Home    |    Daily Lakbima    |    Sunday Lakbima    |   Rajina |    Archive    |    Advertise With Us    |     Careers Email - lakbimaonline@gmail.com youtube
Coss Ear2
lakbima.lk
COSS Ear 1
                                                                                        එසැනින් පුවත් | ගොසිප් | විශේෂ පුවත් | සුන්දර ලක්බිම | ව්‍යාපාරික පුවත්     

අපේ රටේ සිටින ප්‍රතිභාපූර්ණ රංගන ශිල්පීන් අතරින් මුල් තැන රැඳී සිටින රංගන ශිල්පියෙක් තමයි රොෂාන් රවින්ද්‍ර කියන්නේ. හොඳම නළුවා විදිහට මේ වනවිටත් සම්මාන උළෙල රැසකදීම ඇගැයුමට පාත්‍රවී තිබෙන ඔහු තමන්ට රංගනයට ලැබෙන සෑම ආරාධනාවක්ම බාර ගන්නා නළුවෙකුත් නොවෙයි. මේ දිනවල ඉමහත් ජනප්‍රියත්වයක් අත්කරගෙන තිබෙන “සහෝදරයා” ටෙලිනාට්‍යයේ ‘අජිත් කුමාර’ නමැති ප්‍රධාන භූමිකාවෙන් ප්‍රේක්ෂකයන් හමුවට එන රොෂාන් “සහෝදරයා” ගැන වගේම ‍පොදුවේ වත්මන් ටෙලි නාට්‍ය කර්මාන්තය ගැනත් කතා බහ කරන්නට ‘රිද්ම’ සමග සංවාදයට එක්වූයේ මේ විදිහටයි.

  • රොෂාන් ගැන මේ දිනවල බොහෝ දෙනා කතාබහකරන්නේ “සහෝදරයා” නිසා කීවොත් හරි නේද?

ඔව්, තවමත් සහෝදරයා ටෙලි නාට්‍යයේ කොටස් කිහිපයක් පමණයි විකාශය වෙලා තියෙන්නේ. නමුත්, ඒ ගැන ප්‍රේක්ෂකයන් තුළ විශාල උනන්දුවක් තිබෙන බව දැනටමත් ලැබෙමින් පවතින ප්‍රතිචාරවලින් වැටහෙනවා. මම කැමැති විදිහේ චරිතයක් තමයි මටත් “සහෝදරයා” ටෙලි නාට්‍යයේදී ලැබුණේ. ටෙලි නාට්‍යයට සහ මගේ චරිතයට හිමිවන ප්‍රතිචාර ගැන ගොඩක් සතුටුයි.

  •  ටෙලි නාට්‍යයේ අධ්‍යක්ෂවරයාත් ඔබ සමග කිට්ටු සම්බන්ධයක් තිබෙන, ඔබේම පරපුරේ කලාකරුවෙක් නේද?

නාමල් ජයසිංහ කියන්නේ වසර ගණනාවක් තිස්සේ මා සමග සමීපව කලා ක්‍ෂේත්‍රයේ එකට වැඩකළ කෙනෙක්. ඔහු තිර පිටපත් රචනයෙන් දායක වූ ටෙලි නාට්‍යවලත් මම රඟපාලා තියෙනවා. මම ඔහුට ස්තුතිවන්ත වෙනවා මෙවැනි ටෙලි නාට්‍යයක් සඳහා මාව තෝරාගැනීම ගැන.

  •  ඔබ පුංචි තිරයේ නිතර දකින්නට ලැබෙන නළුවෙක් නොවෙයි. මොන විදිහේ තෝරා බේරා ගැනීම්වල ප්‍රතිඵලයක් විදිහටද ඔබේ රංගනය සීමා වෙලා තියෙන්නේ?

කොහොමටත් මගේ කැමැත්තක් නැහැ අවුරුදු ගණනාවක් එක දිගට විකාශය වන ටෙලි නාට්‍යවල රඟපාන්න. ඊට එක හේතුවක් තමයි, මම විශ්වාස කරනවා ප්‍රේක්ෂකයන්ට විවිධත්වයක් අවශ්‍ය බව. ඒ නිසා ටෙලි නාට්‍යයක් කොටස් 50කට 60කට වඩා දීර්ඝ විය යුතු නැහැ කියන ස්ථාවරයේ තමයි මම ඉන්නේ. තවත් කාරණයක් තමයි, මම ආසා කරන විදිහේ  ටෙලි නාට්‍ය අද හැදෙන්නේ බොහොම අඩුවෙන්. ඔය විදිහේ කාරණා නිසා තමයි ප්‍රේක්ෂකයන්ට මාව “සහෝදරයා” වගේ ටෙලිනාට්‍යවලින් විතරක් මුණ ගැහෙන්නේ.

  •  ඔය කියන විදිහට ඔබ මෙගා ටෙලි නාට්‍යවලටත් ස්වයං වාරණයක් පනවාගෙන සිටින නළුවෙක්?

අනිවාර්යයෙන්ම ඔව්, කීයක් දුන්නත් මෙගා ටෙලි නාට්‍යවල රඟපාන්නේ නෑ කියන තීරණය මම මුලදීම ගත්තු එකක්.

  •  නළුවෙක් විදිහට ඔය වගේ සීමාවන් පනවා ගැනීම ආර්ථික පැත්තෙන් නම් ඒතරම් සුබ දායක නැහැ නේද?

ඒක ඇත්ත, ටෙලි නාට්‍ය කර්මාන්තය ව්‍යාපාරයක් විදිහට දියුණු මට්ටමක තිබෙනවා නම් අපි වගේ නළුවෝ මීටත් වඩා හොඳට වැඩකරයි. නමුත් ඒ විදිහේ වාතාවරණයක් ‍නෙවෙයි අද අපේ රටේ කලාව ඇතු‍ලේ තියෙන්නේ. මේ අර්බුද ගැන නොතේරෙන කාලයේදීයි තිබුණු ආසාවට මම රඟපෑමට එන්න තීරණය කරන්නේ. ආර්ථික ගැටලු දැනෙන්න පටන් ගනිද්දී තමයි ඒ තීරණයේ බරපතළකම වැටහෙන්න පටන් ගත්තේ. ඒත් ඒක වැටහෙනකොට ප්‍රමාද වැඩියි.

  •  වගකිව යුත්තන් අහක බලපු නිසාද අද නළු නිළියන්ට මෙවැනි තත්ත්වයකට මුහුණ දෙන්න සිදුවෙලා තියෙන්නේ ?

බලයට පත්වූ කිසිම ආණ්ඩුවක් ටෙලි නාට්‍ය කර්මාන්තයේ තිබෙන අර්බුදවලට විසඳුම් ලබා දෙන්න මැදිහත් වුණේ නැහැ. උදාහරණයක් විදිහට කීවොත් වෙනත් රටවල නම් ප්‍රේක්ෂකයෝ නරඹන ටෙලි නාට්‍යවල ඉන්නේ තමන්ගේ රටේ නළු නිළියෝනේ. ඒත් අපේ රටේ බැලුවොත් විකාශය වන ටෙලි නාට්‍ය වැඩි හරියක ඉන්නේ ඉන්දියානු නළු නිළියන්. මේ කියන අර්බුද වගකිව යුත්තන්ට තේරුම්ගන්න බැරි ඇයි කියන එක ලොකු ගැටලුවක්. මට හිතෙන විදිහට කලාව ඇතු‍ලේ විතරක් නමෛයි සමස්ත සමාජයේම තිබෙන අර්බුදයක ප්‍රතිඵල තමයි අපි අද මේ අත්විඳින්නේ.

  •  ටෙලි නාට්‍ය කලාවේ ඔය කියන අර්බුද තිබියදී ඔබ ටෙලි නාට්‍ය නිෂ්පාදනයටත් පිවිසුණා ?

ඔව්, තිබුණු ඉඩකඩම් පවා විකුණලා මම මීට වසර 5-6කට කලින් ටෙලි නාට්‍ය නිෂ්පාදනයට අත ගැසුවා. නමුත් පවතින රැල්ලට නොගිය නිසා ඒ පැත්තෙන් මට සාර්ථක වෙන්න බැරි වුණා.

  •  රංගනය සහ නිෂ්පාදනය කියන කඩඉම් පසුකරපු කලාකරුවකුගේ ඊළඟ ඉලක්කය වෙන්නේ අධ්‍යක්ෂණය ?

ඇත්තටම ඔව්. ටෙලි නාට්‍යයක් අධ්‍යක්ෂණය කිරීම තමයි මගෙත් හිතේ තිබෙන ලොකුම බලා‍පොරොත්තුව.

  •  නමුත් ඔබ සඳහන් කරපු ගැටලුත් එක්ක ඔබ වැනි රැල්ලට නොයන කලාකරුවකුට සාර්ථකත්වයක් ලැබේවිද?

අර්බුදකාරී වාතාවරණය මැද වුණත් අද වෙද්දී ටෙලි නාට්‍ය ක්‍ෂේත්‍රයේ කොළ එළියක් දැල්විලා තියෙනවා. ඒ තමයි “කූඹියෝ” සහ “සහෝදරයා” කියන ටෙලි නාට්‍ය නිසා ඇතිවී තිබෙන පිබිදීම. මේ කියන සතුටුදායක තත්ත්වය තව කෙතරම් කාලයක් පවත්වාගෙන යන්න පුළුවන් වේවිද දන්නේ නැහැ. හැබැයි ඒ තත්ත්වය දිගටම පැවැතුණහොත් අපි වගේ කලාකරුවන්ට ඉදිරි කාලයේදී යම් අස්වැසිල්ලක් ලැබේවි.

කිෂාන් කනංකෙ

බුද්ධික රඹුක්වැල්ල නළුවෙක් වගේම ලෝක වාර්තා කිහිපයක්ම තැබූ පුද්ගලයෙක්. ඔහු ඒ සෑම වාර්තාවක්ම තැබුවේ වාහන පැදවීම සම්බන්ධවයි. දෙපයින් රිය පදවලා වාහනේ රිවස් කරගෙන දුර ගමනක යෙදිලා බුද්ධික ලෝක වාර්තා තැබුවා. පහුගිය දවසක තමන්ගේ වාහනය පදවමින් සිටින අතර බුද්ධික මාරාන්තික අනතුරකට ලක් වුණා. අනූනවයෙන් ජීවිතය ගලවා ගන්නට හැකි වුණත් වාහනය බේරා ගන්නට නම් බුද්ධික සමත් වුණේ නැහැ.

සිද්ධියේ වැඩි විස්තර අපි ඔහුගෙන්ම අහලා බලමු.

  • බුද්ධික මොකක්ද මේ සිදු වූ අනතුර?

පහුගිය 30 වැනිදා හවස 7ට විතර කළුතර රොබට් පාරේ ගමන් කරමින් ඉන්න අතරේ එකපාරටම මගේ වාහනය ගිනි ගත්තා. මම වාහනෙන් පැනලා ජීවිතය ගලවාගත්තා. ඒත් වාහනයට නම් අලාබ හානි වුණා.

  •  වාහනය ගිනි ගන්නා තුරුම බුද්ධිකට දැනුනේ නැද්ද?

මම වාහනය පදවාගෙන යද්දී මට දැනුනා වයර් එකක් පිච්චෙනවා වගේ ගඳක්. ඒත් මම ගණන් ගත්තේ නැහැ. ඊට පස්සේ එක පාරටම වාහනය දුමින් පිරුනා. ඒ දුම කාබන් මොනොක්සයිඩ් වායුව. ඒකට සිහි නැතුව ගියොත් වාහනය ගිනි ගත්තත් ඇතුළෙම දැවිලා යන්න වෙන බව මට තේරුනා. මම හුස්ම ගන්න එක නවත්තලා හුස්ම තද කරගෙන වාහනේ පාර අයිනේ නවතලා දොර ඇරගෙන පනින්න හැදුවා. කලබ‍ලේට දොර අරින්න බැහැ. කොහොම හරි දොර ඇරගෙන එළියට පනිනකොටම වාහනේ ගිනි ගත්තා.

  •  ඊට පස්සේ?

වටාපිටාවේ අය ඇවිත් ගින්න නිවා දැමුවා. වාහනයට නම් ඩැමේජ්. එදා මට උදව් කළ ඒ හැමෝටම මම ස්තුතිවන්ත වෙනවා. ඒ. වගේම කොහුවල ‍පොලීසියේ ස්ථානාධිපති රංජිත් මහතා, ඒ.එස්.පී., සමන් ජයසේකර, රන්සිළු මෝටර්ස්හි තුෂාර, සුදත් ඔටෝ ඉම්පෙක්ට්හි සුදත් යන අයවත් ආදරයෙන් මතක් කරනවා.

  •  අනතුරට හේතුව මොකක්ද?

තවම හොයාගෙන යනවා. කාර්මික දෝෂයක් වෙන්න ඇති. එදා වැසි දවසක්නේ.

  •  ඇස් ඉදිරිපිටම වාහනේ ගිනි වැදිලා ගියාම දරාගන්න බැරි දුකක් දැනෙන්න ඇති?

මම මේ කියන දේ ඇත්ත බව මගේ බිරිඳ දන්නවා. වාහන පැදලා ලෝක වාර්තා තබපු මගේ මරණය වාහනය තුළදී වනවා නම් මම කැමතියි කියලා මම මගෙ බිරිඳට කාලෙකට ඉස්සර කියලා තිබුණා. අද ගොඩක් අය ජීවත් වෙන්නේ නොමැරෙන අය වගේ. මරණය ගැන හිතල ජීවත් වුණොත් මේ වගේ ඕනම දෙයක් විඳ දරාගන්න පුළුවනි.

ආරියවංශ කුලතිලක

Prison1
“සිරකරුවෝද මනුෂ්‍යයෝය” යන්න තහවුරු කරමින් කොළඹ මැගසින් බන්ධනාගාරයේ 39 අවුරුදු සිරදඬුවමක් විඳින සිරකරුවකුගේ විවාහයක් ඊයේ (7) මැගසින් බන්ධනාගාරයේදී සිදුවිය. බන්ධනාගාරයේ රැඳවියා සමග විවාහ වූයේ එස්.එස්. චමිලා බක් නමැති 41 හැවිරිදි කාන්තාවකි.
“ඔහු හිටපු ‍පොලිස් නිලධාරියෙකි. අනුරාධපුර තංගල්ල ආදී ප්‍රදේශවල සේවය කළ මොහුට එරෙහිව දූෂණ චෝදනා එල්ල වීම නිසා අධිකරණයෙන් සිරදඬුවම් නියම විය. චෝදනා කීපයකටම වැරදිකරු වීම නිසා ඔහුගේ සිරදඬුවම වසර 39ක් බව ප්‍රකාශ කර තිබුණි. සිරගත වූ ඔහුගේ අයිතිවාසිකම් නඩු කීම වෙනුවෙන් ඉදිරිපත් වූයේ චමිලාය. සිරගත කර සිටි සෙනරත් බන්දුල ලියනආරච්චි වෙනුවෙන් පෙනී සිටීමට ඇයට අයිතියක් නැති බව බන්ධනාගාර නිලධාරීන් ඇයට දන්වා තිබේ. ඔහු වෙනුවෙන් ඉදිරිපත් විය හැක්කේ ඔහුගේ බිරිඳට පමණක් බවද නිලධාරීන් ඇයට දන්වා ඇත.
මේ උපදෙස් ඇයට හොඳ මඟපෙන්වීමක් විය. ඇය බන්ධනාගාර රැඳවියන් බලන්නට එන ඥාතියකු සේ බන්දුලගේ සැපදුක් බලන්නට බන්ධනාගාරයට පැමිණ විවාහය ගැන කතාකරගෙන ඇත. “මම ඔයාගේ අයිතීන් වෙනුවෙන් පෙනී සිටින්න කැමතියි. ඒකට ඉඩක් නෑ කියලා බන්ධනාගාර නිලධාරීන් කියනවා. ඔයාගේ විවාහක බිරිඳට පමණයි ඔයා වෙනුවෙන් පෙනී සිටින්න පුළුවන්. මම කැමතියි ඔයා එක්ක විවාහ වෙන්න” චමිලා බන්දුලට කීවේය. බන්දුල දෙනෙත් තෙත්කරගෙන ඇය දෙස බලා සිටියේ වසර 39ක සිරදඬුවම් නියම වී ඇති තමන් විවාහ කරගන්නට කැමති වූ තම අනාගත සහකාරිය කෙරෙහි උපන් අනුකම්පාව මුසු ආදරයෙනි.
දෙදෙනාගේ කැමැත්ත විවාහයට ප්‍රමාණවත්ය. හෝටල්වල හෝ වෙනත් උත්සව ශාලා අවශ්‍ය නොවේ. චාම් උත්සවයකින් විවාහය සිදුකරගත හැකි යැයි සිතූ චමිලා බන්ධනාගාර රැඳවියකු විවාහ කර ගැනීමේදී අනුගමනය කළ යුතු සියලු දෑ සම්පූර්ණ කරගත්තාය. දින සති මාස ලෙස වසර තුනක් ගත වුවද බන්ධනාගාර නිලධාරීන්ගෙන් මේ සඳහා යහපත් සහයෝගයක් නොලැබුණ බව චමිලා කියන්නේ කනගාටුවෙනි.
“අවුරුදු තුනක් ගෙවිලත් අපේ විවාහයට අනුමැතිය ලැබුණේ නෑ. අන්තිමේදී මම බන්ධනාගාර ඇමැති ඩී.එම්. ස්වාමිනාදන් මහතා හමුවුණා. එතුමා මගේ ඉල්ලීම ගැන මානුෂිකව අවධානය යොමු කරලා ඔහුගේ කාර්ය මණ්ඩලයේද සහයෝගය ලබාගෙන අපේ විවාහය සිදු කිරීමට අවශ්‍ය නීතිමය කටයුතු ඉටු කරලා දුන්නා. ඒ අනුව තමයි අපේ විවාහය අද සිද්ධ වුණේ” යැයි චමිලා කීවාය.
ඊයේ චමිලා බන්ධනාගාරයට ආවේ වෙනදා බන්දුල බැලීමට එන සාමාන්‍ය කාන්තාවක ලෙස නොවේ. ඇය ඊයේ ආවේ මනාලියක ලෙසය. ඇය සමග චමිලා විවාහ රෙජිස්ට්‍රාර්වරයාටත් නීතිඥයින් දෙපළකටත් මනාලියගේ පාර්ශ්වයේ ඥාතීන් සිව් දෙනකුත් බන්ධනාගාරය තුළට යාමට අවස්ථාව ලැබුණි. මේ සුවිශේෂ විවාහය මාධ්‍යයට විවෘත නොවීය. චමිලා හා බන්දුල විවාහ වූ බවට විවාහ සහතිකයේ ලියවිණ. සාමන්‍ය විවාහයේදී පළමු දිනයේදී මනාලයා හා මනාලිය හනිමුන් ගියත් චමිලා හා බන්දුල විවාහයෙන් පසු නැවත වෙන් විය. බන්දුල සිරකුටියට ගියේය. චමිලා ඇගේ ඥාතීන් සමග නිවසට ආවාය.

ජයසූරිය උඩුකුඹුර

එය 2016 වසරේ සිංහල අවුරුද්දට ආසන්න දිනයකි. එවක මගේ බිරිඳ අප දෙවන දරුවා ප්‍රසූත කිරීම පිණිස අටමස් ගැබිණියකව සිටියාය. එක්තරා අඳුරු සැන්දෑවක නිවසේ ආහාර පිසීමට කම්මැළි බැවින් අපට ආසන්නතම ගල්ගමුව නගරයට ගොස් ආහාර ගනිමු යැයි බිරිඳ මට යෝජනා කළාය.

ඒ අනුව මම සියඹලන්ගමුවේ පිහිටි අප නිවසේ සිට බිරිඳ සහ එවක එකොළොස් හැවිරිදිව සිටි මගේ  දියණියද කැටුව මා සතු ත්‍රිරෝද රථයෙන් සියඹලෑව පාර ඔස්සේ ගල්ගමුව නගරයට යාමට පිටත් වුණෙමි. අතරමගදී අප හිතවත් අසල්වැසියෙකු ද ගල්ගමුව දෙසට යමින් සිටි බැවින් අපි ඔහුද ත්‍රිරෝද රථයට නංවා ගතිමු.

 සැන්දෑ ඇඳිරියත්, වැසි ඇඳිරියත් එකට සුසංයෝග වූ ඒ සැදෑවේ ත්‍රිරෝද රථය සියඹලාවට හැරෙන තැන පිහිටි වංගුව පසුකරනවාත් සමඟම මගේ ඉදිරි මාර්ගයේ සුදු පැහැති යමක් දිස් විය. එවිට මට දැක ගත හැකි වූයේ මාර්ගයේ අප ඉදිරියට එන දළ සහිත ඇතෙකි. ඒ අපට හොඳින් ‍හුරු පුරුදු දළ පූට්ටුවා නම් සද්දන්තයා බව එක්වරම මට සිහිපත් විය. දැන් දළ පූට්ටුවා පැමිණෙනුයේ කෙලින්ම අපගේ ත්‍රිරෝද රථය ඉලක්ක කරගනිමිනි. ඒ මොහොතේ මට මගේ දියණිය සහ ගැබ්බර බිරිඳ සිහි විය. ඒ අනුව මා හනික ත්‍රිරෝද රථයෙන් පිටතට පැන දිවීමට සැරසුණෙමි. ඒ දළ පූට්ටුවා ත්‍රිරෝද රථය අමතක කොට මා පසුපස එළවාවි යන විශ්වාසයෙනි. නමුත් මා රථයෙන් පැන ගත් විගසම මගේ දියණිය ද රථයෙන් පිටතට පැන ගත්තාය. මට එක්වරම දෙවියන් සිහි විය. ඒ අතර මගේ බිරිඳ කෑ ගැසීමට වත් දිරියක් නොමැතිව ත්‍රිරෝද රථය තුළ නිසොල්මන්ව සිටියාය. දළ පූට්ටුවා ක්‍රමයෙන් රථයට සමීපවත්ම අන් කිරීමට කිසිවක් නොහැකි මගේ අසල්වැසියා සහ බිරිඳ ද රථයෙන් බැස ගත්තේ මරණ දඬුවමට නියම වූවන් ලෙසිනි. දැන් අපට සැඟවීමට කිසිම තැනක් නැත. අඩුම ගණනේ අවට සැලකිය යුතු වන රොදක්වත් නැත. එනිසා  අන්ත අසරණ බවට පත් වූ අපි කරකියා ගත හැකි අන් කිසිවක් නොමැතිව ත්‍රිරෝද රථයේ පිටුපසට මුවා වීමු. ඒ අප ඉදිරියට එන දළ පූට්ටුවා ත්‍රිරෝද රථය පපඩමක් සේ පොඩි කර දමා ඊළඟට අප වෙත යොමු වෙතැයි යන මර බියද සිතේ පුරවාගෙනය. එහෙත් තම  සුපුරුදු සන්සුන් ගමනින් ඉදිරියට පැමිණි දළ පූට්ටුවා ත්‍රිරෝද රථය ඉදිරියට විත් මඳක් නිසොල්මන්ව සිට එයට හොඬවැලින් කුඩා කුඩා තට්ටුවක් දමා අප පිළිබඳ කිසිදු තැකීමකින් තොරව නැවත වනය දෙසට හැරුණි.

ඔහුගේ මෙම නික්ම යාම දුටු අපට හැඟුණේ අප සැම මරණයෙන් පිබිදුණු අයුරකි. ඔහු අපට එදා එලෙස අභයදානය නොදෙ‍න්නට මා සේම මගේ දියණිය ගැබ්බර බිරිඳ, මගේ මිතුරා සේම ඒ වන විට මෙලොවට එන්නට සැරසී සිටි ම‍ගේ සිඟිති පුතුගේ ද ජීවිත අහිමි වන්නට ඉඩ තිබිණි.

නොයෙක් ප්‍රචණ්ඩකාරී ක්‍රියා කරන වන අලින් වන ඇතුන් ගැන අසා ඇති ඔබ දළ පූට්ටුවාගේ මෙම සුවිශේෂ ගති ගුණ මීට පෙර අසා නොතිබෙන්නට ඇත. නමුත් ඔහු ජීවත් වූ ප්‍රදේශවල ගැමියන් සතුව ඔහු සම්බන්ධ මෙවැනි අත්දැකීම් රැසක් තිබේ. එම උදාර සත්වයා සතු ඒ උතුම් ගුණාංග සිහිපත් කරමින් ඒවාට කෘතවේදීත්වය පළකරනු වස්  මෙම දෙසැම්බර් අට නවය යන දෙදින තුළ එම උතුම් සත්වයා වෙනුවෙන් මතක බණක් කියවා සාංගීක දානයක් දී පිං පැමිණ   වීමට උස්ගල, සියඹලන්ගමුව ගම්වාසීන් වන අප ඇතුළුව සමස්ත ගල්ගමුව ප්‍රදේශවාසීහු මේ දිනවල කැපවී ක්‍රියා කරති. ඒ මින් පසු මෙවැනි බිහිසුණු කෘර සත්ව ඝාතන ඇතුළු වන අපරාධ දුරින් දුරු වේවා ය යන පැතුම පෙරදැරි කරගත් දේව කන්නලව්වක් ද කරමිනි.

ක්‍රිෂාන්ත ප්‍රසාද් නන්දසේන ගල්ගමුව

නයිජීරියාව සම්බන්ධයෙන් ලෝකයේ අවධානය වැඩිපුරම යොමුවුණේ බොකෝ හරාම් ත‍්‍රස්තවාදීන් විසින් පාසල් දැරියන් 300කට අධික පිරිසක් පැහැර ගනු ලැබීමත් සමගය. වසරකටත් වඩා කාලයක් ගතවුවත් හැඬූ කඳුළින් සිටි දෙමාපියන් හමුවට යළි පැමිණියේ ත‍්‍රස්ත ම්ලේචිඡුයන්ට දාව උපන් දරුවන් හෝ දරුගැබ් සහිත දැරියන්ය. ඒ සැම දෙනෙක්ම ත‍්‍රස්තයන් අතින් කායිකව මෙන්ම මානසිකව ද කුරිරු ලෙස හිංසනයට හා දූෂණයට ලක්ව සිටියහ.  
අන්තවාදී කැරලිකරුවන් නිසා නයිජීරියානු දැරියන්ට මේ කණගාටුදායක තත්ත්වය උදා වුවත් තවමත් එරට පවතින ගෝත‍්‍රික සමාජය තුළද කාන්තාවන් සම්බන්ධයෙන් ඇත්තේ එතරම් සුවදායී වාතාවරණයක් නොවන බව පෙනේ. ගෝත‍්‍රික කාන්තාවන් 
ලිංගික වශයෙන් සුන්නත් කිරීම ඊට දිය හැකි එක් නිදසුනක් පමණි. 
ගුප්ත කටයුතු හා කට්ටඬිකම් පිළිබඳ නයිජීරියානුවන් තුළ ඇති පිළිගැනීම ඉතා ඉහළය. මෙය වැඩිපුරම දැකිය හැක්කේ එඩෝස් නමැති ගෝත‍්‍රික ජන කණ්ඩායම තුළය. කොතැනක හෝ සිදුවන කාන්තාවකගේ හෝ පුරුෂයෙකුගේ මරණයට හේතුව ගුරුකමකැයි සැක සිතුනහොත් එම ගුරුකම කළ බවට සැක කෙරෙන තැනැත්තා කට්ිටඬියෙකු හෙවත් යකැදුරෙකු වෙත යොමු කෙරේ. සත්‍යය හෙළි කර ගැනීමට දෙනු ලබන අනන්ත දුක් පීඩා අවසානයේ සිදු වන්නේ චුදිතයා විසින් වරද පිළිගනු 
ලැබීමයි. එය යකැදුරා විසින් කෙරෙන බලකිරීමකි. සැකකරු වරද කළ බව නිගමනය කිරීමෙන් අනතුරුව ඔහු හෝ ඇය එම ජන කොට්ඨාශයෙන් නෙරපා දැමේ.
තරුණ වියට පත් අයෙකුට බිරියක ලබා ගැනීමට හැකි වන්නේ තම නිර්භීතභාවය සෙස්සන් ඉදිරියේ ප‍්‍රදර්ශනය කළහොත් පමණි. කස පහරදීම යන අරුතැති ශාරෝ නමැති ප‍්‍රසිද්ධ උත්සවයේදී එය සිදු කළ යුතුය. කොපමණ දරුණු ලෙස කසපහර කෑවද කිසිදු වේදනාවක් නොපෙන්වා සිටීමයි කළ යුත්තේ. පොදු වෙළෙඳ පොළ වැනි ස්ථානයක සතියක් පමණ පැවැත්වෙන මෙම උත්සවය නැරඹීමට සියලූ දෙනා පැමිණෙන්නේ මේ තරුණයන්ගේ අභීතභාවයට සාක්ෂි පිණිසය. 
නයිජීරියානු ගෝත‍්‍රිකයන් බොහොමයක් අනාචාරය ප‍්‍රබල වරදක් ලෙස සලකති. ඇතැම් අවස්ථාවල පුරුෂයා මළ පසු ඔහුගේ සොහොයුරන්ට ඇය අත්පත් කර ගැනීමේ අයිතිය ඇත. එය බොහෝවිට මරණකරුගේ වත්කම් අත්පත්කර ගැනීමට දරන වෑයමකි. අද ඊට ඇති ලොකුම බාධකය කාන්තා අධ්‍යාපනයයි. 
සැමියා මළවිට එම බිරියෝ තවත් ඛේදවාචකයකට ගොදුරු වෙති. එම මරණය සම්බන්ධයෙන් තමන් අත වරදක් නැතැයි ඔප්පු කිරීමට ඔවුනට සිදුවේ. නයිජීරියාවේ ඇතැම් ගෝත‍්‍රිකයන් වැන්දඹු කාන්තාවට බල කරන්නේ මළ සිරුර සේදු ජලය පානය කරන ලෙසයි. මරණකරුගේ ඥාතීන් ඉන් නොසෑහී ඇගේ හිසද බූ ගා දමා මිනීිය සමග නිදා ගැනීමටද ඇයට බල කෙරේ. මේ ජුගුප්සාජනක සිරිත් සුළුතර පිරිසක් අතර අදද පැවතේ. 
කළු අප‍්‍රිකානු ජනතාවක් වන නයිජීරියානුවන් අතරද රූමත් කාන්තාවන් සිටින බව පෙනේ. ඉග්බො, හවුසා හා යොරුබා ගෝත‍්‍රික කතුන් ඒ අතරින් ප‍්‍රමුඛ වේ. විවාහ වීමට පෙර අධ්‍යාපනය ලැබුමට මේ කාන්තාවෝ උනන්දු වෙති. ඔවුහු වැඩිහිටියන් දුටුවිට දණ නමා ආචාර කරති. මොවුන් තම සංස්කෘතියෙන් ඔබ්බේ ඇති රටවල මෝස්තර, කලා නිර්මාණ ආදිය වෙත තම මනස යොදවමින් සිටී.  
යොරුබා ගෝත‍්‍රික දරුවෙකු උපන් විට මවගේ වයසට වඩා බාල ස්ත‍්‍රියකට දරුවා බැලීමට ඉඩ දෙනු නොලැබේ. දරුවා මත ජලය ඉස ප‍්‍රශස්ති ගී ගයනු ලැබේ. මවගේ වැදෑමහ වළලා දැමේ. 
මල්වර සමයේ දැරියන් පවුලෙන් වෙන්කර තෙමසක් හෝ ඊට වඩා වැඩි කාලයක් හෝ කුටියක රඳවා තබා පෝෂ්‍යදායී ආහාර විශාල ප‍්‍රමාණයක් ලබා දෙනු ලැබේ. මේ කාලය වසරක් තරම් දිගු වීමටද ඉඩ ඇත. ඇයට වැඩිපුර නිදා ගැනීමටද අවස්ථාව ලබා දේ. එහි යැවීමට පෙර දැරියගේ පියා කොරල් මුතු ලබා දී දැරිය සතුටු කරයි. ඒ ඔවුන්ගේ ඇදහීම අනුව තම ‘නිවසේ ගංගා දේවතාවිය’ සේ එම දැරිය සැලකෙන හෙයිනි. 
මේ තරකිරීමේ කුටියට යැවෙන්නේ දැරියන් ස්ත‍්‍රීත්වයට සූදානම් කිරීම සඳහාය. සිරුර වැඞී බරද වැඩිවන මේ අවස්ථාව දැරියන්ට ලැබෙන වරප‍්‍රසාදයක් සේ සැලකේ. එය හැදියාවේත් ලිංගික පාරිශුද්ධත්වයේත් සංකේතයක් බඳුය. මේ කාලය තුළ ඇය දැකිය හැක්කේ වැඩිහිටි කතුන්ට පමණි. ඔවුහු එහිදී ඇයට ස්ත‍්‍රිත්වය හා විවාහ දිවිය ගැන පාඩම් උගන්වති. සම්ප‍්‍රදායික තෙල් වර්ග තවරා දැරියගේ සිරුර සම්බාහනය කරති. මේ දියණියන් සුන්නත් කිරීමට ලක්වන්නේද මෙහිදීය. එද මේ කුටියෙන් බැහැරවීමට පෙර ඔවුන්ගේම මව්වරුන් අතිනි. විවාහ වන තෙක් දැරියන්ගේ පාරිශුද්ධිය හා විශ්වාසය රැකීම මෙහි අරමුණයි. ඔවුන් යළි සමාජගත කෙරෙන්නේ කාන්තාවන්ගේ නැටුම් ගැයුම් පිරි උත්සවයකිනි.
සුන්නත් කිරීම අප‍්‍රිකානු රටවල සුලබ කරුණක් වන අතර එහිදී පුරුෂයන්ගේ ලිංගේන්ද්‍රියේ පෙරසම සම්පූර්ණයෙන්ම හෝ කොටසක් හෝ ඉවත් කිරීම සිදුවේ. නයිජීරියාවේ කාන්තාවන් සම්බන්ධයෙන්ද එම කරුණ එලෙසම සිදු කෙරෙන බව ප‍්‍රකට කරුණකි. පුරුෂයන්ගේ මෙන් නොව මෙහිදී කාන්තාවන්ගේ ලිංගේන්ද්‍රියේ සංවේදිත්වය මුළුමනින්ම අහිමි ව’ම සිදුවේ. මෙනිසා ලොව පුරා සමාජ ක‍්‍රියාකාරීන්ගේ අප‍්‍රසාදය හා විරෝධය ඊට එල්ලව’ ඇත. අධ්‍යාපනය හා නව ලොව වෙත එරට නිරාවරණය වීමත් සමගම මේ සිරිත ඔවුන්ගෙන් ගිළිහුණද තවමත් ඇතැමුන් එම සංස්කෘතියෙන් ඉවත් ව’මට මැළි වීිම කණගාටුවට කරුණකි.
සුන්නත් කිරීමෙන් පසු ගැහැනු පිරිමි දෙපිරිසම විවාහයට සුදුසු සේ සැලකේ. මෙනිසා විරුද්ධ ලිංගිකයන් ආකර්ෂණය කරගැනීමට සිරුරු පින්තාරු කර ගැනීම දෙපිරිසම සිදුකර ගනිති. 
විවාහ මංගල්‍යයට පෙර මනාලියගේ දෑවැද්ද පරික්ෂා කරනු ලැබෙි. ඉග්බො ගෝත‍්‍රයේ මනාලයා මනාලියගේ පවුලෙන් දෙනු ලබන භාණ්ඩ ලැයිස්තුව කෙසේ හෝ රැගෙන ආ යුතුය. එය මිල අධික මොටෝ රියක් වැනි දෙයක් වීමටත් කිඹුලෙකුගේ දතක් වැනි සොයා ගැනීමට අසීරු දෙයක් වීමටත් ඉඩ ඇත. ඉල්ලන දේ දිය නොහැකි අයෙකුට එම පවුලෙන් විවාහයකට ඉඩක් නැත. 
ආගමික හා සමිප‍්‍රදායික යනුවෙන් මංගල උත්සව දෙකකි. ඒ සඳහා කෙරෙන්නේ විවෘත ආරාධනයකි. එනිසා අමුත්තන් ගණන නිශ්චිත නැත. 
මනාලියන් බටහිර පන්නයට සුදු ඇඳුමකින් සැරසීමෙි ප‍්‍රවනතාවක් දැක්වුවද බහුතරයේ කැමැත්ත දීප්තිමත් පැහැයෙන් යුත් ලේස් හැටිටය හා සිරුර වටා එතෙන දිගු සාය ඇඳ කොරල් අබරණ පැළඳීමයි. හිසද පාට සළුවකින් අලංකාර කෙරේ. මනාල යුවළම එකම පාටකින් සැරසීම විශේෂත්වයකි.
මංගල තෑගි ලෙස මනාලිය මතට මුදල් විසුරුවාලීම නයිජීරියාවේ චාරිත‍්‍රයකි. ඇය නටන විට ඇය වෙත විවිධ බිල්පත් විසිකිරීමද සිදුකෙරේ. 
නයිජීරියානුවන් අධ්‍යාපනය වෙත යොමුවීමත් සමග මේ බොහෝ සිරිත් සමාජයෙන් ඈත් වන බව පෙනේ. එහෙත් තවමත් එරට කාන්තාවන්ගෙන් අඩක් පමණ ශ‍්‍රම හමුදාවට එක්ව සිටිති. පාර්ලිමේන්තුවේ සියයට 7ක පමණ කාන්තා නියෝජනයක්ද දැකිය හැකිය. 
 
ඒ. ජී. දීපිකා පි‍්‍රයදර්ශනී

විසි හැවිරිදි මවක බිහි කළ නිවුන් දරු දෙදෙනකු හා බැඳුණු අනුවේදනීය සහ අසාමාන්‍ය පුවතක් නිසා මේ දිනවල ඉන්දියාවේ විශාල ආන්දෝලනයක් ඇති වී තිබේ. මෙම ආන්දෝලනයට පසුබිම් වී ඇත්තේ දිල්ලියේ පිහිටි මැක්ස් නැමැති පෞද්ගලික රෝහලක සිදු වූ සිදුවීමකි.
ඉන්දීය මාධ්‍ය හරහා වාර්තා වන අන්දමට පසුගිය 30 වෙනි දින වර්ෂා නැමැති මෙම තරුණ මව ඉහත කී රෝහ‍ලේදී නිවුන් දරුවන් දෙදෙනකු බිහි කර තිබේ.  නමුත් එම දරු දෙදෙනා මියගිය බව වෛද්‍යවරු වර්ෂාටත්, ඇගේ සැමියා වන අශීෂ්ටත් පසුව දැනුම් දී ඇත. ඒ අනුව දරුවන් දෙදෙනාගේ සිරුරු ප්ලාස්ටික් ආවරණයක දමා ඔවුන්ට භාරදීමට රෝහල කටයුතු කර ඇති බව සඳහන් වේ. මහත් සිත් කම්පාවට පත් වූ මව්පියන් දෙදෙනාට වෙන කරන්නට දෙයක් නොවූයෙන් ඔවුහු දරු දෙදෙනාගේ සිරුරු ආදාහනය කිරීමට තීරණය කළහ.  ඒ අනුව පවු‍ලේ උදවිය දරුවන්ගේ සිරුරු දමා තිබූ ආවරණයද ගෙන ආදාහනාගාරයක් කරා ගමන් කරමින් සිටි අතර ඒ අවස්ථාවේ සිදුවී ඇත්තේ කිසිසේත් බලා‍පොරොත්තු නොවිය හැකි ආකාරයේ සිදුවීමකි.  පවු‍ලේ අයෙකුට හදිසියේම ප්ලාස්ටික් ආවරණය තුළ යම් සෙලවීමක් දැකගන්නට ලැබි ඇත. වහාම ආවරණය විවර කර බලද්දී ඔවුන්ට දැකගන්නට ලැබි ඇත්තේ මියගිය බව පැවැසූ දරු දෙදෙනාගෙන් එක් අයෙකු තවමත් පණ පිටින් සිටින අන්දමයි. මෙයින් විස්මයට පත් අශීිෂ් ඇතුළු පිරිස වහාම ඒ අසල පිහිටි වෙනත් රෝහලකට දරුවන්ද සමග ගොස් ඇති අතර පණ පිටින් සිටි ඉහත කී දරුවා ඇතුළත් කරගෙන ප්‍රතිකාර ලබා දීමට එම රෝහල පියවර ගෙන තිබේ. 
බලා‍පොරොත්තු විය හැකි ආකාරයෙන්ම දැන් ඉන්දියාව තුළ මහත් ආන්දෝලනයක් ඇති කිරීමට මෙම සිද්ධිය සමත්ව ඇත.  මේ සම්බන්ධයෙන් සම්පූර්ණ 
පරීක්ෂණයක් කිරීමට අදාළ රෝහල කටයුතු කර ඇති අතර සිදුවීමට සම්බන්ධ වෛද්‍යවරුන් දෙදෙනකු නිවාඩු යැවීමටද ඔවුන් පියවර ගෙන ඇති බව අනාවරණය වෙයි. මේ සම්බන්ධයෙන්, දරු දෙදෙනාගේ පියා  වන 26 හැවිරිදි අශීෂ් ‍පොලීිසියට ද පැමිණිල්ලක් ගොනු කර ඇති බව මාධ්‍ය වාර්තා කර තිබිණි.
ඔහු සඳහන් කර ඇති අන්දමට නොවැම්බර් 27 වෙනි දින වර්ෂා හදිසියේම දැඩි වේදනාකාරී තත්ත්වයකට පත්ව ඇති අතර ඒ අනුව ඇය මුලින්ම ගෙනගොස් ඇත්තේ අසල පිහිටි වෙනත් සාත්තු නිවාසයක් වෙතය. මැක්ස් රෝහල වෙත ඇය යොමු කර ඇත්තේ  එහිදී ඇය පරීක්ෂා කරන ලද වෛද්‍යවරුන්  විසිනි. මැක්ස් රෝහ‍ලේ දී ඔවුන්ට දැනගන්නට ලැබි ඇත්තේ කුස තුළ නිවුන් දරු දෙදෙනකු සිටින බවයි. එමෙන්ම ඔවුන් ජීවත් වීමට ඇති ඉඩ ඉතා අඩු බවද, එය සියයට 10-15ක ප්‍රතිශතයක් බවද වෛද්‍යවරුන් පවසා ඇතැයි සඳහන් වේ. ඒ වනවිට දරු ගැබට සම්පූර්ණ වී තිබි ඇත්තේ මාස හයකට ආසන්න කාලයක් පමණක් වීමද මෙයට බලපාන්නට ඇත. දරුවන් ජීවත් වීමට ඇති ඉඩ වැඩි කිරීම සඳහා ඉන්දියානු රුපියල් 35,000 ක් වන එන්නත් තුනක් ලබා දීමට නිර්දේශ කළ බවද අශීෂ් පවසා ඇත. මෙම එන්නත් ලබා දීමෙන් පසු දරුවන් ජීවත් වීමේ අවස්ථාව සියයට 30ක ප්‍රතිශතයක් දක්වා වැඩි වූ බව ද රෝහලෙන් දැනුම් දී තිබේ. 
කෙසේ හෝ වේවා නොවැම්බර් 29 වෙනි දින රාත්‍රියේ වර්ෂාගෙන් රුධිර වහනයක් සිදුවීමට පටන්ගෙන ඇති හෙයින් ශල්‍යකර්මයක් කළ යුතුව ඇති බව දැනුම් දී ඇතැයි පැවැසේ. එයින් අනතුරුව 30 වෙනි දින උදයේ වර්ෂා ඇගේ පළමු දරුවා ප්‍රසූත කර ඇත. ඔහු මියගොස් සිට නැති බව පැවසෙන අතර ඊට මඳ වේලාවකට පසු බිහි කළ දෙවැනි දරුවා (දියණිය) උපත ලබද්දීම මියගොස් සිට ඇතැයි වාර්තා වෙයි. පළමු දරුවා ද ඒ වනවිට සිටි අනතුරුදායක තත්ත්වයෙන් ගොඩ එන තුරු රැක ගැනීමේ ප්‍රතිකාර කටයුතු සඳහා තවත් ඉන්දියානු රුපියල් ලක්ෂ 50ක මුදලක් වැය වනු ඇතැයි රෝහල සඳහන් කළ බවද අශීෂ් පවසා තිබේ. පවු‍ලේ අය මේ ගැන සාකච්ඡා කරමින් සිටින අතර  එදින දහවල් වනවිට රෝහලෙන් දැනුම් දී ඇත්තේ පළමු දරුවාද මිය ගිය බවයි. දරුවන් දෙදෙනාගේ සිරුරු ප්ලාස්ටික් ආවරණයක බහා පවු‍ලේ උදවියට භාර දී ඇත්තේ එයින් අනතුරුවය.
ආදාහනාගාරය වෙත යමින් සිටින අතරතුර, පළමු දරුවා මියගොස් නැති බව දැනගැනීමෙන් පසු එම දරුවා  ඒ අසල පිහිටි වෙනත් රෝහලකට ඇතුළත් කළ පවු‍ලේ පිරිස අනතුරුව, ඒ වනවිට මියගොස් සිටි බව තහවුරු කර තිබූ, දෙවැනි දියණියගේ සිරුර ආදාහනය කිරීමට කටයුතු කර ඇත.
මේ වනවිට මෙම සිද්ධිය පිළිබඳ ‍පොලිස් පරීක්ෂණයක්ද ආරම්භ කර ඇති අතර සිද්ධියට අදාළ වෛද්‍ය වාර්තා ආදිය සිය භාරයට ගැනීමට ඔවුන් ක්‍රියා කර ඇත. මේ අතර වර්ෂාට ලබා දුන් ඉන්දියානු රුපියල් 35,000 ක් වූ බව සඳහන් එන්නත් ද අත්‍යවශ්‍යම වූ ඒවා ද යන්න සම්බන්ධයෙන්ද සොයා බලන බව ඔවුන් සඳහන් කර තිබේ. මේ පිළිබඳව කෙරෙන පරීක්ෂණවලින් පසු අවශ්‍ය වුවහොත් රෝහ‍ලේ බලපත්‍රය අවලංගු කිරීමට වුවද පියවර ගන්නා බව දිල්ලි බලධාරීන්ගේ පාර්ශ්වයෙන් ප්‍රකාශ වී ඇත.
 
කිත්සිරි මල්වත්ත
IMAGE

මගේ ගීත ගායනා කරන්න එපා වික්ටර්ගෙන් පුතුන්ට නියෝගයක්

IMAGE 2017 Dec 17 11:32
නව පරපුරේ සංගීතවේදියකු වන ඉරාජ් වීරරත්න මීට මාස කිහිපයකට පෙර නිර්මාණය කළ දැණුනා නම්වූ...
Views - 54

රුපියල් දහසේ නෝට්ටු මවන භූතයෙක්

IMAGE 2017 Dec 17 10:13
නිවෙස්වලට කඩාවැදී ගෙහිමියන්ට වින පමුණුවන භූතයන් ගැන අපි කොතෙකුත් අසා ඇත්තෙමු. එහෙත්,...
Views - 136

ෆේස්බුක් එකෙන් ඔබේ හිතේ ලෙඩ ගැනත් කියන්න පුළුවන්

IMAGE 2017 Dec 15 10:42
ඔබටත් ෆේස්බුක් ගිණුමක් තිබෙනවාද? එසේ ගිණුමක් තිබෙනවා නම් ඔබ ඒ සඳහා දවසකට; සතියකට හෝ මාසයකට පැය...
Views - 2013

සුද්දන්ට උණවටුන එපා කරවන ඩිස්කෝ ඩාන්ස්

IMAGE 2017 Dec 14 07:56
ආචාර්ය ආතර් සී. ක්ලාක් විද්වතා පවසන ආකාරයට උණවටුන වෙරළ තීරය ලෝකයේ ඇති දර්ශනීය වෙරළ දොළහෙන්...
Views - 3435

ගැබිණි නිලධාරිනිය අධ්‍යක්ෂක හා 'හනිමූන්' ගිහින්

IMAGE 2017 Dec 13 10:33
ඔහු මෙරට ප්‍රමුඛතම සමාගමක අධ්‍යක්ෂ වරයෙකි. වයස අවුරුදු 40 ක් පමණ වන ඔහු දරු දෙදෙනෙකුගේ පියෙක්...
Views - 9282

2017 විශ්ව රූ රැජින ඩෙමී සහ අපේ ක‍්‍රිස්ටියානා

IMAGE 2017 Dec 13 10:17
ලෝක රූ රැජින තේරීමේ තරගයේ උණුසුම පහව යෑමටත් පෙර තවත් සුරූපිනියක් විශ්ව රූ රැජින ලෙස  කිරුළ...
Views - 4830

Please publish modules in offcanvas position.