatto) ඡවි වර්ණයටත් ඊට අමතරව කළුවර දැව සහිත ඡවි වර්ණයටත් (Ebony) ලොව ඇති පිළිගැනීම ශීඝ්‍රයෙන් ඉහළ යමින් පවතී.

යුරෝපයේ ශීත සෘතුවේදී  නිවර්තන කලාපීය රටවලට පැමිණ සිත් සේ 'හිරු රැස් නාන' කතුන් නැවත එම රටවලට ගොස් ඔබ දැන් 'ලෝකඩ වර්ණයට' නැතහොත් 'කළුවර දැව වර්ණයට'  පැමිණ ඇතැයි සෙස්සන් පවසනු අසා සිටින්නේ මහත් ආඩම්බරයෙනි. එය තම ධනය මත පදනම් කර ගත් නිවර්තන කලාපීය සංචාරය ප්‍රකට කරවන ලක්ෂණයක් ලෙසද ඔවුහු සලකති.

පසුගිය දශක කිහිපය තුළ  කළු ජාතිකයන් සුදු ජාතිකයන් අභිබවා ලෝකයේ ප්‍රමුඛතම ස්ථාන වලට පත් වීම අප රටේ වැසියන් අතීතයේ සුද්දන්ට දැක්වූ ඇල්ම මෙන් වර්තමානයේ සුද්දන් කළු ජාතිකයන්ට දක්වන ඇල්ම මනාව ප්‍රකට කරන්නකි.

කළු පැහැති සමක් හිමි බැරැක් ඔබාමා ලෝකයේ ප්‍රමුඛතම රාජ්‍ය නායකයා බවට පත් වීමත් එවැනිම කළු සමක් හිමි මිචෙල් ඔබාමා ලොව මුල්ම ගැහැනිය බවට පත් වීමත් එහි අග්‍රපලයකි. එමෙන්ම ලෝකප්‍රකට ගායිකාවක වූ විට්නි හූස්ටන් ඇතුළු තවත් ලෝක පූජිත කාන්තාවන් කළු පැහැයෙන් යුතු වීම නිසාත් මේ වන විට ජාත්‍යන්තර රූප රාජිනී තරඟ සඳහා කළු යුවතියන්ගේ ඉදිරිපත් වීම වැඩි වෙමින් පවතී. එනිසාම  ඔවුන්ගේ ජයග්‍රහණයන් ප්‍රමාණයද ශීඝ්‍රයෙන් ඉහළ යමින් තිබේ.

ඒ අතර අප රටේ කාන්තාවන් තුළ වර්තමානයේ පවත්නා 'සුදු වීමේ උන්මාදය' අනාගත තරුණියන් ගේ උපහාසයට ලක් වීම කෙසේ වත් වැලැක්විය නොහැකි යැයි මට සිතේ. ඊට හේතුව අනාගතයේ සුදු පැහැයට වඩා කළු පැහැය රූමත් බවේ සංකේතයක් ලෙස ලෝක පිළිගැනීමට ලක්වන බැවිනි.

මානව වංශ විද්‍යාත්මක සාධක අනුවද එවැන්නක් සිදුවීමේ පසුබිම දැනටම නිර්මාණය වෙමින් පවතී.

එබැවින් කළු යුවතියනි,  සමේ පැහැය නිසා මෙතෙක් සමාජයෙන් කොන් වූ ඔබ 'සුදු' යුවතියන්ද අභිබවා පෙරට එන දිනය උදාවන්නට වැඩි කාලයක් නැත.

තිලක් සේනාසිංහ

 

IMAGE

බසයේදී දුන් බොරු විවාහ පොරොන්දුවෙන් පවුල්ජීවිතේ 'හබක්'

IMAGE 2018 Feb 23 12:25
ඔහු අගනුවර ප්‍රසිද්ධ සමාගමක විධායක නිලධාරියෙකි. වයස අවුරුදු 40 ඉක්මවූ ඔහුට රූමත් බිරිඳක් සහ...
Views - 4012

අහිමි පෙම ඉල්ලා පෙම්වතියට ප්‍රසිද්ධියේ ගුටි ඇනලා

IMAGE 2018 Feb 23 10:42
පැරණි පෙම්වතියගෙන් අහිමි වූ ආදරය නැවත ඉල්ලා එය නොලැබුණු විට නාරාහේන්පිට ප්‍රදේශයේදී ඇයට...
Views - 2653

සංසාර සිහිනයේ ගී සංකල්පනය මම 'ටැබ් එකේ ටයිප් කරපු' එකක්

IMAGE 2018 Feb 21 12:00
සනුක වික්‍රමසිංහ ගායනා කරන “සංසාර සිහිනේ” කලක පටන් බොහෝ ගීත දර්ශකවල පෙරමුණ ගෙන තිබෙන...
Views - 3730

මම නාට්‍ය කලාවෙ ඉන්නේ ඒ ගැන තියන 'උණ' නිසයි

IMAGE 2018 Feb 21 11:53
වේදිකාව, පුංචිතිරය සහ සිනමාව යන මාධ්‍ය ත්‍රිත්වයෙහිම සිය ප්‍රතිභාව ප්‍රකට කළ කලාකරුවකුවන...
Views - 2245

බිරිඳ රැකියාවක් නොකිරීම මගේ සාර්ථකවයට හේතුවක්

IMAGE 2018 Feb 20 14:38
“සිරස ජූනියර් සුපර් ස්ටාර්..” තරගය ගැන මුලින්ම අප ඔබගෙන් විමසන්න කැමතියි.. ඇත්තෙන්ම “සිරස...
Views - 7448

බිරිඳට පින් තකා සුනඛයන්ට දිනපතා සහල් කිලෝ 08ක දනක්

IMAGE 2018 Feb 20 14:23
මිනිසා තිරිසනුන් වන අවස්ථාත් තිරිසනා මිනිසුන් වන අවස්ථාත් අපට බොහෝ විට දක්නට ලැබුණද...
Views - 4597

Please publish modules in offcanvas position.