Coss Ear2
lakbima.lk
COSS Ear 1

ඔහු අගනුවර ප්‍රසිද්ධ සමාගමක විධායක නිලධාරියෙකි. වයස අවුරුදු 40 ඉක්මවූ ඔහුට රූමත් බිරිඳක් සහ සුරතල් සිඟිති දියණිවරු දෙදෙනෙක් සිටිති. පසුගිය සති අන්තයක ඔහු කිසියම් රාජකාරී අවශ්‍යතාවක් සඳහා නගරාන්තර  බසයකින් මහනුවර යාමට පිටත් වුණි. බසයේ ඔහු සමීපයේ වාඩි වී සිටියේ අතිශය රූමත් කාන්තාවකි. බසය පෑලියගොඩ, කිරිබත්ගොඩ, කඩවත පසුකරත්ම කාන්සිය මකාගැනීම සඳහා ඔහු එම කාන්තාව සමඟ කතා බහකට එළඹිණි. එහිදී ඇය ද කිසිදු පැකිලීමකින් තොරව ඔහු හා කතා බහට පිවිසි අතර බසය ඉදිරි‍යට ඇදෙන වේගයෙන්ම ඔවුන්‍ දෙදෙනාගේ සුහදත්වයද වර්ධනය විය.  

තමන් කලක් ඕස්ට්‍රේලියාවේ ජීවත් වී සැමියාගේ නොපනත්කම් දරාගත නොහැකිව ඔහුගෙන් වෙන්වී ශ්‍රී ලංකාවට පැමිණ සිටින බවත් දැනට පදිංචිය මහනුවර ප්‍රදේශයේ පිහිටි තම මහගෙදර බවත් ඇය ඔහු හා කියා සිටියාය. එහිදී මෙම විධායක නිලධාරියාගේ සිත ඇගේ රූප සොබාව කෙරෙහි කොතරම් ඇදීගියේද යත් උපායශීලීව ඇය තමන් වෙතට නතු කර ගැනීමට ඔහු මාන බැලීය. එහිදී ඔහු ඒ සඳහා යොදාගත්තේ තමන් ද විවාහ වී දරු දෙදෙනෙකු සිටින මුත් බිරිඳගේ අකාරුණික කම මත තම යුග දිවියේ එතරම් තෘප්තියක් නැතැයි යන පට්ටපල් බොරුවය. එමෙන්ම තමන් සහ බිරිඳ අතර කායික සබඳතාද මේ වන විට මුළුමනින් ඇණහිට ඇතැයි ඔහු ඇයට කියා සිටියේ ඇගේ අනුකම්පාව දිනාගනු පිණිසය. බසය මාවනැල්ල, හිඟුල පසුකොට කන්ද උඩරටට සේන්දුවන විට මොවුන් දෙදෙනාගේ හිතවත් කමද කෙමෙන් ඉහළම තැනකට පත්වෙමින් තිබිණ.

"මම වයිෆ් ගෙන් දික්කසාද වෙලා ආවොත් ඔයා මට කැමති වෙනවද?"

බසය මහනුවරට ළංවන අතරේ ඔහු ඇගේ කනට මුව තබා ඇසීය.

"සත්තකින්ම"

ඇය ඔහුගේ අත්ල මත අත්ල තබමින් කීවාය.

කෙසේ හෝ ඇය ඔහුගෙන් මහනුවරදී සමුගත්තේ දින කිහිපයකින් යළි අගනුවර පැමිණ ඔහුට ඇමතුමක් දෙන බවට පොරොන්දු වෙමිනි. එමෙන්ම මහනුවර තම වැඩිහිටියන් සහ පවුලේ සාමාජිකයන් සමඟ වෙසෙන බැවින් ඒ දින කිහිපය තුළ දුරකතනයෙන් නිදහසේ කතා කළ නොහැකි බවද ඇය ඔහුට කියා සිටියාය. කෙසේ හෝ එදින සවස් යාමයේ ඔහු මහනුවර සිට යළි අගනුවර බලා පැමිණි අතර ඊට පසු සෙනසුරාදා ඔහුගේ නිවසේ දී ඔහුගේ බිරිඳ හිටිහැටියේ ඔහු වෙත කඩා පැන්නාය.

"ඔයා කාට හරි ගෑණියෙකුට කිව්වද මාව ඩිවෝස් කරලා ඒ ගෑණිව බඳිනව කියලා."

ඔහුගේ බිරිඳ හැපින්නක් මෙන් ඔහු වෙත කඩා පනිමින් ඇසුවාය.

"මොන පිස්සුද මම?"

නගරාන්තර බසයේ දී වූ සිදුවීම සැනින් සිහියට ආ මුත් ඔහු ඒ බවක් නොහඟවා බිරිඳගෙන් ප්‍රශ්න කළාය.

"බොරු විතරක් කියන්න එපා තේරුණාද?"

බිරිඳ ආවේශ වූ කළෙක මෙන් කෑ ගැසුවාය.

"මාත් එක්ක එකට ඉගෙන ගත්තු යා‍ළුවෙක් දන්න ගෑණුකෙනෙකුට ඔයා බස් එකකදි කියලා තියෙනවා. මම නපුරුයි, මගෙන් ඔයාට සතුටක් ලැබෙන්නේ නැහැ. ඒ හින්දා ඔයා මාව දික්කසාද කරලා ඒ ගෑණිව බඳිනවා කියලා. ඔයා දන්නවාද ඒ ගැණී ඔයා කියපු ඔක්කොම රෙකෝඩ් කරලා තියෙන බව."

බිරිඳගේ මෙම කතාව ඇසූ සැමියා අන්දුන් කුන්දුන් වූ අතර මේ වන විට මෙම ප්‍රවෘත්තිය බිරිඳගේ පාර්ශවයට සේම සැමියාගේ කාර්යාලයටද සැල වී ඇත. මෙම සිදුවීම පිටුපස කවුරුන් හෝ සැලසුම් කළ කිසියම් රහසිගත වැඩපිළිවෙලක් තිබේදැයි සෙවිය යුතු මුත් සමාජයට මුහුණ නොදී සැඟවෙනු මිස ඒ පිළිබඳව සිතීමටවත් දැන් ඔහුට මානසික නිදහසක් නැත. ඒ අද වන විට බිරිඳ තමන්ට සිදුකළ ලැජ්ජාව සහ අපකීර්තිය මුල්කොට දරු දෙදෙනාද සමඟ සිය මහගෙදර ගොස් ඇති බැවිනි.

දමයන්ති ගමගේ

 

 

පැරණි පෙම්වතියගෙන් අහිමි වූ ආදරය නැවත ඉල්ලා එය නොලැබුණු විට නාරාහේන්පිට ප්‍රදේශයේදී ඇයට ප්‍රසිද්ධියේ බිම පෙරළාගෙන පහර දී රන් මාලයක් කඩා ගත් බව කියන ශ්‍රී ලංකා ගුවන් හමුදාවේ නායක ගුවන් භටයකු පෙරේදා (21) සවස නාරාහේන්පිට ‍පොලීසිය විසින් අත්අඩංගුවට ගෙන තිබේ.

මෙසේ අත්අඩංගුවට පත්ව  ඇත්තේ  මකුල්දෙණිය, උතුරුවෙලගහතැන්න පදිංචි විසි අට හැවිරිදි තරුණයෙකි. මොහු ගුවන් හමුදාවේ බුද්ධි අංශයේ නායක ගුවන් භටයකු ලෙස සේවය කරන අයෙකු බව ‍පොලීසිය පවසයි.

මෙසේපහරකෑමට ලක්ව ඇත්තේ එම ප්‍රදේශයේම පදිංචි විසි එක් හැවිරිදි තරුණියකි. ඇය කොළඹ ප්‍රධාන පෙළේ පෞද්ගලික සමාගමක පෞද්ගලික ‍ලේකම්වරියක් ලෙස කටයුතු කරන තැනැත්තියකි.

මෙම තරුණයා හා තරුණිය වසර හතරක් පුරා පෙම්වතුන්ව සිට පසුව තරුණිය විසින් මීට මාස හතරකට පමණ ඉහතදී  ඇගේ තනි තීරණයක් මත සම්බන්ධතාව නවතා තිබේ. ඒ පිළිබඳ කනස්සල්ලෙන් සිටි තරුණයා නිතරම ඇගෙන් නැවත ආදරය ඉල්ලා කරදර කර ඇති බව ඇය ‍පොලීසියට පවසා ඇත.

පෙරේදා දින ඇය සේවය නිමවා ජයකොන්ත පටුමගේ පැමිණෙන විට මෙම තරුණයා බිමත්ව ඇය ඉදිරියට පැමිණ නැවත යහළු වන ලෙස පවසා තර්ජනය කර ඇත. ඇය ඊට විරුද්ධත්වය ප්‍රකාශ කිරීමත් සමඟ කෝපයට පත් තරුණයා ඇය එම ස්ථානයේදීම බිම පෙරළාගෙන ප්‍රසිද්ධියේ පහර දීමට පටන් ගෙන ඇති අතර අවට සිටි පිරිස් විසින් මේ පිළිබඳ නාරාහේන්පිට ‍පොලීසියට දන්වා ඇත.

එම අවස්ථාවේ නාරාහේන්පිට ‍පොලිස් ස්ථානාධිපති ප්‍රධාන ‍පොලිස් පරීක්ෂක ගයාන් ප්‍රසන්න මහතා ප්‍රමුඛ නිලධාරීන් කණ්ඩායමක් එම ස්ථානයට ගොස් තරුණයා අත්අඩංගුවට ගෙන තිබේ.  මෙහිදී තරුණිය ප්‍රකාශ කර ඇත්තේ ඇගේ රන් මාලයද ඔහු කඩා ගත් බවය. ඒ අනුව ඔහුව පරීක්ෂා කරන විට ඔහුගේ කලිසම් සාක්කුවේ තිබි එම මාලයද ‍පොලීසියට හමුව තිබේ.

අත්අඩංගුවට පත් තරුණයා කළුබෝවිල රෝහ‍ලේ අධිකරණ වෛද්‍ය නිලධාරීවරයා වෙත ඉදිරිපත් කිරීමෙන් පසු ඔහු බිමතින් සිටි බව තහවුරු වී තිබේ. සැකකාර තරුණයා ඊයේ (22) දින අධිකරණය වෙත ඉදිරිපත් කෙරුණි.

මේ සම්බන්ධයෙන් නාරාහේන්පිට ‍පොලීසිය වැඩිදුර පරීක්ෂණ සිදුකරනු ලබයි.

ශානිකා මාධවී පීරිස්

සනුක වික්‍රමසිංහ ගායනා කරන “සංසාර සිහිනේ” කලක පටන් බොහෝ ගීත දර්ශකවල පෙරමුණ ගෙන තිබෙන ජනප්‍රිය ගීතයකි. සනුකගේ හ¾ඩින් එය කොතෙකුත් රසවිඳ තිබුණද එම ගීතයේ පද රචනය කාගේද යන්න බොහෝ දෙනා නොදන්නා කාරණයකි. එහි පද රචිකාව වන උදාරි අමරතුංග ‘සංසාර සිහිනේ’ ඇය අතින් ලියැවුණු ආකාරය සහ ඇගේ අනෙකුත් ගීපද රචනා ගැන කතාබහ කිරීමට මෙලෙස සංවාදයට එක්වූවාය.

පද රචිකාව විදිහට මේ ගීතය වෙනුවෙන් ඔබටත් හොඳ ප්‍රතිචාර ලැබෙනවා ඇති නේද ?
ඇත්තටම ක්ෂේත්‍රයේ අයගෙන් වුණත් වෙනස් ගීතයක් කියලා හුඟක් හොඳ ප්‍රතිචාර ලැබුණා. බොහෝ දෙනා කිව්වා මේ ගීතය රැල්ලකට යන්නේ නැතුව කරපු නිර්මාණයක් කියලා.  මම සේවය කරන්නේ හොරණ තක්ෂිලා මහා විද්‍යාලයේ උසස් පෙළ තොරතුරු තාක්ෂණය උගන්වන ගුරුවරියක ලෙසයි.  මම උගන්වන දරුවෝ ටිකත් අපේ ටීචර් ලියපු ගීතයක්නේ කියලා බොහොම ආඩම්බරයෙන් ඒ ගැන කතා කරනවා.


සංසාර සිහිනේ ගීතයෙන් ඔබ මොන විදිහේ පණිවුඩයක්ද දෙන්න උත්සාහ කළේ?
අද තියෙන්නේ අද දැක්කා හෙට යාළු වුණා අනිද්දට අතහැරියා වගේ කෙටි ප්‍රේම සම්බන්ධතානේ. නමුත් සංසාර සිහිනෙන් කියවෙන්නේ දිගු කාලයක් තිස්සේ තේරුම් ගැනීම හරහා තමන්ගේ ආත්මයන් හඳුනාගෙන පවත්වාගෙන යන්නට හදන ආදර කතාවක් ගැනයි. ඒ වගේම ලිංගිකත්වයට විතරක් බර වෙන්නේ නැතුව හැම පැත්තෙන්ම විවාහ ජීවිතයකට සුදුසු අයුරින් දීර්ඝකාලීන බැඳීමක් ගෙනයාම ගැනත් සංසාර සිහිනේ ගීතයෙන් කියවෙනවා.

‘සංසාර සිහිනේ’ ගීතයට පාදක වුණේ ඔබේම අත්දැකීමක්ද?
නැහැ. ඒක මගේ මිතුරියකගේ අත්දැකීමක්. විශ්වවිද්‍යාලයේ ඉන්න කා‍ලේ දවසක් බස් එකෙන් ගෙදර එන අතරතුර මම ඒ මිතුරියගේ කතාව මට දැනුන විදිහට ටැබ් එකේ ටයිප් කරමින් ආවා. එදා මගේ හිතට ආපු ඒ වචන ටික තමයි අද ලංකාවේ ජනප්‍රියම ගීතයක් බවට පත්වෙලා තියෙන්නේ.

සංසාර සිහිනේට පෙරත් ඔබ අතින් ගීත ලියැවී තිබෙනවා නේද?
ඔව්. මම ගීත හුඟක් ලියලා තියෙනවා. ඒත් තවම ඒවා ගීත විදිහට එළිදැක්වුණේ සනුකගේ හ¾ඩින් විතරයි. මගේ පළවෙනි ගීත රචනය වන “ඔබ දකින්න බැහැ” කියන ගීතයත් ජනතාව අතරට ගෙනිච්ච්ෙ සනුක. ඒ වගේම විශේෂයෙන් කියන්න ඕනේ ‘සංසාර සිහිනය’ කියන ගීතය තේමා කරගෙන ලියන නවකතාවක පරිච්ජේද කිහිපයක්ම මම මේ වනවිටත් අවසන් කරලා තියෙනවා. මේ කතාව සම්පූර්ණ කරලා මගේ ප්‍රථම නවකතාව විදිහට එළිදක්වන්නත් මම බලා‍පොරොත්තුවෙන් ඉන්නවා.

ඔබේ ගීතවල සාර්ථකත්වය ගැන කියන්න ඔබට විශේෂ කාරණයකුත් තිබෙනවා?
ඔව්. හුඟක් අය කියනවා අද කා‍ලේ ගීතයක් ජනප්‍රිය කර ගන්න විෂුවල් ඕනෑමයි කියලා. ඒත් මම කියලා සනුකගේ හඬින් ගැයුණු ගීත දෙකටම විෂුවල් නැහැ. ඒත් ඒ ගීත දෙකම ගීත ලෝලීන් හුඟක් ආදරයෙන් වැලඳ ගත්තා. මම නම් හිතන්නේ ගීතයකට මුලින්ම විෂුවල් එකක් නිර්මාණය කරලා මේකයි විෂුවල් එක කියලා එළියට දාන්නේ නැතුව යම් ගීතයක් ජනප්‍රිය වෙනවා නම් ඒක තමයි මම දකින විදිහට සාර්ථකම ගීත රචනාව.

නමුත් අද කා‍ලේ හැටියට මියුසික් වීඩියෝවක් නැතුව ගීතයක් ජනප්‍රිය කර ගැනීම තරමක් දුරට අභියෝගයක් නේද ?
අද මිනිස්සු ගොඩාක් කාර්යබහුල නිසා බොහෝ දෙනා ක්ෂණික දේවල්වලට තමයි හුරු වෙලා ඉන්නේ. මිනිස්සු යාන්ත්‍රික වෙලා නිසා ඔවුන් ඉක්මනට විෂුවල් වලට ඇදිලා යනවා. සමහර විට ගීතයෙන් කියවෙන්නේ මොනවගේ අර්ථයක්ද, විෂුවල් එක ගීතයේ පද රචනයට ගැළපෙනවද කියලා වත් දන්නේ නැහැ. නමුත් ඇත්තටම සංසාර සිහිනේ ජනප්‍රිය වෙන්නේත් ඒකට විෂුවල් එකක් නැති හින්දමයි. මොකද රසිකයෝ මේ ගීතයෙන් කියවෙන්නේ මොකක්ද කියලා පුළුල්ව හිතන්න පටන් ගත්තා.

භාෂාව පිළිබඳ කිසිදු හැදෑරීමක් නොමැතිව ගීත ලියනවා කියන චෝදනාව නව පරපුරේ බොහෝ ගී පද රචක රචිකාවන්ට එල්ලවෙනවා. ඒ චෝදනාව ඔබ දකින්නේ මොන විදිහටද?
මම නම් හිතන්නේ හොද ගීත ලියන්න නම් හොඳට කියවලා තියෙන්නත් ඕනෑ කියලයි. මගේ භාෂා භාවිතයට මට ලැබුණ හොඳම ශක්තිය තමයි ‍පොත් කියවීම. අපිට හොඳ ගීතයක් රචනා කරන්නට නම් භාෂාව ගැන වෙනමම හැදෑරීමක් කිරීම අවශ්‍ය නැහැ. නමුත් භාෂාව ගැන යම් පරාසයක අවබෝධයක් තිබිම හරිම වටිනවා.


සමන්මලී නැලිගම

වේදිකාව, පුංචිතිරය සහ සිනමාව යන මාධ්‍ය ත්‍රිත්වයෙහිම සිය ප්‍රතිභාව ප්‍රකට කළ කලාකරුවකුවන රොඩ්නි වර්ණකුල සිය 'සාරංගා නැවෙන් ඇවිත්'  නමැති වේදිකා නාට්‍යය නව නිෂ්පාදනයක් ලෙස  නැවතත්  නාට්‍යලෝලීන් වෙත තිළිණ කිරීමට සූදානම් වෙයි. මෙහි දැක්වෙන්නේ එම වේදිකා නාට්‍යය සහ ඔහුගේ අනෙකුත් කලා කටයුතු මෙන්ම ‍පොදුවේ නාට්‍ය කලාව පිළිබඳ රොඩ්නි සමග කළ සංවාදයකි.


සාරංගා නැවෙන් ඇවිත් නම් වූ ඔබේ වේදිකා නාට්‍යය නව නිෂ්පාදනයක් ලෙස නැවතත් වේදිකාවට රැගෙන ඒමට මේ දිනවල ඔබ සූදානම් වෙනවා. ඇයි  ඔබ එම වේදිකා නාට්‍යය නැවතත් ප්‍රේක්ෂකයන්ට තිළිණ කිරීමට තීරණය කළේ?


 'සාරංගා නැවෙන් ඇවිත්' කියන්නේ කාලයක් ඉතා සාර්ථක ලෙස වේදිකා ගත වූ වේදිකා නාට්‍යයක්. එහි රඟපෑ ඇන්ටන් ජූඩ්ගේ වියෝවත් එක්ක මීට වසර අටකට කලින් එය රඟ දැක්වීම නතර කරන්න සිද්ධ වුණා. ඒ වනවිට එහි දර්ශන 200ක් වේදිකා ගත කරලා තිබුණා. 'සාරංගා නැවෙන් ඇවිත්' කියන්නේ නැටුම් සහ ගැයුම් ඇතුළත් ප්‍රසාංගික නාට්‍යයක්.  පිරිහීගෙන යන රසවින්දනය ගැනයි ඒ වේදිකා නාට්‍යයෙන් කතා බහ කෙරෙන්නේ. ඉතින් මට හිතුණා එහි තිබෙන  ප්‍රසාංගික බව සහ තේමාවේ තිබෙන කාලීන බව නිසා අදටත් ඊට හොඳ ප්‍රතිචාර ලැබේවි කියලා.


නව නිෂ්පාදනය අලුත් රංගන ශිල්පීන් සහ ශිල්පිනියන් එක්කාසු කරගෙන වේදිකාවට ගේන්නද ඔබ බලා‍පොරොත්තුවෙන් ඉන්නේ?

මිහිර සිරිතිලක මේ වේදිකා නාට්‍යයට අලුතෙන් එකතුවෙනවා. ඒ හැරණාම  පැරණි නළු නිළි පිරිසම තමයි මෙය රංගනයේ යෙදෙන්නේ.


ඒ වගේම ඔබ මේ දිනවල තවත් භාරදුර කටයුත්තකට සූදානම් වන බව ආරංචියි?
ඔව්. ඒ තමයි මගේ කලාදිවියට වසර 37ක් සපිරිම  නිමිති කරගෙන පැවැත්වීමට සූදානම්වන '3 ෆේස්' නමැති සංගීත ප්‍රසංගය  මැයි 18 වැනිදා කොළඹ බණ්ඩාරනායක ජාත්‍යන්තර සම්මන්ත්‍රණ ශාලාවේදී එය පැවැත්වෙන්නේ. කුමාර තිරිමාදුර සහ සමන් ලෙනින් එදාට මා සමග ගීත ගයනවා. මේ දිනවල මගේ වැඩි කාලයක් ගත වෙන්නේ ඒ ප්‍රසංගයේ පුහුණුවීම් කටයුතුවලට තමයි.


 ඒ සමග ඔබ තවත් වේදිකා නාට්‍ය කිහිපයකටත් දායක වෙනවා?
ඔව් දයානන්ද ගුණවර්ධනගේ 'මධුර ජවනිකා' සහ  'නරි බෑනා' වේදිකා නාට්‍යවලටත්, ආනන්ද අතුකෝරලගේ 'හොරු හොඳයි' සහ 'ජයලාල් රෝහණගේ 'ගොන්ඩෝලා' කියන නාට්‍යවලටත් සුපුරුදු පරිදි රංගනයෙන් දායකවෙනවා.
ත හාස්‍ය නාට්‍ය රැල්ලක් ඇවිත් අද වෙද්දි වේදිකාව ගිලගෙන තිබෙන බව ඇතැමුන් පවසනවා?
හුඟාක් අය අද අහන්නේ අපට නරඹලා හිනාවෙන්න පුළුවන් වේදිකා නාට්‍යය  මොනවාද තියෙන්නේ කියලයි. මේ නිසා ඒ ඉල්ලීම  සපුරන්න අද කා‍ලේ බොහොම ළඳ බොළඳ බාල මට්ටමේ වේදිකා නාට්‍ය  බිහිවෙනවා. ඇත්තටම  සිනහව සහ හාස්‍යය කියන්නේ දෙකක්. හාසේ‍යාත්පාදක  නිර්මාණයකින් ගැඹුරින් යථාර්ථය නිරූපනය කරන්න පුළුවන්. ඒත් අද බිහිවෙලා තියෙන බොළඳ   සිනහ නාට්‍ය රැල්ලෙන් නම් නාට්‍ය කලාවට යහපතක් වෙන්නේ නැහැ.

නාට්‍ය කලාවේ උන්නතියට ලැබෙන අනුග්‍රහය අදවන විට යහපත් මට්ටමකද තිබෙන්නේ?
නාට්‍ය කලාවට විතරක් ‍නෙවෙයි සාහිත්‍යය, චිත්‍ර, මූර්ති ආදී කිසිදු කලාවකට  දේශපාලනඥයන්ගෙන් විශේෂ සැලකිල්ලක් ලැබෙන්නේ නැහැ.  ඉතින් ඒ කාගේවත් හව්හරණක් නැතිවයි අද නාට්‍ය කරුවනුත් නාට්‍ය කලාවේ නිරත වෙලා ඉන්නේ. නාට්‍ය කලාව වෙනුවෙන් තිබෙන  උණ නිසා තමයි අපි පෞද්ගලිකව ඉතා සුළු පිරිසකගෙන් ලැබෙන සහයෝගය මත තවමත් නාට්‍ය කලාවේ  නියැළී සිටින්නේ.

ඔය අතරේ නාට්‍ය කලාවට සෘජුවම සම්බන්ධ පිරිසක් වන නාට්‍ය සංවිධායකවරු ගැනත් විවිධ විවේචන එල්ල වෙනවා නේද?
 ඔව්. නාට්‍ය සංවිධායකවරු ඉතා හොඳින් තමන්ගේ කටයුතු කරගෙන  ගිය කාලයක් තිබුණා.  නමුත් අද වෙද්දී ඒ සමහරු තමන්ගේ නමින් එක දිගටම රංගශාලා වෙන්කරවා ගැනීම වැනි අසාධාරණ කටයුතුවල යෙදෙනවා. ඇත්තටම අද නාට්‍ය සංවිධායකවරු මුදල් පස්සේ යන කළු කඩ මුදලාලිලා බවට පත්වෙලා කියලා කීවොත් වඩාත් නිවැරදියි.

“සිරස ජූනියර් සුපර් ස්ටාර්..” තරගය ගැන මුලින්ම අප ඔබගෙන් විමසන්න කැමතියි..
ඇත්තෙන්ම “සිරස ජූනියර් සුපර් ස්ටාර්.”  විනිසුරුවරයෙකු ලෙස කටයුතු කිරීම ඉතාම වගකීම් සහිත කටයුත්තක්. එහි තරග වදින්නේ වයස 12 - 18 අතර ළමයි . ඒක සංක්‍රාන්ති වයස. ඒ වයසේදී සිතන පතන විදිය වෙනස්. ටිකක් ආවේගශීලීව හිතන ක්ෂණික තීරණ ගන්න වයසක්. ඒ වගේ අයත් එක්ක ගනුදෙනු කරන එක බොහෝම කල්පනාවෙන් කරන්න ඕන. අපේ එක වචනයකින් ඒ අයගේ ජීවිතේට තදබල බලපෑමක් ඇති කරන්න පුළුවනි. ඒ වගේම මේක තරගයක් බවත් අපට අමතක කරන්න බෑ.. දක්ෂයන් ඉදිරියට යවන්න අනෙක් අය ඉවත් කරන්න අනිවාර්යයෙන්ම සිදුවනවා.  ඔන්න ඔය අන්ත දෙක ගැන හිතලා තමයි කටයුතු කරන්න වෙන්නේ..

ඒ විදියට කටයුතු කරද්දී ගොඩක් සංවේදි වු අවස්ථා ඇති..
  එහෙම අවස්ථා තියෙනවා. ඒත් විනිසුරුවරුයෙකු විදියට එහෙම සංවේදි වෙලා බැහැ. ඒ වගේ වෙලාවට පෞද්ගලිකව කළහැකි දෙයක් තියෙනවා නම් එම යුතුකම ඉටු කරනවා.

මේ වන විටත් ප්‍රදීප් ඒ වගේ කටයුත්තකට අතගහලා නේද .. ?
ඔව්.. “නිපුන” කියලා වයස 15 ක විතර දරුවෙක් මේ තරගයේදී මට මුණගැහුනා. ඒ ළමයට ගායන කුසලතා තියෙනවා. ඒත් ඊට වඩා දක්ෂ අය ඉදිරියට යද්දි ඒ ළමයට
අවසන් 48 දෙනාගෙන් නතරවන්න සිදුවුණා. ඒ දරුවා “එස්, ඕ. එස්. ළමා ගම්මානයේ තමන්ගේ නංගි එක්ක ජීවත්වන ළමයෙක්. එයාගේ පසුබිම මත මම එයාට ගීතයක් නිර්මාණය කරලා දෙන්න තීරණය කළා. මේ දවස්වල ඒ ගීතය නිර්මාණය වනවා. ගීතය වීඩියෝවක් සමග ඉදිරියේදි මාධ්‍යයට ඉදිරිපත් කරන්න බලා‍පොරොත්තු වනවා. මම හිතන්නේ හේෂානුත් ඒ දරුවට නොමි‍ලේ සංගීතය උගන්නන්න ඉදිරිපත්වුණා.

“ජූනියර් සුපර්ස්ටාර්ස්” ලා ටිකක් දඩබ්බර වයසක ඉන්න අය.. ඒ අය හිතුවක්කාරකන් කරපු අවස්ථා .. විනිශ්චයට විරෝධතා එල්ලකල අවස්ථා නැද්ද .. ?
නැහැ.. ඇත්තටම ඒ ළමයි හරි ශක්තිමත් විදියට ජය පරාජය පිළිගත්තා.

ඇතැම් තරගකරුවන් මතුවු අවස්ථා තියෙනවා.. විනිසුරුවන් ඒ අයට
විශේෂත්වයක් දක්වන බවට සමහරු චෝදනා නගනවා..
කවුරුන් හෝ ඒ විදියට මතුවුනානන් ඒක ඒ අයගේ දක්ෂතා මත වූ දෙයක්. ඒ වගෙ අවස්ථාවල අපිත් ඊට සුදුසු ප්‍රතිචාර දක්වන්නට ඇති. නමුත් කිසිම දවසක අපි කිසිම තරගකරුවකුට හෝ තරග කාරියකට විශේෂත්වයක් දක්වලා නැහැ..

පසුගිය කාලයම ප්‍රදීප් ගතක‍ලේ “ජූනියර් සුපර්ස්ටාර්ස්” ලා සමග. ඒ අයගේ දස්කම් ගැන ඔබට මේ වනවිට වැටහීමක් තියෙනවා.. කිරුළු දිනාගන්නා කෙනා ගැන මේ වනවිට යම් චිත්‍රයක් ප්‍රදීප් තුළ ඇති
 නැහැ.. තරගය පුරා දස්කම් පෙන්වු කෙනෙක් හිටිහැටියේ යම් අසනීප තත්ත්වයක් මත හෝ පෞද්ගලික හේතුවක් මත එක් වටයකදී අවම දස්කම් පෙන්වුවත් විනිශ්චයේදී පූර්ව දක්ෂතා ගැන හිතල බලනවා. ඒත් අවසන් වටයේදි එහෙම කරන්න බෑ.. එහිදී ජය පරාජය හිමිවන්නේ එදා පෙන්වන දක්ෂතා මත.  ඒ හින්දා දැනට අවසානය කරා ඇවිත් ඉන්න අය අතරින් කවුරු ජය ගනීද කියල මට නම් මේ මොහොතේ කියන්න බැහැ.

ප්‍රදීප්ගේ සංගීත ජීවිතයේ නවතම තොරතුරු මොනවාද.. ?
මේ දවස්වල මම ගායනා කල “ඔබගෙන් තරම්” ගීතයට හොඳ ප්‍රේක්ෂක ප්‍රතිචාර තියෙනවා. ඒ වගේම සිරිස ටීවි තුළින් විකාශය වන “දිග්විජය” ටෙලි නාට්‍යයේ තේමා ගීතයටත් ගායනයෙන් එක්වුණා. ඔය අතරේ අලුත් ගීතයක් කරන්නත් සූදානම් වනවා. මේ වසර මැදදී මගේ  එම නවතම ගීතය රසිකයන්ට තිළිණ කරන්න බලා‍පොරොත්තුවෙන් ඉන්නවා.

වෘත්තිමය තොරතුරු කතා කලොත් .. ?
මම දැනට බලංගොඩ මාරතැන්න රෝහ‍ලේ කටයුතු කරනවා. මේ වනවිට මම තමයි එහි ආයතනභාර වෛද්‍ය නිළධාරී විදියට කටයුතු කරන්නේ .. වෘත්තියේ යෙදෙන අතර කාලය කළමනාකරණය කරගෙන තමයි සංගීත කටයුතුවල යෙදෙන්නේ ..

කොහොමද පෞද්ගලික තොරතුරු .. ?
බොහොම සතුටින් ගෙවිල යනවා.. මගේ බිරිඳ මගේ ළඟම ඉඳගෙන මගේ සියලු කටයුතුවලට සහයෝගය දෙනවා. ඇත්තටම  ඇය රැකියාවක් නොකර ගෘහණියක් විදියට ඉන්න හින්දා තමයි මට මේ විදියට මගේ කටයුතු සාර්ථකව කරගෙන යන්න හැකිවෙලා තියෙන්නේ.

දෙන්නගේ කැදැල්ලට පුංචි අමුත්තෙක් එන්නේ කවදාද.. ?
ඉදිරියේදී ඒ බලා‍පොරොත්තුව ඉෂ්ට වේවි ..

ආරියවංශ කුලතිලක

මිනිසා තිරිසනුන් වන අවස්ථාත් තිරිසනා මිනිසුන් වන අවස්ථාත් අපට බොහෝ විට දක්නට ලැබුණද තිරිසනාගේ කුසගින්න නිවන්නට දිවා රෑ නොබලා වෙහෙසෙනා හා තමා උපයන ධනයෙන් කොටසක් ඒ සඳහා වැයකොට එම සතුන් වෙතම ගොස් ඔවුන්ගේ කුසගින්න නිවන ඉතාම දුර්ලභගනයේ පින්වතෙක් පසුගියදා අපට හමුවිය.
ඔහු නමින් ජී.ඩී. සෝමවීර ජයනන්ද වන අතර ඔහුගේ ලිපිනය වන්නේ කිරිමැටියාන බෝත‍ලේගමයි.
වසර කීපයක්ම ඉතාලියේ රැකියාවේ නිරතව සිටි ජයනන්ද මහතා වසර කීපයකට වතාවක් දිවයිනට පැමිණ තම බිරිඳ හා දරුවන්ගේ දුකසැප වෙනුවෙන් වෙහෙසුණද ඔහුගේ සියලුම බලා‍පොරොත්තු සුන්ව ගියේ ඔහුගේ ආදරණීය බිරිඳ රෝගාතුරව හදිසියේ දිවියෙන් සමුගැන්මෙන් පසුවයි.
මියගිය බිරිඳ වෙනුවෙන් පින් රැස් කිරීමට වෙහෙසුණු ඔහුගේ යටිසිත පවසා ඇත්තේ තම මියගිය බිරිඳ වෙනුවෙන් අසරණ සතුන්ගේ කුසගින්න නිවීමට ප්‍රමුඛතාවක් දියයුතු බවකි. මිනිසාටත් වඩා තිරිසනා උසස් කොට සලකන ජයනන්ද මහතා පවසන්නේ කුසගින්නට යමක් ඉල්ලා ගන්නටවත් බුද්ධි ශක්තියක් නොමැති තිරිසණාගේ කුසගින්න නිවන්නට බුද්ධියෙන් පරිපූර්ණ මිනිසා දක්වන අලසකම තමාගේ හදවතට වේදනාවක්ව ඇති බවකි.
ඉතාලියේ සේවයේ නිරතව සිටියදීද අසරණ සතුන්ගෙ කුසගින්න නිවාලනුවස් පැස්තා හා පරළු පාන් එක්රැස්කොට ඉතාලියේ කතානියා නගරයේ යම් ස්ථානයකට ගොස් දහස් ගණනක් පරවියන්ගේ කුසගින්න නිවූ ඔහු තම ගම් ප්‍රදේශයේ අයා‍ලේ යන කාත් කවුරුවත් නැති අසරණ සුනඛයින්ගේ කුසගින්න නිවාලීමට දැන් හුරුපුරුදුව සිටී. දිනකට සහල් කිලෝ 8ක පමණ බත් උයා ඊටම සරිලන වෑංජනයක්ද සූදානම් කර ගන්නා ඔහු දිනපතාම උදේ හවස කිරිමැටියාන තුලාවල කොස්වත්ත හා යක්දෙස්සාව යන ප්‍රදේශ කරා තම යතුරුපැදියෙන් යන්නේ එය තම සුපුරුදු රැකියාවක් ලෙසයි.
දද, කුෂ්ඨ රෝගපීඩාවලින් අන්ත අසරණ වී සිටින සුනඛයන්ගේ ගැලවුම්කරුවකු ලෙස උන් වෙනුවෙන් මුළු දවස ගෙවන මේ පින්වතා උන්ට බේත්හේත් හා බිස්කට් යනාදියද රැගෙනයාම සුපුරුදු දසුනක්ව ඇත.
තම ආදරණීය බිරිඳ වන ජී.ඩී. විනීතා අයිරාංගනී මහත්මියගේ අකල් මරණය සිදුවූ දින සිට තමා ජීවත්ව සිටිනතාක් කාලයක් මේ අපූරු පුණ්‍ය ක්‍රියාවේ යෙදීමට අදිටන් කරගෙන සිටින ජයනන්ද මහතා පැමිණෙන තෙක් සුනඛයන් 60ක පමණ පිරිසක් මගබලා සිටින බව ඔහු මාධ්‍යයට කීවේ හදපිරි සතුටිනි.
අනේ මට බඩගිනියි. කන්න යමක් දෙන්නැයි, කටින් කතා කළ නොහැකි තිරිසන් සතුනගේ කුසගින්න නිවන්නට කටින් කතා කළ හැකි අපේ මිනිසුන්ට නොහැකි මන්දැයි ප්‍රශ්න කරන ජයනන්ද මහතාගේ මේ අපූරු සත්ක්‍රියාවේ වැරදි හොයන තිරිසන් ගණයේ මිනිසුන්ද සිටින බවත් ඔවුනට මිනිසා දෙවියකු යන කියමන අමතක වී ඇති බවත් ඔහු අවසන් වරටත් අප සමග කීය.

ජෝන් ඇන්ටනී - වෙන්නප්පුව

 

Page 1 of 70

 

IMAGE

බසයේදී දුන් බොරු විවාහ පොරොන්දුවෙන් පවුල්ජීවිතේ 'හබක්'

IMAGE 2018 Feb 23 12:25
ඔහු අගනුවර ප්‍රසිද්ධ සමාගමක විධායක නිලධාරියෙකි. වයස අවුරුදු 40 ඉක්මවූ ඔහුට රූමත් බිරිඳක් සහ...
Views - 4007

අහිමි පෙම ඉල්ලා පෙම්වතියට ප්‍රසිද්ධියේ ගුටි ඇනලා

IMAGE 2018 Feb 23 10:42
පැරණි පෙම්වතියගෙන් අහිමි වූ ආදරය නැවත ඉල්ලා එය නොලැබුණු විට නාරාහේන්පිට ප්‍රදේශයේදී ඇයට...
Views - 2651

සංසාර සිහිනයේ ගී සංකල්පනය මම 'ටැබ් එකේ ටයිප් කරපු' එකක්

IMAGE 2018 Feb 21 12:00
සනුක වික්‍රමසිංහ ගායනා කරන “සංසාර සිහිනේ” කලක පටන් බොහෝ ගීත දර්ශකවල පෙරමුණ ගෙන තිබෙන...
Views - 3728

මම නාට්‍ය කලාවෙ ඉන්නේ ඒ ගැන තියන 'උණ' නිසයි

IMAGE 2018 Feb 21 11:53
වේදිකාව, පුංචිතිරය සහ සිනමාව යන මාධ්‍ය ත්‍රිත්වයෙහිම සිය ප්‍රතිභාව ප්‍රකට කළ කලාකරුවකුවන...
Views - 2242

බිරිඳ රැකියාවක් නොකිරීම මගේ සාර්ථකවයට හේතුවක්

IMAGE 2018 Feb 20 14:38
“සිරස ජූනියර් සුපර් ස්ටාර්..” තරගය ගැන මුලින්ම අප ඔබගෙන් විමසන්න කැමතියි.. ඇත්තෙන්ම “සිරස...
Views - 7445

බිරිඳට පින් තකා සුනඛයන්ට දිනපතා සහල් කිලෝ 08ක දනක්

IMAGE 2018 Feb 20 14:23
මිනිසා තිරිසනුන් වන අවස්ථාත් තිරිසනා මිනිසුන් වන අවස්ථාත් අපට බොහෝ විට දක්නට ලැබුණද...
Views - 4596

Please publish modules in offcanvas position.